Deuteronomi

10 “Unai nega ai Iehova be lau dekenai ia gwau, ‘Oi ese nadi palaka rua oi utua, ginigunadia bamona,+ bona lau dekenai ororo ataiai oi daekau mai. Danu, oi sibona ese au amo maua ta oi karaia. 2 Bona guna oi makohia nadi palaka ginigunadia ai idia noho herevadia be unai nadi ai do lau torea, bona maua lalonai oi atoa be namo.’ 3 Bena lau ese akasia au amo maua ta lau karaia bona nadi palaka rua lau utua, ginigunadia bamona, bona nadi palaka rua lau dogoatao bona ororo dekenai lau daekau lao.+ 4 Vadaeni ia ese nadi palakadia ai guna ia torea herevadia,+ Taravatu 10* unai,+ ia torea lou, guna ororo ai umui hebou dinana ai+ Iehova be lahi amo umui dekenai unai hereva ia gwauraia.+ Bena Iehova ese unai nadi palakadia be lau dekenai ia henia. 5 Bena ororo amo lau diho+ bona unai nadi palakadia be lau karaia maua lalonai lau udaia, unuseni idia noho, Iehova ese lau ia oda henia hegeregerena.

6 “Bena Israela taudia be Beroto Bene-iakana idia rakatania bona Mosera dekenai idia lao. Unuseniai Arona ia mase bona idia guria,+ bona iena natuna Eleasara ese iena gabu ai hahelaga gaukarana ia karaia matamaia.+ 7 Unuseni amo Gudugoda dekenai idia lao, bona Gudugoda amo Iotobata dekenai idia lao,+ unai tano ai ranu momo ia aru.

8 “Unai nega ai Iehova ese Levi iduhu ia abia hidi+ Iehova ena Taravatu Maua do idia huaia,+ bona Iehova ena vairanai do idia gini ia idia hesiai henia totona, bona iena ladanai taunimanima do idia hanamoa,+ bona unai bamona idia karaia ema bona hari. 9 Unai dainai Levi be ahuna idia henia lasi ena tadikakadia ida. Iehova be iena ahuna, Iehova emui Dirava ese ia hamaoroa hegeregerena.+ 10 Lau sibona be ororo ai dina 40 bona hanuaboi 40 lau noho,+ nega ginigunana ai lau karaia bamona, bona unai nega ai danu Iehova be egu hereva ia kamonai.+ Iehova be ia ura lasi umui ia hadikaia ore. 11 Bena Iehova be lau dekenai ia gwau, ‘Oi hegaegae bona taunimanima oi hakaua inai gabu umui rakatania totona, unai amo do idia vareai bona idia dekenai do lau henia tano, edia sene taudia dekenai lau gwauhamatalaia tano unai, do idia abia.’+

12 “Israela taudia e, Iehova be umui amo dahaka ia noia noho?+ Gauna be inai: Iehova emui Dirava do umui gari henia,+ iena dala ibounai dekenai do umui raka,+ ia do umui lalokau henia, Iehova emui Dirava do umui hesiai henia mai emui kudouna ibounai bona mauri* ibounai ida,+ 13 bona emui namo totona Iehova ena oda herevadia bona taravatu, hari dina umui dekenai lau gwauraia gaudia unai, do umui badinaia.+ 14 Itaia, guba be Iehova emui Dirava ena, guba bona ena atai herea momokani gabudia danu, bona tanobada bona ia lalonai idia noho gaudia ibounai danu.+ 15 To, Iehova be emui sene taudia sibona edia kahirakahira ia lao bona ena lalokau ia hahedinaraia, bona ia ese taunimanima ibounai amo umui ia abia hidi, emui sene taudia edia natudia unai,+ bona hari dina umui be iena. 16 Vadaeni, namona be hari emui kudouna umui hagoevaia+ bona umui kwara auka noho lasi.+ 17 Badina Iehova emui Dirava be dirava ibounai edia Dirava+ bona lohiabada ibounai edia Lohiabada, ia be Dirava badana, mai ena goada bona taunimanima ese idia gari henia bona matauraia be namo, ta ena toana ia laloa lasi+ bona ta ese ena lalona ia veria diba lasi, taunimanima ese laloani moni amo diadi taudia edia lalona idia veria bamona. 18 Ia ese tamana lasi natuna* bona vabu dekenai hahemaoro goevana ia hahedinaraia,+ bona idau tano tauna ia lalokau henia,+ ia dekenai aniani bona dabua ia henia. 19 Umui danu ese idau tano tauna umui lalokau henia be namo, badina guna Aigupito tanona ai umui be idau tano taudia bamona umui noho.+

20 “Namona be Iehova emui Dirava umui gari henia, ia umui hesiai henia,+ ia umui badinaia momokani, bona iena ladana dekenai gwauhamata umui karaia. 21 Ia sibona umui hanamoa.+ Ia be emui Dirava, ia ese umui totona hoa kara badadia ibounai ia karaia, bona unai umui itaia.+ 22 Emui sene taudia be Aigupito dekenai idia lao neganai, idia ibounai be 70,+ bona hari Iehova emui Dirava ese emui namba ia habadaia, guba ena hisiu edia momo hegeregerena.+