Deuteronomi

12 “Emui sene taudia edia Dirava, Iehova, ese umui noholaia totona umui dekenai do ia henia tano ai, namona be emui mauri dinadia ibounai lalonai inai taravatu bona hahemaoro herevadia do umui badinaia namonamo. 2 Namona be do umui lulua besedia edia dirava tomadiho henia gabudia ibounai do umui hadikaia ore,+ herevana unai be ororo badadia eiava maragidia edia ataiai eiava au namodia edia henunai. 3 Namona be edia boubou patadia umui hadikaia, edia nadi du helagadia umui hamakohia,+ edia au helagadia* be lahi dekenai umui gabua, bona imana amo idia karaia diravadia umui utua,+ unai amo edia ladana be unai gabu amo do umui kokia momokani.+

4 “Namo lasi idia karaia dalana ai Iehova emui Dirava umui tomadiho henia.+ 5 To, emui iduhu ibounai huanai Iehova emui Dirava ese ena ladana bona do ia noho gabuna ia abia hidi gabuna dekenai umui lao, bona unuseniai ia umui tomadiho henia.+ 6 Unuseniai umui ese emui gabua bouboudia,+ emui boubou gaudia, emui aniani kahana 10 ena kahana ta,+ umui henia gau ma haida,+ emui gwauhamata bouboudia, emui harihari bouboudia,+ bona emui boromakau bona mamoe edia vara guna natudia do umui mailaia.+ 7 Umui bona emui ruma bese taudia be unuseniai do umui aniani, Iehova emui Dirava vairanai,+ bona emui gaukara ibounai dainai do umui moale,+ badina Iehova emui Dirava ese umui ia hanamoa.

8 “Hari ita be iniseniai sibona iseda ura ita badinaia noho, to namo lasi unai bamona umui karaia, 9 badina Iehova emui Dirava ese umui dekenai ia henia laga-ani gabuna bona tano dekenai umui do vareai lasi.+ 10 Ioridane umui hanaia+ bona Iehova emui Dirava ese umui dekenai ia henia tano dekenai umui vareai neganai, ia ese emui inai taudia ibounai amo umui dekenai laga-ani do ia henia, bona do umui noho namo.+ 11 Umui lau oda henia gaudia ibounai do umui mailaia. Iehova emui Dirava ese ena ladana ia noho totona ia abia hidi gabuna dekenai do umui mailaia gaudia be inai:+ Emui gabua bouboudia, emui boubou gaudia, emui aniani kahana 10 ena kahana ta,+ umui henia gau ma haida, bona Iehova dekenai umui gwauhamatalaia boubou gaudia ibounai. 12 Umui be Iehova emui Dirava vairanai do umui moale,+ umui bona emui natudia memero bona kekeni, bona emui igui hesiai tatau bona hahine, bona emui siti lalodiai idia noho Levi taudia, badina idia be umui ida ahuna idia abia lasi.+ 13 Umui naria namonamo, namo lasi umui itaia gabudia ta ai emui gabua bouboudia umui henia.+ 14 Iehova ese emui iduhu edia huanai ia abia hidi gabuna sibona dekenai emui gabua bouboudia umui henia be namo, bona unuseniai lau oda henia gaudia ibounai do umui karaia.+

15 “Vamu umui ura ania neganai, animal ta umui hamasea bona ania diba,+ bona vamu momo herea umui ania diba, emui siti ibounai lalonai Iehova emui Dirava ese umui dekenai ia henia hegeregerena. Ia goeva lasi tauna bona ia goeva tauna ese idia ania diba, dia umui ania hegeregerena. 16 To namo lasi rara umui ania.+ Unai rara be ranu bamona tano dekenai umui bubua be namo.+ 17 Umui ese gau haida be emui siti lalodiai do umui ania eiava inua lasi, hegeregere emui witi, emui wain matamata, bona emui oela, edia kahana 10 ena kahana ta unai, bona emui boromakau bona mamoe edia vara guna natuna,+ umui gwauhamatalaia boubou gaudia, emui harihari bouboudia eiava umui henia gau ma haida danu. 18 Iehova emui Dirava ese ia abia hidi gabuna dekenai unai gaudia be umui, emui natudia memero bona kekeni, emui igui hesiai tatau bona hahine, bona emui siti lalodiai idia noho Levi taudia ese do umui ania, Iehova emui Dirava vairanai.+ Bona emui gaukara ibounai dainai, Iehova emui Dirava vairanai do umui moale. 19 Umui naria namonamo, namo lasi Levi taudia umui laloaboio,+ emui tano ai umui noho dinadia ibounai lalonai.

20 “Iehova emui Dirava ese emui tano ia habadaia neganai,+ umui ia gwauhamata henia hegeregerena,+ bona bema umui ura vamu umui ania, vadaeni emui ura hegeregerena vamu umui ania diba.+ 21 Bema Iehova emui Dirava ese ena ladana ia noho totona ia abia hidi gabuna be ia daudau,+ vadaeni Iehova ese umui dekenai ia henia boromakau eiava mamoe haida umui hamasea be namo, umui lau oda henia hegeregerena. Bona emui siti lalodiai unai vamu umui ania diba, umui ura ania negadiai. 22 Unai vamu do umui ania, dia umui ania hegeregerena,+ ia goeva lasi tauna bona ia goeva tauna ese idia ania diba. 23 To emui lalona umui hadaia momokani rara do umui ania lasi,+ badina rara be mauri,+ bona bema vamu be mai ena rara, namo lasi unai vamu umui ania. 24 Namo lasi rara umui ania. Rara be ranu bamona tano dekenai umui bubua be namo.+ 25 Namo lasi rara umui ania, unai amo umui bona emui bese taudia do umui noho namo, badina umui be Iehova ena vairanai kara maorona umui karaia noho. 26 Namona be emui harihari gaudia helagadia bona emui gwauhamata bouboudia umui abia, bona Iehova ese ia abia hidi gabuna dekenai umui mailaia. 27 Unuseniai emui gabua bouboudia, hidio bona rara unai, be Iehova emui Dirava ena boubou patana latanai do umui bouboulaia.+ Bona emui boubou gaudia ma haida edia rara be Iehova emui Dirava ena boubou patana badinai do umui bubua,+ to edia hidio do umui ania.

28 “Namona be umui dekenai lau henia oda hereva ibounai do umui badinaia namonamo, unai amo umui bona emui bese taudia do umui noho namo, badina umui be Iehova emui Dirava ena matanai kara namo bona kara maorona umui karaia noho.

29 “Do umui abia tano ena bese taudia be Iehova emui Dirava ese do ia hadikaia ore bona umui be edia tano dekenai do umui noho.+ 30 To umui naria namonamo, namo lasi edia kara umui tohotohoa. Namo lasi edia dirava dainai umui henanadai, umui gwau, ‘Inai bese be edena dala ai edia dirava idauidau idia hesiai henia? Lau danu be unai bamona do lau karaia.’+ 31 Namo lasi Iehova emui Dirava be unai dala ai umui tomadiho henia, badina idia ese edia dirava idia tomadiho henidia lalonai, Iehova ia inai henia kara dika rohoroho ibounai idia karaia. Edia dirava dekenai edia natudia memero bona kekeni be lahi dekenai idia gabudia danu.+ 32 Umui dekenai lau henia oda hereva ibounai do umui badinaia namonamo.+ Namo lasi unai hereva dekenai hereva ma ta umui atoa kau eiava umui kokia.+