Deuteronomi

2 “Bena ita giroa bona Davara Kakakaka ena dala amo taunimanima lasi gabuna amo ita lao, Iehova ese lau ia hamaoroa hegeregerena,+ bona Seiri Ororo ia noho gabuna dekenai dina momo ita raka. 2 Bena Iehova be lau dekenai ia gwau, 3 ‘Umui be inai ororo ia noho gabuna ai nega daudau umui loaloa vadaeni. Hari, not kahana dekenai umui lao. 4 Bona taunimanima dekenai inai oda hereva oi henia: “Umui be emui tadikaka, Esau ena bese taudia unai, edia tano ena boda amo do umui hanaia,+ idia be Seiri dekenai idia noho.+ Bona idia be umui dekenai do idia gari,+ to namona be umui naria namonamo. 5 Namo lasi idia umui tuari henia,* badina lau ese edia tano ta be umui dekenai do lau henia lasi, oibe, tano ena kahana maragina ta danu be umui do lau henia lasi, badina Seiri Ororo be Esau dekenai lau henia vadaeni.+ 6 Namona be do umui ania aniani totona idia dekenai moni umui henia, bona do umui inua ranu totona idia dekenai davana umui henia.+ 7 Iehova emui Dirava ese umui karaia gaudia ibounai lalonai umui ia hanamoa. Umui be inai taunimanima lasi gabuna dekenai umui loaloa neganai, umui ia naria namonamo. Inai lagani 40 lalonai Iehova emui Dirava be umui ida, bona gau ta dekenai umui dabu lasi.”’+ 8 Vadaeni iseda tadikaka, Esau ena bese taudia,+ Seiri tano idia noholaia taudia unai, ita hanaia, to Arabaha dalana, Elata bona Esiono-gebere kahirakahira ita lao lasi.+

“Bena ita giroa bona Moaba ena taunimanima lasi gabuna ena dala amo ita lao.+ 9 Bena Iehova be lau dekenai ia gwau: ‘Namo lasi Moaba taudia oi habadua eiava idia oi tuari henia, lau ese edia tano ta be oi dekenai do lau henia lasi oi abia totona, badina lau ese Are be Lota ena bese taudia dekenai lau henia vadaeni.+ 10 (Guna Emima taudia+ be unuseniai idia noho, idia be taunimanima latadia bona goadadia bona idia be momo herea, Anakima taudia bamona. 11 Repaima taudia+ be Anakima taudia bamona danu,+ bona Moaba taudia ese idia gwauraidia Emima. 12 Guna, Hori taudia+ be Seiri ai idia noho, to Esau ena bese taudia ese idia luludia bona idia hadikadia ore bona edia gabu idia abia,+ unai hegeregerena Israela taudia be idia abia tanona dekenai unai bamona do idia karaia, Iehova ese unai tano be idia dekenai do ia henia.) 13 Vadaeni umui lao bona Seredi Koura umui hanaia.’ Bena Seredi Koura ita hanaia lao.+ 14 Kadesi-baranea amo ita raka ela bona Seredi Kourana ita hanaia ena daudau be lagani 38, unai nega lalonai iseda huanai idia noho tuari tatau ibounai idia mase ore, Iehova ese idia dekenai ia gwauhamata hegeregerena.+ 15 Iehova ena siahu ia gaukaralaia, iseda huana amo idia ia hadikaia totona ela bona idia ibounai idia mase ore.+

16 “Unai tuari tatau ibounai be taunimanima huana amo idia mase ore neganai,+ 17 Iehova be lau dekenai ma ia gwau, 18 ‘Hari dina oi be Moaba tano, Are, amo do oi hanaia lao. 19 Amono taudia kahirakahira oi mai neganai, namo lasi idia oi kara auka henia eiava idia oi habadua, badina lau ese inai tano ta be oi dekenai do lau henia lasi, badina unai tano be Lota ena bese taudia dekenai lau henia vadaeni.+ 20 Guna unai tano be Repaima taudia edia tano.+ (Repaima taudia be guna unuseniai idia noho, bona Amono taudia ese idia gwauraidia Samusumima. 21 Idia be momo herea bona taunimanima latadia bona goadadia, Anakima taudia bamona.+ To Iehova ese idia be Amono taudia vairanai ia hadikadia ore, bona Amono taudia ese idia luludia bona edia gabu idia abia. 22 Ia ese Esau ena bese taudia, Seiri+ ai idia noho taudia totona unai bamona ia karaia danu. Ia ese edia vairana amo Hori taudia+ ia halusia, unai amo Esau ena bese taudia ese idia luludia bona edia gabu idia abia bona idia noholaia ema bona hari. 23 Bona Avima taudia be edia hanua idia karaia ela bona Gasa+ dekenai, to Kapo* amo idia mai Kapitorima taudia+ ese idia halusia bona edia gabu idia abia.)

24 “‘Umui toreisi, bona Aranona Koura umui hanaia.+ Bona kamonai, lau ese emui imana dekenai Amoro tauna, Sihona+ lau henia, ia be Hesebona ena king. Vadaeni ia umui tuari henia, bona iena tano umui abia. 25 Emui sivarai idia kamonai taudia, guba henunai idia noho taudia ibounai unai, edia latanai hari dina gari do lau mailaia. Idia be umui dainai do idia gari bada bona do idia heudeheude.’+

26 “Bena lau ese Kedemoto+ ena taunimanima lasi gabuna amo Hesebona ena king Sihona dekenai gwaukau taudia lau siaia, bona inai maino herevadia idia gwauraia,+ 27 ‘Mani emu tano lau hanaia lao. Dala badana sibona dekenai do lau raka bona idiba eiava lauri kahana dekenai do lau lao lasi.+ 28 Lau dekenai oi hoihoilaia aniani sibona do lau ania bona oi hoihoilaia ranu sibona do lau inua. To mani emu tano dekenai lau raka hanaia. 29 Unai be Esau ena bese taudia Seiri ai, bona Moaba taudia Are ai ese lau idia durua dalana. Bona do ai lao ela bona Ioridane ai hanaia bona Iehova emai Dirava ese ai dekenai ia henia tanona dekenai ai ginidae.’ 30 To Hesebona ena king Sihona ese gwaumaoro ia henia lasi ita hanaia totona, badina ia ese ena lalona ia ha-aukaia bona Iehova emui Dirava ese unai ia koua lasi,+ ia ese King Sihona be iseda imana dekenai ia atoa totona, bona hari dina unai bamona ia karaia.+

31 “Bena Iehova be lau dekenai ia gwau, ‘Kamonai, lau ese Sihona bona ena tano be oi dekenai lau henia vadaeni. Oi lao bona ena tano oi abia.’+ 32 Sihona bona ena taunimanima ibounai be ita tuari henia totona Iahasa dekenai idia mai neganai,+ 33 Iehova iseda Dirava ese ia be ita dekenai ia henia, vadaeni ita ese ia, ena natudia memero, bona ena taunimanima ibounai ita halusia. 34 Ita ese ena siti ibounai ita abia bona ita hadikaia ore, edia tatau, hahine, bona natudia danu. Ta ia roho mauri lasi.+ 35 Ita ese ita hadikaia siti lalonai idia noho animal ibounai ita abia bona edia kohu danu ita abia. 36 Aroere,+ ia be Aranona Koura ena isena ai ia noho siti (koura lalonai ia noho siti danu), ela bona Gileada, idia ibounai ita abia. Iehova iseda Dirava ese idia ibounai be ita dekenai ia henia.+ 37 To, Amono taudia edia tano,+ Iaboka Koura ena sinavai ibounai+ bona ororo gabudia idia noho siti, eiava Iehova iseda Dirava ese ia taravatua gabudia ma haida dekenai umui lao lasi.