Samuela Ginigunana

6 Iehova ena Taravatu Maua+ be Filistia tanona ai hua 7 ia noho. 2 Vadaeni Filistia taudia ese hahelaga taudia bona vaira nega idia gwauraia taudia idia boiria+ bona idia nanadaidia: “Iehova ena Taravatu Maua dekenai dahaka do ita karaia? Ai umui hadibaia, edena bamona unai maua be ena gabu korikorina dekenai ita siaia giroa diba.” 3 Idia haere: “Bema Iehova, Israela ena Dirava, ena Taravatu Maua umui siaia giroa, namona be boubou gauna ta ida umui siaia giroa. Oibe, namona be ia dekenai kerere boubouna umui henia.+ Bena do umui namo lou, bona ia ese umui ia panisia noho ena badina do umui diba.” 4 Bena Filistia taudia idia henanadai: “Ia dekenai dahaka kerere boubou do ai siaia?” Idia gwau: “Filistia edia lohia taudia edia namba hegeregerena,+ umui ese iohururu* 5 bona bita 5, golo amo umui karaia gaudia unai, umui siaia lao, badina unai dika tamona ese umui bona emui lohia taudia ia hahisia. 5 Namona be umui ese emui iohururu edia laulau bona emui tano idia hadikaia bita edia laulau umui koroa,+ bona Israela ena Dirava umui hanamoa. Reana ia ese umui, emui dirava, bona emui tano do ia panisia lou lasi.+ 6 Dahaka dainai emui kudouna umui ha-aukaia, Aigupito taudia bona Farao ese edia kudouna idia ha-aukaia hegeregerena?+ Ia ese idia ia hahisia bada neganai,+ idia ese Israela taudia idia siaia lao.+ 7 Vadaeni treila matamatana bona boromakau sinadia rua umui hegaegaelaia, unai boromakau latanai nega ta huaia auna idia atoa lasi. Bena unai boromakau be treila dekenai umui kwatudia, to edia natudia be boromakau edia noho gabuna dekenai umui abia giroa lou. 8 Bona Iehova ena Maua umui abia bona treila latanai umui atoa, bona kerere boubouna bamona do umui siaia golo gaudia be maua ta lalonai umui udaia bona Maua badinai umui atoa.+ Bena boromakau umui siaidia lao 9 bona do umui raraia. Bema Maua be Bete-semese+ ena dala amo ia daekau lao, ena gabu korikorina dekenai, vadaeni Israela taudia edia Dirava ese ita dekenai inai dika bada ia havaraia. To bema lasi, do ita diba ia ese ita ia panisia lasi, to inai dika be idia vara kava.”

10 Bena taunimanima ese unai sisiba idia badinaia. Idia ese boromakau sinadia rua idia abia bona treila dekenai idia kwatudia, bona boromakau natudia be edia noho gabuna dekenai idia koudia. 11 Bena Iehova ena Maua be treila latanai idia atoa, golo bita bona iohururu edia laulau ena maua danu. 12 Bona boromakau be Bete-semese ia lao henia dalana dekenai maoromaoro idia lao.+ Idia be dala badana dekenai sibona idia raka mai regerege ida, idiba eiava lauri kahana dekenai idia lao lasi. Bona Filistia lohia taudia be edia murinai idia raka ela bona Bete-semese ena tano hetoana ai. 13 Bete-semese taudia be koura ai witi idia gogoa noho. Idia roha-isi bona Maua idia itaia neganai, idia moale dikadika. 14 Treila be Bete-semese tauna Iosua ena tano sisina ia noho gabuna dekenai ia lao, bona unuseni ia noho nadi badana ta badinai ia doko. Vadaeni idia ese treila ena au idia siria, bona boromakau be gabua boubou bamona Iehova dekenai idia henia.+

15 Levi taudia+ ese Iehova ena Maua idia kokia bona nadi badana latanai idia atoa, bona unai ida idia siaia mauana danu, ia lalonai be golo gaudia idia noho. Bena unai dina ai Bete-semese taudia+ ese gabua bouboudia bona boubou gaudia ma haida be Iehova dekenai idia henia.

16 Filistia ena lohia taudia 5 ese unai idia itaia neganai, idia be unai dina ai Ekarona dekenai idia giroa lou. 17 Filistia taudia ese Iehova totona golo iohururu laulaudia 5 idia siaia, kerere boubou bamona.+ Idia be inai hanuadia totona idia siaia: Ta be Asadoda+ ena, ta be Gasa ena, ta be Asakelona ena, ta be Gata+ ena, bona ta be Ekarona+ ena. 18 Bona golo bita be Filistia taudia edia lohia taudia 5 edia siti, magu lalonai idia noho siti bona magu lasi hanuadia unai, edia namba hegeregerena.

Bona Bete-semese tauna Iosua ena tano sisina ia noho gabuna dekenai, Iehova ena Maua idia atoa kau nadi badana be hamomokania gauna bamona ema bona hari. 19 To Dirava ese Bete-semese taudia ia hamasedia, badina idia ese Iehova ena Maua idia itaia. Ia ese taunimanima 50,070 ia hamasedia, bona taunimanima idia taitai matamaia badina Iehova ese idia momo herea ia hamasea.+ 20 Vadaeni Bete-semese taudia idia henanadai: “Daika ia hegeregere inai helaga Diravana,+ Iehova, ena vairanai ia gini? Ia be ita ia rakatania bona ma haida dekenai ia lao diba, a?”+ 21 Bena Kiriata-iearimi taudia+ dekenai gwaukau taudia idia siaia lao, idia gwau: “Filistia taudia ese Iehova ena Maua idia abia giroa mai vadaeni. Umui diho mai bona abia lao.”+