Samuela Iharuana

5 Vadaeni Israela ena iduhu ibounai be Davida dekenai idia mai, Heberona ai,+ bona idia gwau: “Itaia, ai be emu rara tamona taudia.+ 2 Guna Saulo be emai king neganai, oi ese tuari dekenai Israela taudia oi gunalaia.+ Bona Iehova be oi dekenai ia gwau: ‘Oi ese egu taunimanima, Israela taudia unai, do oi naria bona edia hakaua tauna ai do oi lao.’”+ 3 Vadaeni Israela ena tau badadia ibounai be king dekenai idia mai, Heberona ai, bona unuseniai King Davida be idia ida gwauhamata ta ia karaia,+ Iehova vairanai. Bena idia ese Davida idia horoa bona ia be Israela ena king ai ia lao.+

4 Davida ena mauri lagani be 30 neganai, ia be king ai ia lao bona lagani 40 ia lohia.+ 5 Heberona ai ia be lagani 7 bona hua 6 lalonai Iuda ia lohiaia, bona Ierusalema+ ai ia be lagani 33 lalonai Israela ibounai bona Iuda ia lohiaia. 6 Bona king bona ena tatau be Ierusalema dekenai idia lao, unai tano ai idia noho Iebusu taudia tuari henia totona.+ Davida idia hevasehalaia, idia gwau: “Oi be iniseni oi vareai diba lasi! Matakepulu taudia bona aena dika taudia danu ese oi do idia lulua.” Idia laloa, ‘Davida be iniseni do ia vareai diba lasi.’+ 7 To Davida ese Siona ena siti mai magu aukana ia abia, gabeai ena ladana idia hatoa Davida Ena Siti.+ 8 Vadaeni unai dina ai Davida ia gwau: “Iebusu taudia do idia tuari henia taudia be ranu totona idia geia matudia amo do idia lao, ‘aena dika taudia bona matakepulu taudia,’ Davida idia inai henia taudia unai, tuari henidia totona!” Unai dainai idia gwau: “Matakepulu taudia bona aena dika taudia be ruma lalonai idia vareai diba lasi.” 9 Bena Davida be siti mai magu aukana dekenai ia noho matamaia, bona unai siti ena ladana idia hatoa Davida Ena Siti, bona Davida ese Ororo*+ bona siti ena gabu ma haida dekenai magu bona ruma ia haginia matamaia.+ 10 Vadaeni Davida ena siahu be ia bada ia lao,+ bona tuari oreana edia Dirava Iehova be ia ida.+

11 Turo ena king Hirama+ ese Davida dekenai gwaukau taudia ia siaia, bona sida audia,+ kapenta taudia, bona nadi koroa taudia ia siaia danu, bona idia ese Davida ena ruma idia haginia matamaia.+ 12 Davida ia diba Iehova ese Israela ai ia be king ai ia halaoa+ bona ena basileia ia hanamoa bada,+ Iena taunimanima Israela taudia dainai.+

13 Davida be Heberona ia rakatania bona Ierusalema dekenai ia mai murinai, ia ese hahine ma haida ia adavaia+ bona Davida amo natudia memero bona kekeni ma haida idia vara.+ 14 Ierusalema ai ia amo idia vara natudia edia ladadia be inai: Samua, Sobaba, Natana,+ Solomona,+ 15 Ibihara, Elisua, Nepega, Iapia, 16 Elisama, Eliada, bona Elipelete.

17 Filistia taudia idia kamonai, Davida be idia horoa Israela ena king ai ia lao totona,+ vadaeni Filistia taudia ibounai idia daekau lao Davida idia tahua totona.+ Davida be unai ia kamonai neganai, hunia gabuna ta dekenai ia diho lao.+ 18 Bena Filistia taudia idia vareai bona Repaima Kourana dekenai idia raka loaloa.+ 19 Davida ese Iehova ia nanadaia:+ “Filistia taudia tuari henidia totona do lau lao, a? Oi ese idia be egu imana dekenai do oi atoa, a?” Unai neganai Iehova be Davida dekenai ia gwau: “Oi daekau lao, badina lau ese momokani Filistia taudia be emu imana dekenai do lau atoa.”+ 20 Vadaeni Davida be Bala-perasimi dekenai ia lao, bona unuseniai ia ese idia ia alaia mase. Bena ia gwau: “Iehova be egu vairanai ia lao, ia aru haraga ranuna bamona, bona egu inai taudia ia hadikaia ore.”+ Unai dainai unai gabu ena ladana ia hatoa Bala-perasimi.*+ 21 Filistia taudia ese edia kaivakuku be unuseni idia rakatanidia bona Davida bona ena tatau ese idia huaia lao bona idia hadikadia ore.

22 Gabeai Filistia taudia idia daekau lao lou bona Repaima Kourana dekenai idia raka loaloa.+ 23 Davida ese Iehova ia nanadaia, to Ia gwau: “Idia dekenai oi lao maoromaoro lasi. To edia murina kahana amo oi lao, unai amo baka audia vairanai idia oi tuari henia. 24 Baka audia edia ataiai amo edia aena regena oi kamonai neganai, namona be oi haraga, badina lau, Iehova, be oi vairanai do lau lao Filistia tuari taudia lau alaia mase totona.” 25 Vadaeni Davida be Iehova ese ia oda henia hegeregerena ia kara, bona Filistia taudia ia aladia mase,+ Geba+ amo ela bona Gesere dekenai.+