Hahemaoro Taudia

3 Iehova ese inai bese taudia ia rakatania idia noho totona, unai amo Kanana taudia ida idia do tuari lasi Israela taudia ibounai idia tohoa diba.+ 2 (Unai amo Israela taudia edia uru matamatadia idia tuari diba, idia be guna tuari lalonai idia vareai lasi.) 3 Unai tano dekenai idia noho besedia be inai, Filistia lohia taudia 5,+ bona Kanana taudia, Sidono taudia,+ bona Hivi taudia ibounai,+ idia be Lebanona Ororo+ amo ela bona Bala-heremona Ororo bona Lebo-hamata* ai idia noho.+ 4 Idia be Israela taudia tohoa totona idia noho, Israela taudia ese Iehova ena oda herevadia do idia badinaia eiava lasi, unai be guna Mose amo edia sene taudia dekenai ia henia.+ 5 Vadaeni Israela taudia be Kanana taudia,+ Hiti taudia, Amoro taudia, Perisi taudia, Hivi taudia, bona Iebusu taudia edia huanai idia noho. 6 Israela taudia ese unai bese taudia edia natudia kekeni idia adavaia, bona edia natudia kekeni be unai bese taudia edia natudia memero dekenai idia henia idia adavaia totona, bona idia ese edia dirava idia hesiai henia matamaia.+

7 Vadaeni Israela taudia be Iehova ena vairanai idia kara dika, bona Iehova edia Dirava idia laloaboio bona Bala diravadia+ bona au helagadia*+ idia hesiai henia noho. 8 Vadaeni Iehova ena badu mai siahuna be Israela taudia latanai ia diho, bona idia be Mesopotamia* ena king, Kusana-risataimi, dekenai idia ia hoihoilaia. Israela taudia be lagani 8 lalonai Kusana-risataimi idia hesiai henia. 9 Israela taudia be Iehova dekenai heduru totona idia boiboi neganai,+ Iehova ese idia totona hamauria tauna ta ia abia hidi,+ ia be Kenasa ena natuna Otoniele,+ Kenasa be Kaleba ena tadina. 10 Iehova ena lauma be Otoniele latanai ia diho,+ bona ia be Israela taudia edia hahemaoro tauna ai ia lao. Ia be tuari totona ia lao neganai, Iehova ese Mesopotamia* ena king, Kusana-risataimi, be ena imana dekenai ia atoa bona ia ese Kusana-risataimi ia halusia. 11 Unai murinai, tano be lagani 40 lalonai ia laga-ani.* Bena Kenasa ena natuna Otoniele ia mase.

12 Bona Israela taudia ese Iehova ena vairanai idia kara dika lou.+ Vadaeni Iehova ese Moaba+ ena king, Egalona, ia koua lasi Israela taudia ia halusia totona, badina Iehova ena vairanai idia kara dika. 13 Danu, ia ese Amono taudia+ bona Amaleka taudia+ ia mailaia Israela taudia idia tuari henia totona. Idia ese Israela taudia idia tuari henia bona pama audia idia noho siti idia abia.+ 14 Israela taudia be lagani 18 lalonai Moaba ena king, Egalona, idia hesiai henia.+ 15 Bena Israela taudia be Iehova dekenai heduru totona idia boiboi,+ vadaeni Iehova ese idia totona hamauria tauna ta ia abia hidi,+ ia be Gera ena natuna Ehuda,+ Beniamina iduhu+ amo bona ia be imana lauri tauna.+ Vadaeni Israela taudia be ia amo Moaba ena king, Egalona, dekenai harihari gaudia* idia siaia lao. 16 Ehuda be ia sibona totona tuari kaia mai ena matana rua ia karaia, ena lata be 1 kiubit,* bona ena dabua henunai ia kwatua, unai be ena mamuna idibana ai. 17 Bena ia ese Moaba ena king, Egalona, dekenai harihari gaudia ia henia. Egalona be tauanina bada herea tauna.

18 Ehuda ese harihari gaudia ia henia murinai, ia bona unai harihari gaudia idia huaia taudia idia lao. 19 To idia koroa kaivakuku idia noho gabuna, Gilegala dekenai idia ginidae murinai,+ ia sibona be king dekenai ia giroa lou, bona ia gwau: “King e, lau be mai egu hehuni hereva ta oi totona.” Vadaeni king ia gwau: “Ai umui rakatania!” Unai neganai ena hesiai taudia ibounai ese ia idia rakatania. 20 Vadaeni Ehuda be king dekenai ia lao, king be ena ataiai daiutu kerumana dekenai ia helai noho. Bena Ehuda be ia dekenai ia gwau: “Lau be oi totona Dirava ena hereva lau mailaia.” Vadaeni ena terona* amo ia toreisi. 21 Bena Ehuda ese ena imana laurina amo tuari kaia be ena mamuna idibana amo ia veria raka-lasi bona king ena bogana ia gwadaia. 22 Bona kaia mai ena hendol danu ia vareai bona digara ese kaia ia koua, bona kaia be ena bogana amo ia kokia diba lasi dainai, kukuri idia raka-lasi. 23 Ehuda ia raka-lasi, bena ataiai daiutu ena iduara ia koudia bona ia lokadia. 24 Gabu ia rakatania murinai, hesiai taudia idia giroa lou bona idia itaia ataiai daiutu ena iduara be idia loka. Vadaeni idia gwau: “Reana ia be lalona daiutu kerumana ena toileti ai ia noho.” 25 Idia naria daudau dainai idia laloa momo, to idia itaia ia ese ataiai daiutu ena iduara ia do kehodia lasi neganai, idia ese ki idia abia bona iduara idia kehodia bona idia itaia edia lohia be floa* dekenai ia hekure, ia mase vadaeni!

26 Idia metairametaira noho lalonai Ehuda ia heau boio, bona idia koroa kaivakuku idia noho gabuna ia hanaia+ bona Seira dekenai ia lao, dika ta ia davaria lasi. 27 Ia ginidae neganai, Eparaima ena ororo gabudia+ ai kibi ia hiriria,+ bona Israela taudia be ororo gabudia amo idia diho, bona ia ese idia ia gunalaia. 28 Bena idia dekenai ia gwau: “Lauegu murinai umui raka, badina Iehova ese emui inai taudia, Moaba taudia unai, be emui imana dekenai ia atoa vadaeni.” Bena ia murinai idia raka bona Moaba taudia amo Ioridane ena dobu lasi kahana idia abia, bona unuseni idia koudia bona ta ia hanaia lasi. 29 Unai nega ai idia ese Moaba taudia 10,000 bamona idia aladia mase,+ idia ibounai be tatau goadadia, bona idia ta ia heau boio lasi.+ 30 Unai dina ai Israela taudia ese Moaba taudia idia halusia, bona unai tano be lagani 80 lalonai ia laga-ani.*+

31 Ehuda murinai, Anata ena natuna Samiga+ ese Israela taudia ia hamauria, ia ese boromakau idia hakaua au, io bamona,+ amo Filistia tatau 600 ia alaia mase.+