Aposetolo Edia Kara

16 Vadaeni Paulo be Derebe dekenai ia ginidae bena Lusitera dekenai ia lao.+ Unuseniai hahediba tauna ta ladana Timoteo ia noho.+ Ia be abidadama Iuda hahinena ena natuna, to ena tamana be Grik tauna. 2 Lusitera bona Ikonio ai idia noho tadikaka idia gwau Timoteo be kara namo tauna. 3 Paulo ia gwau ia ura Timoteo be ia do ia bamoa, to Iuda taudia idia noho dainai, ia ese Timoteo ia abia bona ena kopina ia utua. Badina unai gabudia ai idia noho Iuda taudia ibounai+ idia diba ena tamana be Grik tauna. 4 Siti idauidau dekenai idia lao neganai, Ierusalema ai idia noho aposetolo taudia bona tau badadia ese idia abia hidi taravatu be tadikaka bona taihu dekenai idia hadibaia, unai amo inai taravatu idia badinaia diba.+ 5 Oibe, unai dainai kongrigeisen taudia edia abidadama ia goada ia lao bona dina ta ta ai edia namba ia bada daekau.

6 Danu, idia be Perigia bona Galatia dekenai idia lao,+ badina lauma helaga ese idia ia koua, Asia provinsi dekenai sivarai namona idia harorolaia lasi totona. 7 Bona Musia dekenai idia diho lao neganai, dala idia tahua Bitunia dekenai do idia lao,+ to Iesu ese lauma helaga amo idia ia koua. 8 Vadaeni Musia idia hanaia bona Troa dekenai idia diho lao. 9 Bona hanuaboi ai Paulo ia matahanai, ia itaia Makedonia tauna ta be unuseniai ia gini, Paulo ia noia, ia gwau: “Makedonia dekenai oi mai bona ai oi durua.” 10 Unai matahanai ia itaia murinai, dala ai karaia Makedonia dekenai ai lao totona, badina ai abia dae Dirava ese ai ia boiria idia dekenai sivarai namona do ai harorolaia.

11 Unai dainai bouti dekenai ai guia bona Troa amo maoromaoro ai lao Samotrake dekenai, to murina dinana ai Neapoli dekenai ai heau lao. 12 Bona unuseni amo Filipi dekenai ai lao.+ Filipi be Roma ese ia naria siti bona ia be Makedonia distrik ena siti badana. Unai siti ai dina haida ai noho. 13 Sabati dinana ai, siti amo ai raka-lasi bona sinavai dekenai ai lao. Ai laloa unuseniai guriguri gabuna ta ia noho, vadaeni ai helai bona unuseniai idia haboua hahine ai hereva henidia matamaia. 14 Bona pepol dabua ia hoihoilaia* hahine ta ladana Lidia ia noho. Ia be Tuatira siti amo,+ bona ia be Dirava tomadiho henia hahinena bona ai ia kamonai henia noho. Vadaeni Iehova* ese ena lalona* ia kehoa bona Paulo ia gwauraia herevadia ia abia dae. 15 Ia bona ena ruma taudia idia bapatiso neganai,+ ai ia noia goadagoada: “Bema umui laloa lau be Iehova* lau abidadama henia hahinena, mani umui mai bona egu ruma ai umui noho.” Ia ura dikadika dainai ai lao.

16 Vadaeni guriguri gabuna ai lao henia noho lalonai, hesiai kekenina ta ese ai ia hedavari henia. Ia be demoni ta ese ia biagua dainai, vaira negana ia gwauraia hedinarai diba.+ Ena biagudia be iena gaukara amo moni momo idia abia. 17 Unai kekeni be Paulo bona ai murinai ia raka noho bona ia boiboi, ia gwau: “Inai tatau be Ataiai Momokani Diravana ena hesiai taudia+ bona umui dekenai hahemauri dalana idia harorolaia noho.” 18 Dina momo lalonai unai bamona ia karaia noho. Dokonai, Paulo be unai ia hesikulaia bena ia giroa bona lauma dikana dekenai ia gwau: “Iesu Keriso ena ladanai oi lau oda henia, inai kekeni amo oi raka-lasi.” Bena maoromaoro ia raka-lasi.+

19 Vadaeni ena biagudia idia itaia edia moni abia dalana ia ore neganai,+ Paulo bona Sila idia dogoatao bona lohia taudia itaia totona, maketi* dekenai idia veria lao.+ 20 Bona majistret taudia dekenai idia gwau: “Inai tatau ese iseda siti ena mauri idia hadikaia noho.+ Idia be Iuda taudia, 21 bona idia harorolaia kastom karadia ai abia dae eiava badinaia be maoro lasi, badina ai be Roma taudia.” 22 Vadaeni hutuma idia toreisi bona mai badu ida idia hereva henidia, bona majistret taudia ese Paulo bona Sila edia dabua idia darea oho murinai, oda idia henia au amo idia dadabadia totona.+ 23 Vadaeni idia dadabadia dikadika murinai, dibura ruma ai idia atodia, bena dibura ruma naria tauna idia oda henia do ia gimadia idia heau boio lasi totona.+ 24 Unai oda ia abia dainai, dibura ruma ena lalona momokani daiutuna lalonai ia atodia bona edia aena be au metaudia* rua huanai ia lokaia.

25 To hanuaboi momokani ai, Paulo bona Sila idia guriguri bona Dirava hanamoa anedia idia abia+ bona dibura taudia be idia kamonai noho. 26 Bena karaharaga tano mareremarere bada ia vara bona dibura ruma ena badina idia marere. Danu, maoromaoro iduara ibounai idia kehoa bona dibura taudia ibounai edia seini idia makohi.+ 27 Dibura naria tauna ia noga bona ia itaia dibura ruma ena iduara ibounai idia kehoa neganai, ena tuari kaia ia abia bona ia ura sibona ia alaia mase, badina ia laloa dibura taudia ibounai idia heau boio vadaeni.+ 28 To Paulo ia boiboi badabada: “Oi sibona oi alaia lasi, ai ibounai ai noho!” 29 Vadaeni lamepa totona ia boiboi bena ia heau vareai, mai gari bona heudeheude danu Paulo bona Sila vairanai ia tui diho. 30 Idia ia hakaua raka-lasi bona ia gwau: “Tau badadia e, dahaka lau karaia be namo hahemauri lau abia totona?” 31 Idia gwau: “Lohiabada Iesu oi abidadama henia, bena oi bona emu ruma taudia be hahemauri do umui abia.”+ 32 Vadaeni Iehova* ena hereva be ia bona ena ruma taudia ibounai dekenai idia gwauraia. 33 Bona unai hanuaboi ai idia ia abia lao, edia bero ia huria. Bona ia bona ena ruma taudia ibounai be maoromaoro bapatiso idia abia.+ 34 Ia ese ena ruma dekenai ia abidia vareai bona aniani ia henidia, bona ia moale bada badina Dirava ia abidadama henia, bona ena ruma taudia idia moale danu.

35 Daba ia rere neganai, majistret taudia ese ofesa taudia* idia siaia bona idia hamaorodia do idia gwau: “Unai tatau umui ruhaia.” 36 Vadaeni dibura naria tauna ese edia hereva be Paulo dekenai ia gwauraia: “Majistret taudia ese ofesa taudia idia siaia umui idia ruhaia totona. Unai dainai umui raka-lasi bona mai maino ida umui lao.” 37 To Paulo be idia dekenai ia gwau: “Taunimanima vairanai ai idia dadabaia bona dibura ruma lalonai ai idia atoa, ena be kota vairanai ai gini lasi, bona ai be Roma taudia.+ Bona hari idia ura hehuni dalanai ai idia ruhaia, a? Lasi momokani! Namona be idia sibodia idia mai bona ai idia hakaua raka-lasi.” 38 Vadaeni ofesa taudia* ese unai hereva be majistret taudia dekenai idia gwauraia. Majistret taudia idia kamonai idia be Roma taudia neganai, idia gari dikadika.+ 39 Vadaeni idia mai bona Paulo bona Sila dekenai sori herevana idia gwauraia bona idia hakaudia raka-lasi murinai, idia noidia siti do idia rakatania. 40 To dibura ruma amo idia raka-lasi bona Lidia ena ruma dekenai idia lao. Unuseniai tadikaka idia itaia bona idia hagoadadia murinai,+ idia rakatanidia.