Aposetolo Edia Kara

10 Kaisarea ai, tau ta ladana Korenelio ia noho. Ia be tuari oreana* ladana Italia, ena ami ofesa* ta. 2 Ia be tomadiho ia laloa bada, bona iena ruma taudia ibounai be Dirava idia gari henia. Hebogahisi dainai ia ese ogogami taudia ia durua, bona hanaihanai Dirava ia guriguri henia. 3 Adorahi 3 oklok* bamona ai,+ matahanai ta lalonai Dirava ena aneru ta ia itaia, ia dekenai ia mai, bona ia gwau: “Korenelio e!” 4 Vadaeni Korenelio be mai gari ida aneru ia itaia, bona ia gwau: “Lohiabada e, mani oi hereva bona do lau kamonai.” Aneru be ia dekenai ia gwau: “Emu guriguri bona hebogahisi dainai ogogami taudia oi durua karana be Dirava dekenai idia daekau bona ia laloatao.+ 5 Vadaeni tatau haida be Iopa dekenai oi siaia bona Simona, ena ladana ma ta be Petero, do idia boiria. 6 Ia be Simona ena ruma dekenai ia noho. Simona be boromakau kopina gaukaralaia tauna, ena ruma be davara badinai.” 7 Aneru be unai ia gwauraia murinai ia lao, bena maoromaoro Korenelio ese ena hesiai taudia rua bona tomadiho ia laloa bada tuari tauna ta ia boiria. 8 Bona Korenelio ese idia dekenai gau ibounai ia herevalaia, bena Iopa dekenai ia siaidia lao.

9 Murina dinana ai, idia lao bona unai siti kahirakahira idia ginidae gwauraia neganai, Petero be ruma ataiai ia daekau ia guriguri totona, unai be adorahi 12 oklok* bamona. 10 To ia hitolo bada bona ia ura ia aniani. Aniani idia do hegaegaelaia noho lalonai, matahanai ta ia itaia,+ 11 guba ia kehoa bona gau ta ena toana be dabua badana ta bamona ia hedinarai, ena kona 4 dekenai idia dogoatao bona tanobada dekenai idia hadihoa. 12 Unai dabua lalonai be tanobada ai idia noho aena 4 animal idauidau bona idia rau gaudia idauidau, bona guba ena manu idauidau idia noho. 13 Bena gado ta be ia dekenai ia gwau: “Petero e, oi toreisi, oi alaia bona oi ania!” 14 To Petero ia gwau: “Lohiabada e, lasi momokani, badina nega ta miro bona goeva lasi gauna ta lau ania lasi.”+ 15 Bona nega iharuana unai gadona be ia dekenai ia gwau: “Namo lasi Dirava ese ia hagoevaia vadaeni gaudia oi gwauraia miro.” 16 Unai gadona be nega ihatoina ia hereva, bena maoromaoro unai dabua badana be guba dekenai ia daekau.

17 Petero be ia itaia matahanai ena anina ia laloa momo noho lalonai, Korenelio ese ia siaia taudia be Simona ena ruma idia tahua, bena idia mai bona geiti dekenai idia gini.+ 18 Idia boiboi bona henanadai bema Simona, ena ladana ma ta be Petero, be unuseniai ia noho. 19 Petero be unai matahanai ia do laloa noho lalonai, lauma helaga+ ia gwau: “Itaia! Tatau toi be oi totona idia henanadai noho. 20 Vadaeni oi toreisi, oi diho bona idia ida oi lao. Oi daradara lasi, badina lau ese idia lau siaia.” 21 Bena Petero ia diho bona unai tatau dekenai ia gwau: “Umui tahua tauna be lau. Dahaka dainai umui mai?” 22 Idia gwau: “Ami ofesa ta ladana Korenelio,+ be Dirava ia gari henia bona ia be kara maoromaoro tauna bona Iuda besena ibounai idia gwau ia be tau namona. Aneru helagana ta ese Dirava ena hadibaia hereva be ia dekenai ia gwauraia, bona ia hamaoroa hereva do ia siaia iena ruma dekenai oi mai totona, bona oi gwauraia herevana do ia kamonai.” 23 Unai dainai Petero ese ia boiridia vareai bona unuseniai idia noho.

Daba ai ia toreisi bona idia ida ia lao bona Iopa amo tadikaka haida be ia idia bamoa. 24 Unai dina murinai, Kaisarea dekenai ia ginidae. Oibe, Korenelio be idia ia naria noho bona ena varavara bona tura korikoridia ia boiria bona idia haboua. 25 Petero ia vareai neganai, Korenelio ese ia hedavari henia, ena aena badinai ia moru diho, bona hemataurai karana ia hahedinaraia.* 26 To Petero ese ia veria isi, ia gwau: “Oi toreisi, lau danu be taunimanima ta sibona.”+ 27 Korenelio ida ia herevahereva noho lalonai, ia vareai bona ia itaia hutuma idia haboua. 28 Vadaeni idia dekenai ia gwau: “Umui diba, Iuda tauna ta ese idau bese tauna ta ia bamoa eiava ia hereva henia be taravatu.+ To Dirava ese lau dekenai ia hahedinaraia, tau ta do lau gwauraia lasi ia miro eiava ia goeva lasi.+ 29 Vadaeni hereva umui siaia neganai, lau daradara lasi, to lau mai sibona. Mani umui hereva, dahaka dainai lau totona hereva umui siaia.”

30 Bena Korenelio ia gwau: “Dina 4 idia ore vadaeni, adorahi 3 oklok* bamona ai lau be egu ruma ai lau guriguri noho lalonai, tau ta be egu vairanai ia gini, ena dabua be ia diaridiari, 31 bona ia gwau: ‘Korenelio e, Dirava ese emu guriguri ia kamonai, bona hebogahisi dainai ogogami taudia oi durua karana be Dirava ese ia laloatao. 32 Unai dainai, Iopa dekenai haida oi siaia lao bona Simona, ena ladana ma ta be Petero, do idia boiria. Ia be animal kopina gaukaralaia tauna Simona ena ruma dekenai ia noho, unai be davara badinai.’+ 33 Bena maoromaoro oi totona hereva lau siaia, bona namo herea oi mai. Vadaeni hari ai ibounai be Dirava vairanai ai noho, Iehova* ese oi dekenai ia gwauraia herevana ai kamonai totona.”

34 Vadaeni Petero ia hereva matamaia, ia gwau: “Hari lau laloparara momokani, Dirava be taunimanima edia toana ia laloa lasi,+ 35 to bese ibounai lalonai ia idia gari henia bona kara maoromaoro idia karaia taudia be ia ese ia abia dae.+ 36 Dirava ese Israela taudia dekenai, Iesu Keriso amo ia vara maino ena sivarai namona ia siaia.+ Ia be taunimanima ibounai edia Lohiabada.+ 37 Umui diba Ioane be bapatiso ia harorolaia murinai, Galilea dekenai inai sivarai idia gwauraia matamaia,+ ia lao bona Iudea kahana ibounai, 38 unai be Nasareta tauna Iesu idia herevalaia. Dirava ese lauma helaga amo ia horoa+ bona siahu ia henia. Vadaeni gabu ibounai dekenai ia lao bona kara namodia ia karaia bona Diabolo ese ia hahisia taudia ibounai ia hanamoa,+ badina Dirava be ia ida ia noho.+ 39 Bona Iuda taudia idia noho tanona bona Ierusalema ai ia karaia gaudia ibounai ai itaia. To au ta dekenai ia idia kokoa kau,* bona idia hamasea. 40 Dina ihatoina ai, Dirava ese ia hatorea isi lou+ bona gwaumaoro ia henia taunimanima dekenai ia hedinarai totona, 41 taunimanima ibounai ese idia itaia lasi, to ai sibona, mase amo ia toreisi lou murinai, ia be ai ida ia aniani bona inuinu. Ai be Dirava ese ia abia hidi guna ia do ai itaia bona herevalaia totona.+ 42 Danu, ai ia hagania taunimanima dekenai do ai haroro bona ai hahedinaraia namonamo,+ ia be Dirava ese ia abia hidi, mauri taudia bona mase taudia edia diadi tauna ai ia lao totona.+ 43 Peroveta taudia ibounai ese ia idia gwauraia hedinarai,+ idia gwau ia idia abidadama henia taudia ibounai be iena ladana dainai Dirava ese edia kara dika do ia gwauatao.”+

44 Petero be unai gaudia ia herevalaia noho lalonai, Dirava ena hereva idia kamonai taudia ibounai ese lauma helaga idia abia.+ 45 Petero ida idia mai abidadama taudia, kopina utua taudia unai, be idia hoa, badina lauma helaga, davana lasi harihari gauna unai, be idau bese taudia ese idia abia danu. 46 Badina idia kamonai idau bese taudia be gado idauidau ai idia hereva bona Dirava idia hanamoa.+ Bena Petero ia gwau: 47 “Inai taudia be ai hegeregerena lauma helaga idia abia vadaeni, unai dainai daika ia gwau ranu lalonai bapatiso idia abia diba lasi?”+ 48 Vadaeni idia ia hagania Iesu Keriso ena ladanai bapatiso do idia abia.+ Bena ia idia noia dina haida idia ida do ia noho.