Karoa 10

“Satani Ena Hunia Momokani Gaudia” Dadaraidia

TUATIRA

KILOMITA 64 bamona Bergama (Peregamo) ena laurabada kahanai Turkey hanuana Akhisar ia noho. Lagani 1,900 bamona gunanai, unai hanua ena gabu dekenai Tuatira hanuana ia noho. Dala badana ta amo loaloa naria taudia ese Peregamo idia rakatania diba bona Tuatira dekenai idia lao diba, bena Apokalupo karoa 3 ese ia gwauraidia kongregesen, Sadi, Filadelefia, bona Laodikea dekenai ia lao diba. Tuatira lalonai Roma pavapava tomadiho henia karana be bada lasi, unai dainai Peregamo amo ia idau. To Tuatira hanuana lalonai dirava koikoi edia kaivakuku bona dubu badadia idia haginia. Unuseniai bisinesi gaukarana idia karaia momo.

² Paulo be Makedonia lalonai ia haroro neganai, Tuatira hahinena ladana Lidia ia davaria. Unai hahine ena gaukara be dabua kakakaka ia hoihoilaia. Lidia bona ena ruma taudia iboudiai ese Paulo ia harorolaia sivaraina idia abia dae bona heabidae karana idia hahedinaraia danu. (Kara 16:​14, 15) Baibel lalonai Keristen dalana ia abia dae Tuatira tauna ginigunana be unai hahine. Nega sisina murinai, Tuatira hanuana lalonai Keristen kongregesen ta ia noho. Iesu ena hereva unai kongregesen dekenai ese ma kongregesen iboudiai dekenai ia siaia herevadia edia lata ia hanaia. Ia gwau: “Tuatira ekalesia oreana ena aneru dekenai inai hereva do oi torea: ‘Dirava ena Natuna, iena matana be lahi ena hururuhururu bamona, iena aena be kapa idia hagoevaia, vadaeni ia diaridiari bamona, iena hadibaia hereva be inai.’ ”​—⁠Apokalupo 2:⁠18.

³ Ena be Apokalupo ena siri ma haida dekenai Iesu ese Iehova ia gwauraia “lauegu Tamana,” to Apokalupo bukana ese inai hereva, “Dirava ena Natuna,” nega tamona sibona ia gwauraia unai. (Apokalupo 2:26; 3:​5, 21) Iesu ese sibona ia gwauraia Dirava ena Natuna dainai, reana Tuatira Keristen taudia ia durudia, do idia laloatao Iesu bona Iehova idia hetura heheni namonamo. Unai Natuna ena “matana be lahi ena hururuhururu bamona.” Unai ese Tuatira Keristen taudia ia hadibadia iena hahemaoro be lahi bamona kongregesen lalonai ia itaia miro gaudia do ia araia ore. Nega iharuana ia gwau ena aena idia diaridiari kapa bamona. Unai ese ia hahedinaraia goevagoeva tanobada dekenai ia raka neganai, ia kamonai namonamo. Tuatira Keristen taudia ese ena sisiba idia kamonai henia, bona hari inai negai namona be unai bamona ita karaia danu!​—⁠1 Petero 2:⁠21.

⁴ Iesu ese Tuatira Keristen taudia ia hanamodia diba. Ia gwau: “Oiemu kara, oiemu lalokau, oiemu abidadama, oiemu hesiai gaukara, bona oiemu haheauka, ibounai lau diba. Lau diba danu oiemu kara be namo, guna bamona lasi.” (Apokalupo 2:​19) Guna Iehova idia lalokau henia bada, bona unai lalokau idia haboioa lasi; unai dainai Efeso taudia amo idia idau. Edia abidadama ia goada. Danu, guna edia hesiai gaukara be momo lasi, to hesiai gaukara momo hari idia karaia noho. Efeso, Semurana, bona Peregamo kongregesen taudia ese idia karaia hegeregerena, Tuatira Keristen taudia idia haheauka noho. Hari inai negai, tanobada ibounai dekenai, kahirakahira kongregesen 100,000 lalodiai Iehova ena Witness taudia be unai bamona idia karaia. Edia orea taudia iboudiai, matamata taudia bona buruka taudia, be mai edia ura ida haroro gaukara idia karaia neganai, idia hahedinaraia goevagoeva Iehova idia lalokau henia bada. Idia momo ese pioneer gaukara idia karaia. Unai dala amo mai edia aonega ida inai tanobada ena nega orena lalonai inai hairai sivaraina idia harorolaia: Dirava ena Basileia be kahirakahira do ia mai!​—⁠Mataio 24:14; Mareko 13:⁠10.

⁵ Lagani momo lalodiai, kamonai taudia momo, horoa orena taudia bona hutuma bada herea taudia, be Dirava ena hesiai gaukara lalonai idia haheauka bona unai neganai haheitalai namona idia hahedinaraia. Unai idia karaia noho lalonai, tanobada taudia edia helaro namona ia maragi ia lao. To namona be ita lalo-goada! Apokalupo ese Dirava ena peroveta taudia gunadia edia hereva ia hamomokania. “Iehova ena dina badana ia kahirakahira vadaeni. Ia kahirakahira bona ia mai haraga herea.”​—⁠Sepanaia 1:14; Ioela 2:1; Habakuku 2:3; Apokalupo 7:9; 22:​12, 13.

“Unai Hahine, Ladana Iesabel”

⁶ Iesu ena matana be lahi bamona bona ma gau haida danu ia itadia. Iesu ese kerere ta ia itaia bona idia hamaoromaoroa haraga be namo. “To inai gauna dekenai oi be oi kerere. Oi ese unai hahine, ladana Iesabel, ena kara dika oi koua lasi. Ia ese sibona ia gwauraia peroveta hahine. Lauegu hesiai taudia ia hadibaia kerere bona idia ia hakaua kerere, vadaeni matabodaga karana idia karaia, bona kaivakuku dekenai henia vamuna idia ania.” (Apokalupo 2:20) Lagani 1000 B.C.E. murinai, Baal ia tomadiho henia Lohia Hahinena, Israel Pavapava Ahaba ena adavana Iesabel, ese taunimanima ia aladia mase, ia heudahanai, bona taunimanima ia biagudia. Iehova ese ia horoa tauna Iehu ese Iesabel ia hamasea. (1 King Taudia 16:31; 18:4; 21:​1-​16; 2 King Taudia 9:​1-7, 22, 30, 33) Iesabel ese dirava koikoi ia tomadiho henia dainai ia be peroveta hahinena momokanina lasi. Ia be Israel dekenai idia gaukara kamonai peroveta hahinedia Miriama bona Debora bamona lasi. (Esodo 15:​20, 21; Gunalaia Taudia 4:4; 5:​1-​31) Bona Iehova ena lauma helaga ese Iesabel ia hasiahua lasi, hahine burukana Ana bona sivarai namona harorolaia tauna Filipo ena natu kekenidia haniosi ia hasiahudia hegeregerena.​—⁠Luka 2:​36-​38; Kara 21:⁠9.

⁷ Unai dainai, ia hedinarai goevagoeva sibona ia gwauraia peroveta hahinena, “unai hahine, ladana Iesabel,” be ia koikoi. Dirava ena lauma ese ia durua lasi. Unai hahine Iesabel be daika? Reana ia ese hahine ta o hahine haida ia laulaulaia. Unai hahine ese kongregesen taudia ia veridia kerere, ia hemarai lasi. Reana hahine haida be kongregesen lalonai idia vareai, bena kongregesen taudia idia veridia idia sihari kava totona, bona unai idia karaia neganai Baibel ena siri edia anina idia gwauraia kerere, edia gwau-edeede dalana ena kerere idia hunia toho totona. Idia peroveta koikoi unai! Unai hahine taudia, “heudahanai, lebulebu, matadika, matabodaga, bona kohu ura dikadika kara . . . hegeregere kaivakuku tomadiho henia kara bamona” hahinedia, ese ma haida idia veridia toho edia kara do idia tohotohoa totona. (Kolose 3:⁠5) Kerisendom taudia momo idia sihari kava bona sibodia edia ura idia laloa guna eiava unai kara idia abia dae. Unai hahine idia ura kongregesen taudia danu be unai bamona do idia karaia.

⁸ Iesu ese Tuatira kongregesen ena elda taudia ia hamaorodia, ia gwau: “Lau ese nega lau henia vadaeni iena lalona do ia giroa totona, to iena lebulebu karadia ia ura lasi rakatania. Vadaeni, kamonai! Lau ese gorere bada mai hisihisi bada danu unai hahine do lau henia iena heudahanai geda dekenai. Bona unai taudia, unai hahine danu idia heudahanai vadaeni, bema edia lalona idia giroa lasi, idia danu do lau hahisia bada herea, unai geda dekenai.” (Apokalupo 2:​21, 22) Iesabel ginigunana ese Ahaba ia biagua bona Dirava ese ia siaia hamasea tauna Iehu ia gwau-edeede henia. Unai hegeregerena, reana unai Iesabel ena kara bamona hahinedia ese edia adavadia, bona elda taudia danu, idia biagudia toho. Tuatira kongregesen ena elda taudia ese unai hahine edia kara idia koua lasi. Unai siri lalonai Iesu ese sisiba aukana be unai elda taudia ia henidia, bona hari inai negai Iehova ena orea taudia tanobada ibounai dekenai ia sisiba auka henidia danu. Hari inai negai, unai bamona gwau-edeede hahinedia haida ese edia tatau idia veridia, hereva momokani idia negea totona, bona idia ese Iehova ena kamonai hesiai taudia be kota vairanai idia samanidia danu.​—⁠Iuda 5-8 itaia danu.

⁹ Unai hereva ese Keristen kongregesen ena kamonai hahinedia ia gwauraidia dika lasi. Hari inai negai, taihu namodia ese haroro gaukara ena kahana badana idia karaia. Taunimanima idia Baibel stadi henidia dainai, kamonai matamata taudia momo be kongregesen dekenai idia veria mai. Dirava ese edia gaukara ia hanamoa, Salamo 68:11 ese ia hahedinaraia hegeregerena, ia gwau: “Iehova sibona ia hereva; sivarai namona idia gwauraia hahinedia be tuari oreana badana ta.” Hahine idia manau bona idia hemataurai neganai, “idia be namo bada herea Dirava ena vairanai,” bona reana edia adavadia edia lalona do idia veria, dala namona do idia gavaia totona. (1 Petero 3:​1-4) Mai aonega ida idia gaukara goadagoada hahinedia be Pavapava Lemuele ese ia hanamodia. (Aonega Herevadia 31:​10-​31) Hahine ese edia gabu korikori bema idia rakatania, tatau idia gahusia neganai eiava kwarana taudia idia gwau-edeede henia o idia laloa lasi neganai, Iesabel ena kara be kongregesen lalonai ia vareai unai.​—⁠Efeso 5:​22, 23; 1 Korinto 11:⁠3.

¹⁰ Iesu ese “unai hahine, ladana Iesabel” ia gwauraia neganai, ia be ma ia gwau: “Unai hahine ena murinai idia raka taudia danu do lau alaia mase. Vadaeni ekalesia orea taudia ibounai do idia diba, lau be taunimanima ibounai edia laloa bona edia ura lau diba. Bona umui danu ta ta emui davana do lau henia, ena kara ena kara hegeregerena.” (Apokalupo 2:​23) Iesu ese nega be Iesabel bona ia murinai idia raka taudia ia henidia vadaeni do idia helalo-kerehai totona, to edia sihari kava karadia idia karaia noho; unai dainai hahemaoro do idia abia. Unai hereva be mai anina bada hari inai negai idia noho Keristen taudia dekenai. Herevana idia be tatau o hahine, to Iesabel ena kara idia tohotohoa tataudia bona hahinedia ese Baibel ena hereva kwarana dagina dekenai bona kara goevana dekenai idia dadaraia dainai, eiava Dirava ese ena orea ia naria dalana idia gwau-edeede henia dainai, Iesabel ena murinai idia raka. Unai dainai, lauma dalanai edia gorere be dika herea. Momokani, bema unai bamona tau o hahine ta ese kongregesen ena elda taudia ia boiridia, ia totona do idia guriguri, bona bema mai ena manau ida unai guriguri hegeregeredia ia karaia, “inai guriguri mai abidadama danu ese gorere tauna do ia hanamoa. Lohiabada ese iena mauri do ia hanamoa, bona iena kara dika do ia gwauatao.” To namona be tau (o hahine) ta do ia laloa lasi ena sihari kava karadia ia hunia toho dainai eiava taunimanima vairadiai hesiai gaukara ia goadalaia dainai, Dirava eiava Keriso ia koia diba.​—⁠Iamesi 5:​14, 15.

¹¹ Hari inai negai, Iehova ena Witness taudia edia kongregesen momo idia naria namonamo unai dika do ia vara garina. Elda taudia idia gima noho, kongregesen lalonai Dirava ese ena orea ia naria dalana idia dadaraia taudia edia lalohadai idia abia dae garina bona kara dika do ia vara garina. Lauma dalanai do idia goada bona edia kerere do idia hamaoromaoroa haraga totona, elda taudia ese dika idia davaria gwauraia tataudia bona hahinedia idia durudia toho, idau idia mase garina. (Galatia 5:16; 6:⁠1) Bema hahine haida ese orea maragidia idia havaraia toho tatau edia siahu idia dadaraia totona, vadaeni, mai edia lalokau bona mai edia goada ida unai Keristen naria taudia ese unai dala idia koua. Danu, nega ta ta ai Iehova ena Witnes taudia edia buka bona buklet lalonai sisiba namodia idia printaia.a

¹² To, bema sihari kava taudia idia helalo-kerehai lasi, bona idia sihari kava loulou, kongregesen murimurinai idia atodia be gau badana. Ita laloatao Iehu be mai ena goada ida Iesabel ena siahu be Israel amo ia kokia vaitani. Unai hegeregerena, Ioane oreana taudia hari inai negai be mai edia goada ida haheitalai namona be edia “Iehonadab” turadia dekenai idia hahedinaraia, bona idia hahedinaraia Kerisendom ena pris bona pasto taudia amo idia idau vaitani.​—⁠2 King Taudia 9:​22, 30-​37; 10:​12-⁠17.

¹³ Dirava ena Natuna be Iehova ena Gwaukau Tauna bona Hahemaoro Tauna. Unai dainai, hari inai negai ia noho Iesabel be daika ia gwauraia, bona gorere gedana dekenai ia negea be maoro, badina ena gorere lauma dalana dekenai be bada. (Malaki 3:​1, 5) Unai hahine ena siahu idia dadaraia lasi taudia danu ese hisihisi bada do idia davaria​—⁠kongregesen murimurinai do idia atodia, hegeregere idia mase bamona. Bema idia helalo-kerehai lasi, edia kara idia haidaua lasi, bona kongregesen ese ia abidia dae lou lasi, “gorere bada mai hisihisi bada” ena amo do idia mase momokani​—⁠hisihisi bada herea ia mai neganai eiava ia do mai lasi neganai. To hari, bema edia kara dikadia amo idia helalo-kerehai momokani, lauma dalanai idia goada lou diba.​—⁠Mataio 24:​21, 22; 2 Korinto 7:⁠10.

¹⁴ Gau badana be “ekalesia orea taudia ibounai” do idia diba, Iesu be “taunimanima ibounai edia laloa bona edia ura” ia diba, anina be edia lalona ena mamina bona idia ura gaudia ibounai ia diba. Kongregesen iboudiai be unai do idia diba totona, Iesu ese hisiu, kara maoromaoro elda taudia unai, ia gaukaralaidia, hekwakwanai haida, hegeregere Iesabel ena kara bamona, do idia kokidia totona. (Apokalupo 1:20) Unai elda taudia ese unai bamona hekwakwanai idia tahua namonamo bona hahemaoro karana idia karaia murinai, kongregesen taudia ese edia kara ena badina idia tahua be maoro lasi. Namona be kongregesen taudia iboudiai be mai edia manau ida elda taudia edia kara idia abia dae bona unai kongregesen ena hisiu taudia idia durudia. Iehova bona ia ese ena orea ia naria dalana idia badinaia momokani dainai, davana namona do idia davaria. (Salamo 37:​27-​29; Heberu 13:​7, 17) Iesu ese taunimanima ta ta ibounai ena kara ena kara hegeregerena davana ia henidia neganai, hahenamo do oi abia be namo.​—⁠Galatia 5:​19-​24; 6:​7-9.

“Umui Ia Henia Vadaeni Gauna Do Umui Dogoatao Noho”

¹⁵ Iesu ena hereva gabedia ese edia lalona idia hagoadaia: “To umui Tuatira taudia momo ese unai hadibaia hereva umui badinaia lasi, bona Satani ena hunia momokani gaudia umui diba lasi. Umui dekenai lau hereva inai: Metau ma ta umui latanai do lau atoa lasi. To Dirava ese umui ia henia vadaeni gauna do umui dogoatao noho, ela bona umui dekenai lau mai.” (Apokalupo 2:​24, 25) Tuatira kongregesen lalonai kamonai taudia haida ese Iesabel ena siahu idia dadaraia. Unai hegeregerena, lagani 40 idia do noho ema bona lagani 1918 bona unai lagani ena nega amo danu, sibodia idia gwauraia Keristen taudia haida ese Kerisendom ena sihari kava karadia bona ena kara mirodia idia abidia dae lasi. Orea maragina ta, Bible Student taudia, hari idia gwauraia Iehova ena Witness taudia, ese dubu taudia idia durudia toho, do idia lalo-parara Kerisendom ena hahediba herevadia momo be Keristen tomadihona amo idia mai lasi. Unai Bible Student taudia ese dala idia tahua, Kerisendom ena amo idia abia Babulono herevadia bona karadia iboudiai be edia orea amo do idia kokidia totona. Anina be, “unai hahine, ladana Iesabel” ena lebulebu hahediba herevana idia negea danu.

¹⁶ Hari inai negai, Ioane oreana taudia ese edia bamodia, hutuma bada herea taudia, idia hamaorodia namona be idia naria namonamo lebulebu karadia dainai, hegeregere moale karadia momo edia kara bodaga ese idia do idia hamorua garina. Namo lasi iseda ura dainai kara mirona lalonai ita vareai, ena mamina ita diba totona eiava dahaka amo ita gini siri be namo ita diba totona. Aonega dalana be inai: “Satani ena hunia momokani gaudia” amo ita gini siri momokani. Iesu ia gwau: “Metau ma ta umui latanai do lau atoa lasi.” Unai hereva be Keristen taudia ginigunadia edia hakaua oreana edia hereva hegeregerena: “Lauma Helaga bona ai be inai bamona ai laloa. Ai be maduna metau haida ma do ai atoa lasi umui dekenai. To inai taravatu mai badina gaudia, idia mo umui naria. Kaivakuku vairana dekenai idia atoa aniani umui ania lasi, rara umui ania lasi, aiona idia gigia gaudia edia hidio umui ania lasi, bona heudahanai kara umui karaia lasi. Bema inai gaudia umui karaia lasi, dohore umui be namo.” (Kara 15:​28, 29) Lauma dalanai do oi goada totona, tomadiho koikoi amo, rara gaukaralaia kerere karana (hegeregere rara atoa hanai karana) amo, bona sihari kava karana amo oi gini siri! Bona reana emu tauanina do ia namo danu!

¹⁷ Hari inai negai, Satana ena “hunia momokani gaudia” ma haida be lalohadai hereva aukadia bona tanobada aonega herevadia, diba tahua taudia edia lalona hamoalea gaudia unai. Unai hunia momokani gaudia be lebulebu bona sihari kava lalohadai sibodia lasi, to babalau karana bona evolusen herevana danu. Aonega ibounai, gau ibounai ia Havaraia Tauna, ese unai “hunia momokani gaudia” be edena bamona ia lalohadailaia? Paulo ese Iena hereva ia gwauraia lou, ia gwau: “Lau be aonega taudia edia aonega do lau haorea.” “Dirava ena laloa dobu gaudia” be idau vaitani. Idia auka lasi, idia goevagoeva, bona taunimanima edia kudouna idia hamoalea. Aonega Keristen taudia ese Satana ena tanobada dikana ena “hunia momokani gaudia” idia dadaraia. Inai oi laloatao: “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”​—⁠1 Korinto 1:19; 2:10; 1 Ioane 2:⁠17.

¹⁸ Bena, Iesu ese Tuatira Keristen taudia ia hereva henidia bona edia kudouna ia hamoalea. Hari inai negai ena hereva ese horoa Keristen taudia idia hagoadaia danu. Ia gwau: “Kwalimu taudia, lauegu ura idia karaia noho ela bona dokona, be siahu, lauegu Tamana ese lau ia henia siahu hegeregerena, do lau henidia. Idia ese tanobada besedia do idia gunalaia. Auri itotohina dekena amo tanobada besedia do idia biagudia. Uro idia makohia kahana maragimaragidia bamona unai tanobada besedia do idia hamakohia maragimaragi.” (Apokalupo 2:​26, 27) Hahenamo bada herea unai! Horoa kwalimu taudia idia toreisi lou neganai, siahu idia abia, Iesu ida “auri itotohina” idia gaukaralaia hebou, gwau-edeede besedia badadia be Aramagedono lalonai do idia haoredia totona. Iesu ese ena inai taudia do ia hamakohidia maragimaragi, uro gaudia ia hamakohidia bamona; unai neganai, unai bese badadia edia niuklia tuari gaudia edia siahu do ia ore haraga, lahi ena siahu ia ore haraga, ranu amo idia habodoa bamona.​—⁠Salamo 2:​8, 9; Apokalupo 16:​14, 16; 19:​11-​13, 15.

¹⁹ Iesu be ma ia gwau: “Bona daba ena hisiu bada danu idia dekenai do lau henia.” (Apokalupo 2:28) Iesu ese unai “hisiu” ena anina ia gwauraia hedinarai, ia gwau: “Lau be Davida ena natuna ta, Davida ena bese tauna. Lau be unai hisiu bada, daba rere neganai ia diaridiari gauna.” (Apokalupo 22:16) Ena be Balaam ia ura lasi, to Iehova ese ia doria inai peroveta herevana ia gwauraia totona: “Iakobo besena amo hisiu do ia raka lasi, bona lohia ena dagi auna be Israel besena amo ia toreisi.” Iesu ese unai peroveta herevana ia hamomokania. (Numera 24:17) Iesu be edena bamona “daba ena hisiu bada” be kwalimu taudia do ia henidia? Ia ese sibona do ia henia idia dekenai, iena hetura namona lalonai ia abidia dae neganai. (Ioane 14:​2, 3) Momokani, idia haheauka be mai anina bada! Danu, hutuma bada herea taudia idia moale, badina idia diba ‘daba rere ena hisiu bada’ ese ena Basileia siahuna do ia gaukaralaia, Paradaiso be tanobada dekenai do ia havaraia lou totona!

Kara Maoromaoro Dekenai Gini Goada

²⁰ Iesu ena hereva Tuatira Keristen taudia dekenai ese edia lalona ia hagoadaia bada. Mani oi laloa​—⁠Dirava ena Natuna hairaina guba dekenai ese Tuatira Keristen taudia edia hekwakwanai haida be idia dekenai ia herevalaia! Momokani, unai kongregesen taudia haida ese Iesu ena lalokau naria dalana dainai idia kamonai namonamo. Unai hereva Tuatira Keristen taudia dekenai be lata, ma kongregesen 6 dekenai ia siaia herevadia edia lata ia hanaia. Danu, unai hereva latana ese ita ia durua hari inai negai Keristen kongregesen momokanina do ita diba totona. Lagani 1918 lalonai, hahemaoro do ia henia totona Iesu be Iehova ena dubu dekenai ia mai neganai, kaivakuku tomadiho henia karana bona lauma dalanai sihari kava karana ese sibodia idia gwauraia Keristen oreadia momo idia hamiroa. (Iamesi 4:⁠4) Idia haida be lagani 1800 C.E. murinai idia vara lalo-goada hahinedia edia hahediba herevadia idia abia dae. Unai hahine haida be Seventh-Day Adventist hahinena Ellen White bona Christian Scientist hahinena Mary Baker Eddy; bona hari inai negai, hahine momo be dubu lalonai taunimanima vairadiai idia gini bona idia haroro henidia. (Timoteo Ginigunana 2:​11, 12 itaia danu.) Katolik tomadiho idauidau momo lalodiai, Maria idia matauraia bada, Dirava bona Keriso idia matauraia maragi. Iesu ese unai bamona hemataurai be Maria ia henia lasi. (Ioane 2:4; 19:26) Hahine edia siahu idia habadaia kerere oreadia be Keristen orea momokanidia, a?

²¹ Herevana idia be Ioane oreana taudia o mamoe idaudia taudia, Keristen taudia ta ta iboudiai ese unai hereva idia laloa namonamo be namo. (Ioane 10:16) Reana haida idia ura Tuatira Iesabel ena hahediba taudia bamona idia karaia, bona dala idia tahua do idia hekwarahi bada lasi totona. Danu, hedibagani ese haida ia veria, dala maorona idia rakatania totona. Hari inai negai, rara gaudia ania karana dainai bona rara abia hanai karana dainai Keristen taudia ese hahetoho idia davaria. Reana haida idia laloa haroro gaukara idia karaia goadagoada dainai eiava tok idia henia namonamo dainai, idia be mai edia maoro edia kara ma haida idia naria namonamo lasi; hegeregere dagedage bona sihari kava be piksa bona video dekenai idia raraia, eiava idia inuinu momo. Iesu ena sisiba Tuatira Keristen taudia dekenai ese ita ia hadibaia unai bamona kara kereredia amo ita gini siri be gau badana. Iehova ena ura be do ita goeva, mai eda kudou ibounai ida do ita gaukara, bona do ita parara lasi, Tuatira Keristen taudia idia parara hegeregerena.

²² Ena hereva ia hadokoa neganai, Iesu ia gwau: “Mai ena taiana tauna, namona be Lauma Helaga ena hereva ekalesia oreadia dekenai do ia kamonai!” (Apokalupo 2:29) Unai be nega hani Iesu ese unai hereva ia gwauraia, bona ma kongregesen toi ia henidia herevana ia hadokoa neganai, unai hereva do ia gwauraia lou. Oiemu taiana ese Iesu ena hereva do ia kamonai henia, a? Bema oibe, Dirava ese ena lauma amo bona ena orea amo sisiba ia henia neganai, namona be oi kamonai namonamo noho.

[Footnote]

[Study Questions]

 1. Kongregesen ma haida edia gabu bona Tuatira hanuana ena gabu be edeseniai, bona Tuatira hanuana lalonai dahaka tomadiho ia noho?

2, 3. (a) Tuatira hahinena ta be Keristen hahine ai ia lao sivaraina idia torea neganai, dahaka idia torea? (b) Tuatira Keristen taudia dekenai Iesu be “Dirava ena Natuna” bona “iena matana be lahi ena hururuhururu bamona” edia anina be dahaka?

4, 5. (a) Dahaka dainai Iesu ese Tuatira Keristen taudia edia kara ia hanamoa? (b) Tuatira kongregesen be edena dala ai hari inai negai Iehova ena Witness taudia edia kongregesen ida ia hegeregere?

 6. (a) Ena be Iesu ese Tuatira kongregesen ena kara haida dainai ia hanamodia, to dahaka kerere ia itaia kongregesen lalonai bona idia hamaoromaoroa haraga be namo? (b) Iesabel be daika, bona ia gwau ia be peroveta hahinena ta be maoro, a?

 7. (a) Iesu ese “unai hahine, ladana Iesabel” ia gwauraia neganai, reana dahaka kara ia herevalaia? (b) Kongregesen lalonai idia vareai hahinedia haida ese edia gwau-edeede karana ena kerere reana edena bamona idia hunia toho?

 8. (a) Iesu ia gwau Tuatira ena “Iesabel” dekenai dahaka do ia vara? (b) Hari inai negai, gwau-edeede hahinedia ese dahaka idia karaia?

 9. (a) Iesu ese Iesabel ia herevalaia neganai, badina be dahaka ita gwau diba lasi kongregesen ena taihu iboudiai ia gwauraidia dika? (b) Dahaka dala sibona amo Iesabel ena kara ia vara diba?

10. (a) Dahaka dainai Iesabel bona ia murinai idia raka taudia ese hahemaoro do idia abia? (b) Iesabel ena murinai idia raka taudia ese dahaka dika idia davaria diba, bona namona be unai bamona taudia ese dahaka do idia karaia?

11. Hari inai negai, kongregesen be edena bamona idia durudia, hahine edia taravatu badinaia lasi siahu dikana do idia dadaraia totona?

12. Hari inai negai, Ioane oreana taudia ese Iehu ena kara be edena dala ai idia tohotohoa?

13. Hahine edia siahu dikana idia dadaraia lasi taudia ese dahaka do idia davaria?

14. (a) Iesu ese elda taudia edena bamona ia gaukaralaidia hekwakwanai haida, hegeregere Iesabel ena kara bamona, do idia kokia totona? (b) Elda taudia ese unai bamona hahemaoro idia karaia neganai, kongregesen taudia ese edena bamona idia durudia be namo?

15. (a) Iesu be dahaka ia gwau Iesabel ese ia hamirodia lasi taudia dekenai? (b) Dahaka ese ia hahedinaraia lagani 1918 ai Kerisendom ese sibodia idia gwauraia Keristen taudia haida ia hakereredia lasi?

16. Ena be Iesu bona idaunegai Keristen hakaua oreana taudia ese metau gauna ma ta idia atoa lasi, to dahaka gaudia amo ita gini siri be namo?

17. (a) Hari inai nega lalonai, Satana be “hunia momokani gaudia” amo taunimanima edena bamona ia dibaganidia? (b) Namona be Satana ena aonega tanobada taudia edia “hunia momokani gaudia” be edena bamona ita lalodia?

18. Ela bona nega dokona do idia gini goada horoa Keristen taudia dekenai, Iesu ese dahaka hahenamo ia gwauhamatalaia, bona Aramagedono lalonai unai toreisi lou taudia ese dahaka hahenamo do idia davaria?

19. (a) “Daba ena hisiu bada” be daika, bona unai hisiu be edena dala amo Iesu ese kwalimu taudia do ia henidia? (b) Dahaka ese hutuma bada herea taudia edia lalona ia hagoadaia?

20. Kerisendom lalonai dahaka gaudia idia vara, idia be Tuatira kongregesen ena manoka gaudia bamona?

21. Iesu be Tuatira kongregesen ia henia herevana ese dahaka ia hadibaia taunimanima ta ta iboudiai dekenai?

22. Iesu be edena bamona ia hahedinaraia kamonai namonamo karana be gau badana?

[Pictures on page 51]

Hari inai negai, kamonai taihudia ese haroro gaukara ena kahana badana idia karaia, bona mai edia manau ida Dirava ena orea ena taravatu idia matauraia