Toana Namona

EMU toana ese emu kara ia hahedinaraia. Iehova ese kudouna ia itaia, to taunimanima ese “tau ena toana idia itaia” bona unai hegeregerena unai tau idia laloa. (1 Sam. 16:7) Oi goeva bona emu toana ia namo neganai, ma haida ese idia itaia oi be oi sibona oi lalo-namo henia, bona idia ura emu hereva idia kamonai. Danu, emu dabua idia namo neganai, kamonai taudia ese oiemu orea bona oi tomadiho henia Diravana idia matauraia.

Heduru Herevadia. Baibel ese iseda toana dekenai taravatu momo ia gwauraia lasi. To ia ese hakaua herevadia namodia ia henia, abia hidi maorodia ita karaia totona. Unai ibounai lalonai mai anina bada gauna be ‘gau ibounai ita karaia Dirava hanamoa totona.’ (1 Kor. 10:31) Iseda toana ita laloa neganai, dahaka hakaua herevadia ita badinaia be namo.

Gau ginigunana be, Baibel ese ita ia hagoadaia eda tauanina bona dabua do idia goeva. Iehova ese idaunegai Israela dekenai taravatu ia henia neganai, idia goeva totona taravatu ia henia danu. Hegeregere, ia gwauraia negadia ai hahelaga taudia ese edia gaukara lalonai, idia digudigu bona edia dabua idia huria. (Lev. 16:​4, 24, 26, 28) Keristani taudia be Mose ena Taravatu henunai idia noho lasi, to ia lalonai idia noho hakaua herevadia be mai edia namo. (Ioa. 13:10; Apok. 19:8) Tomadiho gabuna dekenai ita lao eiava haroro gaukara ita karaia neganai, iseda tauanina, uduna hodahoda, bona dabua idia goeva be namo, ma haida edia hemami ita hadikaia lasi totona. Kongregesen vairanai hereva eiava haheitalai idia henia taudia edia toana ia namo be gau badana. Iseda toana ita naria karana amo ita hahedinaraia Iehova bona ena orea ita matauraia.

Gau iharuana be, Baibel ese ita ia hagoadaia do ita manau bona laloa maoromaoro. Aposetolo Paulo ese Keristani hahinedia ia hagoadaia “mai manau bona mai mataurai danu edia dabua do idia kwatua. Edia huina danu sitaelo sitaelo bamona do idia karaia lasi, bona golo o kavabukavabu herahera gaudia do idia atoa lasi. Davana bada dabua danu do idia abia lasi. To kara namodia ibounai, be herahera bamona do idia karaia. Unai be maoro, bona Dirava idia matauraia hahine edia kara korikori.” (1 Tim. 2:​9, 10) Tatau ese edia dabua bona tauanina ena toana amo manau bona laloa maoromaoro idia hahedinaraia be mai anina bada danu.

Ia manau tauna ia ura lasi ma haida ia hahekwakwanaia bona edia lalona ia veria lasi ia idia laloa totona. Laloa maoromaoro dainai ta ia aonega bona abia hidi namona ia karaia. Unai bamona tauna ia laloa namonamo, badina Dirava ena taravatu ia matauraia. Unai kara ita hahedinaraia lalonai, ita ese dabua namodia ita atoa diba, to ita ia durua eda toana ita laloa maoromaoro bona dabua bona tauanina ena toana idau hereana ita dadaraia. (1 Ioa. 2:16) Herevana ita be tomadiho gabuna ai, haroro gaukara ai, eiava gau ma haida ita karaia, to ita ura unai hakaua herevadia ita badinaia. Dina ta ta ai ita atoa dabua danu ese manau bona laloa maoromaoro idia hahedinaraia be namo. Sikuli ai eiava moni gaukara ai, dala do ia kehoa ita haroro totona. Ena be unai neganai eda dabua be kongregesen heboudia bona hebouhebou badadia dekenai ita atoa dabua bamona lasi, to namona be edia toana ia namo, idia goeva, bona hemataurai idia hahedinaraia.

Momokani, ita ta ta eda dabua edia toana be idauidau. Unai be namo. Taunimanima idia ura gaudia be idauidau, bona unai be maoro. To namona be hanaihanai Baibel ena heduru herevadia ita badinaia.

Aposetolo Petero ese ia hahedinaraia huina ena sitaelo bona dabua be anina bada lasi, to ‘hairai korikori eda lalona dekenai’ be mai anina bada. (1 Pet. 3:​3, 4) Lalokau, moale, maino, kara namo, bona abidadama mai ena badina goadana ese eda kudouna idia hahonua neganai, idia be lauma dalanai eda dabua ai idia lao bona Dirava idia hanamoa momokani.

Gau ihatoina be, Baibel ese ita ia hagoadaia eda dabua do ita kwatua namonamo. Timoteo Ginigunana 2:9 (NW) be “idia kwatua namonamo dabua” ia gwauraia. Ena be aposetolo Paulo ese hahine edia dabua ia herevalaia, to tatau danu ese unai hakaua herevana idia badinaia be namo. Ita kwatua namonamo dabua ena toana idia namo. Herevana iseda moni be bada eiava maragi, to iseda toana ita naria namonamo diba.

Iseda toana dekenai taunimanima idia itaia haraga gauna be eda huina. Namona be ena toana ia namo. Taunimanima edia huina ena sitaelo be edia gabu ena kastom bona edia huina ia tubu dalana hegeregerena. Toana be aposetolo Paulo ese 1 Korinto 11:​14, 15 ai huina ena sitaelo ia sisibalaia neganai, unai gau rua ia laloa. To, bema hahine ta ena huina ena sitaelo ese ia hahedinaraia ia ura ena toana be tau bamona, eiava tau ta ia ura ena toana be hahine bamona, unai ese Baibel ena hakaua herevana ia utua.​—Deu. 22:5.

Reana tatau edia toana ia namo totona edia adena huina idia sevia namonamo. Gabu haida ai idia laloa bibina huina be namo, to bema bibina huina ia noho, namona be idia utua namonamo.

Gau namba 4 be, eda toana ese tanobada bona ena dala ia hahedinaraia lasi. Aposetolo Ioane ia gwau: “Tanobada do umui ura henia lasi, bona tanobada ena gaudia danu do umui ura henia lasi.” (1 Ioa. 2:​15-17) Inai tanobada dekenai ura dikadia be momo. Ioane ese ia gwauraia gaudia haida be tauanina ena ura dikadia bona kohu hekokorokulaia karadia. Baibel ese kara dika bona kamonai lasi karana ia herevalaia. (Aon. 17:11; Efe. 2:2) Nega momo unai ura bona lalohadai dikadia be taunimanima edia dabua bona edia tauanina ena toana amo idia hedinarai. Unai dainai, reana edia dabua ese tauanina idia koua namonamo lasi eiava lebulebu toana idia hahedinaraia, herahera gaudia momo herea idia atoa, idia goeva lasi, eiava edia toana idia namo lasi momokani. Ita be Iehova ena hesiai taudia dainai, unai bamona Keristani lasi daladia idia hahedinaraia dabua ita atoa lasi.

Namona be tanobada oi tohotohoa lasi, to emu dabua bona tauanina ena toana amo kongregesen lalonai idia noho lo Keristani tatau bona hahine edia haheitalai oi tohotohoa be namo! Idia ura gabeai pablik tok idia henia matamata taudia ese pablik tok henia totona idia hegeregere vadaeni taudia edia dabua idia itaia diba. Ita ibounai ese lagani momo lalonai taunimanima vairanai hesiai gaukara idia karaia vadaeni taudia edia haheitalai amo diba ita abia.​—1 Tim. 4:12; 1 Pet. 5:​2, 3.

Gau namba 5 be, abia hidi maorona ita karaia neganai namona be ita laloatao “Keriso ese sibona ena namo ia tahua lasi.” (Roma 15:3) Iesu ese ia laloa bada gauna be Dirava ena ura ia karaia. Danu, Iesu ese ma haida durua gaukarana ia laloa guna, sibona ena namo be gabeai. Bema iseda dabua ena sitaelo eiava tauanina ena toana be koua gauna ta ita bona hesiai gaukara ita karaia gabuna dekenai idia noho taudia huanai, dahaka ita karaia be namo? Bema Keriso ia hahedinaraia manau karana ita tohotohoa unai ese ita ia durua, mai aonega ida abia hidi ita karaia totona. Aposetolo Paulo ese inai hakaua herevana ia gwauraia: “Ai ura lasi taunimanima idia gwau aiemai gaukara ia dika.” (2 Kor. 6:3) Unai dainai, reana ita haroro henia taudia edia lalona idia koua diba huina ena sitaelo bona dabua ita dadaraia.

Gini Dalana. Iseda toana ia namo totona ita gini namonamo be mai anina danu. Momokani, ita ibounai eda kara ena toana be tamona lasi, bona unai be maoro. To, Baibel ese ia gaukaralaia dalana ai, ta ia gini maoromaoro karana ese ia hahedinaraia sibona ia matauraia bona lalohadai namona ia dogoatao. (Lev. 26:13; Luka 21:28) To, reana tadikaka eiava taihu ta be lagani momo ena gaukara lalonai ia gini namonamo lasi dainai, eiava ia buruka eiava gorere dainai, ia hegeregere lasi ia gini maoromaoro totona eiava heduru gauna ta ia dogoatao be namo. To idia karaia diba taudia be ma haida dekenai idia hereva neganai, idia gini namonamo be namo, kamonai taudia idia laloa lasi eiava idia gwauraia herevana idia hemarailaia karadia ia hahedinaraia garina. Unai hegeregerena, ena be hereva henia tauna be nega ta ta podium dekenai imana ia atoa be kerere lasi, to kamonai taudia be ia dekenai lalohadai namona do idia abia bema podium dekenai ia tabekau lasi.

Gau Idauidau Edia Toana. Iseda toana ia goeva bona ia namo be namo, to namona be haroro gaukara lalonai ita gaukaralaia gaudia danu idia goeva bona edia toana ia namo.

Emu Baibel oi laloa. Iseda Baibel ita gaukaralaia daudau murinai, ita ibounai ese reana matamata ita hoia diba lasi. To, herevana eda Baibel ita gaukaralaia daudau vadaeni, namona be ena toana ese ia hahedinaraia ita naria namonamo.

Haroro baege ita hegaegaelaia daladia be momo, to namona be ena toana ia namo. Nega ta oi itaia pablisa ta be ruma hahine ia hereva henia lalonai eiava tadikaka ta be kongregesen dekenai hereva ia henia lalonai, Baibel siri ia duahia gwauraia neganai Baibel amo pepa idauidau idia moru, a? Unai ese emu matana ia veria, ani? Bema emu Baibel lalonai oi atoa pepadia ese taunimanima edia matana idia veria, reana gabu ma ta dekenai idia oi atoa be namo emu gau idauidau edia toana ia namo totona. Danu, gabu haida ai idia laloa foloa dekenai Baibel eiava tomadiho bukadia ma haida atoa karana be hemataurai lasi karana.

Namona be ita dekenai eda tauanina ena toana namona be mai anina bada. Ma haida ese unai hegeregerena ita idia laloa. To ita dekenai ia be mai anina bada ena badina badana be ita ura “iseda Hahemauri Tauna, Dirava, ena hahediba herevadia do idia hahairaia.”​—Tito 2:​10, NW.