Dirava Ena Ura Tanobada Totona be Dahaka?

 1. Dirava ena ura tanobada totona be dahaka?

DIRAVA ena ura tanobada totona be namo herea. Iehova ia ura tanobada be idia moale bona gorere lasi taudia amo ia honu. Baibel ia gwau “Dirava ese uma ta . . . ia karaia, ladana Eden” bona ia ese “tano dekena amo toana namo au ibounai ia havaraia, bona aniani idia atoa audia danu.” Dirava ese tau bona hahine ginigunadia, Adamu bona Heva ia havaraia murinai, unai gabu hairaina dekenai Ia atodia bona ia hamaorodia: “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua.” (Genese 1:28; 2:​8, 9, 15) Unai dainai Dirava ia ura taunimanima ese natudia idia havaraia, bona tanobada ibounai be paradaiso ai do idia halaoa, bona animal do idia naria.

 2. (a) Edena bamona ita diba Dirava ena ura tanobada totona be do ia guguru? (b) Taunimanima do idia noho hanaihanai herevana dekenai, Baibel be dahaka ia gwau?

² Oi laloa Iehova Dirava ena ura, taunimanima be tanobada paradaiso dekenai do idia noho, be do ia vara momokani, a? Dirava ia gwau: “Lau hereva vadaeni, bona lauegu hereva gauna be do ia vara.” (Isaia 46:​9-11; 55:11) Oibe, Dirava ia ura karaia gaudia ibounai be do ia karaia momokani! Ia gwau, “Ia ese tano do ia noho kava totona ia karaia lasi, to tano mai anina namona, taunimanima idia noholaia diba gabuna, ia karaia.” (Isaia 45:18) Dirava ia ura edena bamona taudia ese tanobada do idia noholaia? Bona ia ura unuseniai do idia noho ela bona edena nega? Baibel ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.”​—Salamo 37:29; Apokalupo 21:​3, 4.

 3. Hari tanobada dekenai dahaka gau dikadia idia vara, bona unai dainai edena henanadai idia vara?

³ Momokani, unai be ia do vara lasi. Hari inai negai, taunimanima idia gorere bona idia mase; idia heatu bona idia ala-ala. Unai be dika. Hari tanobada dekenai idia vara gaudia be Dirava ena ura hegeregerena lasi! Dahaka ia vara? Dahaka dainai Dirava ia ura karaia gauna be ia guguru lasi? Taunimanima ese idia torea bukana ta ese unai ia haerelaia diba lasi, badina guba dekenai unai kerere ia matamaia.

4, 5. (a) Daika ese gaigai ia gaukaralaia Heva ia hereva henia totona? (b) Edena dala ai guna kara namodia ia karaia bona hereva momokani ia gwauraia tauna be henaohenao tauna ai ia lao diba?

⁴ Baibel ena buka ginigunana ese, Eden umana dekenai Dirava ia tuari henia tauna, ia hedinarai dalana ia herevalaia. Baibel ia gwau ia be “gaigai” bamona, to ia be animal ta lasi. Baibel ena buka ginigabena ia gwau “iena ladana be Diabolo bona Satani. Ia be tanobada taudia ibounai ia koia noho gauna.” Baibel ia gwau danu ia be “idaunegai gaigaina.” (Genese 3:1; Apokalupo 12:9) Unai siahu bada aneruna, eiava ita itaia diba lasi laumana, ese gaigai ta ia gaukaralaia Heva ia hereva henia totona. Unai be hegeregere diba tauna ta be doli ia gaukaralaia bona ena be unai diba tauna ia herevahereva, to toana be doli ia hereva bamona. Dirava ese taunimanima totona tanobada ia karaia neganai, unai lauma tauna be ia noho vadaeni.​—Iobu 38:​4, 7.

⁵ To, Iehova ia karaia gaudia ibounai be goevadae dainai, daika ese “Diabolo” bona “Satani” ia havaraia? Ita gwau diba, Dirava ena lauma natuna ta be sibona Diabolo ai ia halaoa. Unai be edena bamona ia vara? Hari inai negai, guna kara namodia ia karaia bona hereva momokani ia gwauraia tauna be henaohenao tauna ai ia lao diba. Unai be edena bamona ia vara diba? Reana ura kererena be unai tauna ena kudouna lalonai ia tubu matamaia. Bema unai ia laloa noho, unai ura kererena be do ia bada. Bena dala ia kehoa neganai, reana ia laloa gauna do ia karaia diba.​—Iamesi 1:​13-15.

 6. Edena dala ai Dirava ena siahu bada natuna ta be Satani Diabolo ai ia lao?

⁶ Satani Diabolo dekenai unai bamona ia vara. Dirava ese Adamu bona Heva ia hamaoroa natudia do idia havaraia bona tanobada do idia hahonua neganai, unai hereva ia kamonai. (Genese 1:​27, 28) Reana Satani ia laloa, ‘Inai taunimanima ibounai ese lau idia tomadiho henia diba, to Dirava lasi!’ Ura kererena be ena kudouna lalonai ia tubu matamaia. Gabeai, Heva dekenai Dirava ia gwauraia koikoi. (Genese 3:​1-5) Unai dainai ia be “Diabolo” ai ia lao, anina be “ladana hadikaia tauna.” Ma danu, ia be “Satani” ai ia lao, anina be “tuari henia tauna.”

 7. (a) Dahaka dainai Adamu bona Heva idia mase? (b) Dahaka dainai Adamu ena natudia ibounai idia buruka bona idia mase?

⁷ Satani Diabolo ese hereva bona dala koikoidia ia gaukaralaia, Adamu bona Heva edia lalona ia veria Dirava idia gwau-edeede henia totona. (Genese 2:17; 3:6) Unai dainai, idia mase, Dirava ia hereva bamona. (Genese 3:​17-19) Adamu ia kara dika neganai, ia be goevadae lasi tauna ai ia lao, unai dainai ena natudia ibounai be ia amo kara dika idia abia. (Roma 5:12) Reana beredi gabua totona idia gaukaralaia tini ta mani ita laloa. Bema tini dekenai maka ta ia noho, unai tini dekenai idia karaia beredi ta ta dekenai dahaka do ia vara? Beredi ta ta dekenai unai maka do ia noho danu. Unai hegeregerena, taunimanima ibounai ese Adamu amo unai “maka” eiava kara dika idia abia. Unai dainai, taunimanima ibounai idia buruka bona idia mase.​—Roma 3:23.

8, 9. (a) Satani ese dahaka hepapahuahu herevana ia gwauraia? (b) Dahaka dainai Dirava ese unai nega ai gwau-edeede taudia ia hadikaia ore lasi?

⁸ Satani ese Adamu bona Heva edia lalona ia veria Dirava idia gwau-edeede henia totona neganai, Dirava gwau-edeede henia karana ia hamatamaia. Ia ese Iehova ena lohia dalana ia hepapahuahulaia. Unai be hegeregere, Satani ia gwau: ‘Dirava be lohia tauna dikana. Ia be koikoi herevadia ia gwauraia bona ia lohiaia taudia dekenai gau namodia ia henia lasi. Dirava ese taunimanima ia lohiaia be anina lasi. Idia ese dahaka be namo bona dahaka be dika idia abia hidi diba. Bona egu lohia dalana henunai namo bada do idia davaria.’ Dirava be unai bamona hadikaia herevadia dainai dahaka do ia karaia? Haida idia laloa unai nega ai Dirava ese unai gwau-edeede taudia ia hamasedia be namo. To unai ese Satani ena hepapahuahu herevana do ia hamaoromaoroa, a? Unai ese do ia hamomokania Dirava ena lohia dalana be maoro, a?

⁹ Iehova ena hahemaoro goevana dainai, unai nega ai unai gwau-edeede taudia ia hamasea lasi. To nega ia henia, unai amo Satani ena hepapahuahu herevana ia haerelaia diba, bona ia hamomokania diba Diabolo be koikoi tauna. Unai dainai Dirava ese taunimanima ia koua lasi Satani ena siahu henunai sibodia do idia lohiaia totona. Iehova ese unai bamona ia karaia ena badina, bona unai hepapahuahu ia hamaoromaoroa totona nega bada ia henia ena badina, be inai buka ena Karoa 11 ese do ia herevalaia. To, namona be inai ita laloa: Adamu bona Heva ese Satani, idia totona gau namona ta ia karaia lasi tauna unai, ena hereva idia abia dae be maoro, a? Bona idia be mai edia maoro idia dekenai gau ibounai ia henia tauna Iehova, be koikoi tauna dikana idia gwauraia totona, a? Bema unai be oi, dahaka do oi karaia?

10. Edena dala ai Satani ena hepapahuahu herevana ita haerelaia diba?

¹⁰ Namona be unai henanadai ita laloa, badina hari ita dekenai unai henanadai be mai anina bada. Oibe, dala ia noho Iehova ena lohia siahuna ita abia isi bona Satani ena hepapahuahu herevana do Ia haerelaia. Namona be oi abia dae Iehova be emu Lohia Tauna bona danu oi hahedinaraia Satani be koikoi tauna. (Salamo 73:28; Aonega Herevadia 27:11) Madi, taunimanima bilioni momo huanai haida sibona ese unai idia abia hidi. Unai ese mai anina bada henanadaina ia havaraia, Momokani Baibel ia gwau Satani ese inai tanobada ia lohiaia, a?

11, 12. (a) Satani ese Iesu ia dibagania karana amo edena bamona ia hahedinaraia ia be inai tanobada ena lohia? (b) Dahaka gau ma ta ese ia hamomokania Satani be inai tanobada ena lohia?

¹¹ Iesu ia diba momokani Satani ese inai tanobada ia lohiaia. Hoa dalanai, Satani ese Iesu dekenai “tanobada edia basileia ibounai mai edia hairaina” ia hahedinaraia. Bena Satani ese Iesu ia gwauhamata henia: “Bema oiemu kwarana oi atoa diho, bona bema lau dekenai oi tomadiho, vadaeni inai ibounai be oi dekenai do lau henia.” (Mataio 4:​8, 9; Luka 4:​5, 6) Mani inai oi laloa. Bema Satani be unai basileia edia lohia tauna lasi, unai hereva ese Iesu do ia dibagania, a? Lasi! Iesu ia diba inai tanobada ena gavamani ibounai be Satani ena. Unai dainai, bema idia be Satani ena lasi, Iesu ese unai do ia gwauraia.

¹² Momokani, Iehova be siahu ibounai Diravana, bona iunives ia Havaraia Tauna. (Apokalupo 4:11) To, Baibel ia gwau lasi Iehova Dirava eiava Iesu Keriso ese inai tanobada ia lohiaia. Iesu ia gwau Satani be “inai tanobada ena lohia.” (Ioane 12:31; 14:30; 16:11) Baibel ia gwau Satani Diabolo be “inai tanobada ena dirava.” (2 Korinto 4:​3, 4) Keristani aposetolo Ioane ese unai tuari henia tauna, eiava Satani ia herevalaia neganai, ia gwau: “Satani ese tanobada taudia ibounai ia gunalaia noho.”​—1 Ioane 5:19.

13. Dahaka dainai tanobada matamata ia vara be namo?

¹³ Lagani ta ta ai, tanobada be ia dika ia lao noho. Ia be idia tuari ami taudia, koikoi momo politikol bona tomadiho gunalaia taudia, bona hebogahisi lasi raskol taudia amo ia honu. Tanobada ibounai ita hanamoa diba lasi. Baibel ese ia hahedinaraia kahirakahira Dirava ese ena Aramagedono tuarina ai inai tanobada dikana do ia hadikaia ore. Bena kara maoromaoro tanobadana do ia havaraia.​—Apokalupo 16:​14-16.

14. Dirava ese daika ia abia hidi Ena Basileia ena Lohia Tauna ai ia lao totona, bona Baibel ese edena bamona unai ia perovetalaia?

¹⁴ Iehova Dirava ese Iesu Keriso ia abia hidi Ena guba Basileiana, eiava gavamanina ena Lohia Tauna ai ia lao totona. Idaunegai, Baibel ia peroveta: “Badina be ita totona natuna ta ia vara! Dirava ese ita dekenai, natuna mero do ia henia! Bona ia be iseda gunalaia tauna do ia lao, bona iena ladana do idia gwauraia, . . . ‘Maino ena Lohia.’ Iena King siahuna, be do ia bada daekau lao, bona iena basileia be nega ibounai, mai maino danu do ia noho.” (Isaia 9:​6,  7) Iesu ese ena murinai idia raka taudia ia hadibaia unai gavamani totona do idia guriguri: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:10) Inai buka dekenai gabeai do ita itaia, kahirakahira Dirava ena Basileia ese inai tanobada ena gavamani ibounai do ia kokia bona edia gabu be ia ese do ia abia. (Daniela 2:44) Bena Dirava ena Basileia ese tanobada paradaisona do ia havaraia.

15. “Tanobada matamata” be dahaka?

¹⁵ Baibel ia gwau: “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” (2 Petero 3:13; Isaia 65:17) Nega haida Baibel ese “tanobada” ia gwauraia neganai, anina be tanobada dekenai idia noho taudia ia herevalaia. (Salamo 97:1) Unai dainai kara maoromaoro “tanobada matamata” ese Dirava ena lalonamo idia abia taudia ia herevalaia.

16. Dirava ese ia lalonamo henia taudia dekenai dahaka harihari gauna namona do ia henia, bona unai harihari gauna ita abia totona dahaka ita karaia be namo?

¹⁶ Iesu ia gwauhamata ia mai noho tanobada matamatana ai, Dirava ese ia lalonamo henia taudia be “mauri hanaihanai” do idia abia. (Mareko 10:30) Mani emu Baibel oi kehoa Ioane 3:16 bona 17:3 dekenai, unuseniai Iesu ese mauri hanaihanai ita abia totona do ita karaia gauna ia herevalaia. Tanobada paradaisona ai, Dirava amo unai harihari gauna namona do idia abia taudia ese do idia abia hahenamodia be Baibel dekenai mani oi itaia.

17, 18. Edena bamona ita diba tanobada hegegemadai taunimanima be maino bona noho namo dekenai do idia noho?

¹⁷ Kara dikadia, tuari, taravatu utua karadia, bona dagedage be do idia ore. “Kara dika taudia do idia ore. . . . To manau taudia ese noho gabuna tano do idia abia.” (Salamo 37:​10, 11) Maino do ia vara badina ‘tuari be Dirava ese do ia hadokoa noho, tanobada kahana ibounai dekenai.’ (Salamo 46:9; Isaia 2:4) Bena “kara maoromaoro tauna do ia tubu, maino danu be bada herea ela bona hua do ia ore”​—anina be maino do ia noho hanaihanai!​—Salamo 72:​7, BHğ.

¹⁸ Iehova idia tomadiho henia taudia be do idia noho namo. Baibel negadiai idia noho Israela taudia ese Dirava idia kamonai henia neganai, idia noho namo. (Levitiko 25:​18, 19) Vaira negana ai Paradaiso dekenai unai bamona do ita noho danu!​—Isaia 32:18; Mika 4:4.

19. Edena bamona ita diba Dirava ena tanobada matamatana ai aniani be do idia ore lasi?

¹⁹ Aniani be do ia ore lasi. Salamo torea tauna ia gwau: “Koni momo herea, be tano dekenai do ia vara namonamo. . . . Ororo gabudia danu dekenai, uiti bona aniani avadia do idia tubu namonamo.” (Salamo 72:16) Iehova Dirava ese kara maoromaoro taudia do ia hanamoa, bona ‘tano ena anina do idia vara namonamo.’​—Salamo 67:6.

20. Dahaka dainai ita diba momokani tanobada ibounai be paradaiso ai do ia lao?

²⁰ Tanobada ibounai be paradaiso ai do ia lao. Goevadae lasi taudia ese idia hadikaia tanobadana be paradaiso ai ia lao neganai ruma bona uma namodia do idia noho. (Isaia 65:​21-24; Apokalupo 11:18) Taunimanima ese idia noholaia tanobada ena kahana be do idia hanamoa ela bona tanobada ibounai be gabu hairaina ai do ia lao bona aniani namodia amo do ia honu, Eden umana bamona. Bona Dirava ese ena ‘imana do ia kehoa noho bena mauri gaudia ibounai edia ura do ia hagugurua noho.’​—Salamo 145:​16, NW.

21. Dahaka ese ia hahedinaraia taunimanima bona animal huanai maino do ia noho?

²¹ Taunimanima bona animal be maino dekenai do idia noho. Dagedage animal bona taunimanima ese idia naridia animal be do idia aniani hebou. Natuna maragina be hari idia dagedage animal dekenai do ia gari lasi.​—Isaia 11:​6-9; 65:25.

22. Gorere dekenai dahaka do ia vara?

²² Gorere do ia ore. Iesu be Dirava ena guba Basileia ena Lohia Tauna dainai, taunimanima ibounai edia gorere do ia hanamoa, guna tanobada ai ia noho neganai ia karaia karadia do ia hereaia momokani. (Mataio 9:35; Mareko 1:​40-42; Ioane 5:​5-9) Bena “ta ese do ia gwau lasi, ‘Lau be gorere.’ ”​—Isaia 33:24; 35:​5, 6.

23. Dahaka dainai toreisi lou ese iseda lalona do ia hamoalea bada?

²³ Mase taudia be do idia toreisi lou bona mauri hanaihanai do idia abia diba. Dirava ese ia lalodiatao mase taudia, be do idia toreisi lou. Momokani, “mase taudia dohore idia toreisi lou, kara maoromaoro taudia, bona kara maoromaoro lasi taudia danu.”​—Kara 24:15; Ioane 5:​28, 29.

24. Tanobada Paradaisona ai do oi abia maurina oi laloa neganai, emu hemami be edena bamona?

²⁴ Idia ura iseda Havaraia Tauna Badana, Iehova Dirava, idia dibaia bona hesiai henia taudia ibounai totona vaira negana namona ia noho! Iesu be ia badinai ia mase kara dika tauna ia hereva henia neganai, ia be vaira negana ai do ia vara paradaisona ia herevalaia: ‘Lau hamaoroa oi dekenai, ita ruaosi Paradaiso dekenai do ita noho.’ (Luka 23:43) Gau badana be Iesu Keriso ita dibaia, badina ia amo unai hahenamo ibounai do ita abia.