Ariara Hahinena Dika Rohorohona​—⁠Idia Hadikaia Ore

“Aleluia! Dirava ita hanamoa! Hahemauri, bona hairai, bona siahu, be iseda Dirava dekenai idia noho. Badina be iena kota henia kara be momokani bona maoromaoro. Ia ese ariara hahine badana ia kota henia vadaeni, unai hahine ese iena matabodaga kara dekena amo tanobada ia hadikaia. Dirava ese ia panisia, badina be unai hahine ese Dirava ena hesiai taudia ia alaia mase dainai.”​—⁠APOKALUPO 19:​1, 2.

 1. Ariara hahinena badana be edena bamona “tanobada ena king” ida idia heudahanai, bona ena kara dainai dahaka ia vara?

ITA kikilaia vadaeni gaudia be mai anina bada. To namona be ita laloa: Apokalupo 17:2 ese danu ariara hahinena badana ena heudahanai karadia ia gwauraia, “tanobada ena king” be ia ida idia karaia karadia unai. Ena be ia moru vadaeni, to ia ese tanobada ia tura henia noho bona tanobada ena lohia taudia ia biagudia toho, sibona ena ura dikadia hegeregeredia. (Iakobo 4:⁠4) Babulono Badana bona politikol lohiadia be lauma dalanai unai bamona idia heudahanai dainai, kerere lasi taudia milion momo idia mase vadaeni! Ariara hahinena badana be mai ena kerere, badina be Tanobada Ibounai Tuarina Ginigunana lalonai idia tuari heheni besedia be ia ese ia durudia, bona Tanobada Ibounai Tuarina Iharuana lalonai ia karaia kara dikadia be “ororo bamona idia daekau lao ela bona guba dekenai”! (Apokalupo 18:⁠5) Dahaka dainai unai bamona ita hereva?

 2. (a) Franz von Papen ese Adolf Hitler edena bamona ia durua Germany dekenai lohia dagina do ia abia totona, bona Germany ena lohia gunana ta ese Franz von Papen be edena bamona ia gwauraia? (b) Nazi Gavamani bona Vatican idia gwauhatama heheni neganai, dahaka hereva rua idia hunia? (Henu herevana itaia danu.)

² Vadaeni, mani inai umui laloa: Germany dekenai, lohia dikana Adolf Hitler ese lohia dagina edena bamona ia abia? Ia abia, badina Katolik tauna mai ladana badana unai dubu orea lalonai ese politikol dalana hehunina amo ia durua dainai; unai tau be Germany ena lohia gunana ese inai bamona ia gwauraia, “ena turana hadikadia karana ai ia ese Iuda Iskariote ia hanaia momokani.” Unai tau ladana Franz von Papen ese Katolik Action oreana bona bisinesi gunalaia taudia ia haboudia, komiunisi politikol dalana do idia koua, bona Germany be Hitler henunai do idia hatamonaia totona. Von Papen ese unai bamona ia durua dainai, Hitler ese dagi badana ia henia, bona ia mai ena heduru taudia ida ia siaidia Rome dekenai, dala do idia tahua, Nazi gavamani bona Roman Katolik dubu oreana do idia gwauhamata heheni totona. Pope Pius Namba 11 ese unai Germany taudia ia hereva henidia, ia gwau ia moale badina be “hari inai negai, Komiunism ia inai henia momokani tauna ta ese Germany ena Gavamani ia gunalaia noho,” bona July 20, 1933 ai, Roman Katolik dubu oreana ena hedikwota dekenai, Cardinal Pacelli (nega daudau lasi murinai Pope Pius Namba 12 ai ia lao tauna) ese gwauhamata pepana ia sainia.a

 3. (a) Guna idia vara gaudia edia sivarai ia torea tauna ta ese Nazi Gavamani bona Vatican ese idia karaia Gwauhamatana edena bamona ia gwauraia? (b) Moale karadia be Vatican dekenai idia karaia noho lalonai, dahaka dagi badana hereana be Franz von Papen idia henia? (c) Franz von Papen be edena bamona Nazi taudia ia durua, Austria idia abia totona?

³ Sivarai torea tauna ta ena hereva be inai: “Inai Gwauhamata, [ia be Roman Katolik dubu oreana ena hedikwota taudia ida idia gwauhamatalaia gauna] be kwalimu ahuna badana Hitler dekenai. Idau bese taudia ese ia idia hanamoa negana ginigunana be unai, bona unai hahenamo be dagi hereadaena tauna amo ia mai.” Moale karadia be Vatican dekenai idia karaia noho lalonai, Pacelli ese Roman Katolik dubu oreana ena dagi bada hereana na von Papen ia henia, Grand Cross of the Order of Pius unai.b Winston Churchill be iena buka ladana The Gathering Storm lalonai ia gwau, “Taunimanima momo idia laloa von Papen be Katolik tauna namona ta,” unai dainai ena dubu orea taudia edia lalona ia ania, Nazi taudia do idia durudia Austria do idia abia totona. Unai neganai Cardinal Innitzer ia hahegani, Austria ena dubu iboudiai dekenai swastika pepedia do idia hadaea, edia gaba do idia toua, bona Adolf Hitler ena betde matauraia totona ia dainai do idia guriguri.

4, 5. (a) Badina be dahaka Vatican be mai ena kerere bada herea rara dekenai? (b) Germany ena Katolik bisop taudia ese Hitler edena bamona idia durua hedinarai?

⁴ Unai dainai Roman Katolik dubu oreana ena hedikwota, Vatican, be mai ena kerere bada herea rara dekenai! Babulono Badana gunalaia oreana badana hegeregerena, Hitler idia durua bada lohia siahuna do ia abia totona, bona ena lalona idia hagoadaia danu. Edia kerere idia habadaia dalana be inai: Hitler ena dagedage karadia bona ena ala-ala karadia idia gwauraia dika lasi. Nazi taudia edia dagedage negana daudauna lalonai, Katolik tuari taudia handred tausen momo be Nazi lohia dalana abia isi totona idia tuari bona idia mase, bona taunimanima milion momo be Hitler ena gas rumadia lalodiai idia hamasedia, to unai nega lalonai Rome ena pope ese unai dika ia herevalaia hedinarai lasi.

⁵ Germany ena Katolik bisop ese Hitler idia durua hedinarai. Unai neganai Germany be tuari lalonai ia durua besena, Japan ese Pearl Harbor ia tuari henia dinanai, inai ripoti be The New York Times niuspepa lalonai idia torea: “Germany ena Katolik Bisop, Fulda dekenai idia hebou, be idia gwau namona be ‘tuari gurigurilaia herevana’ idauna be edia guriguri iboudiai edia matamana ai bona edia dokona ai do idia duahia hedinarai be namo. Unai guriguri amo Dirava do idia noia, Germany ena tuari taudia do ia hanamodia bona do ia hakwalimudia, bona edia mauri do ia naria. Unai bisop ese danu Katolik haroro taudia idia oda henidia, hua ta ta iboudiai, Sunday ta ai idia ese Germany ena tuari taudia edia sivarai do idia harorolaidia, ‘tano dekenai, davara dekenai bona guba padanai’ idia tuari taudia unai.”

⁶ Roman Katolik dubu oreana ena hedikwota, Vatican bona Nazi taudia bema idia ura heheni lasi, reana hisihisi badadia momo idia vara lasi; unai hisihisi haida be inai: Taunimanima 55 milion be unai tuari lalonai idia aladia mase; Iuda taudia 6 milion idia hamasedia, badina be idia be Germany bese taudia korikoridia lasi dainai; Iehova ena Witness taudia momo, horoa taudia bona “mamoe idaudia” ese dagedage bada herea idia hisihisilaia, bona idia momo be Nazi taudia edia dibura kamepadia lalodiai idia mase.​—⁠Ioane 10:​10, 16.

Ariara Hahine Ia Itaia Namonamo

⁷ Apokalupo ena peroveta herevadia lalodiai ia hedinarai matahanaina ma ta be mai anina bada! Karoa 17, siri 3 ela bona 5 lalonai, Ioane ese aneru be inai bamona ia gwauraia: “Taunimanima noho lasi tano dekenai lau ia abia lao. Unuseni hahine ta, dagedage gauna kakakakana ta latanai ia helai, lau itaia. Unai dagedage gauna ena kwarana be 7, bona iena doana be 10. Ia latanai be Dirava hadikaia ladana momo herea idia torea. Unai hahine ena dabua kala be kakakaka bona ma sisina kakakakana. Iena herahera gaudia be golo, davana bada nadidia, bona davana bada kavabukavabu. Iena imana dekenai golo kapusi ia dogoatao. Kapusi be iena matabodaga gau dika rohorohodia bona gau mirodia dekenai ia honu. Hahine ena baguna dekenai be ladana ta ia torea. Inai ladana ena anina be hunia gauna: ‘Babulono badana, ariara hahine ibounai bona tanobada ena kara mirodia ibounai edia sinana.’ ”

 8. (a) Ariara hahinena badana ena golo kapusina lalonai dahaka gaudia idia noho dainai ena kara idia hahedinaraia goevagoeva? (b) Babulono Badana be edena dala ai “dabua kala be kakakaka bona ma sisina kakakakana” ia hahedokilaia bona “iena herahera gaudia be golo, davana bada nadidia, bona davana bada kavabukavabu” ia gaukaralaia?

⁸ Ioane ese Babulono Badana ia itaia namonamo unai. Unai tano gagaena be unai hahine ena gabu korikorina; idia noholaia dagedage gaudia bogaragidiai ia noho be maoro. Ena be unai ariara hahinena badana ena imana dekenai ia dogoatao kapusina ena toana be namo herea, golo bamona, to kapusi lalonai idia noho gaudia ese ena kara idia hahedinaraia goevagoeva. Dirava ena matanai iena inuinu gaudia be dika rohoroho. Tanobada ia tura henia, hahediba herevadia koikoidia ia hadibaia, kara maoromaoro ia badinaia lasi, bona ia be politikol oreadia ida idia gaukara hebou​—⁠unai kara iboudiai be Iehova, “tanobada ibounai ena kota naria tauna” ese ia badu henia. (Genese 18:​22-26; Apokalupo 18:​21, 24) Hari hahine ena dabua ena toana be namo herea! Iena dubu bada hereadia mai hairaidia bona ena gabu helagadia idauidau dainai iena sivarai be taunimanima momo idia kamonai vadaeni. “Ariara hahine badana” ena stailo hegeregerena, iena fada taudia bona hahelaga taudia be davana bada dabuadia idia hahedokilaia, unai dabua edia kala be kakakaka bona ma sisina kakakaka bona ielo.​—⁠Apokalupo 17:⁠1.

 9. Babulono Badana be nega daudau lalonai edena bamona ia kerere rara dekenai, bona Ioane ese ena toana ia gwauraia hedinarai neganai ena hereva ginigabedia be dahaka?

⁹ To iena kerere rara dekenai ese unai ibounai ia hanaia. Nega daudau lalonai ia karaia kereredia edia davana be Iehova ese ia henia gwauraia! Iena kerere haida be inai: Dirava ena Natuna, Lohiabada Iesu Keriso hamasea dalana ia karaia, aposetolo haida ia hamasedia, tuari haida ladadia Crusades ia havaraia, kota dikadia ladana Inquisition ia karaia, tomadiho tuaridia ia havaradia, bona hari inai nega lalonai ia ese lohia taudia dagedagedia ia durudia. (Kara 3:15; Heberu 11:​36, 37) Unai sibona lasi, to vanegai laganidia lalodiai Iehova ena Witness taudia idia pididia mase, idia taudia dae ela bona idia mase, ira bona tuari kaia amo idia aladia mase, bona dibura kamepadia lalodiai idia dagedage henidia ela bona idia mase. Unai dainai Ioane ena hereva ita hoalaia lasi, ia gwau: “Bona lau itaia, unai hahine be ia kekero vadaeni. Momokani, ia ese Dirava ena taudia edia rarana, bona Iesu idia badinaia dainai idia alaia mase taudia edia rarana ia inua dainai unai hahine ia kekero”!​—⁠Apokalupo 17:⁠6.

‘HAHINE BONA DAGEDAGE GAUNA EDIA SIVARAI HEHUNINA’

¹⁰ Ioane ese unai ia itaia neganai, ia “hoa dikadika.” Hari inai negai ita danu ita hoa dikadika! Lagani 1930 amo ema bona lagani 1945, “ariara hahine badana” ese Katolik Action oreana bona politikol daladia hehunidia ia gaukaralaia, Iehova ena kamonai witness taudia dagedage henidia bona edia gaukara taravatulaia totona. Ema bona harihari, Babulono Badana ena siahu ia hegeregere gabudia ai, ia ese Iehova ena Witness taudia edia gaukara, Dirava ena Basileia ena sivarai namona harorolaia gaukarana, be ia koua bona ia gwauraia dika. Ariara hahinena badana ena haroro taudia ese taunimanima milion momo be iena tomadiho oreadia lalodiai idia koudia noho dainai, unai haroro taudia be “matakepulu taudia, bona matakepulu taudia idia hakaua lao noho,” idia hakaudia lao ela bona mase hanaihanai gabuna. Aposetolo Paulo be ia gwau, “Lau be taunimanima iboudiai edia rara amo lau goeva,” to hari ariara hahinena badana be nega ta unai bamona ia hereva diba lasi.​—⁠Mataio 15:​7-9, 14; 23:13; Kara 20:⁠26, NW.

11, 12. Ariara hahinena dika rohorohona be ia latanai ia helai “dagedage gauna kakakakana” ena hehuni sivaraina be dahaka, bona lagani 1942 lalonai Iehova ena Witness taudia be edena bamona unai sivarai hehunina ena anina idia diba?

¹¹ Aneru ese Ioane ia itaia ia hoa dikadika, unai dainai ia nanadaia, ia gwau: “Badina dahaka oi hoa noho? Inai hahine ena sivarai, hunia gauna, bona ia latanai hahine ia helai dagedage gauna, mai ena kwarana 7 bona doana 10, inai sivarai oi dekenai do lau hamaoroa.” (Apokalupo 17:⁠7) Hari “dagedage gauna” be dahaka? Lagani 600 bona ma haida idia do noho ema bona Ioane ese unai ia itaia neganai, peroveta tauna Daniel ese matahanai ta lalonai dagedage gaudia ia itadia, bona ta ese ia hamaoroa idia ese “pavapava,” o politikol gavamanidia idia laulaulaidia, tanobada dekenai idia noho gaudia unai. (Daniel 7:​2-8, 17; 8:⁠2-8, 19-22) Matahanai lalonai Ioane ese unai bamona gavamani ia itadia​—⁠“dagedage gauna kakakakana ta” lalonai idia haboudia. Gauna be taunimanima ese idia havaraia oreana, League of Nations; lagani 1920 lalonai unai orea be tanobada dekenai ia hedinarai, to Tanobada Ibounai Tuarina Iharuana be lagani 1939 lalonai ia vara neganai, unai orea be guri dobu masemasena lalonai ia diho bona unuseniai ia noho kava. To, hari hahine bona ia latanai hahine ia helai dagedage gauna edia sivarai, “hunia gauna,” be dahaka?

¹² Dirava ena ura hegeregerena, lagani 1942 lalonai unai sivarai hehunina ena anina be Iehova ena Witness taudia ia hadibalaidia. Unai neganai tanobada besedia be Tanobada Ibounai Tuarina Iharuana idia karaia badabada, bona Iehova ena Witness taudia momo idia laloa unai tuari do ia bada ia lao ela bona Aramagedono do ia vara. To Iehova ena lalohadai be idau! Gaukara momo ia do noho, iena Witness taudia ese do idia karaia! September 18 ela bona 20, lagani 1942 lalonai, edia Tanobada Matamatana Tiokratik Hebouheboudia idia abia; Cleveland, Ohio, U.S.A. dekenai, Watch Tower Society ena president Nathan H. Knorr ese pablik haroro ladana “Maino​—⁠Do Ia Noho Daudau Diba A?” ia harorolaia. Unai hereva lalonai ia ese Apokalupo 17:⁠8 ia herevalaia, unai siri ese “dagedage gauna kakakakana” ia gwauraia, ia gwau: “Gunaguna ia noho, to harihari ia noho lasi. To nega daudau lasi, ia be guri dobu masemase gabuna dekena amo do ia daekau, vadaeni mase hanaihanai gabuna dekenai do ia lao.” Ia hahedinaraia, League of Nations be guna ia noho, lagani 1920 amo ema bona lagani 1939. To Tadikaka Knorr be unai hereva ia harorolaia neganai, unai “dagedage gauna” be ia noho lasi, badina be League of Nations ia ore dainai. To tuari murinai, unai orea, bese idauidau edia, be guri dobu masemase gabuna amo ia daekau. Unai hereva, Bible amo ia gwauraia, be gabeai ia momokani a? Momokani ena anina ia vara! Lagani 1945 lalonai bese idauidau edia “dagedage gauna” be guri dobu masemase gabuna amo ia raka lasi, ena ladana matamatana idia hatoa United Nations.

13. Babulono Badana be edena bamona United Nations “dagedage gauna” ida matabodaga karadia idia karaia noho?

¹³ Ena be Babulono Badana ia manoka badina be ia moru dainai, to ariara hahinena ta bamona, ia be United Nations “dagedage gauna” ida matabodaga karadia idia karaia noho. Unai hegeregere, June 1965 lalonai, tanobada ena tomadiho oreadia badadia 7 edia gunalaia taudia, sibodia idia gwauraia Keristen oreadia edia, bona Keristen lasi edia danu, be San Francisco dekenai idia hebou, United Nations oreana ena betde namba 20 idia moalelaia totona.c Unai lagani lalonai, Pope Paul Namba 6 ese United Nations ia gwauraia, ia gwau ia be “lalo-tamona bona maino helarona ginigabena,” bona gabeai Pope John Paul Iharuana ese ena helaro ia gwauraia hedinarai, ia gwau, “United Nations oreana ese maino bona hahemaoro goevagoeva naria gaukarana do ia gunalaia ela bona hanaihanai.” Lagani 1986 lalonai, tanobada ibounai ena tomadiho koikoi basileiana ese United Nations ena Bese Iboudiai edia Maino Laganina harorolaia gaukarana ia gunalaia. To edia guriguri dainai maino momokani bona noho namo momokani be idia vara a? Lasi vaitani! United Nations besedia momo ese idia hahedinaraia ariara hahinena badana idia ura henia momokani lasi.

Ariara Hahine Idia Hadikaia Ore

¹⁴ Nega korikori do ia ginidae neganai, “dagedage gauna kakakakana” be mase hanaihanai gabuna dekenai do ia lao. To unai ia do karaia lasi neganai, bona Dirava ena orea taudia do ia tuari henidia negana ginigabena ia do ginidae lasi neganai, unai United Nations dagedage gauna ese gaukara idauna ta do ia karaia. Iehova ‘ese iena palani be dagedage gauna bona ena doana mai edia tuari oreadia edia kudoudia lalodiai do ia atoa.’ Unai dainai dahaka do ia vara? Dirava ena aneru ena haere be inai: “Bona dagedage gauna mai ena doana 10, oi itaia vadaeni gaudia ese ariara hahine do idia badu henia. Do idia hadikaia momokani, iena dabua do idia kokia, kopina kavakava do idia rakatania. Vadaeni iena tauanina do idia ania, bona lahi dekenai do idia gabua.” Guna “ia ese sibona ia habadaia, bona lebulebu idauidau ia karaia momo,” to unai ibounai do ia doko. Ena dubu hairaidia bona ena tano bona kohu momo ese do idia hamauria lasi. Aneru ia gwau: “Dina tamona lalonai hisihisi idauidau ia dekenai do idia ginidae, gorere, lalohisihisi, bona hitolo bada. Lahi ese do ia araia ore, badina be Lohiabada Dirava, unai lebulebu hahine ia kota henia Diravana be mai ena siahu bada.”​—⁠Apokalupo 17:​16, 17; 18:​7, 8.

15. Ariara hahinena ena politikol turadia bona bisinesi badadia gunalaia taudia ese ena mase edena bamona do idia laloa?

¹⁵ Iena politikol turadia be ena mase do idia taitailaia, do idia gwau: “Madi o, madi o, Babulono e, hanua bada herea, goada hanuana, hora tamona lalonai oiemu kerere davana oi abia vadaeni.” Unai hegeregerena, bisinesi badadia gunalaia taudia, ia ida moni be dala kereredia amo idia abia taudia, be “do idia lalohisihisi bada, bona do idia tai. Do idia gwau, ‘Madi o, madi o, . . . hora tamona lalonai iena kohu ibounai idia ore vadaeni.’ ”​—⁠Apokalupo 18:​9-17.

16. Ariara hahinena badana do idia hadikaia ore neganai, Dirava ena orea taudia ese dahaka do idia karaia, bona Apokalupo bukana ese unai edena bamona ia hamomokania?

¹⁶ To Dirava ena orea taudia be dahaka do idia karaia? Aneru ena hereva be mai anina idia dekenai, ia gwau: “Gubai noho taudia e, Babulono ena moru do umui moalelaia, Dirava ena helaga taudia, bona aposetolo taudia bona peroveta taudia, do umui moale bada, badina be umui dekenai Babulono ese ia kara henia hegeregerena, Dirava ese ena dika davana ia henia vadaeni.” Do idia negea diho haraga, bena Iehova ena ladana helagana do ia hadikaia lou lasi. Ariara hahinena badana do idia hadikaia ore neganai, do idia moale bona kwalimu anedia do idia abia Iehova hanamoa totona. Do idia boiboi hebou mai edia moale ida, do idia gwau: “Aleluia! Dirava ita hanamoa! Hahemauri, bona hairai, bona siahu, be iseda Dirava dekenai idia noho. Badina be iena kota henia kara be momokani bona maoromaoro. Ia ese ariara hahine badana ia kota henia vadaeni, unai hahine ese iena matabodaga kara dekena amo tanobada ia hadikaia. Dirava ese ia panisia, badina be unai hahine ese Dirava ena hesiai taudia ia alaia mase dainai.”​—⁠Apokalupo 18:​20–19:⁠3.

17. Ariara hahinena badana idia hadikaia ore murinai, Dirava ese ena hahemaoro karadia be edena bamona do ia hagugurudia?

¹⁷ Unai murinai “king ibounai edia King, bona lohia ibounai edia Lohia” be “vain huahua moia gabunai . . . Siahu Ibounai Dirava ena badu, siahu dikadika” ena gabu dekenai do ia moimoi, Aramagedono dekenai. Unuseniai ia ese lohia dikadia bona Satana ena orea taudia oredia tanobada dekenai do ia haoredia momokani. Manu ese edia tauanina do idia ania ore. (Apokalupo 16:​14, 16; 19:​11-21) Namona be ita moale bada badina be Dirava ena nega be ia kahirakahira vadaeni, unai nega do ia ginidae neganai, miro gaudia bona taunimanima hakereredia gaudia iboudiai be iseda tanobada hairaina amo do ia kokia!

18. Apokalupo bukana ese ia gwauraia gaudia edia gau badana bona ginigabena be dahaka?

¹⁸ Apokalupo bukana ese ia gwauraia gaudia edia gau badana bona ginigabena be unai a? Lasi, do lasi! Badina be 144,000 taudia oredia do idia toreisi lou bona guba dekenai do idia daekau neganai, Mamoe ena Natuna ena headava do ia vara. Iena “headava matamata kekeni” “ia herahera namo herea, dabua namona ia karaia, iena adavana totona ia hegaegae vadaeni” kekenina, be “guba matamatana” lalonai idia atoa, bona unuseni amo ia kara hegeregere ia diho bamona, ena adavana ia durua, Iehova ena palani karaia totona, unai palani be ‘gau ibounai do ia karaia matamata.’ Headava matamata hahinena be mai ena hairai, hanua helagana, Ierusalem matamatana, ena hairai unai; unai hanua be Siahu Ibounai Diravana, Iehova ese ena hairai amo ia hadiaria, bona Mamoe ena Natuna be ena lamepa ai ia lao. (Apokalupo 21:​1-5, 9-11, 23) Apokalupo ena anina ia guguru unai, badina be Iehova ese ena ladana ia hahelagaia vadaeni, bona Mamoe ena Natuna, Keriso Iesu mai ena adavana, Ierusalem Matamatana, ese kamonai taudia idia hanamodia hamatamaia; mauri hanaihanai tanobada ena Paradaiso lalonai idia henidia.

19. (a) Hahemauri do ita abia totona, Babulono Badana ita rakatania sibona lasi, to dahaka danu ita karaia be gau badana? (b) Dahaka idia boiboilaia loulou do ita karaia haraga totona, bona dahaka ita karaia be namo?

¹⁹ Tomadiho koikoi ena koikoi karadia oi lalo-pararalaia vadaeni bona Babulono Badana oi rakatania vadaeni, a? Keriso Iesu ena amo Iehova Dirava dekenai oi mai, bona bapatiso abia totona oi be mai emu lalona ibounai ida oi gwauhamata henia vadaeni, a? Hahemauri abia dalana tamona be unai! Iehova ena hahemaoro karana ginigabena ena nega be ia kahirakahira dainai, oi idia boiboi henia loulou do oi kara haraga totona: “Lauma Helaga bona Headava Matamata Hahine idia gwau, ‘Oi mai.’ ” Oibe, “ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.” (Apokalupo 22:17) Unai bamona idia boiboi noho. Bema oiemu lalona oi hadaia maoromaoro, bona bema Iehova ena gwauhamata taudia ta hegeregerena unai lalohadai be Dirava bona Mamoe ena Natuna edia terona vairanai oi badinaia noho, do oi moale momokani. Ena be reana oi laloa unai gau be do idia vara negana be ia kahirakahira momokani lasi, to ia kahirakahira momokani! Oibe, Apokalupo ese ia gwauraia gauna hereadaena be ia kahirakahira!

Gima Kohorona Stadi ia naria tauna ese hari wiki ena stadi do ia hadokoa totona, namona be tadikaka ta ia hamaoroa Gwaubou Herevana do ia duahia hedinarai. Unai murinai namona be idia torea vadaeni henanadai ia gaukaralaia inai Gwaubou herevana riviulaia totona. Tanobada ibounai lalonai Iehova ena Witness taudia edia “Dirava ena Hahemaoro Goevagoeva” Distrik Hebouheboudia dekenai haroro ta, ladana “ ‘Ariara Hahine’ Ia Moru Vadaeni; Gabeai Do Idia Hadikaia Ore,” be idia henia murinai, inai Gwaubou herevana idia karaia.

[Footnotes]

 6. Vatican bona Nazi taudia bema lauma dalana ai idia heudahanai lasi, reana dahaka hisihisi badadia idia vara lasi?

 7. Aposetolo Ioane ese ariara hahine be matahanai lalonai ia itaia namonamo neganai, edena bamona ia gwauraia?

10. (a) Ema bona harihari ariara hahinena badana be edena dala amo Iehova ena Witness taudia ia dagedage henidia? (b) Babulono Badana ena haroro taudia ese taunimanima edena bamona idia hakaudia?

14. United Nations “dagedage gauna” ese dahaka gaukara idauna ta do ia karaia, bona Dirava ena aneru ese unai gaukara edena bamona ia gwauraia?

[Box on page 13]

POPE IA HEREVA LASI

H. W. Blood-Ryan ese ia torea bukana, Franz von Papen​—⁠His Life and Times, be lagani 1939 ai idia printaia. Unai buka lalonai ia hahedinaraia, von Papen ese dala ia kehoa Hitler ese Germany do ia lohiaia totona, bona ia ese Vatican bona Nazi taudia edia herohemaino ia durua. Unai buka torea tauna be Nazi taudia ese Iuda taudia, Iehova ena Witness taudia bona taunimanima ma haida idia hamasedia karadia be inai bamona ia gwauraia: “Badina be dahaka Pacelli [Pope Pius Namba 12] ia hereva lasi, unai kara do ia koua totona? Badina von Papen ena palani be West Germany taudia ese Roma Basileiana Helagana do idia haginia lou, bona Pacelli ia laloa unai dala amo Katolik Dubu ese siahu bada do ia abia bona Vatican be gavamani lalonai siahu do ia abia lou. . . . Unai tau Pacelli be mai ena dagedage ida taunimanima milion momo ia biagudia lauma dalana ai, to Hitler ena dagedage karadia idia maumauraia lasi. . . . Hari hereva lau torea negana lalonai, idia hanaia dina toi lalonai taunimanima momo idia alaia mase. Idia hamasea taudia iboudiai rua rua amo ta ta be Katolik taudia, to Vatican ese nega ta lasi ia gurigurilaia. Edia siahu inai tanobada dekenai be ia boio vadaeni neganai bona Dirava vairanai do idia gini do ia hahemaoro henidia totona neganai, hahemaoro aukana do idia abia. Dahaka ekskius do idia gwauraia diba? Ta be lasi!”

[Box on page 17]

VATICAN TAUDIA EDIA KARA

The New York Times March 6, 1988 gauna, ia gwau, Vatican taudia idia laloa lagani 1988 dekenai edia moni be 61.8 milion kina amo do ia hegeregere lasi. Inai niuspepa ia gwau: “Moni bada idia negea ena badina ta be lagani 1984 lalonai idia gwauhamata, 250 milion kina be Banco Ambrosiano dekenai idia henitorehai taudia do idia henidia. Vatican taudia ese unai Milan banika idia gaukaralaia bada ela bona lagani 1982, banika ia moru laganina, dekenai.” Oibe, Vatican taudia ese unai banika ena kara dika lalonai idia noho dainai, idia ura lasi Vatican ena dagi bada taudia toi, idia ta be America ena bisop badana, be Italy ena kota do idia henidia hanai!

[Pictures on page 14]

Vatican taudia, von Papen bona Hitler be mai edia kerere bada rara dekenai

[Credit Lines]

UPI/Bettmann Newsphotos

UPI/Bettmann Newsphotos

[Pictures on page 17]

Pope idauidau ese Dirava ena Basileia idia abia isi lasi, to idau, idia gwau U.N. ‘sibona ese maino helarona ia henia diba’

[Credit Line]

Insets: UN photos