Dirava Ena Hesiai Lao Henia Karana ai Moale Lau Davaria
JOSHUA THONGOANA ESE INAI SIVARAI IA GWAURAIA
Lagani 1942 ai lau daradara bada. Seventh-Day Adventist taudia edia buka bona Watch Tower Society edia buka danu lau tahudia. Idaunegai Israel taudia bamona, lau be ‘lalo rua ai lau raka.’—1 Hanua Pavapavadia 18:21.
SEVENTH-DAY Adventist taudia ese magasin ladana “Voice of Prophecy” lau dekenai idia siaidia loulou. Edia henanadai lau haerelaidia mai egu moale ida, bona idia gwauhamata bema eksam ai lau kwalimu setifiket mai hairaina lau do idia henia. Lau itaia “Voice of Prophecy” bona Watch Tower Society ena magasin danu be Cape Town, South Africa amo idia siaidia. Lau laloa: ‘Inai orea ruaosi idia diba heheni a? Edia hahediba herevadia be hegeregere a? Bema lasi, edena be maoro?’
Unai do lau diba totona, revareva mai anidia tamona lau siaidia idia ruaosi dekediai. Hegeregere, Watch Tower Society lau tore henia, lau gwau: “ ‘Voice of Prophecy’ halasia taudia umui diba a? Bema oibe, edia hahediba herevadia be edena bamona umui lalodia?” Gabeai, revareva be unai orea ruaosi amo lau abidia. Watch Tower Society idia gwau “Voice of Prophecy” idia diba, to ena hahediba herevadia, Toi Tamona Diravana herevana bona Keriso be tauanina ai tanobada do ia lou mai herevana, be Baibel ena hereva hegeregerena lasi. Baibel siridia be edia revareva ai idia toredia unai hereva hakoikoidia totona.—Ioane 14:19, 28.
“Voice of Prophecy” taudia idia gwau “Watch Tower taudia” idia diba, to edia hahediba herevadia idia abidia dae lasi. Edia lalohadai ena badina idia gwauraia lasi. Unai dainai, egu lalona lau hadaia Watch Tower Society edia hereva do lau abia dae. Hari, lagani 50 lalodiai Witness taudia lau bamodia vadaeni, bona lau moale badina be egu lalona be unai bamona lau hadaia maoro!
Egu Tomadiho Gunana
Lagani 1912 ai lau be Makanye ai lau vara, South Africa ai. Unai neganai Anglican Church ese unai gabu ia naria, unai dainai lau be unai tomadiho ena memba tauna ta ai lau lao. Lauegu lagani be 10 neganai, egu ruma bese be gabu idauna ai lao, unuseniai Lutheran Berlin Mission Church be mai ena siahu bada, bona egu tamana sinana be unai tomadiho oreana ena memba taudia ai idia lao. Nega daudau lasi murinai, lau hegeregere Anibou ai paraoa do lau ania bona uaina do lau inua, to lauma hitolona lau do hitolo.
Lagani 8 lau sikuli vadaeni bena egu tamana ese lau ia siaia Kilnerton Training Institution ai, bena lagani 1935 ai, Third Year Teacher’s Certificate lau abia. Gabeai lau ese tisa ma ta, haneulato ta ladana Caroline, be lau adavaia, bena natuna kekenina ta ai abia, ena ladana ai hatoa Damaris. Lagani haida murinai, lau be Sehlale School ena het-tisa ai lau lao, Mamatsha ai. Dutch Reformed Church ese unai sikuli ia naria, unai dainai unai tomadiho oreana ena memba ai ai lao bona edia guriguri dekenai ai lao loulou. Ai be unai bamona ai karaia badina be unai be vaia taunimanima edia kara, to egu lalona ia hegeregere lasi.
Lau Senisi
Lagani 1942 ai, Sunday ta ai, ai be dubu ai ane ai abia loulou neganai, nao tauna ta be iduara ai ia hedinarai. Watch Tower Society ena buka toi ia mailaidia. Lau laloa unai buka edia toana be namo, unai dainai lau abidia egu laiberi ai do lau atodia totona. Gabeai lau kamonai hari tau ladana Tienie Bezuidenhout be Iehova ena Witness tauna. Witness tauna ma ta be lasi unai gabu ai. Tienie ia lou mai neganai, pikap ta ia mailaia bena Judge Rutherford ena haroro herevadia be rekodi amo ai kamonai. Lau ese ena hereva lau moalelaia bada, to Caroline bona egu taihuna Priscilla, ai ida ia noho kekenina, ese idia moalelaia lasi. Tienie ena vadivadi negana ihatoina ai, pikap be lau ia henia, rekodi do lau gadaralaidia diba egu turadia do idia kamonai totona.
Dina ta unai buka ta ladana Creation ena karoa edia sinado lau itadia neganai, ta lau duahia matamaia, ena ladana be “Mase Taudia be Edeseniai?” Lau laloa mase taudia edia lauma be guba ai idia moalelaidia gaudia sivaraidia do lau duahia. To lasi, buka ia gwau mase taudia be gara gabudia ai bona gau ta idia diba lasi. Baibel siridia Kohelete 9:5, 10 idia torea unai hereva hamomokania totona. Karoa ma ta ena ladana be “Mase Taudia Haodia Karana”; ia lalonai idia gwau mase taudia be toreisi-lou idia naria, bona Ioane 5:28, 29 idia torea unai hereva hamomokania totona. Unai hereva lau lalo-pararalaia bona lau moalelaia.
Unai neganai, lagani 1942 ai, “Voice of Prophecy” duahia karana lau hadokoa, bona Watch Tower Society edia buka amo lau dibaia herevadia be taunimanima lau hamaorolaidia. Hereva idia abia dae guna taudia ta be egu turana Judah Letsoalo, Kilnerton Training Institution ai ai sikuli hebou tauna.
Judah bona lau be basikele amo kilomita 51 ai heau lao Pietersburg, Africa Witness taudia edia hebouhebou ai ai vareai totona. Gabeai, tura be nega momo Pietersburg amo idia mai Mamatsha, lau idia durua Basileia sivaraina lau harorolaia totona. December 1944 ai, Pietersburg ai, hebouhebou ma ta ai, bapatiso lau abia, egu gwauhamata Iehova enai ena toana unai.
Egu Famili bona ma Haida Idia Kamonai
Caroline, Priscilla, bona emai kekeni Damaris, be vaia Dutch Reformed Church idia lao. Bena dika ia vara. Emai natuna merona ladana Samuel ia do beibi neganai, ia gorere bena ia mase. Caroline ena dubu taudia idia gwau Dirava ia ura mero be ia ida guba ai do idia noho, to unai hereva ese Caroline ena lalona ia hagoadaia lasi. Ena lalona ia hisihisi bada, ia gwau loulou: “Dahaka dainai Dirava ese emai natuna ia abia oho?”
Witness taudia Pietersburg ai be emai natuna ena mase sivaraina idia kamonai neganai, idia mai bona Dirava ena Hereva amo emai lalona idia hagoadaia. Gabeai, Caroline ia gwau: “Baibel ena hereva, mase herevadia bona toreisi-lou helarona herevadia unai, be lau lalo-pararalaidia, bona egu lalona idia hagoadaia. Lau ura tanobada matamatana ai do lau noho bona egu natuna be gara gabuna amo do lau abia lou.”
Caroline be ena dubu dekenai ia lou lao lasi, bena lagani 1946 ai, ia, Priscilla, bona Judah be idia bapatiso. Nega sisina murinai, Judah ia lao Mamahlola, haroro gaukarana be unuseniai do ia hamatamaia totona, bona ia be pioneer tauna ema bona hari.
Judah ia rakatanimai murinai, lau sibogu ese emai kongregesen, ladana Boyne, lau naria. Gabeai Gracely Mahlatji ia mai, aiemai hanua ai ia noho, bena Priscilla ia adavaia. Emai kara be, pura ta Gracely ese pablik haroro Sepedi gado ai ia henia, bena pura ta lau ese. Society ese lau ia noia buka be Sepedi gado ai do lau hahanaia. Taunimanima be unai buka amo heduru idia abia be lau itaia neganai, lau moale bada.
Emai pablik haroro gaukarana habadaia totona, pikap masini ta mai ena laud-spika ai hoia. Unai gau metaudia be doniki ese idia veria gauna lalonai ai udadia, gabu ta gabu ta ai laohaidia totona. Unai dainai, emai dekena taudia ese ai idia gwauraia “Doniki Dubuna Taudia.”
Unai negai emai kongregesen maragina ia bada ia lao noho. Egu taihudia badadia rua mai adavadia ida be Witness taudia ai idia lao bona Iehova idia badinaia ela bona mase. Danu, Boyne kongregesen (hari iena ladana be Mphogodiba) taudia momo ese pioneer gaukarana idia karaia, bona idia momo idia do karaia noho. Hari inai negai inai gabu badana ai, kongregesen be rua bona pablisa 70 mai kahana be haroro gaukarana idia karaia.
Gaukara Matamatana
Lagani 1949 ai, tisa gaukarana lau rakatania bena regular pioneer tauna ta ai lau lao. Unai neganai, Vaalwater ai, Transvaal provinisi ai, kopi korema taudia, Nao taudia edia uma ai leiba gaukarana idia karaia taudia, lau haroro henidia. Unai neganai kurokuro taudia momo idia gwau idia ese korema taudia idia hereadia dainai korema taudia ese edia hesiai idia lao henia be maoro. Unai dainai, kopi korema leiba taudia lau haroro henidia neganai, kurokuro taudia haida idia laloa kerere, idia laloa edia lalodia lau anidia, idia edia siahu do idia dadaraia totona. Haida idia gwau lau be komiunisi tauna, ma idia gwau lau do idia pidia mase.
Unai hereva be Watch Tower Society ena branch opesi lau hadibaia, bena lau idia siaia Duiwelskloof ai, gunika kahanai. Unai neganai egu adavana danu ese tisa gaukarana ia rakatania bena pioneer gaukarana ai lau ia bamoa. Lagani 1950 ai, adorahi ta ai, haroro gaukarana amo ruma ai lou lao neganai, revareva ta Society ena amo ai davaria. Ai hoa, badina lau idia boiria sekit naria gaukarana lau do idia hadibaia totona. Lagani toi lalodiai kongregesen ai vadivadi henidia South Africa ai, bena lagani 1953 ai, ai idia siaia lao Lesotho ai, South Africa ihuanai.
Haroro Gaukarana Lesotho bona Botswana Ai
Lesotho ai ai gaukara matamaia neganai, sivarai ai kamonai unai gabu taudia ese idau bese taudia momo na edia meamea karadia ai idia aladia mase. Lau bona egu adavana be unai ai laloa momo, to emai Sotho tadikaka edia lalokau bona edia heabidae karana dainai emai gari ai laloa nege haraga.
Lesotho ena Maluti Ororodia ai kongregesen do lau vadivadi henidia totona, peleini amo lau lao. Egu adavana be taora ai lau rakatania; unuseniai pioneer gaukarana ia karaia ela bona lau lou lao. Tadikaka ese lau idia hakaua, kongregesen ta amo ela bona ma ta, ororo ai do lau boio garina.
Nega ta idia hamaorogu kongregesen ta do ai lao totona, hosi ai do ai gui bena Orange Sinavaina do ai hanaia. Idia hamaorogu egu hosi ia manau, to idia gwau sinavai ena aru ia goada neganai hosi edia kara be gui-kau taudia idia negedia toho. Lau gari, badina be hosi lau manadalaia lasi bona lau nahu namonamo diba lasi. Sinavai lalonai ai diho neganai, ranu be hosi ena bogana ataiai. Lau gari dikadika dainai, hosi taria kwanauna lau negea bena hosi ena aiona huina lau dogoatao. Sinavai unukahanai ai ginidae neganai lau moale bada!
Unai hanuaboi ai lau mahuta diba lasi badina be egu tauanina ia hisihisi, hosi ai lau gui kau dainai. To egu hisihisi ena davana namona lau abia, badina be emai vadivadi idia moalelaia bada. Lesotho ai lau gaukara matamaia neganai, pablisa taudia iboudiai be 113, to hari idia be 1,649.
Lagani 1956 ai Society ese ai idia siaia Bechuanaland Protectorate ai, hari ena ladana idia hatoa Botswana. Botswana ena bada ese Lesotho ena bada ia hanaia. Pablisa taudia iboudiai ai vadivadi henidia totona, tereini o taraka amo ai lao. Taraka ai helai gaudia be lasi dainai foloa ai ai helai. Tadikaka edia gabu ai ai ginidae negadia momo ai, ai hesiku bona kahu bada dainai ai miro, to edia heabidae karana bona edia moale toana ese ai idia hamauria lou.
Unai neganai, gavamani ese Society ena buka ia taravatudia Botswana ai, unai dainai ruma ta ruma ta ai ai haroro neganai ai naria namonamo, Society ena buka ai gaukaralaidia lasi. Nega ta Maphashalala hanuana ai ai haroro neganai, ai idia dabaia tao. Kota neganai, emai gaukara ena badina ai gwauraia hedinarai totona, Mataio 28:19, 20 Baibel lalonai ai duahia. Ena be kaunsolo taudia haida ese emai hereva idia abia dae, to hanua lohiana ia gwau unai hanua ena Witness taudia do idia dadabadia. Bena ai hoa badina haroro tauna ese lohia ia noia emai dika do ia gwauatao. Lohia ese ena hereva ia abia dae bena ai idia ruhaia.
Ena be ai idia dagedage henia bona emai buka idia taravatudia, to Basileia gaukarana ia goada ia lao. Botswana ai lau ginidae neganai, pablisa taudia iboudiai be 154. Lagani toi murinai, taravatu idia kokia neganai, idia be 192. Hari, Iehova ena Witness taudia 777 be Botswana ai idia haroro.
Hadibaia bona Gado Hahanaia
Nega ta lau ese Keristen elda taudia na Basileia Hesiai Gaukara ena School lalonai lau hadibadia. Unai murinai pioneer taudia be Pioneer Gaukara School lalonai lau hadibadia. Lau mai egu adavana ida be nega ta ta South Africa ena branch opesi ai ai gaukara danu. Unai negadiai gado hahanaia gaukarana lau karaia bona Caroline be aniani nadua gabuna ai ia gaukara.
Lagani 1969 ai, branch naria tauna, Frans Muller, ia hereva henigu, ia gwau: “Tadikaka Thongoana, lau ura oi mai emu adavana ida be egu opesi dekenai do umui mai.” Ai lao neganai, ai ia hamaoroa, ai idia gwauraia hidi “Maino Tanobada Ai” Hebouhebouna do ai lao London ai. Eda tadikaka England bona Scotland ai edia heabidae karana namona ai moalelaia, bona unai ese ai ia durua, eda tadikaka tanobada hegegemadai do ai lalodia bada totona.
Lagani 40 lalodiai, Caroline ese lau ia bamoa ful-taim haroro gaukarana ai. Ai ese gau momo ai moalelaidia hebou bona gau haida ai lalohisihisilaidia hebou. Ena be emai natudia rua idia mase, to emai kekeni, Damaris, be Witness hahinena namona ai ia lao bona South Africa ena branch opesi ai gado hahanaia gaukarana ia karaia danu.
Hari emai tauanidia idia goada lasi dainai ai hegeregere lasi sekit o distrik naria gaukarana do ai karaia, unai dainai idia hanaia laganidia haida lalodiai special pioneer gaukarana ai karaia Seshego ai, Pietersburg kahanai. Lau be kongregesen ena gunalaia tauna. Baibel ia gwau Iehova ena “vairana ai moale ia guguru,” bona momokani, Africa ena diho kahanai Dirava ena hesiai lao henia karana ai moale lau davaria.—Salamo 16:11.
[Picture on page 26]
Seshego hanuana ai idia haroro, South Africa ai