Tuari Lasi Tanobadana be Kahirakahira Do Ia Vara!

DECEMBER 24, 1914 ai, Britain ena tuari tauna ta ladana Jim Prince be tuari gabuna ia rakaia hanai, Germany ena tuari tauna ta hereva henia totona. Germany tauna ia gwau: “Lau be Saxon tauna. Oi be Anglo-Saxon tauna. Dahaka dainai ita tuari heheni?” Lagani momo murinai, Prince ia gwau: “Unai henanadai ena haere lau do diba lasi.”

Lagani 1914 ai, pura tamona lalonai, Britain bona Germany edia tuari taudia be sibodia edia ura hegeregerena idia hetura heheni, soka idia gadaralaia hebou, bona Kirisimasi gaudia idia hariharilai heheni. Edia tuari biagudia ese guna idia koidia, idia gwau edia “inai taudia” be dagedage taudia, bona idia ura lasi do idia davaria unai be momokani lasi. Britain ena tuari tauna Albert Moren be gabeai ia gwau: “Bema pura ma ta lalonai ai tuari lasi, do ai tuari lou be auka herea.”

Unai sivarai ese ia hahedinaraia tuari taudia momo idia ura maino, idia ura lasi tuari. Tuari taudia momo, tuari ena dika idia itaia vadaeni taudia, ese Spain taudia edia hereva ta idia abia dae: “Tuari ena anina korikorina ia diba lasi tauna do ia tuari be namo.” Momokani, taunimanima iboudiai tanobada hegegemadai bema idia nanadaidia edena idia ura henia bada, maino o tuari, momo herea do idia gwau, maino. Momo herea idia ura maino, to tuari be edena bamona do idia koudia diba?

Edia lalohadai do idia haidaudia guna be namo. United Nations oreana ena kahana ta ia gwau: “Tuari be taunimanima edia lalodia ai idia matamaia; unai dainai, maino havaraia dalana be edia lalodia ai idia karaia be namo.” To hari inai negai, abidadama heheni lasi karadia bona inai heheni karadia idia bada idia lao dainai, dagedage ia bada ia lao bona maino ia maragi ia lao.

To, Dirava ia gwauhamata kara maoromaoro ura henia taudia edia lalodia do ia hamainodia. Ia gwau: “Hahemaoro herevadia be taunimanima momo do ia gwaurai henidia. Bena idia ese edia tuari kaiadia do idia hododia, tano geia auridia ai do idia halaodia, bona edia io do idia hododia, au rigidia utudia pakosidia ai do idia halaodia. Bese ta ese tuari kaiana do ia abia isi lasi, bese ta hadikaia totona, bona tuari daladia do idia hadibalaidia lou lasi.”​—Isaia 2:4.

Lalodia Hamainodia

Taunimanima ese edia lalodia be unai bamona do idia haidaudia diba, a? Maino naria dalana do idia dibaia, a? Wolfgang Kusserow ena sivarai mani oi laloa. Lagani 1942 ai, hari Germany tauhauna ena lagani be 20 neganai, Nazi taudia ese ena kwarana idia utua oho, badina be ia ura lasi ‘tuari dalana do ia dibaia.’ Dahaka dainai mase ia abia hidi? Revareva ta lalonai inai Baibel herevadia ia toredia: “Oiemu badibadinai tauna dekenai oi lalokau henia, oi sibona oi lalokau henia bamona,” bona “Tuari kaia idia abia taudia ibounai be tuari kaia dekenai do idia mase.”​—Mataio 22:39; 26:52.

Dirava ena hereva Baibel lalonai be “mai ena siahu”; hari Iehova ena Witness tauhauna ia ha-uraia, maino do ia tahua, herevana dahaka do ia vara. (Heberu 4:12; 1 Petero 3:11) Buka ta ladana The Nazi Persecution of the Churches 1933-45 lalonai J. S. Conway ia gwau, Nazi taudia edia ripoti ese idia hamomokania Iehova ena Witness taudia idia tuari lasi. Ma ia gwau, edia lalodia be unai bamona idia hadaidia gari lasi, anina be sibodia edia mase dalana idia lailaia.

Hari inai negai Iehova ena Witness taudia ese maino idia tahua noho, herevana idia be edena bese taudia. Badina be Baibel amo idia diba Dirava ena hesiai taudia korikoridia ese edia tuari kaiadia be tano geia gaudia ai idia halaodia. Argentine tauhauna ta ladana Alejandro ese unai ia hamomokania.

Lagani 1987 ai Alejandro ia lao Israel, bena unuseniai lagani toi lalodiai iunivesiti ai ia sikuli bona moni gaukarana ia karaia neganai, kibbutz ta ai ia noho. Unai nega lalonai Baibel ia duahia matamaia bona ena mauri ena anina ia tahua. Ia ura bada taunimanima iboudiai be maino ai do idia noho maoromaoro. Alejandro​—Iuda tomadiho tauna​—be Iuda bona Arab taudia ida idia gaukara hebou, to kaha ta ia laloa bada lasi.

Lagani 1990 ai, iena turana ta, Iehova ena Witness taudia ida Baibel ia stadilaia tauna, ese ia boiria dina tamona hebouhebouna ta do ia lao, Haifa ai. Alejandro ia hoa, badina be ia itaia Iuda bona Arab taudia 600 idia hebou mai edia moale ida. Ia laloa, ‘Inai be taunimanima edia noho dalana maorona.’ Hua 6 murinai ia be Witness tauna ta ai ia lao, bona hari iena nega bada be Baibel ena maino sivaraina harorolaia gaukarana ai ia haorea.

Dirava ese Maino Do Ia Havaraia Dalana

Madi, hari inai negai unai bamona sivaraidia be momo lasi. Ena be tanobada taudia idia gwau idia ura maino, to tuari uhedia idia dairidia. Gabu ta idia noholaia taudia bema edia pei ena kahana, 7 ia lao 16 pesen bamona, be ipidi bona sekiuriti gaudia edia davadia ai idia haorea, oi ura unai gabu ai do oi noho a? Tanobada besedia be unai bamona idia karaia, tuari gaudia hoidia bona edia tano gimadia davana karaia totona. Unai dainai Isaia ena peroveta herevana ita hoalaia lasi; ia hahedinaraia taunimanima iboudiai ese edia tuari kaiadia be tano geia gaudia ai do idia halaodia lasi, ela bona Dirava ese ‘hahemaoro herevadia be taunimanima momo do ia gwaurai henidia.’ Unai be edena bamona do ia karaia?

Iehova Dirava ese ena Basileia amo do ia karaia. Peroveta tauna Daniel ia gwau: “Guba Diravana ese basileia ta do ia haginia, nega ta ai do idia hadikaia ore diba lasi gauna. . . . [Tanobada ena] basileia iboudiai be do ia hamakohidia maragimaragi bona do ia haoredia, bena ia sibona do ia gini ela bona hanaihanai.” (Daniel 2:44) Unai ese ia hahedinaraia Dirava ena Basileia ese tanobada ibounai do ia lohiaia. Bese idauidau edia tano hetoadia do ia kokidia, unai amo edia badu heheni karadia do ia hadokodia. Bona, do ia lohiadia taudia be “Iehova ese do ia hadibadia” dainai, “edia maino do ia bada.” (Isaia 54:13) Iesu ia gwau namona be Dirava do ita guriguri henia, do ita gwau: “Oiemu Basileia do ia mai”!​—Mataio 6:10.

Tomadiho ese Ia Havaradia Gaudia Do Ia Kokidia

Maino koua gaudia, tomadiho ese ia havaradia gaudia, be Dirava ese do ia kokidia. “Tuari Helagadia,” Pope Urban Iharuana be lagani 1095 C.E. ai ia hamatamaia tuaridia, edia daudau ese tuari oredia iboudiai edia daudau idia hanaia.a Iseda nega lalonai tomadiho ena haroro taudia ese taunimanima idia ha-uradia tuari ai do idia vareai, politik sibona dainai idia vara tuaridia ai danu.

Keristen tomadiho oreadia be Tanobada Ibounai Tuarina Ginigunana ai idia karaia karadia sivaraidia be Paul Johnson ese ia torea, ia gwau: “Haroro taudia be dala lasi Keristen tomadihona do idia laloa bada bona edia bese do idia laloa maragi, bona idia momo idia ura lasi unai bamona do idia karaia. . . . Idia gwau edia bese badinaia karana be Keristen tomadiho dalana hegeregerena. Keristen tuari taudia idia hamaorodia namona be edia Hahemauri Tauna ena ladana ai do idia ala-ala heheni.”

Tomadiho ese tuari ia havaraia bada, maino ia havaraia maragi. Baibel ia gwau tomadiho koikoi be ‘ariara hahinena’ bamona, tanobada gunalaia taudia ia tura henidia. (Apokalupo 17:​1, 2) Dirava ia gwau kerere bada be ia latanai ia noho, tanobada ai idia aladia mase taudia iboudiai edia rara dainai. (Apokalupo 18:24) Unai dainai, Dirava ese do ia haorea vaitani, maino dalana ia koua dainai.​—Apokalupo 18:4, 5, 8.

Bema politik bona tomadiho koikoi idia ore, to bema tuari havaraia tauna badana, Satana Diabolo, ia do noho, maino do ia vara lasi. Dirava ena Basileia ese maino tanobada ai do ia havaraia vaitani totona do ia karaia karana ginigabena be, Satana do ia kokia. Baibel bukana Apokalupo ia gwau, aneru ta ese Satana do “ia dogoatao,” do “ia guia,” bena “guri dobu masemase lalonai [do] ia negea diho . . . tanobada bese do ia koia diba lasi totona.” Gabeai do ia haorea vaitani.​—Apokalupo 20:2, 3, 10.

Baibel ena gwauhamata, tuari do idia doko gwauhamatana, be ta ese ia laloa kava gauna lasi. Iehova Dirava ese ena Basileia be guba ai ia haginia vadaeni, bona unai basileia ia hegaegae, kara ma haida do ia karaia, tanobada ibounai do ia hamainoa totona. Unai idia do naria noho neganai, Iehova ena Witness taudia milion milion, unai guba gavamanina idia abia dae taudia, be maino ai idia noho.

Vadaeni, eda helaro, tuari daladia do idia ore helarona, be mai ena badina korikoridia. Bona eda helaro ena anina namona be inai: Kahirakahira Iehova ese tuari do ia hadokodia ela bona hanaihanai.​—Salamo 46:9.

[Footnotes]

[Picture on page 7]

Tuari lasi tanobadana matamatana ai do oi noho diba