Iesu Ena Gahediba Dalana Oi Tohotohoa A?

“Taunimanima ese iena hadibaia hereva dekenai idia hoa bada, badina iena hadibaia hereva be edia taravatu hadibaia taudia bamona lasi. Ia ese taunimanima ia hadibaia mai siahu danu.”​—MATAIO 7:​28, 29.

 1. Iesu be Galilea ai ia hahediba neganai, daidia be ia murinai idia raka, bona ia ese edena bamona ia kara henidia?

IESU ia lao gabudia iboudiai, taunimanima be ia dekenai idia aru lao. “Galilea kahana ibounai dekenai ia loaloa, edia dubu lalonai ia hadibaia, bona Basileia ena Sivarai Namona ia harorolaia. Bona taunimanima edia gorere bona edia hisihisi idauidau dekena amo ia hamauridia.” Iena sivarai idia gwauraia loaloa neganai, “taunimanima momo herea iena murina dekenai idia raka, Galilea dekena amo, Hanua Gwauta dekena amo, Ierusalema dekena amo, Iudea dekena amo, bona Ioridane sinavai unai kahana dekena amo.” (Mataio 4:​23, 25) “Taunimanima hutuma ia itaia, vadaeni ia bogahisihisi idia dekenai, badina be edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” Ia hadibadia lalonai, mamina idia abia ia ese ia hebogahisi henidia; iena hebogahisi be edia bero hanamoa muramurana bamona, bona unai ese ia veridia ia dekenai.​—Mataio 9:​35, 36.

 2. Iesu ena hoa karadia sibodia lasi, to dahaka danu ese hutuma ia veridia?

² Hoa dalanai Iesu ese lepera taudia ia hagoevadia, taia kudima taudia ia hakamonaidia, matakepulu taudia ia ha-itadia, aena dika taudia ia harakadia, bona mase taudia ia hatoredia isi! Momokani, unai hoa karadia, Iehova ena siahu ese Iesu ena amo ia karaia karadia, ese taunimanima hutuma idia veridia! To ia dekenai idia aru lao badina ma ta be, ena hahediba herevadia amo do ia hamauridia totona. Ororo ai ena haroro herevana hereadaena idia kamonai murinai, “iena hadibaia hereva dekenai idia hoa bada, badina iena hadibaia hereva be edia taravatu hadibaia taudia bamona lasi. Ia ese taunimanima ia hadibaia mai siahu danu.” (Mataio 7:​28, 29) Edia hadibaia taudia ese idaunegai hadibaia taudia edia taravatu idia gwauraidia lou, edia hahediba herevadia hamomokanidia totona. To Iesu ese ia hadibadia mai siahuna ida, Dirava ena amo ia abia siahuna unai; ia gwau: “Lauegu hereva be lauegu Tamana ese ia henia lau dekenai hegeregerena lau gwauraia noho.”​—Ioane 12:50.

Edia Lalodia Ia Hamareredia

³ Iesu ena hahediba dalana be idau, taravatu hadibaia taudia bona Farisea taudia edia hegeregerena lasi. Hereva momokani Dirava ena amo be ia hadibalaidia, to idia ese sene taudia edia taravatu metaudia idia hadibalaidia. Idia hereva auka mai edia hekokoroku ida, taunimanima idia haganidia edia dagi bada ladadia do idia hatodia, bona idia gwau hutuma be “Dirava dekena amo dika davana do idia davaria.” To Iesu ia manau, ia manada, bona taunimanima ia hebogahisi henidia. Hereva maorodia bona hereva namodia ia hadibalaidia neganai, edia lalodia ai idia vareai. Iena moale herevana ese ia veridia ia dekenai, bona unai hereva dainai, dubu helaga ai idia hebou haraga idia kamonaia totona, ia idia gavaia bona ena hereva idia kamonai mai edia moale ida. Hutuma idia lao ena hereva kamonaia totona; idia gwau: “Hamatamaia nega dekena amo ia mai bona hari tau ta ia hereva lasi inai tau ia hereva bamona.”​—Ioane 7:​46-49; Mareko 12:37; Luka 4:22; 19:48; 21:38.

 4. Iesu ena haroro lalonai, dahaka amo taunimanima momo edia lalodia ia veridia?

⁴ Taunimanima ese Iesu ena hahediba idia ura henia badina ta be, hereva hegeregeredia ia gwauraidia. Palaoapalaoa be tano ai idia tubu, manu ese edia ruma idia karadia, biru taudia ese uhe idia hadodia, mamoe naridia taudia ese idia boio mamoedia idia abidia lou, hahine ese dabua matamata sisina amo dabua gunadia idia banidia, memero kekeni be hanua ena ariara ai idia gadara, haoda taudia ese edia reke be kone ai idia veridia daekau​—taunimanima ese idia itadia momo karadia unai​—be Iesu ese ia lalodia bada. Ia diba hereva hegeregeredia ai do ia gwauraidia diba, Dirava bona Iena Basileia parabolelaia totona eiava taunimanima edia noho herevalaia totona.

 5. Ena parabole ai Iesu ese dahaka ia herevalaidia, bona ena parabole edia namo be dahaka?

⁵ Iesu ese idia itadia loulou vadaeni gaudia herevadia amo hereva momokanidia ia hadibalaidia negadiai, idia lalo-pararalaidia haraga diba. Unai hereva momokanidia be idia kamonai sibona lasi, to edia daradia edia matadia amo unai gau edia laulau idia itadia diba, bena gabeai unai hereva idia lalodia lou haraga diba. Iesu ena parabole be haraga; gau idauidau momo ia gwauraidia hebou lasi, hereva momokanidia do idia lalo-pararalaidia lasi garina. Samaria tauna namona parabolena mani oi laloa. Ia amo dekena tauna namona ena kara oi itaia goevagoeva diba. (Luka 10:​29-37) Parabole ma ta lalonai mero ta ia gwau vain umana ai do ia gaukara to ia gaukara lasi, ta ia gwau do ia gaukara lasi to ia gaukara. Oi itaia haraga kamonai korikori ena anina be inai​—ta ese oi ia henia gaukarana oi karaia. (Mataio 21:​28-31) Iesu ese taunimanima ia hadibadia negadiai, edia daradia idia mahuta lasi, eiava gau idaudia idia lalodia lasi. Iena hereva idia hakala henia bona edia daradia edia matadia amo idia itaia danu.

Lalokau Dainai Iesu Ia Manau

⁶ Dirava ena amo ia mai aonegana ena toana ta be lalo-manada. Anina be, nega haida hebogahisi dainai do ita kara idau. Namona be elda taudia edia lalodia idia hegeregere, kerere tauna ena helalo-kerehai dainai bona lalokau dainai, ia do idia kara manada henia. (1 Timoteo 3:3; Iakobo 3:17) Iesu ese unai kara ia hahedinaraia goevagoeva; hebogahisi dainai nega haida hahegani dainai ia kara auka lasi.

 7. Edena negadia ai Iesu ese taravatu ia badinaia auka lasi?

⁷ Nega ta Iesu ia gwau: “Taunimanima edia vairana dekenai lau do ia gwauraia hedinarai lasi tauna be lauegu Tamana, guba dekenai ia noho, ena vairana dekenai, ia do lau gwauraia hedinarai lasi.” To ena be Petero ese nega toi ia gorea, to ia ese Petero ia dadaraia lasi, badina be ena kara ena badina ia laloa. (Mataio 10:33; Luka 22:​54-62) Ma nega ta ai, hahine ta mai ena rara moru gorerena ese Mose ena Taravatu ia utua, hutuma bogaragidiai ia vareai. Iesu ese ia gwau henia lasi, badina be ena lalo-hekwarahi ia lalo-pararalaia. (Mareko 1:​40-42; 5:​25-34; ma danu Luka 5:​12, 13 itaia.) Iesu ese ena aposetolo ia hamaorodia, taunimanima do idia hadibadia lasi ia be Mesia, to ia sibona ese unai hereva ia badinaia lasi; ranu gurina ta ai ia ese Samaria hahinena ta ia hamaoroa ia be Mesia. (Mataio 16:20; Ioane 4:​25, 26) Unai negadiai, lalokau bona hebogahisi dainai Iesu ese kara idauna ta ia karaia be maoro.​—Iakobo 2:13.

 8. Edena negadiai taravatu hadibaia taudia bona Farisea taudia ese taravatu idia badinaia auka lasi bona edena negadiai idia badinaia auka?

⁸ Taravatu hadibaia taudia bona Farisea taudia edia kara be idau, idia manau lasi. Edia Sabati taravatuna idia utua, sibodia edia boromakau ha-inua o ranu gurina amo veria dae totona. To taravatu metaudia be ladana lasi taudia edia pagadia ai idia atodia, bona “edia imana kwakikwakina sibona dekena amo durua taina idia henia lasi.” (Mataio 23:4; Luka 14:5) Iesu ese taunimanima ia lalodia bada, taravatu haida ia lalodia maragi; to Farisea taudia ese taravatu idia lalodia bada, taunimanima idia lalodia maragi.

“Taravatu Ena Natuna” ai Ia Lao

⁹ Haida idia moale lasi, badina be Iesu ena mero negana sivaraina tamona mo be Baibel lalonai idia torea. To unai sivarai be mai anina bada; Luka 2:​46, 47 ai ia gwau: “Dubu Helaga lalonai idia davaria, hadibaia taudia edia huanai ia helai, edia hereva ia kamonai bona ia henanadaia danu idia dekenai. Ena hereva idia kamonai taudia ibounai be ena diba bona ena haere dekenai idia hoa bada.” Kittel ena Theological Dictionary of the New Testament ia gwau, Greek gado herevana, inai hereva “henanadaia” be ia ida idia hahegeregerea herevana, ena anina be mero ta ena henanadai kava lasi. Ena anina be inai: kota ai kerere idia henanadailaia, o ta ese henanadai ta be henanadai ma ta amo ia koua, o “Farisea bona Sadukea taudia idia henanadai hedibagani karana,” Mareko 10:2 bona Mr 12:​18-23 ese idia gwauraia karana unai.

 9, 10. Iesu ena tamana sinana ese edeseniai idia davaria, bona iena henanadai karana be dahaka bamona?

¹⁰ Unai diksenari be ma ia gwau: “Hari hereva be inai dala ai idia gaukaralaia dainai, reana . . . [Luka] 2:46 ena anina be, mero ia henanadai kava lasi, to Ia be hepapahuahu ai ia kwalimu. [Lu 2 Siri] 47 ese hereva gabena ia hamomokania.”a Hari siri ia gwau: “Ena hereva idia kamonai taudia ibounai be ena diba bona ena haere dekenai idia hoa bada.” Robertson ena Word Pictures in the New Testament bukana ia gwau, idia hoa bada, anina be “idia hoa dikadika, hegeregere edia matadia idia bada herea bamona.”

11. Maria bona Iosepa ese idia itadia gaudia bona idia kamonai herevadia dainai edena bamona idia kara, bona buka ta be dahaka ia gwau?

¹¹ Iesu ena tamana sinana be dubu ai idia ginidae neganai, “idia hoa.” (Luka 2:48) Robertson ia gwau, unai hereva Greek gado ai anina be, idia itadia gaudia bona idia kamonai herevadia dainai idia hoa dikadika, hegeregere gau ta ese ia botadia kava bamona. Unai neganai Iesu be hadibaia tauna namo hereana ai ia lao vadaeni. Dubu Helaga ai ia vara gauna dainai, Kittel be ena buka ai ia gwau: “Iesu ese Ena mero negana ai hepapahuahu ta ia hamatamaia, ia lalonai Ena inai taudia be gabeai do idia lusi.”

12. Gabeai Iesu be tomadiho gunalaia taudia ida idia herevahereva negadiai, dahaka ia vara?

¹² Momokani, idia lusi! Lagani momo murinai, unai bamona henanadaidia amo Iesu ese Farisea taudia ia halusidia dainai, ia “dekenai nanadaia be idia gari, bona idia nanadaia lou lasi.” (Mataio 22:​41-46) Sadukea taudia ese toreisi lou herevana idia nanadailaia neganai, ena haere amo edia hereva ia koua, bena “idia nanadaia lou lasi, idia gari vadaeni.” (Luka 20:​27-40) Taravatu hadibaia taudia danu idia lusi. Idia ta be Iesu ida idia herevahereva murinai, “tau ta ia hegeregere lasi hereva ta idia nanadaia lou.”​—Mareko 12:​28-34.

13. Dahaka dainai dubu helaga ai ia vara gauna be mai anina bada Iesu ena mauri lalonai, bona unai neganai ia be dahaka ia diba?

¹³ Dahaka dainai Baibel ese Iesu ena mero negana sivaraina tamona, dubu helaga ai ia be hadibaia taudia ida idia herevahereva sivaraina, ia gwauraia? Badina be unai nega ai Iesu ena dagi ia senisi. Ena mauri laganidia be 12 bamona neganai, Iuda taudia edia hereva hegeregerena ia be “taravatu ena natuna” ta ai ia lao, anina be unai nega amo unai taravatu ena hahegani iboudiai do ia badinadia be namo. Maria ese ia bona Iosepa edia lalo-hekwarahi ia dainai be ia hamaorolaia neganai, Iesu ena haere ese ia hahedinaraia ia diba ia be hoa dalanai ia vara bona ia be Mesia ai do ia lao. Ia ese Dirava ia gwauraia ena Tamana; ia gwau: “Dahaka dainai lau umui tahua? Umui diba lasi egu Tamana ena ruma be lauegu noho ruma, a?” Inai hereva be Iesu ena hereva ginigunadia Baibel lalonai idia toredia, bona idia hahedinaraia ia diba dahaka dainai Iehova ese ia siaia tanobada dekenai. Unai dainai, inai sivarai ibounai be mai anina bada.​—Luka 2:​48, 49.

Maragidia Ia Lalokau Henidia Bona Ia Lalo-Pararalaidia

¹⁴ Memero kekeni ese inai sivarai idia moalelaia bada be namo. Ia hahedinaraia Iesu ia tubu daekau lalonai ia stadi goadagoada. Hadibaia taudia dubu helaga ai ese hari “taravatu ena natuna,” lagani 12 merona, ena aonega idia hoalaia. To ia be Iosepa ida kapenta gaukarana idia do karaia, Iosepa bona Maria ‘ia do kamonai henidia,’ bona “Dirava bona taunimanima ese idia ura henia.”​—Luka 2:​51, 52.

15. Tanobada ai ia noho neganai, Iesu ese memero kekeni edia lalodia edena bamona ia hagoadadia, bona hari inai negai unai ena anina be dahaka memero kekeni dekediai?

¹⁵ Iesu be tanobada ai ena hesiai gaukarana ia karaia neganai, memero kekeni edia lalodia ia hagoadadia bada: “Dubu biagudia bona taravatu hadibaia taudia ese Iesu ena hoa karadia idia itaia, memero bona kekeni danu edia hereva idia kamonai, Dubu Helaga lalonai idia boiboi, idia gwau, ‘Hosana, Davida ena natuna ita hanamoa!’ Vadaeni idia be badu dikadika. Idia nanadaia Iesu dekenai, idia gwau, ‘Inai maragidia edia hereva oi kamonai, a?’ Iesu ia gwau, ‘Oibe. Umui be nega ta Buka Helaga umui duahia lasi, a? “Natudia maragidia, rata idia inua memero, edia uduna dekenai Dirava idia hanamoa namonamo.” ’ ” (Mataio 21:​15, 16; Salamo 8:2) Hari inai negai idia kara maoromaoro noho bona Dirava idia hanamoa noho memerodia bona kekenidia tausen momo herea be Iesu ese edia lalodia ia hagoadadia danu; madi, idia haida be unai idia karaia dainai idia mase!

16. (a) Iesu ese mero maragi ta be ena aposetolo bogaragidiai ia haginia neganai, unai amo dahaka ia hadibadia? (b) Ena be edena dika be kahirakahira, to Iesu ese memero kekeni ia lalodia?

¹⁶ Aposetolo ese daika ia bada be idia heailaia neganai, Iesu ese ia hamaorodia, ia gwau: “ ‘Bema tau ta ena ura be ia gini, gunalaia tauna o biaguna, unai tau dohore ia lao gabeai, bona ia be dohore taunimanima ibounai edia hesiai tauna.’ Ia ese mero maragi ta ia abia, edia huanai ia haginia, bona ia rosia. Ia hereva, ‘Daika ese natuna maragi inai bamona ia abia dae lauegu ladana dainai, be lau danu ia abia dae.’ ” (Mareko 9:​35-37) Ierusalem ia lao henia negana ginigabena ai, ena be ia diba hisihisi bada bona mase do ia davaridia, to memero kekeni ia lalodia; ia gwau: “Lau ura maragi idia mai lau dekenai, umui lulua lasi, badina idia bamona be Dirava ena Basileia taudia.” Bena “maragidia ia rosia, bona iena imana ia atoa idia latanai, ia hanamoa.”​—Mareko 10:​13-16.

17. Dahaka dainai Iesu ese memero kekeni edia mamina ia diba, bona idia ese Iesu edena bamona idia laloa be namo?

¹⁷ Iesu ese mero maragi be taunimanima bogaragidiai ia abia mamina ia diba. Guna, ia be taunimanima badadia ida idia noho, idia ida idia gaukara, edia siahu henunai ia noho, bona edia lalokau dainai noho namo ena mamina ia mamia danu. Memero kekeni e, hari Iesu be emui turana; umui dainai ia mase, bona iena hahegani bema umui badinadia, do umui mauri ela bona hanaihanai.​—Ioane 15:​13, 14.

18. Dahaka moale gauna be nega dikadia ai bona hekwarahi negadia ai do ita laloa noho be namo?

¹⁸ Iesu ena hahegani badinadia be auka momokani lasi. Memero kekeni e, ia hegaegae noho, umui bona taunimanima oredia do ia durua. Mataio 11:​28-30 ai ia gwau: “Taunimanima manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.” Mani umui laloa, emui mauri lalodiai Iehova ena hesiai umui lao henia lalonai, Iesu be umui badibadinai ia raka, emui maduna ia haharagaia. Unai ese ita ibounai ia hamoalea bada, ani?

19. Nega ta ta ai Iesu ena hahediba daladia be edena bamona ita henanadailaidia lou be namo?

¹⁹ Vadaeni, ita be Iesu hegeregerena ita hahediba, eiava? Gorere taudia eiava lauma dalanai idia hitolo taudia ita itadia negadiai, ita hebogahisi henidia bona ita durudia, a? Taunimanima ita hadibadia negadiai, Dirava ena Hereva ita hadibalaidia, eiava, Farisea taudia hegeregeredia, siboda eda lalohadai ita hadibalaidia, a? Baibel ena hereva momokanidia do idia lalo-pararalaidia haraga totona, idia manadalaidia gaudia amo ita parabolelaidia, a? Bema lalokau bona hebogahisi dainai taravatu haida ita hamanokadia be namo, badinadia auka karana ita rakatania mai eda manau ida, a? Iesu hegeregerena, ita ese memero kekeni ita kara namo henidia bona ita hebogahisi henidia, a? Emu natudia be Iesu ia mero neganai ia stadi hegeregerena do idia stadi totona oi hagoadadia, a? Iesu hegeregerena, do oi kara mai emu lalo-auka ida, to do oi hegaegae helalo-kerehai taudia do oi abidia dae, kokoroku hahinena ese ena natuna be ena hanina henudiai ia gogodia bamona, a?​—Mataio 23:37.

20. Iehova ena hesiai ita lao henia lalonai, dahaka lalohadai namona ese iseda lalona ia hagoadaia?

²⁰ Bema iseda diba hegeregerena do ita hahediba toho, Iesu ia hahediba hegeregerena, momokani dala do ia kehoa ‘ia huaia auna’ be ita danu do ita huaia.​—Mataio 11:​28-30.

[Footnotes]

Oi Laloatao A?

◻ Dahaka dainai hutuma be Iesu dekenai idia aru lao?

◻ Dahaka dainai nega haida Iesu be taravatu haida dainai ia kara auka lasi?

◻ Dubu helaga ai Iesu ese hadibaia taudia ia nanadaidia karana amo dahaka ita diba?

◻ Iesu ese memero kekeni ia kara henidia dalana ese ita dahaka ia hadibaia?

 3. Iesu ena hahediba dalana be edena bamona ia idau, taravatu hadibaia taudia bona Farisea taudia edia hegeregerena lasi?

 6. Edena negai ita manau be mai anina bada?

14. Mero matamata Iesu ena kara dubu helaga ai ese memero kekeni be dahaka ia hadibadia?