Iobu Ia Haheauka—Ita Haheauka Diba Danu!

“Ita diba inai haheauka taudia ese moale idia davaria vadaeni, ani?”​—IAKOBO 5:11.

1. Ia buruka Keristen tauna ta ese ia davaria hetoho dekenai dahaka ia gwau?

‘DIABOLO ese lau ia abia toho! Lauegu mamina be Iobu ia abia mamina hegeregerena!’ Unai hereva amo, A. H. Macmillan ese Iehova ena Witness taudia edia hedikwota dekenai iena turana namona dekenai ena lalona ena mamina ia gwauraia hedinarai. Tadikaka Macmillan ena mauri lagani be 89 neganai ena tanobada maurina ia ore, August 26, 1966 ai, ia mase. Ia diba ia bamona horoa idia abia Keristen taudia be mai abidadama danu hesiai gaukara idia karaia ela bona mase neganai, “edia kara namodia ena sivarai be idia danu nega tamona ia lao.” (Apokalupo 14:13) Oibe, unai taudia be Iehova ena hesiai gaukara idia karaia noho, badina idia toreisi lou bona ia ore diba lasi guba maurina idia abia. Tadikaka Macmillan ese unai davana namona ia abia dainai iena turadia idia moale. To, tanobada dekenai ia do noho ena buruka negana lalonai, hetoho idauidau ia davaria. Ia gorere danu, bona unai amo ia diba Satana ia ura iena abidadama karana Dirava dekenai ia hamakohia.

2, 3. Iobu be daika?

² Tadikaka Macmillan ia gwau ena mamina be Iobu ia abia mamina hegeregerena neganai, ia be ena abidadama idia tohoa bada tauna ta ena kara ia gwauraia. Iobu be “Usu tanona ai” ia noho, reana unai be Arabia ena not kahanai. Ia be Noa ena natuna Sem ena garana ta, ia ese Iehova ia tomadiho henia. Reana Iobu ia davaria hetoho ena nega be Iosepa ia mase murinai bona Mose ese ia hahedinaraia ia be kara maoromaoro tauna ena nega huanai. Unai nega lalonai, tanobada dekenai taunimanima ma ta lasi ena abidadama Dirava dekenai be Iobu ena bamona. Iehova ia gwau hari tau Iobu ia kerere lasi, ia kara maoromaoro, bona Dirava garina ia gari.​—Iobu 1:​1, 8.

³ “Mairiveina kahana taudia iboudiai amo ia be tau hereadaena” dainai Iobu ena hesiai taudia be momo, bona iena animal edia namba be 11,500. To ia dekenai lauma ena taga be mai anina bada. Hari inai negai Dirava idia badinaia tamadia hegeregeredia, reana Iobu ese iena natuna mero 7 bona ena natuna kekeni toi dekenai Iehova ena sivarai ia hadibadia. Ena be iena ruma idia rakatania vadaeni, to ia be iena ruma bese ena hahelaga tauna bona idia totona boubou karana ia karaia, edia kara dika ia noho garina.​—Iobu 1:​2-5.

4. (a) Dahaka dainai dagedage idia davaria Keristen taudia be Iobu idia laloa be namo? (b) Iobu ena kara dekenai, dahaka henanadai do ita tahudia?

⁴ Dagedage idia davaria Keristen taudia be Iobu ena kara idia laloa be namo, sibodia idia hagoadaia diba bona idia haheauka noho totona. Hahediba tauna Iakobo ia toretore, ia gwau: ‘Ita diba inai haheauka taudia ese moale idia davaria vadaeni, ani? Iobu ena haheauka sivaraina umui kamonai vadaeni, bona Iehova ese dokona neganai Iobu ia durua bada, ani? Badina be Iehova be mai ena hebogahisi, bona iena hariharibada be bada herea.’ (Iakobo 5:11) Iobu bamona, Iesu murinai idia raka horoa taudia bona hari inai negai “hutuma bada herea” taudia edia abidadama dekenai hetoho idia davaria neganai idia haheauka be gau badana. (Apokalupo 7:​1-9) Vadaeni, Iobu ese dahaka hetoho ia haheaukalaidia? Dahaka dainai unai hetoho ia abia? Bona ia davaria gaudia amo dahaka namo ita abia diba?

Hepapahuahu Badana Ta

⁵ Ena be Iobu ia diba lasi, to guba dekenai hepapahuahu badana ta ia vara gwauraia. Dina ta ai “Dirava momokani ena natudia be Iehova vairanai idia hedinarai.” (Iobu 1:6) Dirava sibona ia havaraia Natuna tamona, Hereva, be ia noho danu. (Ioane 1:​1-3) Danu, kara maoromaoro anerudia bona ‘Dirava ena natudia,’ gwau-edeede anerudia unai, idia noho. (Genese 6:​1-3) Satana ia noho danu, badina idia lulua negana ia do mai lasi, lagani 1914 ai, Basileia ia vara murinai guba amo do idia lulua unai. (Apokalupo 12:​1-12) Iobu ena nega lalonai, Satana be hepapahuahu badana ta ia havaraia. Ia ese Iehova ena lohia dalana ena maoro, Ia havaraia gaudia iboudiai dekenai, ia hepapahuahulaia.

6. Satana be dahaka ia ura karaia, bona Iehova ena ladana be edena bamona ia gwauraia dika?

⁶ Iehova ia gwau: “Oi be edeseni amo oi mai?” Satana ia haere, ia gwau: “Tanobada dekenai lau loaloa bona lau raka lao raka mai.” (Iobu 1:7) Tau ta ia ania gwauraia. (1 Petero 5:​8, 9) Iehova ena hesiai taudia edia abidadama ia hamakohia dalana amo, Satana ia ura hamomokania gauna be taunimanima be Dirava idia badinaia karana be lalokau dainai lasi. Unai hepapahuahu hereva ia gwauraia neganai, Iehova ese Satana ia nanadaia, ia gwau: “Egu hesiai tauna Iobu oi itaia vadaeni, a? Tanobada dekenai ia bamona tauna ta be lasi; ia be kerere ta lasi tauna bona kara maoromaoro tauna; Dirava garina ia gari bona kara dika amo ia raka oho, ani?” (Iobu 1:8) Ena be Iobu be goevadae lasi tauna to Iehova ese ia gwauraia taravatudia ia badinadia. (Salamo 103:​10-14) To Satana ia haere, ia gwau: “Iobu be badina lasi Dirava garina ia gari a? Ia bona ena ruma bona iena gau iboudiai be magu ta amo oi koua hegege vadaeni, ani? Ena imana amo ia karaia gaukara be oi hanamodia bona ena boromakau be momo herea tanobada dekenai.” (Iobu 1:​9, 10) Unai hereva amo Diabolo ese Iehova ena ladana ia hadikaia, ia gwau Ena dagi bona kara dainai taunimanima ese do idia lalokau henia lasi bona do idia tomadiho henia lasi, ia gwau Dirava ese taunimanima dekenai lalo-ani karana ia karaia dainai Ena hesiai gaukara idia karaia. Satana ia gwau Iobu ese Dirava ena hesiai gaukara ia karaia gau haida do ia abia totona, ia karaia lasi lalokau dainai.

Satana Ia Dagedage!

⁷ Satana ia gwau: “To harihari emu imana oi atoa ena orea bona ena gau iboudiai do oi kokidia totona; bena ia ese oi do ia gwauraia dika.” Unai hemataurai lasi hepapahuahu herevana dainai Dirava be dahaka ia hereva? Iehova ia gwau: “Itaia! Ena orea bona ena gau iboudiai be oiemu imana dekenai lau atoa; to gau tamona, ia do oi daua toho lasi.” Diabolo ia gwau Dirava ese Iobu ena gaukara ibounai ia hanamoa, ena kohu ia habadaia, bona hanaihanai ia naria. Vadaeni, Dirava ese ia koua lasi dainai Satana ese Iobu do ia hahisihisia, to ena tauanina ia daua toho lasi. Satana be unai hebou ia rakatanaia bona ena lalona ia hadaia dika do ia havaraia totona.​—Iobu 1:​11, 12.

8. (a) Iobu ese dahaka kohu ia haboiodia? (b) Inai hereva “Dirava ena lahi” ena anina momokani be dahaka?

⁸ Daudau lasi murinai, Satana ese ena dagedage karana ia hamatamaia. Iobu ena hesiai tauna ta ia mai bona ia dekenai inai sivarai dikana ia gwauraia, ia gwau: “Boromakau be tano idia ruaia bona doniki be idia badinai idia aniani noho; bena Sabea taudia idia mai, idia abidia, bona hesiai taudia be tuari kaia amo idia hamasedia.” (Iobu 1:​13-15) Naria siahuna be Iobu ena kohu dekenai ia noho lasi. Karaharaga, demoni edia siahu ia davaria, badina hesiai tauna ma ta ia mai bona ia gwau: “Dirava ena lahi be guba amo ia moru, mamoe bona hesiai taudia ia aradia ore.” (Iobu 1:16) Dika momokani, badina Diabolo ese unai dika ia mailaia, to idia laloa Dirava ese ia mailaia bona sibona ena hesiai tauna dekenai dika ia havaraia! Kevaru be guba amo ia diho mai dainai, idia laloa Iehova ese ia siaia, to unai lahi be demoni amo ia mai.

9. Iena taga ibounai idia boio neganai, Iobu ena turana karana Dirava dekenai be edena bamona?

⁹ Satana ese ena dagedage karana ia karaia noho lalonai, hesiai tauna ma ta ia mai bona ia gwau Kaldea taudia be Iobu ena kamelo idia abidia bona ena hesiai taudia iboudiai idia hamasedia. (Iobu 1:17) Ena be Iobu ena taga iboudiai idia boio, to ena turana karana Dirava dekenai ia hadikaia lasi. Bema oiemu taga iboudiai idia boio oiemu abidadama karana Iehova dekenai oi dogoatao noho diba, a?

Ma Dika Badana ta Ia Vara

¹⁰ Diabolo ese Iobu dekenai ia havaraia gau dikadia idia ore lasi. Hesiai tauna ma ta ia mai bona ia gwau: “Oiemu natuna maruanedia bona hahinedia be vara guna natuna ena ruma dekenai idia aniani hebou bona uaina idia inua hebou. Bena lai-gubana be tano gaegaena amo ia mai, ruma daigunina haniosi ia botaia; bona ruma be hari eregabe taudia latadiai ia moru, bona iboudiai idia mase. Lau mo sibona lau roho mauri, bena oi lau hadibaia totona lau mai.” (Iobu 1:​18, 19) Idia laloa maoromaoro lasi taudia be reana idia gwau unai lai-gubana ia havaraia gau dikana be ‘Dirava amo ia vara.’ To, demoni edia siahu amo ia vara gau dikana be Iobu ena lalona korikori ia hahisihisia bada.

10, 11. (a) Iobu ena natudia 10 dekenai dahaka ia vara? (b) Madi, Iobu ena natudia idia mase murinai, iena lalohadai Iehova dekenai be dahaka?

¹¹ Ia daradoko dainai, Iobu be ‘ena dabua ia darea bona ena kwarana huina ia pakosia, bona tano dekenai ia moru, ia tui diho.’ To, ena hereva oi kamonai. “Iehova ese ia henia, Iehova ese ma ia abia oho; Iehova ena ladana do ita hanamoa noho.” Unai sivarai ma ia gwau: “Unai ibounai lalonai, Iobu be ia kerere lasi bona Dirava ia gwau dika henia lasi.” (Iobu 1:​20-22) Satana be ma ia kwalimu lasi. Ita be Dirava ena hesiai taudia dainai bema mase bona lalohisihisi ita davaria be edena bamona? Bema ita sibona ita laloa momo lasi bona Iehova ita badinaia bona ita abidadama henia, ita be abidadama haheaukalaia noho taudia ai do ita lao diba, Iobu bamona. Horoa idia abia taudia bona edia bamodia, tanobada maurina ena helaro idia abia taudia unai, be Iobu ia haheauka ena sivarai amo moale bona goada idia abia diba.

Hepapahuahu Ia Bada Ia Lao

¹² Daudau lasi murinai Iehova ese guba kota dekenai hebou ma ta totona ia boiridia lou. Iobu ena natudia be lasi hari, bona toana be Dirava ese unai ogogami tauna ia hadikaia, to ena abidadama ia do goada noho. Momokani, Satana ia ura lasi ia gwau ena samani herevana Dirava bona Iobu dekenai be koikoi herevana. Hari ‘Dirava ena natudia’ be Satana ena hereva bona Iehova ena hereva do idia kamonai, badina Iehova ese Diabolo ia veria unai hepapahuahu dekenai, edena hereva ia maoro do ia hahedinaraia totona.

12, 13. Guba dekenai idia hebou lou neganai, Satana ena ura be dahaka, bona Dirava ese dahaka ia karaia?

¹³ Iehova ese Satana ia hahemaoro henia totona ia gwau: “Oi be edeseni amo oi mai?” Ena haere be dahaka? “Tanobada dekenai lau loaloa bona lau raka lao raka mai.” Iehova ese hari tau Iobu ena kerere lasi, ena kara maoromaoro, bona Dirava garina ia gari karadia ia gwauraidia lou, ia ese ena abidadama karana ia do dogoatao noho. Diabolo ia haere, ia gwau: “Kopi ena davana be kopi. Tau ta ese ena orea bona ena kohu iboudiai do ia henia, ena mauri ia dogoatao totona. To harihari oiemu imana oi negea, ena turiana bona ena hidiona dekenai oi atoa, bena ia ese oiemu vairana dekenai oi do ia gwauraia dika.” Unai dainai Dirava ia gwau: “Itaia, ia be oiemu imana dekenai, to gau tamona, oi hamasea lasi.” (Iobu 2:​2-6) Satana ia laloa Iehova ese Iobu ia naria noho, unai dainai ia gwau ia ura Iobu ena turiana bona ena hidiona ia daua toho. To Dirava ese ia koua dainai Diabolo be Iobu ia hamasea diba lasi; to Satana ia diba gorere ese Iobu ena tauanina do ia hahisihisia, bona taunimanima do idia laloa ena kerere hehunina dainai Dirava ese davana mai hisihisina ia henia.

14. Satana ese Iobu be edena bamona ia hahisihisia, bona dahaka dainai taunimanima ta ese ia durua diba lasi ena hisihisi mamina hamaragia totona?

¹⁴ Unai hebou amo idia siaia oho neganai, Satana be mai moale danu ena ura dikana ia karaia. Ia ese Iobu dekenai “iohururu dika hereadia amo ia hahisia, ena aena lalona amo ela bona ena kwarana tubuana.” Iobu be lahi kahuna dekenai ia helai bona ia makohi uro ena kahana maragina ta amo ena kopina ia kakasia neganai hisihisi bada ia ania! (Iobu 2:​7, 8) Unai gorere ena hisihisi be bada herea, ia dika momokani, bona ia be hemarai gauna, bona doketa taudia ese idia durua diba lasi unai hisihisi mamina idia hamaragia totona, badina Satana ena siahu amo unai gorere ia davaria. Iehova mo sibona ese Iobu ia hanamoa diba. Bema oi be Dirava ena hesiai tauna ta bona oi gorere, inai oi laloaboio lasi: Dirava ese oi ia durua diba oi haheaukalaia totona bona gabeai gorere lasi tanobada matamatana lalonai mauri oi do ia henia diba.​—Salamo 41:​1-3; Isaia 33:24.

15. Iobu ena adavana ese ena lalona ia ania dahaka do ia karaia totona, bona Iobu be dahaka ia karaia?

¹⁵ Gau dokona be Iobu ena adavana ia gwau: “Oi be emu lalo-maoromaoro ai oi do haheauka noho, a? Iehova oi gwau dika henia bena oi mase!” “Lalo-maoromaoro” ena anina be kerere lasi abidadama karana, bona Iobu ese Dirava do ia gwau dika henia totona reana unai hahine be mai ena badu hevaseha herevana amo ia hereva henia. To ia haere, ia gwau: “Oi be kavakava hahinedia edia hereva hegeregeredia ai oi hereva. Be, namo mo Dirava ena imana amo do ita abia bena dika do ita abia lasi, a?” Unai dala amo Satana ese Iobu ia hamorua lasi, badina ita idia hadibaia hereva be inai: “Inai ibounai lalonai Iobu be ena uduna bibinadia amo ia hereva kerere lasi.” (Iobu 2:​9, 10) Bema iseda ruma bese taudia ese iseda tomadiho idia dadaraia bona idia gwau ita be kavakava badina Keristen ena gaukara dainai iseda tauanina ita hamanokaia, bona ita idia hagoadaia Iehova Dirava do ita dadaraia totona, dahaka do ita karaia? Iobu bamona unai hetoho ita haheaukalaia diba badina Iehova ita lalokau henia bona ita ura iena ladana helagana ita hanamoa.​—Salamo 145:​1, 2; Heberu 13:15.

Koikoi Taudia Toiosi Mai Edia Hekokoroku

¹⁶ Iobu ena “turana” toiosi idia lao ia dekenai ena lalona idia hagoadaia totona, to gabeai ia hedinarai unai be Satana ena dala ma ta do ia hamorua totona. Idia ta be Elifasa, reana ia be Esau amo Abraham ena iduhu dekenai ia vara. Idia toiosi amo reana Elifasa ena lagani be bada dainai, ia hereva guna. Ia noho tauna ma ta ena ladana be Bildad, ia be Suhi tauna, ia be Abraham ena natuna ta Ketura amo. Tau ihatoina be Sofara, idia gwauraia Naamata tauna, unai ese ena ruma bese eiava ena noho gabuna ia hahedinaraia, reana unai be Arabia ena notwest kahana dekenai. (Iobu 2:11; Genese 25:​1, 2; 36:4, 11) Hari inai negai, taunimanima haida be Iehova ena Witness taudia idia doridia toho Dirava do idia dadaraia totona, unai taudia be Satana ese ia gaukaralaidia taudia toiosi hegeregeredia, Iobu idia samania koikoi bona idia doria toho do ia gwau ia kerere bona ena abidadama do ia hamakohia.

17. Dina 7 bona hanuaboi 7 lalodiai unai vadivadi taudia toiosi be dahaka idia karaia, bona dahaka idia karaia lasi?

¹⁷ Unai taudia toiosi be hekokoroku dalana amo idia taitai, edia dabua idia darea, bona kahu idia negea bona edia kwarana dekenai ia moru edia hebogahisi idia hahedinaraia totona. Murinai, dina 7 bona hanuaboi 7 lalodiai Iobu danu idia helai to hagoadaia hereva ta idia henia lasi! (Iobu 2:​12, 13; Luka 18:​10-14) Unai koikoi taudia toiosi mai edia hekokoroku be lauma dalana ai idia manoka herea, unai dainai idia be dala lasi Iehova bona ena gwauhamata herevadia amo hagoadaia hereva haida idia herevalaidia totona. Vaia Iuda taudia edia kara be taunimanima vairanai edia lalohisihisi idia hahedinaraia, to idia laloa kerere, bona hereva idia hegaegaelaia Iobu idia samania totona. Inai oi laloa: idia herevahereva lasi dinadia 7 idia do ore lasi neganai, tauhau Elihu be edia hereva ia kamonai diba gabuna dekenai ia mai helai.

18. Dahaka dainai Iobu be lalo-maino davaria totona ia ura ia mase?

¹⁸ Iobu ese hereva ia hamatamaia. Idia vadivadi henia taudia toiosi amo hagoadaia hereva ia kamonai lasi dainai, ia vara dinana ia gwauraia dika bona dahaka dainai ena mauri dikana ia do ore lasi ia daradaralaia. Lalo-maino do ia davaria totona ia ura ia mase, ia laloa ia do mase lasi negana lalonai moale momokani do ia davaria lou diba lasi, badina hari ia ogogami momokani, ena mase taudia be momo, bona gorere badana ia abia. To Dirava ese Satana ia koua dainai Iobu ia hamasea diba lasi.​—Iobu 3:​1-26.

Iobu Idia Samania Taudia ese Idia Dagedage Henia

¹⁹ Iobu ena abidadama ma ia tohoa hepapahuahu ena kahana toi lalodiai Elifasa be ia hereva guna. Ena hereva ginigunana lalonai, Elifasa ia henanadai, ia gwau: “Edeseniai kara maoromaoro taudia ia negedia daure?” Ia laloa Iobu be ia kerere dainai Dirava ese kerere davana ia henia. (Iobu, karoa 4, 5) Ena hereva iharuana lalonai, Elifasa ese Iobu ena aonega ia hevasehalaia bona ia henanadai, ia gwau: “Dahaka gau oi diba to ai diba lasi?” Elifasa ia laloa Iobu be sibona ia gwauraia ia be Siahu Ibounai Diravana ena aonega ia hanaia. Ena dagedage hereva iharuana hadokoa totona, ia gwau Iobu be tomadiho momokani ia negea, lalo-ani moni ia abia, bona ia koikoi. (Iobu, karoa 15) Kahana toi dekenai ena hereva ginigabena ai, Elifasa ese Iobu ia samania koikoi, ia gwau dika idauidau ia karaia​—taunimanima ia koidia kohu abia totona, dabu taudia dekenai paraoa bona ranu ia henidia lasi, bona vabu bona tamana lasi merodia ia hahisihisidia.​—Iobu, karoa 22.

20. Bildad ese Iobu ia dagedage henia herevadia be dahaka?

²⁰ Hepapahuahu ena kahana toi lalodiai hereva iharuana ia gwauraia neganai, Bildad ese nega momo Elifasa ena hereva ia habadaia. Bildad ena hereva be idia kwadogi sisina to hereva auka ia gwauraia. Ia gwau Iobu ena natuna be kerere idia karaia dainai kerere davana mase idia abia. Ia laloa kerere, bona inai haheitalai ia gwauraia: Siriho bona rei be ranu lasi neganai idia marai bona idia mase, unai be “Dirava idia laloaboio taudia” hegeregeredia. Unai hereva be ia momokani, to ena anina Iobu dekenai ia gwauraia be maoro lasi. (Iobu, karoa 8) Bildad ia gwau Iobu ese gorere ia davaria badina ia kara dika dainai. (Iobu, karoa 18) Ena hereva kwadogina ihatoina lalonai, Bildad ia gwau taunimanima be “gaigai maragi” bona “biluga” hegeregerena bona unai dainai Dirava vairanai idia be mai edia miro.​—Iobu, karoa 25.

21. Sofara ese Iobu ia samania herevana be dahaka?

²¹ Unai hepapahuahu lalonai Sofara be hereva ihatoina tauna. Ena hereva momo be Elifasa bona Bildad edia hereva hegeregerena. Sofara ia gwau Iobu be ia kara dika bona ia hagoadaia ena kara dika karadia do ia negedia totona. (Iobu, karoa 11, 20) Hepapahuahu ena kahana rua sibona lalonai Sofara ia hereva. Kahana ihatoina lalonai hereva ma ta ia gwauraia lasi. To, unai hepapahuahu negana lalonai, Iobu be gari lasi dekenai idia samania taudia edia hereva ia haerelaidia. Hegeregere, nega ta ia gwau: “Umui ibounai be heduru taudia dikadia! Hereva kavakavadia be mai edia dokona, a?”​—Iobu 16:​2, 3.

Ita Haheauka Diba

²² Iobu bamona, reana hetoho idauidau ita davaria hebou diba, bona reana Satana be ita idia hagoadaia lasi gaudia eiava kara ma haida do ia gaukaralaidia iseda abidadama karana ia hadikaia totona. Bema moni hekwarahina ita abia reana dala ia tahua Iehova do ita dadaraia totona. Bema iseda lalokau tauna ta ia mase eiava gorere ita abia, reana Satana be iseda lalona do ia veria bena ia ura do ita gwau unai be Dirava ena kerere. Iobu ena turadia hegeregeredia, reana ta ese ita ia samania kerere. Tadikaka Macmillan ia hereva bamona, Satana be reana ‘ita ia abia toho,’ to ita haheauka diba.

22, 23. (a) Iobu dekenai ia vara hegeregerena, Diabolo be reana edena dala amo iseda abidadama Iehova Dirava dekenai do ia hadikaia toho diba? (b) Ena be Iobu ese hetoho idauidau ia haheaukalaidia noho, to ena lalohadai ita diba totona dahaka henanadai ita gwauraidia be namo?

²³ Ita tahua vadaeni sivaraina lalonai, Iobu ia davaria hetoho idauidau ia haheaukalaidia. To, kahirakahira ena haheauka ia ore, a? Ena abidadama ia manoka, a? Namona be ita itaia Iobu ese ena helaro namona ibounai ia haboioa eiava lasi.

Edena Bamona Do Oi Haere?

◻ Iobu ena negai, Satana ese ia havaraia hepapahuahu badana be dahaka?

◻ Edena daladia amo Iobu ena abidadama karana idia tohoa bada?

◻ Iobu ena “turana” toiosi ese idia samania neganai idia gwau dahaka ia karaia?

◻ Iobu dekenai ia vara bamona, Satana be iseda abidadama Iehova dekenai be edena bamona ia hadikaia toho diba?

5. Ena be Iobu ia diba lasi, to guba dekenai dahaka ia vara noho?

7. Edena hepapahuahu herevana amo Diabolo ese Dirava ia samania, bona Iehova ese dahaka ia karaia?

16. Daidia idia mai Iobu idia hagoadaia totona, to Satana be edena bamona ia gaukaralaidia?

19. Elifasa ese Iobu ia samania kerere herevana be dahaka?

[Picture on page 10]

A. H. Macmillan