Emui Lalo-Hekwarahi Iboudiai be Iehova Imana Dekenai Umui Atoa
“Dirava ena imana goadana henunai do umui manau, vadaeni iena nega namona lalonai ia ese umui do ia abia isi. Ia ese umui ia naria noho. Unai dainai emui laloa hekwarahi gaudia ibounai iena imana dekenai do umui atoa.”—1 PETERO 5:6, 7.
1. Lalo-hekwarahi karana be edena bamona ita ia hadikaia diba, bona edena bamona unai oi haheitalaia diba?
LALO-HEKWARAHI be iseda mauri ia hadikaia diba. Ia be reidio dekenai ita kamonai henia miusik namona ia hadikaia regena hegeregerena. Bema gau ta lasi be reidio ena siahu ia koua, ia dekena amo ia mai miusik ena rege namona ita kamonai namonamo diba bona iseda lalona ia hamainoa diba. To, bema static ena rege ese unai miusik namona ia hadikaia, ita badu bona ita lalo-hisihisi. Unai hegeregerena, lalo-hekwarahi ese iseda maino do ia haorea diba. Ita ia hametaua diba bena mai anina bada gaukarana do ita karaia lasi. Oibe, “lalo-hekwarahi ese tau ta ia hametaua noho.”—Hereva Lada-isidia 12:25.
2. Iesu Keriso be mauri “ena laloa metau momo gaudia” be edena bamona ia herevalaia?
2 Lalo-hekwarahi bada karana ese ita ia veria kerere diba be Iesu Keriso ese ia herevalaia. Dina gabedia ena peroveta herevana lalonai ita ia sisiba henia, ia gwau: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina, vadaeni Lohiabada ena dina do ia mai haraga, umui hegaegae lasi garina. Badina be unai dina be tanobadai idia noho taunimanima ibounai dekenai do ia ginidae. Unai dainai, do umui naria, bona nega ibounai do umui guriguri, vadaeni inai dika ibounai dekena amo do umui roho mauri, vadaeni Taunimanima ena Natuna ena vairana dekenai do umui gini.” (Luka 21:34-36) Bema ita aniani bona ita inuinu bada unai ese iseda lalohadai haraga dalana do ia koua, unai hegeregerena, mauri ena “laloa metau momo gaudia” dainai ita laloa namonamo diba lasi, bona unai ese dika ia havaraia diba.
Lalo-Hekwarahi Ena Anina
3 ‘Lalo-hekwarahi’ ena anina be inai bamona idia gwauraia, “hisihisi eiava dika ia vara gwauraia dainai lalona dekenai gari karana.” Ia be “mai gari danu eiava mai ura danu gau ta oi laloa” bona ia be “dika ia vara garina bona gari dikadika gauna dainai tauanina dekenai toa ia hedinarai (hegeregere varahu ia diho, lalona ia hekwarahi, bona kudouna ia hetaha), unai dika do ia vara bona ia be dahaka idia daradaralaia dainai, bona idia laloa unai dika do idia hanaia diba lasi.” (Webster’s Ninth New Collegiate Dictionary) Vadaeni, lalo-hekwarahi karana be hekwakwanai badana. Ia vara ena badina haida be inai: idia gorere, idia buruka, raskol karana dainai idia gari, moni gaukara idia haboioa, bona ruma bese idia dika garina idia gari.
4. (a) Taunimanima bona edia lalo-hekwarahi ita laloa ena badina be dahaka? (b) Bema ita lalo-hekwarahi, dahaka ita karaia diba?
4 Ia hedinarai goevagoeva, lalo-hekwarahi ena bada be idauidau, bona lalo-hekwarahi ia havaraia ena badina eiava karadia be idauidau. Kara ta ia vara neganai, taunimanima edia kara be idauidau. Unai dainai, namona be ita lalo-parara, kara ta ia vara neganai reana ita lalo-hekwarahi lasi, to reana Iehova idia tomadiho henia tadikaka ma haida be unai gau dainai do idia lalo-hekwarahi bada. Bema ita lalo-hekwarahi bada dainai Dirava ena Hereva ena lalo-tamona bona moale hereva momokanina ita lalohadailaia namonamo diba lasi, dahaka do ita karaia diba? Bema ita lalo-hekwarahi bada dainai Iehova ena lohia dalana dekenai hepapahuahu herevana bona Keristen ena abidadama karadia ita lalohadailaidia namonamo diba lasi, dahaka do ita karaia? Reana iseda mauri dalana ita haidaua diba lasi. To, ita lalo-hekwarahi bada lasi totona, namona be Revareva Helagadia dekena amo ita do ia durua herevadia ita tahudia mauri ena hekwarahi aukadia do ita haheaukalaidia diba totona.
Heduru Oi Abia Diba
5 Lauma dalanai Keristen taudia be heduru idia abia be namo neganai, bona lalo-hekwarahi gaudia ese idia hametaudia neganai, Dirava ena Hereva dekena amo lalo-maino havaraia herevadia idia davaria diba. Unuseniai ita ia hakaua hereva namodia idia noho, bona nega momo ita ia hadibaia ita be Iehova ena abidadama hesiai taudia dainai, ita be sibona ita gini lasi. Hegeregere, salamo torea tauna David be ane amo ia gwau: “Emu maduna be Iehova latanai oi tahoa kau, ia ese oi do ia abia isi. Ia ese kara maoromaoro tauna do ia naria hanaihanai, do ia marere lasi totona.” (Salamo 55:22) Dahaka do ita karaia unai hereva do ita badinaia totona? Dalana be iseda lalo-hekwarahi, lalo-metau, gari, bona lalohisihisi gaudia iboudiai be iseda guba lalokau Tamana dekenai ita tahoa kau. Unai ese ita do ia durua bena noho namo mamina bona lalo-manau kudouna do ita abia.
6. Filipi 4:6, 7 hegeregerena, guriguri be edena bamona ita ia durua diba?
6 Ita idia hametaua gaudia, iseda lalo-hekwarahi gaudia danu, be Iehova dekenai do ita tahodia kau diba totona, gau badana be hanaihanai iseda lalona ibounai ida ita guriguri. Unai kara ese ita dekenai lalo-maino do ia havaraia, badina be aposetolo Paulo ia toretore, ia gwau: “Gau ta totona do umui laloa hekwarahi lasi. To emui dabu gaudia do umui abia totona Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia bona emui kudouna idia mamia gaudia ibounai do ia naria namonamo.” (Filipi 4:6, 7) Gau ta ia hanaia diba lasi gauna be “Dirava ena maino,” bona ena be hekwakwanai idia davaria, to Iehova ena gwauhamata hesiai taudia ese unai lalo-maino namona idia do moalelaia diba. Unai ita karaia diba badina ita ta ta iboudiai be Dirava ida ita tura henia namonamo. Ena be lauma helaga abia totona ita guriguri, bona ita ia hasiahua hegeregerena ita gaukara, ena be mauri ena hekwarahi haida ita do davaria, to maino, lauma huahuana ta, ita do moalelaia diba. (Luka 11:13; Galatia 5:22, 23) Lalo-hekwarahi ese ita ia hametaua bada lasi, badina ita diba Iehova ese dala ia karaia iena abidadama taudia iboudiai be ‘gari lasi dekenai do idia noho’ totona, bona dika do ia koua dainai gau ta lasi ese ita do ia hadikaia ore diba.—Salamo 4:8.
7. Lalo-hekwarahi karana haheaukalaia totona, Keristen elda taudia ese ita edena bamona idia durua diba?
7 To, bema Revareva Helagadia edia hereva ita lalohadailaidia namonamo bona ita guriguri noho to ita do lalo-hekwarahi noho, dahaka do ita karaia? (Roma 12:12) Kongregesen lalonai dagi idia abia elda taudia be Iehova ena heduru lauma dalanai ita goada totona. Dirava ena Hereva idia gaukaralaia bona ita ida bona ita totona idia guriguri dalana amo ita dekenai lalo-maino bona heduru idia henia. (Iakobo 5:13-16) Aposetolo Petero ese elda taudia ia hagoadadia Dirava ena mamoe orea be mai edia ura danu do idia gunalaia, mai edia goada danu, bona mai edia ura namona dalana amo. (1 Petero 5:1-4) Unai taudia ese iseda namo idia tahua bona idia ura ita idia durua. Momokani, elda taudia idia henia heduruna amo namo do ita davaria totona, bona kongregesen lalonai lauma dalanai ita goada totona, ita ibounai be Petero ena sisiba ita badinaia be gau badana, ia gwau: “Eregabe taudia e, umui ese gunalaia taudia do umui kamonai henia. Umui ibounai do umui laloa manau, vadaeni umui ta ta dekenai durua do umui henia. Badina be Buka Helaga ia gwau, ‘Dirava ese hekokoroku taudia edia dala ia koua, to manau taudia dekenai iena hariharibada ia henia.’ ”—1 Petero 5:5.
8, 9. Petero Ginigunana 5:6-11 dekena amo ita davaria lalo-maino herevana be dahaka?
8 Petero ma ia gwau: “Unai dainai Dirava ena imana goadana henunai do umui manau, vadaeni iena nega namona lalonai ia ese umui do ia abia isi. Ia ese umui ia naria noho. Unai dainai emui laloa hekwarahi gaudia ibounai iena imana dekenai do umui atoa. Do umui laloa maoromaoro bona naria namonamo. Umui ia tuari henia tauna, Satani be leona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho. Emui abidadama dekenai do umui gini goada, vadaeni Satani do umui koua. Namo umui diba, emui ekalesia varavara tanobada kahana ibounai dekenai, be hisihisi inai bamona idia abia noho. Umui be nega sisina do umui hisihisi, vadaeni gabeai, hariharibada ibounai Diravana ese umui do ia hanamoa momokani, umui do ia haginia goada, bona badina korikori latanai umui do ia haginia. Oibe, inai Dirava ese umui ia boiria vadaeni iena noho hanaihanai hairaina Keriso danu do umui abia hebou totona. Ia dekenai siahu ibounai ia noho ela bona hanaihanai. Amen.”—1 Petero 5:6-11.
9 ‘Ita ia naria noho dainai, iseda lalo-hekwarahi gaudia ibounai be Dirava imana dekenai ita atoa diba,’ unai ita lalo-pararalaia neganai lalo-maino ita davaria! Bema iseda lalo-hekwarahi haida ena badina be dagedage bona hisihisi ma haida ita davaria Diabolo ia ura iseda hetura karana Iehova ida ia hadikaia toho totona, ita moale diba badina ita diba gabeai abidadama noho taudia ese namo do idia davaria, ani? Oibe, ita hisihisi sisina murinai, hariharibada Diravana be ita ia hadibaia dalana do ia haorea bona ita ia haginia auka bona ita ia hagoadaia.
10. Lalo-hekwarahi hamaragia totona 1 Petero 5:6, 7 ese ia gwauraia heduru gaudia toi be dahaka?
10 Lalo-hekwarahi haheaukalaia totona 1 Petero 5:6, 7 ese ita ia durua diba gaudia toi ia gwauraidia. Ta be manau karana eiava “laloa manau.” 1Pe 5 Siri 6 ena hereva ginigabena ia gwau “iena nega namona lalonai,” unai ese ia hahedinaraia ita haheauka be gau badana. 1Pe 5 Siri 7 ese ia hahedinaraia gari lasi dekenai iseda lalo-hekwarahi gaudia iboudiai be iena imana dekenai ita atoa diba ‘badina ita ia naria noho dainai,’ bona unai hereva ese ita idia hagoadaia Iehova ita abidadama henia momokani totona. Namona be manau, haheauka, bona Dirava abidadama henia momokani karadia ese ita idia durua dalana lalo-hekwarahi hamaragia totona do ita itaia hari.
Manau be Ita Ia Durua Dalana
11 Bema ita manau, do ita gwau Dirava ena lalohadai be iseda lalohadai ia hereaia momokani. (Isaia 55:8, 9) Manau karana ese ita ia durua bena ita diba gau haida sibona ita lalohadailaia diba, to Iehova ese gau iboudiai ia lalohadailaia diba. Gau haida ia itaia to ita ese unai gau ita lalo-pararalaidia diba lasi, unai ia hedinarai kara maoromaoro tauna Iobu ena sivarai lalonai. (Iobu 1:7-12; 2:1-6) “Dirava ena imana goadana henunai” ita manau karaia neganai, ita gwau ita maragi bona Atai Herea Lohiabadana be bada herea. Bena, unai ese ita ia durua ia koua lasi karadia do ita haheaukalaidia totona. Reana iseda lalona ibounai ida ita ura unai dika ia kokia, to Iehova ena kara iboudiai be goevadae dainai, ia diba edena negai bona edena dala amo kara ia karaia ita ia durua totona. Vadaeni, mero kekeni maragidia bamona, namona be mai iseda manau ida Iehova ena imana ita abia, ita gari lasi badina ita diba iseda lalo-hekwarahi gaudia ita haheaukalaidia totona ita do ia durua.—Isaia 41:8-13.
12. Bema mai iseda manau ida Heberu 13:5 ena hereva ita badinaia, kohu abia karana amo noho namo ita tahua karana dekenai iseda lalohadai be dahaka?
12 Manau karana ena anina danu be mai iseda ura ida Dirava ena Hereva amo ita abia sisibana ita badinaia, nega momo unai ese lalo-hekwarahi ena mamina ia hamaragia diba. Hegeregere, bema ita gaukara goadagoada kohu momo abia totona, bona unai dainai lalo-hekwarahi ita davaria, namona be Paulo ena sisiba ita laloa namonamo, ia gwau: “Moni do umui ura henia dikadika lasi. To umui dekenai ia noho gauna, be inai bamona do umui laloalaia, ‘Lau dekenai noho gauna be namo, ia hegeregere vadaeni.’ Badina be Dirava be inai bamona ia hereva, ia gwau, ‘Lau ese umui do lau negea lasi, bona umui do lau rakatania lasi. Lasi bona lasi momokani.’ ” (Heberu 13:5) Mai edia manau danu unai sisiba idia badinaia dainai, taunimanima momo herea be noho namo totona kohu idia lalo-hekwarahilaia lasi. Ena be edia moni be ia do hegeregere lasi, to idia ese unai idia lalohadailaia hanaihanai lasi, lauma dalanai idia dika garina.
Haheauka Ena Anina
13 Petero Ginigunana 5:6 dekenai, inai hereva “nega namona lalonai” ese ia hahedinaraia mai manau danu ita haheauka be gau badana. Nega haida hekwakwanai ta be nega daudau lalonai ia noho, bona unai ese lalo-hekwarahi ia habadaia diba. Unai neganai, namona be Iehova imana dekenai ita atoa. Hahediba tauna Iakobo ia toretore, ia gwau: ‘Ita diba inai haheauka taudia ese moale idia davaria vadaeni, ani? Iobu ena haheauka sivaraina umui kamonai vadaeni, bona Iehova ese dokona neganai Iobu ia durua bada, ani? Badina be Iehova be mai ena hebogahisi, bona iena hariharibada be bada herea.’ (Iakobo 5:11) Iobu ese ena kohu ibounai ia haboioa, ena natudia 10 idia mase, gorere dikana ena hisihisi ia abia, bona heduru koikoi taudia ese idia samania kerere. Unai dika ibounai ia davaria tauna be vaia do ia lalo-hekwarahi diba.
13, 14. (a) Mai manau ida haheauka karana dekenai, Iobu ena haheitalai namona be dahaka? (b) Mai haheauka danu Iehova ita naria karana be edena bamona ita ia durua?
14 To vadaeni, Iobu be mai ena manau ida ia haheauka noho dalana be haheitalai namona. Bema gau ta ese iseda abidadama ia tohoa bada, reana do ita naria heduru do ita abia totona, ia naria hegeregerena. To durua totona Dirava ese kara ta ia karaia, gabeai ia ese Iobu dekena amo hisihisi mamina ia kokia bona ia hanamoa bada. (Iobu 42:10-17) Mai iseda haheauka ida Iehova ita naria neganai, unai ese iseda haheauka karana ia habadaia bona iseda abidadama ena bada ia dekenai ia hahedinaraia.—Iakobo 1:2-4.
Iehova Ita Abidadama Henia
15 Petero ese abidadama tamona taudia ia hagoadadia ‘edia lalo-hekwarahi gaudia iboudiai Dirava ena imana dekenai do idia atoa badina idia ia naridia dainai.’ (1 Petero 5:7) Vadaeni, namona be Iehova ita abidadama henia momokani. Hereva Lada-isidia 3:5, 6 dekenai ia gwau: “Iehova oi abidadama henia mai emu lalona ibounai ida; bona oi sibomu emu lalo-parara oi abidadama henia lasi. Emu dala iboudiai lalodiai ia oi laloa, bena ia ese emu dala do ia hamaoromaorodia.” Guna idia dekenai ia vara karadia dainai, idia lalo-hekwarahi taudia haida be taunimanima dekenai idia abidadama be ia auka. To iseda Havaraia Tauna ita abidadama henia ena badina be momo, ia be mauri ena Badina bona Durua Noho Tauna. Ena be reana nega ta ta ai gau ta dainai ita diba lasi dahaka do ita karaia, to Iehova dekenai ita abidadama diba, iseda hekwakwanai dikadia amo ia ese ita do ia hamauria diba.—Salamo 34:18, 19; 36:9; 56:3, 4.
16. Tauanina gaudia lalo-hekwarahilaia karana dekenai Iesu Keriso be dahaka ia gwau?
16 Dirava dekenai ita abidadama ena anina be iena Natuna, Iesu Keriso, ena hereva ita badinaia, ia ese ena Tamana amo ia diba gaudia ia hahedibalaia. (Ioane 7:16) Iesu ese ena hahediba taudia ia hagoadadia Iehova idia hesiai henia totona, unai amo ‘guba dekenai kohu do idia haboua’ diba. To tauanina durua gaudia, hegeregere aniani, dabua, bona ruma be edena bamona? Iesu ia sisiba, ia gwau: “Mai gari danu umui laloa momo lasi.” Ia hahedinaraia Dirava ese manu edia aniani ia henia. Palaoapalaoa be dabua bamona hairai amo ia koudia. Unai gaudia ese Dirava ena taunimanima idia hanaia, a? Lasi momokani. Unai dainai, Iesu ia sisiba, ia gwau: “Umui be [Dirava ena] Basileia bona iena kara maoromaoro do umui tahua guna, vadaeni unai gau ibounai danu umui dohore ia henia.” Iesu ma ia gwau: “Umui emui lalona do idia hekwarahi lasi kerukeru totona. Badina be kerukeru sibona ena hekwarahi do ia abia.” (Mataio 6:20, 25-34) Oibe, aniani, inuinu, dabua, bona ruma ita abia be gau badana, to bema Iehova dekenai ita abidadama, unai gaudia abia totona do ita lalo-hekwarahi bada lasi.
17. Basileia ita tahua guna be gau badana, edena dala amo ita haheitalaia diba?
17 Basileia do ita tahua guna totona, Dirava dekenai ita abidadama bona ita laloa namonamo mai anina bada gaudia ita atoa guna totona. Reana nahu tauna be hahodi masini ia abia lasi, to davara dekenai ia pau dobi bona mai ena dava bada nadinadi bisisina ia tahua. Unai dala amo moni ia davaria ena ruma bese taudia ia ubudia totona. Oibe, unai ia karaia be mai anina bada! To dahaka be mai anina bada herea? Hodahoda! Hanaihanai ia daekau hodahoda ia ania totona. Hodahoda ia ania guna be mai anina bada. Unai hegeregerena, mauri durua gaudia abia totona inai tanobada dekenai ita gaukara. To, lauma gaudia ita laloa guna be namo, badina unai amo iseda ruma bese taudia do idia mauri. Tauanina durua gaudia abia totona ita lalo-hekwarahi garina, namona be Dirava dekenai ita abidadama momokani. Danu, ‘Lohiabada ena gaukara do ita karaia goadagoada,’ reana unai ese ita ia durua iseda lalo-hekwarahi ita hamaragia totona, badina “Iehova moalelaia karana” be iseda goada gauna.—1 Korinto 15:58; Nehemia 8:10.
Iseda Lalo-Hekwarahi be Iehova Imana Dekenai Ita Atoa
18 Lauma gaudia do ita lalodia noho diba totona, iseda lalo-hekwarahi be Iehova imana dekenai ita atoa be gau badana. Namona be ita laloatao ia ese ena hesiai taudia ia naridia momokani. Haheitalai ta be inai: Keristen hahine ta ena adavana be ia heudahanai, unai dainai ia lalo-hekwarahi bada bona ia mahuta be ia auka momokani. (Salamo 119:28 itaia.) To, ena mahuta gedana dekenai ena lalo-hekwarahi gaudia iboudiai be Iehova imana dekenai ia atoa. Ena lalohadai iboudiai be Dirava dekenai ia gwauraia hedinarai, ia bona ena natuna kekeni maragi ruaosi edia hisihisi mamina ia hamaorolaia. Ia gwau guriguri amo mai taitai danu heduru abia totona ia noinoi murinai, karaharaga ia mahuta diba, badina Iehova dekenai ia abidadama, ia diba Ia ese ia bona ena natudia do ia naridia. Baibel ena hereva hegeregerena ena headava ia hadokoa bona hari elda ta ia adavaia dainai ia moale.
19, 20. (a) Iseda lalo-hekwarahi haheaukalaia daladia haida be dahaka? (b) Iseda lalo-hekwarahi iboudiai dekenai dahaka ita karaia?
19 Ita be Iehova ena taunimanima dainai, lalo-hekwarahi gaudia haheaukalaidia daladia be idauidau. Dirava ena Hereva ita badinaia be heduru dala namona ta. Dirava ese “hesiai tauna mai ena kamonai bona mai ena kara maoromaoro” oreana amo lauma aniani digarana ita ia henia, ita idia durua bona hagoadaia sivaraidia be Gima Kohorona bona Noga! magasin amo danu. (Mataio 24:45-47) Dirava ena lauma helaga ese ita ia durua. Hanaihanai mai iseda lalona ibounai ida ita guriguri karana ese ita ia durua bada. Elda dagina idia abia Keristen taudia idia noho hegaegae bona idia ura lauma dalana amo heduru bona hagoadaia herevadia ita idia henia.
20 Bema ita lalo-hekwarahi, iseda manau bona haheauka karadia be heduru bada ita ia hametaua lalo-hekwarahi ita hamaragia totona. Gau badana be Iehova dekenai ita abidadama, iena heduru ita abia bona ena hakaua dalana ita itaia neganai, unai ese iseda abidadama karana ia habadaia. Danu, Dirava dekenai ita abidadama neganai, lalo-hekwarahi momo karana do ia koua. (Ioane 14:1) Abidadama karana ese ita ia hasiahua Basileia do ita tahua guna bona Lohiabada ena moale gaukarana do ita goadalaia totona, bona unai ese ita ia durua lalo-hekwarahi gaudia ita haheaukalaidia totona. Unai bamona gaukara dainai, Dirava ena ladana hanamoa anena do idia abia ela bona hanaihanai taudia edia huanai, noho namo mamina ita abia. (Salamo 104:33) Unai dainai, namona be iseda lalo-hekwarahi iboudiai be Iehova ena imana dekenai ita atoa.
Edena Bamona Do Oi Haere?
◻ Lalo-hekwarahi ena anina be dahaka?
◻ Lalo-hekwarahi ita haheaukalaia daladia haida be dahaka?
◻ Manau bona haheauka karadia be edena bamona ita idia durua lalo-hekwarahi mamina hamaragia totona?
◻ Lalo-hekwarahi haheaukalaia totona, dahaka dainai Iehova ita abidadama henia bada be gau badana?
◻ Iseda lalo-hekwarahi iboudiai Iehova imana dekenai ita atoa noho ena badina be dahaka?
3. ‘Lalo-hekwarahi’ ena anina be dahaka, bona ia vara ena badina haida be dahaka?
5. Salamo 55:22 badinaia totona dahaka ita karaia?
11. Manau karana be edena bamona ita ia durua lalo-hekwarahi ita haheaukalaia totona?
15. Dahaka dainai Iehova ita abidadama henia momokani be gau badana?
18. Bema iseda lalo-hekwarahi iboudiai be Iehova imana dekenai ita atoa, dahaka ese ia hamomokania unai ese ita ia durua bada?
[Picture on page 24]
Dahaka dainai Iesu ia gwau, “Mai gari danu umui laloa momo lasi,” oi diba, a?