Abidadama Noho Besena

“Ikoukou umui kehoa, bena kara maoromaoro besena mai ena abidadama do ia raka vareai.”​—ISAIA 26:2.

1. Isaia lalonai ia gwau “kara maoromaoro besena” ia noho, to dahaka dainai taunimanima ese unai hereva dainai idia hoa?

HARI inai nega lalonai, bese edia kara toana be idauidau. Bese haida edia gavamani be demokratik, haida be mai edia diktator. Bese haida be mai edia taga, haida be idia ogogami. To idia iboudiai be gau tamona dekenai idia hegeregere: Idia iboudiai be inai tanobada ia biagua diravana, Satana, ena kahana dekenai idia noho. (2 Korinto 4:4) Unai dainai, taunimanima haida ese Isaia ena hereva dainai reana idia hoa, ia gwau: “Umui taunimanima e, ikoukou umui kehoa, bena kara maoromaoro besena mai ena abidadama do ia raka vareai.” (Isaia 26:2) Kara maoromaoro besena? Oibe, kara maoromaoro besena ia noho, badina peroveta herevana ia gwau iseda nega lalonai do ia noho. Unai bese be edena bamona do ita dibaia?

2. Unai “kara maoromaoro besena” be dahaka? Edena bamona ita diba?

² New World Translation Baibel lalonai, Isaia 26:​2 ena hereva idia hahanaia neganai, unai bese idia gwauraia “kara maoromaoro besena mai ena abidadama.” King James Version Baibel (margin) lalonai unai siri idia hahanaia, “mai ena kara maoromaoro besena be hereva momokani idia badinaia.” Unai hereva ruaosi be namo. Oibe, mai ena kara maoromaoro besena ita diba be ia auka lasi, badina unai tanobada besena mo sibona be Pavapava Keriso ena siahu henunai ia noho, unai dainai ia be Satana ena tanobada kahana lasi. (Ioane 17:16) Unai dainai, taunimanima idia diba unai bese taudia be ‘taunimanima edia vairanai kara namodia idia karaia.’ Edia mauri lalonai Dirava hanamoa dalana idia badinaia. (1 Petero 2:12) Ma danu, tanobada dekenai herevana edeseniai idia noho, to idia be ‘mauri Diravana ena ekalesia, idia be hereva momokani ena du bona iena badina korikori.’ (1 Timoteo 3:15) Hereva momokani idia abia dae dainai, Kerisendom ese ia hadibaia herevadia, bona Dirava diba lasi taudia edia hahediba herevadia unai, idia dadaraidia bona “lauma ena rata goevagoeva”​—Dirava ena Hereva, Baibel, idia gwauraia bada. (1 Petero 2:2) Ma danu, idia ese Basileia ena sivarai namona be “tanobada ibounai dekenai” idia harorolaia. (Kolose 1:23) Ita daradara unai bese be ‘Dirava ena Israel’ taudia oredia, idia be horoa Keristen kongregesen oreana, a? Lasi momokani!​—Galatia 6:16.

Bese Ia Vara

³ Unai “kara maoromaoro besena” be edena negai ia vara? Isaia bukana ese do ia matamaia negana ia perovetalaia. Isaia 66:​7, 8, ita duahia, ia gwau: “[Siona] ena hisihisi ia do abia lasi neganai natuna ia havaraia. Vara ena hisihisi mamina ia do abia lasi neganai, ia ese natuna merona ta ia abia. . . . Siona be hekwarahi ia abia bona ena natuna memerodia ia havaraia danu.” Unai be idau momokani, Siona, Dirava ena guba oreana, ese “natuna merona” ia havaraia to mara ena hisihisi ia abia lasi. Lagani 1914 ai, guba dekenai Mesia ena Basileia ia vara. (Apokalupo 12:5) Unai murinai, bese ma haida be tanobada ibounai tuarina ginigunana lalonai idia vareai, bona horoa Keristen taudia be hisihisi bona dagedage bada idia davaria. Bena, lagani 1919 ai, tanobada dekenai lauma besena ena “natuna merona” ia vara. Siona ese ‘ena natuna memero ia havaradia’​—“kara maoromaoro besena” matamatana ena horoa taudia unai​—bona idia hegaegaelaidia ia bada ia lao haroro gaukarana do idia karaia totona.​—Mataio 24:3, 7, 8, 14; 1 Petero 2:9.

4. Dahaka dainai Dirava ena kara maoromaoro besena be ia hekwarahi ia abidadama noho totona?

⁴ Ia vara negana amo, unai bese taudia edia abidadama karana dekenai hetoho bada idia davaria. Dahaka dainai? Guba Basileia ia vara neganai, Satana bona ena demoni be guba amo idia negedia diho tanobada dekenai. Mai ena rege bada gadona ta ia gwau: “Harihari iseda Dirava ena hahemauri ia ginidae vadaeni. Harihari iena Keriso ese iena siahu ia hedinaraia vadaeni. Badina be unai tau ese Dirava ena vairanai, dina bona hanuaboi, ia gini, iseda varavara ia samania, hari be ia noho lasi. Guba dekena amo ia idia negea diho vadaeni. Iseda varavara ese Mamoe ena Natuna ena rarana dainai, bona iena hereva idia gwauraia dainai, Satani dekena amo idia kwalimu. Bona edia tanobada mauri idia laloa momo lasi, to Keriso dainai edia mauri idia atoa diho.” Unai ia vara dainai Satana be ia badu dikadika bona “ia lao, hahine ena natuna oredia, idia do noho taudia, ia tuari henia. Unai taudia be inai: idia ese Dirava ena taravatu idia badinaia momokani. Bona Iesu ena hereva momokani idia gwauraia hedinarai.” Satana amo dagedage idia davaria neganai horoa Keristen taudia idia gini goada. Ema bona hari, ‘ena be idia mase diba,’ to Dirava ena kara maoromaoro bese taudia be mai edia goada danu Iesu ia henia boubou rarana dekenai idia abidadama, bona edia abidadama karana amo Iehova ese ia ia gwau henia tauna badana ia haere henia diba.​—Apokalupo 12:​1, 5, 9-12, 17; Hereva Lada-isidia 27:11.

5. Dahaka kara namona ese hari inai nega Witness taudia ia durudia idia abidadama noho totona?

⁵ Lagani 1919 ai, Iehova ena Witness taudia, guna edia ladana be Bible Student taudia, ese iseda negai Dirava ena Basileia harorolaia gaukarana idia hamatamaia neganai, idia be momo lasi to edia abidadama be goada herea. Idia be ‘hanua aukana; ena magu bona imuda be hahemauri gauna’ ena badina taudia ai idia lao. Idia ese “Iehova . . . noho hanaihanai nadina” idia abidadama henia. (Isaia 26:​1, 3, 4) Idaunegai tauna Mose hegeregerena, idia gwau: “Iehova ena ladana do lau harorolaia. Iseda Dirava ena siahu umui herevalaia! Nadi Badana, iena gaukara be goevadae, badina be iena dala iboudiai be hahemaoro maoromaoro daladia. Ia be abidadama Diravana, kara kerere ta lasi ia dekenai; ia be maoromaoro bona momokani.”​—Deuteronomi 32:​3, 4.

6. Hari inai nega dokona lalonai, Iehova ese ena bese taudia ia hanamodia dalana be dahaka?

⁶ Unai nega amo, taunimanima be Dirava ena Basileia siahuna henunai idia vareai dalana ena ikoukou idia kehoa noho, bona 144,000 horoa Keristen taudia oredia idia haboudia guna, bona harihari “mamoe idaudia” hutuma ese idia bamodia Iehova ena Basileia gaukara idia harorolaia totona. (Ioane 10:16) Vadaeni, mai moale danu ita gwau: “Iehova e, bese taudia oi hahutumadia vadaeni; oi be sibomu oi hahairaia vadaeni. Tano hetoadia iboudiai oi habadaia vadaeni.” (Isaia 26:15) Hari inai negai, tanobada hegegemadai unai gaukara ita itaia neganai, ita diba unai hereva be ia momokani! Lauma helaga ena siahu amo, Keriso ena Basileia, kahirakahira do ia mai gauna, be “tanobada ena kahana ibounai” dekenai idia harorolaia. (Kara 1:​8) Unai gaukara ena bada oi diba totona, Iehova Ena Witness Taudia Edia Lagani 1994 Ena Haroro Ripoti, rau 12 ia lao 15 oi itaia.

Pablisa Edia Namba ma Ia Daekau

⁷ Unai ripoti ena namo haida mani ita laloa. Haroro gaukara dekenai Basileia pablisa taudia edia namba ia daekau 4,914,049! Ita moale bada herea badina idia aru mai taudia be “hutuma bada herea . . . bese idauidau, iduhu idauidau, kopina idauidau, bona gado idauidau. Idia ibounai be helai gabuna badana vairanai bona Mamoe ena Natuna vairanai idia gini. Edia dabua be kurokuro”! Oibe, idia danu idia hahedinaraia idia abidadama noho. “Edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro momokani,” Iesu ese ia henia boubou karana dekenai idia abidadama dainai, kara maoromaoro taudia idia gwauraidia.​—Apokalupo 7:​9, 14.

7, 8. (a) Dirava ena taunimanima be ‘edia kalaga kwanau idia halatadia’ ia hamomokania gauna be dahaka? (b) Unai Lagani 1994 Ena Haroro Ripoti ita itaia neganai edena gabu dekenai, ‘kalaga dabuadia idia veridia roro’ bada?

⁸ Lagani 1919 dekena amo, Iehova ena orea ese ia abia haheganina be inai: “Emu dabua kalagana do oi habadaia, emu kalaga dabuadia do oi veridia roro; oi leiti lasi, emu kwanau do oi halatadia, bona emu ikoko do oi ha-aukadia.” (Isaia 54:2) Unai hahegani hegeregerena, haroro gaukara idia do karaia noho, aisi gabuna Yukon dekenai danu, unai be Alaska kahirakahira dekenai. Unuseniai mai edia goada painia orea taudia ese keru bada herea idia haheaukalaia, nega haida keru ena bada be Celsius -45° ia lao -50° bona pura haida unai bamona ia noho. Vanegai idia ore laganidia lalodiai, taunimanima hutuma be Iehova ena abidadama besena dekenai idia vareai. Ikoukou ma idia kehoa badabada bona Kerisendom lasi Asia tanodia amo, guna Komiunis ia goada tanodia amo, Africa tanodia momo amo, bona Katolik tanodia, hegeregere Italy, Spain, Portugal, bona South America amo idia vareai. Edia noho gabuna korikori amo idia lulua taudia idia haroro henidia danu. Hegeregere, England lalonai, Witness taudia ese idau gado bona idau bese taudia edia orea idauidau 13 idia naridia.

‘Umui Karaia Noho’

⁹ Lagani 1994 ena ripoti amo ia hedinarai gauna namona ma ta be Memorial dekenai idia lao taudia edia namba. Kahirakahira do ia mase neganai, Iesu ese Memorial hebouna ia karaia taunimanima ese iena mase do idia laloatao totona, bona ia murinai idia raka taudia dekenai ia gwau: “Inai bamona do umui karaia, lau do umui laloa totona.” (1 Korinto 11:24) Ai moale bada herea badina lagani 1994 ai taunimanima 12,288,917​—unai be nega rua bona ma haida amo pablisa taudia edia namba ia bada daekau​—idia hebou unai hahegani idia badinaia totona; idia haida be uaina idia inua bona paraoa idia ania, to momo herea be idia lao hereva idia kamonai henia totona. Tano haida lalodiai, Memorial hebouna dekenai idia mai taudia edia namba be pablisa taudia edia namba ia hanaia momokani. Estonia, Latvia, bona Lithuania dekenai pablisa taudia 4,049 idia moale bada herea badina unai Memorial heboudia dekenai idia mai taudia be 12,876, unai ese pablisa edia namba be nega toi amo ia hanaia. Bona Benin dekenai, 16,786 be Memorial hebouna dekenai idia lao, unai ese pablisa edia namba be nega ima bamona amo ia bada. Kongregesen ta ena pablisa taudia be 45 bamona to unai hebou dekenai idia mai taudia be 831!

10. (a) Momo ese Memorial hebouna idia lao henia dainai, iseda maduna be dahaka? (b) Ta ese Memorial ia lao henia murinai heduru ia abia ena sivarai oi gwauraia hedinarai.

¹⁰ Unai dina badana ena hebou dekenai kamonai taudia momo ese idia bamodia dainai Iehova ena Witness taudia idia moale. Harihari idia ura unai taudia idia durudia edia diba bona lalokau hereva momokani dekenai do idia habadaia totona. Reana haida be Russia dekenai ia noho hahinena Alla bamona do idia karaia. Alla be spesel painia taihu ta ida idia stadi to stadi ia goadalaia lasi, unai dainai stadi idia hadokoa. To, Memorial hebouna dekenai Alla idia boiria mai neganai ia lao. Unai hebou be mai anina bada, bona ena lalona ia hamarerea bada. Ena ruma dekenai ia giroa lao neganai, ia ese ena tomadiho gaudia ia negedia bona heduru abia totona ia ese Iehova ia guriguri henia. Dina rua murinai, painia taihuna ese Alla ia vadivadi henia badina ia ura diba bema Memorial hebouna ia moalelaia. Kiki hebou namona ta idia karaia. Alla dekenai stadi idia hamatamaia lou. Daudau lasi murinai ia ese haroro gaukara ia karaia. Unai ekspiriens ese ia hahedinaraia Memorial hebouna dekenai idia mai taudia ita lou henidia be gau badana. Reana momo be Alla bamona do idia ura stadi.

“Hebou Kara Do Umui Hadokoa Lasi”

¹¹ Iehova ena Witness taudia edia sediual dekenai Memorial hebouna be mai anina bada, to hebou ma haida idia abia danu. Pura ta ta iboudiai Iehova ena Witness taudia idia hebou aposetolo Paulo ena hereva idia badinaia totona, ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi haida ese idia hadokoa bamona. To umui ta ta emui ekalesia varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” (Heberu 10:​24, 25) Idia be Iehova ena kara maoromaoro besena idia bamoa, unai bese ena toana be abidadama idia hahedinaraia. Abidadama karana ena anina ta be mai iseda abidadama ida ita hebou hanaihanai.

11-13. (a) Kara maoromaoro besena ena abidadama karana ta be dahaka? (b) Dahaka dainai Keristen momokani taudia idia hebou be gau badana?

¹² Philippines dekenai unai idia diba momokani, unuseniai Sunday heboudia dekenai idia lao taudia edia namba be pablisa taudia edia namba ia hanaia 25 pesen. Danu, Argentina dekenai, Witness orea bona kamonai taudia idia diba hebou be mai anina bada. Idia noho kilomita 20 bamona Kingdom Hall amo. To, sekit naria tauna ena ripoti lalonai ia gwau idia ta ese hebou idia reaia lasi, idia gorere sibona neganai idia reaia. Hebou lao henia totona idia ese hosi ia veria gauna lalonai eiava hosi idia guia bona hora hani idia lao, bona keru negana lalonai hanuaboi ena dibura dekenai edia ruma dekenai idia giroa lao.

¹³ Inai tanobada do ia ore negana ia mai kahirakahira lalonai, iseda mauri dalana be ia auka, iseda hekwakwanai be momo, bona ita hebou hanaihanai be reana mai ena hekwarahi. To unai gaudia dainai, gau badana be lauma aniani ita ania bona tadikaka ida ita hebamo, bona unai heboudia sibona dekenai unai ita karaia diba.

“Harorolaia Goadagoada”

¹⁴ Lagani gunanai, Italy dekenai, Katolik Orea taudia ese Iehova ena Witness taudia edia gaukara idia gwauraia “mai dagedage bona hemataurai lasi amo idia haroro.” To, Witness taudia be dagedage amo idia gaukara lasi. To idau, edia haroro gaukara amo idia hahedinaraia edia dekena taudia idia lalokau henidia bada. Danu, ia hedinarai Paulo ena hereva idia badinaia, ia gwau: “Sivarai Namona do oi harorolaia goadagoada, nega namodia neganai, bona nega dikadia neganai danu.” (2 Timoteo 4:2) Iehova ena Witness taudia be idia haroro goadagoada, unai ita diba badina lagani 1994 ai, edia dekena taudia haroro henidia totona, hora 1,096,065,354 idia negea, lou-henia idia karaia, bona pura ta ta iboudiai Baibel stadi 4,701,357 idia karaia. Momo herea be painia gaukara idia karaia, unai ese ia hahedinaraia painia gaukara ia bada ia lao. Unai ia hamomokania gauna be tanobada hegegemadai painia ena averes be 636,202.

15, 16. (a) Memero kekeni bona buruka taudia ese edena bamona idia hahedinaraia idia be painia urana idia abia? (b) Unai Lagani 1994 Ena Haroro Ripoti lalonai, edena tanodia dekenai painia taudia edia namba idia momo?

¹⁵ Unai painia taudia edia namba lalonai memero kekeni be momo. Hari, United States dekenai, haida be haisikuli dekenai idia lao to regula painia gaukara idia karaia danu, edia teritori badana be edia klas turadia idia haroro henidia. Unai memero kekeni idia davaria unai painia gaukara idia karaia ese ia naridia, badina sikuli momo lalonai drag, sihari kava, bona dagedage karadia idia noho. Memero kekeni ma haida ese edia lalona idia hadaia sikuli idia haorea neganai painia gaukara do idia karaia. Ukraine dekenai, Irina be haisikuli dekenai ia lao to heduru painia gaukara ia karaia danu, badina ia ura ia hegaegae sikuli ia haorea neganai painia gaukara do ia karaia totona. Sikuli ia haorea neganai, ena ruma bese taudia be moni amo idia durua, unai amo edia ruma bese lalonai ta be regula painia gaukara ia karaia diba. Ukraine dekenai, moni davaria be mai ena hekwarahi bada. To Irina ia gwau: “Lau diba lau karaia gaukarana amo lau sibona lasi to lau haroro henia taudia danu ese mauri do ai davaria diba.” Ita moale badina memero kekeni momo edia lalohadai be Irina ena lalohadai hegeregerena. Unai be dala hereadaena ‘edia tauhau bona ulato dinadia ai edia Havaraia Tauna Badana idia laloatao’ totona, ani?​—Kohelete 12:1.

¹⁶ Painia taudia momo be idia buruka. Idia ta ia gwau tanobada ibounai tuarina ginigunana lalonai, ena tamana bona ena taihuna idia tuari neganai idia mase, bona ena sinana bona ena tadina be ogogami hanuana dekenai idia pidia mase. Gabeai, ena natuna merona ia mase. Hari, unai hahine ia buruka ia lao bona ia gorere, to Keristen kongregesen lalonai Iehova ese ia dekenai bese badana ia henia, ia haboioa besena ena bada ia hanaia. Bona regula painia gaukara amo ma haida ia durudia dainai ia moale.

17, 18. Ena be painia gaukara ita karaia eiava lasi, to painia gaukara urana be edena bamona do ita hahedinaraia diba?

¹⁷ Momokani, taunimanima haida sibona idia painia diba. Iseda kudouna ibounai ida ita henia diba gauna be Iehova ese mai moale ida ia abia dae, ita henia diba gauna be idauidau, to namona be iseda goada ibounai ida ita henia. (Malaki 3:​10) Oibe, namona be idia haroro goadagoada painia taudia hegeregeredia painia urana ita abia, bona sivarai namona ita harorolaia iseda goada hegeregerena.

¹⁸ Hegeregere, Australia dekenai, April 16 idia abia hidi dala dekenai idia haroro totona. Pablisa bona painia taudia momo ese idia karaia, unai ia hamomokania gauna be unai hua lalonai pablisa matamata taudia edia namba ia daekau bona pablisa iboudiai 58,780 idia davaria. Ma danu, lagani gunanai unai hua dekenai idia hariharilaia magasin ena namba be 90,000 amo ia bada. Unai idia abia hidi dinana lalonai, taihu ta ese tau ta dekenai magasin ia henia, bona do ia lou-henia totona ena ladana bona adres ia torea neganai, ia davaria idia be varavara! Unai tau be hari taihu sinana ena kakana natuna, bona lagani 30 lalodiai idia hedavari lasi. Ia lou-henia loulou neganai reana idia moale bada!

Ela Bona Dokona Oi Abidadama Noho

¹⁹ Satana ena tanobada be kahirakahira do ia ore dainai, Dirava ena kara maoromaoro besena lalonai idia noho taudia iboudiai idia abidadama noho be gau badana. Kahirakahira, Iehova ena helaga besena ese inai boiboi do idia kamonai: “Egu bese taudia e, umui lao, emui daiutu dekenai umui vareai, emui iduara umui koua. Nega sisina umui komu ela bona badu do ia ore.” Inai tanobada lalonai rara bada idia bubua dainai gabeai Dirava ena amo hahemaoro do idia davaria. “Badina be, itaia! Iehova be ena gabu amo ia raka lasi, tanobada noholaia taudia edia dika ena davana do ia henidia totona, bona tanobada ese ia latanai idia bubua rarana do ia hahedinaraia bona ia latanai idia aladia mase taudia do ia hunidia lou lasi.” (Isaia 26:​20, 21) Namona be ita ibounai be mai iseda Keristen abidadama ida ita gini goada Iehova ena kara maoromaoro besena ida. Unai neganai mauri hanaihanai tanobada ai eiava guba ai, Keriso ena Basileia dekenai do ita moalelaia diba.

Oi Laloatao, A?

◻ “Kara maoromaoro besena” be edena negai ia vara?

◻ Hari inai nega dokona lalonai, dahaka dainai Dirava ena taunimanima idia haheauka noho be gau badana?

◻ Unai Lagani 1994 Ena Haroro Ripoti lalonai, pablisa taudia edia namba be bada bona haroro dekenai hora momo idia negea ese dahaka ia hahedinaraia?

◻ Inai tanobada ena dokona ia mai kahirakahira negana lalonai, dahaka dainai hebou karana be mai anina bada?

◻ Dahaka dainai Dirava ena kara maoromaoro besena idia bamoa taudia idia abidadama noho be gau badana?

3. Unai “kara maoromaoro besena” ia vara dalana oi gwauraia hedinarai.

9. (a) Lagani 1994 Memorial heboudia dekenai idia lao taudia edia namba ese dahaka ia hahedinaraia? (b) Edena tanodia dekenai Memorial hebouna dekenai idia lao taudia edia namba be bada herea?

14. Dahaka dainai Iehova ena Witness taudia be mai goada danu idia haroro, bona ripoti ese edena bamona unai ia hamomokania?

19. Dahaka dainai Iehova ena kara maoromaoro besena idia abidadama ela bona dokona be gau badana?

[Chart on page 12-15]

IEHOVA ENA WITNESS TAUDIA EDIA LAGANI 1994 ENA HARORO RIPOTI

(See bound volume)

[Picture on page 18]

Iehova ena kara maoromaoro besena lalonai, idia abidadama noho taudia ese mauri hanaihanai goevadaena do idia abia