Dominican Republic—Ia Lalonai Gau Haida Idia Davaria Noho

CHRISTOPHER COLUMBUS ia mero neganai, davara ai ia laolao matama, bena gabeai ena laolao ta ai, motumotu haida ia davaria, hari edia ladana idia hatoa West Indies. December 1492 lalonai, ena lagatoi badana, Santa María, be boe dekenai ia kamokau, Española motumotuna ena not kahana konena ai. Hari inai negai unai motumotu ena ladana idia hatoa Hispaniola; ena kahana be rua​—Haiti bona Dominican Republic. Unuseniai Columbus ese European hanuana aukana ginigunana ia haginia haraga, ena ladana ia hatoa La Navidad. Bena unai motumotu amo ia laolao, gabu ma haida ia tahua.

Columbus ese ia davaria Taino Indian taudia ese unai motumotu idia noholaia. Idia be raho namo taudia, taunimanima abidadama henia bona abia dae taudia. Unai neganai edia momo be 100,000 bamona. To, unai nao taudia, edia ura bada be golo do idia davaria taudia unai, ese idia dagedage henidia dainai, inai motumotu taudia korikoridia edia momo ia diho haraga. Lagani 1570 ai, Taino Indian taudia be 500 bamona mo.

Hari inai negai, bese idauidau bona kopi idauidau taudia, edia sene taudia be idau gabudia amo idia mai taudia, ese Dominican Republic idia noholaia. Edia kara momo be Taino taudia edia kara namodia hegeregerena​—idia be gado namo taudia mai edia manau. Unai dainai, bona Dirava idia abidadama henia momokani bona Baibel idia matauraia dainai, Iehova ena Witness taudia edia haroro bona hahediba gaukarana be inai tano lalonai ia kwalimu.

Gau Idauna Idia Davaria

Watch Tower misinari taudia ginigunadia, Lennart bona Virginia Johnson, be Dominican Republic ai idia ginidae, siahu ibounai ia abia lohiana, Trujillo, ena lohia negana lalonai. Idia moale, badina be taunimanima momo ese edia hereva Baibel amo idia abia dae haraga. To, unai ese gavamani taudia bona edia sisiba henia taudia, tomadiho oreadia taudia unai, ia hamoaledia lasi. Nega daudau lasi dagedage ia vara, bena unai ese Dominican Witness taudia ginigunadia edia abidadama ia tohoa bada. Unai nega amo ema bona hari, edia kamonai bona edia abidadama​—nega haida ela bona mase​—be taunimanima ese idia do kikilaia momo.

Inai motumotu ai, taunimanima momo be Iehova ena Witness taudia idia diba; hari edia momo be 16,000 bamona. Vanegai, inai motumotu ai, televisen steiseni ima ese video kaset ladana Jehovah’s Witnesses​—The Organization Behind the Name idia hahedinaraia.a

Unai amo Witness taudia edia gaukara sivaraina idia hahedinaraia, siti badadia ai sibodia lasi, to taoni maragidia bona hanua haida lalonai danu. Unai murinai, Witness taudia idia gaukara goada, Basileia sivaraina namona do idia laohaia unai gunika gabudia dekenai.

Hahenamo Idia Abidia

Witness taudia momo, edia tauanina idia goada bona haroro gaukarana idia goadalaia taudia matamatadia, be sibodia idia henia, hua rua lalonai unai gunika gabudia ai do idia haroro totona. Edia hekwarahi ese anina namona ia havaraia. Gabu ta ai, Witness taudia rua ese kamonai taudia momo idia davaria. Unai be Memorial negana, Iesu ena mase laloatao negana, unai dainai hebou ta idia hegaegaelaia bona taunimanima idia boiridia mai. Taunimanima ese hebou rumana idia hanonua, bena hebou idia karaia. Hebou ia doko murinai, idia hoa badina be ruma murimurinai taunimanima momo idia naria noho. Unai dainai idia boiridia ruma lalonai do idia vareai, bena program idia karaia lou. Hari, kongregesen ta be unai gabu ai.

Inai motumotu taudia edia hariharibada bona edia gado namo ese nega momo ia doridia, idia dibaia noho herevadia momokanidia Baibel ena amo be edia ruma bese taudia bona ma haida dekenai do idia gwauraia. Baibel stadilaia tauna ta be ia hegeregere ruma ta ruma ta ai do ia haroro neganai, ia moale dikadika. Unai neganai ia be Baibel stadi ima ena hanua taudia dekenai ia karaia vadaeni, to haroro gaukara ma haida do ia karaia dainai ia moale.

Gabu momo be Basileia harorolaia taudia ese idia lao henidia loulou lasi, unai dainai basi ai idia gui taudia bona bisinesi karaia eiava hoihoi totona siti dekenai idia mai taudia be idia haroro henia toho. Brens opesi ese ia davaria revarevana ta ese ia hahedinaraia unai ese anina namona ia havaraia. Toana be tatau rua, gunika ai idia noho taudia, ese unai revareva amo Baibel stadi idia noia. Witness ta ese ia vadivadi henidia neganai, ia davaria unai “tatau” be memero, ta ena lagani be 10, ta ena be 11. Baibel stadi karana be edena bamona idia dibaia? Edia hanua tauna ta ia lao siti badana, bisinesi karaia totona. Dala ai Witness tauna ta ia davaria, ia ese pepapepa ta ia henia bona ia hamaoroa bema ia ura neganai Baibel stadi be ena ruma dekenai do ia karaia davana lasi. Ena hanua ia lou henia neganai, pepapepa be lagani 12 kekenina ta ia henia bona Baibel stadi karana ia hamaorolaia. Kekeni ese unai hereva be memero ruaosi ia hamaorolaia, bena maoromaoro unai revareva idia torea. Vadaeni, Baibel stadi be unai memero, unai kekeni, unai tau, bona ena natuna rua dekenai idia karaia matama.

Memero Kekeni Edia Kara Namo

Momokani, toana be memero kekeni, hereva momokani lalonai idia tubu daekau taudia bona ma haida danu, ese Dirava tomadiho henia karana idia laloa bada. Hegeregere, Tamar bena ena tadina Keila, edia lagani be 10 neganai bapatiso idia abia, bona edia lagani be 11 neganai ful-taim painia gaukarana ai idia vareai. Wendy Carolina ena lagani be 12 neganai bapatiso ia abia, bena lagani rua murinai, lagani 1985 lalonai, regula painia gaukarana ia matamaia. Hari ia be ena hahediba karana amo anina namona ia havaraia bona ena ful-taim haroro gaukarana ia moalelaia noho. Jovanny, ena lagani be 10 neganai bapatiso ia abia bena ena lagani be 11 neganai regula painia gaukarana ia matamaia merona, ese Baibel stadi hani ia karaia noho. Lagani 10 merona ladana Rey ese Iehova ena Witness taudia edia buka ta be buka gunadia hoihoilaia tauna ta dekenai ia itaia neganai, ena sinana ia noia do ia hoia iena. Buka ibounai ia duahia ore. Baibel idia herevalaia bukadia ma haida ia tahua lalonai, brens opesi dekenai ia lao. Hari inai negai ful-taim hesiai gaukarana ia moalelaia noho, bona ena sinana danu ese Dirava ena hesiai ia lao henia noho.

Dahaka ese unai memero kekeni bona ma haida danu ia durua, lauma gaudia edia namo do idia laloa bada totona? Idia momo edia tamana sinana edia kara ese; idia ese idia hakaudia maoromaoro. Josué ena tamana sinana, sikuli tisa taudia, ese unai dala amo idia durua. Sekit naria tauna ta ena hereva ta idia kamonai murinai Josué idia durua. Unai hereva be inai: Tama sina ese edia natuna ta do idia durua toho be namo, ful-taim hesiai gaukarana do ia karaia totona. Sikuli ai diba ia abia haraga dainai, gavamani ese skolasip idia henia, ensinia gaukarana kosina do ia karaia totona. Lagani ta mai kahana iunivesiti ai ia sikuli murinai, idia boiria dainai Iehova ena Witness taudia Dominican Republic ai edia hedikwota dekenai ia lao, ruma haginia gaukarana durua totona. Ena tamana sinana idia gwau idia moale bada badina be edia natuna idia henia, Iehova ena hesiai do ia lao henia totona.

“Gau Tahua Taudia” Tano Idaudia Amo

Iesu ena hereva, “uiti ena anina abia negana ia ginidae vadaeni, to utua taudia be momo lasi” herevana, be mai anina inai motumotu lalonai. (Mataio 9:37) Haroro taudia be momo lasi bona inai motumotu taudia momo ese hereva momokani idia abia dae dainai, Witness taudia tano idaudia amo idia mai, kohu namona, hereva momokani be mai edia momokani ida idia tahua taudia unai, do idia tahua totona.

Witness taudia mai edia ruma bese ida be kahirakahira dekenai ia noho motumotuna ladana Puerto Rico amo idia mai, bena Dominican Republic ena gabu idauidau ai Dirava ena hesiai lao henia gaukarana amo moale momokani idia davaria. Ruma bese kwarana ta ia gwau: “Lau ese egu abidadama bona egu helaro be kamonai taudia dekenai lau gwauraia hedinarai diba dainai, hereva momokani ia mauri unai!” Inai gabu ena dabu idia diba neganai, Sweden kekenina ladana Cecilia bona United States kekenina ladana Nia idia mai, bena ful-taim hesiai gaukarana karaia kekenidia ma haida ida idia gaukara hebou. Idia be lalona kahanai, ororo dainai ia siahu momokani lasi gabuna ai idia gaukara. Ruma bese rua Canada amo be Dominican ruma bese ta, United States amo idia lou mai taudia, ida ororo kahanai idia gaukara hebou. Unai gabu kerumana ai pain audia momo idia tubu. Idia be kongregesen maragina ta ai idia noho bona idia ese guna lagani 10 bamona lalonai Iehova ena Witness taudia ese idia vadivadi henia lasi taudia idia lao henia diba.

Alfredo bona Lourdes mai edia natudia ima ida be New York City amo idia lou mai, bona hari idia be kone hanuana ta mai hairaina ena kongregesen maragina ta lalonai idia noho. Idia moale, badina be idia ese lalo-namo taudia tahua bona kongregesen hatubua gaukarana idia durua. Roland, kompiuta gaukaralaia tauna Austria amo, bona ena adavana Yuta, be motumotu ena saut kahana, ia siahu sisina bona medu be sisina mo gabuna ai idia noho. Idia moale, badina be unuseniai idia noho negana lalonai kongregesen matamatana ta ia vara be idia itaia. Painia kekenidia toi bona tau ta mai ena adavana California amo be kahirakahira dekenai ia noho taonina ta lalonai idia noho. Idia gwau taunimanima momo herea ese idia noidia Baibel amo do idia stadi henidia, to idia be nega lasi iboudiai do idia naria. Unai dainai kamonai taudia idia hagoadaia Kingdom Hall dekenai hebou do idia lao henidia bona edia ladana be Baibel stadi ura henia taudia edia lista ai do idia torea. Notist kahanai, Yuta ena taihuna, Stefan, be kongregesen maragina ta ai ia gaukara, taoni mai hairaina, Samaná lalonai. Lagani rua mo lalonai, Basileia harorolaia taudia edia momo be nega rua amo ia bada daekau.

Idia bona ma haida, iniseniai idia mai do idia heduru totona taudia, be edia lalokau bona edia goada dainai ita hanamodia be namo. Ena be tano matamatana mai ena noho dalana idauna bona mai ena kastom idaudia dekenai idia mai be mai ena hekwarahi, to unai bamona idia karaia, bona idia momo ese gado matamatana idia dibaia danu, mamoe bamona taudia be lauma dalanai do idia durudia totona. Edia hekwarahi dainai motumotu taudia ese edia haroro herevana idia abia dae.

Dominican ruma bese haida ese siti badadia mai edia noho namo idia rakatania bona idia lao gunika kahanai. Idia iboudiai ese davana namona idia abia; hereva momokani tahua momokani taudia idia davaria dainai idia moale.

Gunaguna momokani, kohu namona idia tahua taudia ese Taino taudia idia hanamoa lasi, to idia guia bona idia hahisia bada. Columbus danu ese unai motumotu ena kohu namona amo namo ia davaria lasi. Haida ese ia idia dogoatao, seini amo idia guia, bena ia davaria motumotuna amo idia siaia lou lao Spain dekenai.

Hari inai negai tahua gaukarana idauna idia karaia, ia amo kohu namo hereana idia davaria. Iehova ena orea taudia ese lalo-namo taudia, Basileia ena sivarai namona idia ura henia taudia, idia tahua goadagoada. Edia gaukara dainai taunimanima momo ese ura kwalimu, Dirava ena Hereva sibona mo ese ia mailaia gauna, idia abia. (Ioane 8:32) Idia ese nega vaira idia naria, unai neganai inai motumotu mai ena ororo, bona ranu ia aru diho gabudia mai edia hairai, bona kone namodia, bona kohua namodia, be tanobada matamatana ena paradaiso ena kahana ta ai do ia lao.​—2 Petero 3:13.

[Footnotes]

[Picture on page 25]

Ful-taim hesiai gaukarana amo memero kekeni ese lauma gaudia edia namo idia davaria