Emu Guriguri be Edena Bamona Oi Hanamodia Diba?

GURIGURI be Iehova Dirava ese ia henia gauna idau hereana. Reana emu inai taudia ese emu Baibel do idia abia oho eiava emu tomadiho oreana taudia ida do umui hebou dalana do idia koua, to ta ese emu guriguri dalana do ia koua diba lasi. Guriguri be mai anina bada herea. Unai dainai, namona be ita ta ta ibounai ese ita laloa bada bona ita goadalaia. Dahaka ese oi ia durua diba, emu guriguri do oi hanamodia totona?

Baibel be guriguri bukana ta lasi. To, ia be guriguri daladia taunimanima hadibalaia bukana hereadaena ita gwauraia diba. Heberu Revarevadia lalonai guriguri 150 mai kahana idia noho. Haida idia kwadogi; haida idia lata. Taunimanima vairadiai bona gabu hehunidia ai idia gwauraidia, king eiava abia mauri taudia ese idia gwauraidia, bona kwalimu negadiai eiava hisihisi negadiai idia gwauraidia. Davida ena ane Salamo 65:2 ai hegeregerena, “taunimanima ibounai be [Iehova] dekenai do idia mai,” ‘guriguri kamonaia’ Diravana unai. Dahaka dainai Dirava ese ena lauma amo Baibel torea taudia ia hasiahua, guriguri idauidau momo do idia torea totona?

Unai henanadai haerelaia totona, mani 2 Timoteo 3:16 oi laloa. Ia gwau: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu.” Unai hegeregerena, guriguri herevadia be Baibel lalonai idia torea ita do idia hakaua totona, Baibel ena peroveta herevadia, ena taravatu, bona ena sivarai ese ita idia hakaua hegeregerena. Unai guriguri herevadia ese ita edena bamona idia durua diba?

Baibel lalonai idia torea guriguridia bema ita tahua namonamo, ita diba edena idia gwauraia, edia noho be iseda noho hegeregerena neganai. Guriguri edia badina bona edia anina idauidau ita dibaia diba. Ma danu, hahenamo bona tanikiu herevadia matamatadia do ita davaria, bona iseda noinoi lalodiai do ita gwauraia herevadia matamatadia danu. Oibe, Baibel lalonai idia torea guriguridia ese ita idia durua diba, iseda guriguri do ita hanamodia totona.

Toana be Iesu ia do vara lasi neganai, ena sinana Maria ese Baibel lalonai idia torea gurigurina ta ena hereva amo namo ia abia. Ia ese ena varavara Elisabeta ia vadivadi henia, idia ruaosi be Dirava ena heduru amo idia rogorogo vadaeni neganai. Maria ese Dirava ia hanamoa bona ia tanikiu henia; ena hereva haida be Heberu Revarevadia lalonai ia noho gurigurina ta ena hereva haida hegeregerena. Toana be Maria be peroveta tauna Samuela ena sinana, Hana, ese ia gwauraia gurigurina ia diba. Lagani 1,000 gunanai, Hana danu be Dirava ena heduru amo ia rogorogo. Reana Maria ese unai guriguri ia laloa noho, badina be ia ese sibona ena hemami ia hahedinaraia, ani?​—1 Samuela 2:​1-10; Luka 1:​46-55.

Oi be edena bamona? Baibel lalonai ia noho gurigurina ta oi laloa diba a, unai guriguri ia gwauraia tauna ena noho be oiemu noho hegeregerena? Bema unai bamona guriguridia oi tahua bona oi duahia bona oi laloa noho, unai ese oi do ia durua, Dirava do oi hereva henia namonamo totona. Hereva gabena lalonai, oi ai noia Buka Helaga lalonai idia noho guriguridia toi do oi tahua namonamo. Idia gwauraidia taudia edia noho be idauidau; reana nega haida oiemu noho be idia edia hegeregeredia.