Do Ai Ritaea Lasi!

“DO AI RITAEA LASI.” Tokyo, Japan ai, ruma idauna ta idia noholaia taudia edia lalohadai be unai, bona vadivadi taudia ese edia lalohadai ena mamina idia abia. Tatau bona hahine, iboudiai 22, be unuseniai idia noho; edia mauri laganidia edia averes be 70. Idia be varavara korikori lasi, to misinari gaukarana ese varo bamona ia guidia hebou. Idia iboudiai be ful-taim haroro gaukarana lalonai idia haheauka noho laganidia iboudiai be 1,026! Idia vara guna taudia toiosi be lagani 1910 ai idia vara. Idia 7 be ful-taim gaukarana idia hamatamaia, lagani 20 idia do abia lasi neganai. Basileia harorolaia gaukarana be Tanobada Ibounai Tuarina Iharuana murinai Japan dekenai idia hamatamaia negana amo ia bada ia lao, be idia 9 ese idia itaia vadaeni.​—Isaia 60:22.

To, unai sitori 6 rumana, Watch Tower brens rumana gunana ta, be lalona hagoadaia gabuna, badina be idia noholaia misinari taudia edia lalohadai dainai. Ena be idia momo edia tauanina idia goada lasi, badina be idia buruka bona idia gorere dainai, to unai lauma tuari taudia ta lasi ia ura gaukara amo do ia doko. Durudia totona, Japan ena Witness taudia ese unai ruma idia hamatamataia vaitani, Kingdom Hall ta be ia henunai idia karaia, bona lifti idia atoa.

Idia Hamoaledia Gaudia

Idia siaidia gabuna dekenai lagani momo idia noho vadaeni dainai, unai misinari taudia idia laloa edia hanua korikori be unai. Idia buruka momokani taudia ta ia gwau: “Vanegai lau be distrik hebouhebouna totona Australia dekenai lau lou lao. Pura rua idia ore neganai, lau ura do lau lou mai!” Idia durudia taudia be idia lalokau henidia bada. Haida ese revareva amo idia tore henidia o telefon amo idia hereva henidia bona guna idia karaia karadia idia kikilaia negadiai, unai misinari taudia iboudiai idia moale.

Unai be idia gaukara goadagoada dainai. Iehova idia lalokau henia dainai, nega namodia ai bona nega dikadia ai unai misinari taudia ese Dirava ena Hereva idia harorolaia vadaeni. (2 Timoteo 4:2 itaia.) Vera MacKay, Japan dekenai lagani 37 ia gaukara hahinena, ia gwau: “Iehova ena hesiai lao henia karana moalelaia dalana ai manadalaia. Ai lao Iehova harorolaia totona; ruma tauna be iduara ia kehoa eiava lasi be herevana.”

Ena be unai misinari taudia 12 idia headava lasi, to idia moale, badina be Lohiabada ena hesiai idia lao henia mai lalo-rua lasi. (1 Korinto 7:35) Idia ta be Gladys Gregory, lagani 43 lalonai misinari gaukarana ia karaia vadaeni. Ia gwau: “Iehova ena hesiai be mai egu ura kwalimu bada ida do lau karaia totona, painia gaukarana lau karaia, bena gabeai lau lao Gilead [Watchtower Bible School of Gilead], bena unai murinai misinari gaukarana lau karaia. Ena be do lau headava lasi gwauhamatana lau karaia lasi, to lau headava lasi, bona egu turana haida hegeregeredia, lau be nega ta unai lau lalohisihisilaia lasi.”

Edia Lalona Idia Hegeregere Dala Idauna ai Do Idia Noho

Ena be taunimanima haida be idia buruka idia lao neganai edia lalona idia auka, to misinari taudia edia lalona idia hegeregere dala idauna ai do idia noho. Lois Dyer, Molly Heron, bona Lena bona Margrit Winteler be guna misinari rumana maragina lalonai idia noho, Tokyo ena kahana ta dekenai. Lagani 20 mai kahana unuseniai idia noho bona unai gabu taudia dekenai idia manada. Edia haroro gabudia dekenai Lena bona Margrit Winteler ese taunimanima 40 magasin idia henidia loulou, bona Molly bona Lois ese taunimanima 74 magasin idia henidia loulou. Bena Society ese ia noidia, unai ruma do idia rakatania bona unai misinari rumana mai ena sitori 6 lalonai do idia noho, Tokyo ena ihuana momokani dekenai. Lena ia gwau: “Matamanai, egu lalona ia metau bona ia hisihisi.” To, vaia edia kara hegeregerena, edia ruma matamatana idia manadalaia. Hari edia lalona edia mamina be edena bamona? Lena ia gwau: “Ai moale bada. Hari inai negai tadikaka rua, Betele taudia, ese emai aniani idia nadua bona emai ruma idia hagoevaia. Ai idia naria namo herea.” Idia iboudiai ese Lois ena hereva idia hamomokania; ia gwau: “Iehova ena orea taudia ese ai idia naria mai edia lalokau ida dainai, ai haheauka diba.”

Norrine Thompson danu ese ena noho dalana ia haidaua. Ia gwau: “Lagani 15 lalonai lau be egu adavana [New Zealand amo ia mai tauna] lau bamoa, distrik naria gaukarana ia karaia noho lalonai; unai neganai Japan ibounai be distrik tamona.” To, ena adavana ia gorere, bena lagani 18 idia lao vadaeni ia mase neganai, unai hetoho bada hereana ia haheaukalaia. Ia gwau: “Unai neganai misinari gaukarana lau karaia noho diba, badina be Japan ibounai lalonai tadikaka ese lalokau idia hahedinaraia, bona lau guriguri bona haroro gaukarana lau karaia momo dainai.”

Gorere Idia Haheaukalaia

Albert Pastor, misinari rumana naria tauna, be ia gwau: “Ena be idia momo idia gorere, to idia moale, bona idia ura bada do idia gaukara.” Doketa ta mai ena adavana, nesi ta, be idia siaia lao unai ruma dekenai, misinari taudia do idia naria totona.

Lagani toi idia lao vadaeni, Elsie Tanigawa, Gilead School ena klas namba 11 hahinena ta, ena matana laurina ia dika haraga dainai, ia amo gau ta ia itaia diba lasi. Bena hua hani murinai, ena matana idibana danu ia dika. Elsie ia gwau: “Nega haida egu lalona ia hisihisi, badina lau gaukara diba lasi, guna lau gaukara hegeregerena. To Society ese heduru gaudia momo lau idia henia mai edia hebogahisi ida, bona egu bamona bona ma haida ese lau idia durua mai edia lalokau ida; unai dainai Iehova ena hesiai lau lao henia noho mai egu moale ida.”

Idia hanai laganidia haida lalonai, Shinichi Tohara bona ena adavana, Masako, Gilead dekenai Elsie ida idia sikuli hebou taudia, ese hetoho momo idia davaria. Shinichi be haroro diba momo tauna, to ena matana ruaosi be idia kepulu idia lao dainai, ena haroro herevadia pepa ai ia itaia lasi, unai dainai ia hekwarahi bada. Ena be vanegai laganidia lalonai operesen badana ta bona maragina ta ia abia, to ia ese ena Baibel stadi tauna ta, lagani 90 tauna, ia kikilaia neganai, ena matana idia diaridiari.

Ena be “ginigini ta” be edia kopina dekenai, to unai misinari taudia ese edia manoka idia laloa, aposetolo Paulo ese iena manoka ia laloa hegeregerena. Paulo ia gwau: “Lau manoka neganai, unai be Dirava ena goada lau abia.” (2 Korinto 12:​7-10) Bona idia be momokani goada idia abia! Daba daba iboudiai idia toreisi bena 7 okaloka dekenai daba tomadihona idia karaia. Idia aniani murinai, edia tauanina edia goada ia hegeregere taudia be idia lao, haroro gaukarana idia karaia.

Richard bona Myrtle Shiroma be ma haida ida unai bamona idia haroro loulou. Ena be lagani 1978 ai Myrtle ena tauanina ena kahana ta ia mase bamona, badina be ena kwarana harana ia dika matamaia, to ia ese ena adavana Richard ia bamoa loaloa ela bona November 1987. Hari inai negai Richard ena lagani be 70, to ia ese Myrtle ia durua noho, ena kara iboudiai lalonai. Ia be 5 okaloka dabai ia toreisi, mahuta patana amo ia hatorea isi, ia hadigua, ena dabua ia hadabualaia, ena vairana ia penia, bona sipunu amo ia ubua. Bena daba daba iboudiai ena uilisea dekenai ia atoa bona ia laohaia haroro gaukarana karaia totona. Hora tamona bamona lalonai ruma ta ruma ta idia lao, bena unai murinai basi naria gabudia dekenai taunimanima idia haroro henidia. Hari inai negai Myrtle ia hereva diba lasi, to ia gwauraia herevadia ginigabedia be Dendo, dendo, Japan gado ai unai ena anina be “Haroro, haroro.”

Edia natuna hahinena, Sandra Sumida, be durudia totona misinari rumana ia lao bona unuseniai ia noho. Madi, vanegai Sandra ena adavana lalokauna ena kudouna ia dika dainai ia mase haraga. Guna Sandra be ia ida misinari gaukarana idia karaia Guam dekenai, bona ia ese Watch Tower Society ena hebogahisi ia laloa bada, badina be Guam amo idia siaia lou Japan dekenai. Ia gwau: “Guna lau laloa egu tamana sinana lau durua bada lasi badina be Guam dekenai lau noho dainai. Unai neganai egu tadina Joanne ese ia naridia inai ruma lalonai. Vadaeni, durudia dalana lau davaria neganai, lau moale. Egu adavana ia mase haraga negana amo ema bona hari, egu lalona ia namo ia lao, badina be mamina lau abia egu heduru idia laloa bada.”

Idia Gaukara Noho

Ena be hari misinari taudia be buruka negana ena metau ena mamina idia abia, to edia lalona ai misinari gaukarana idia goadalaia noho. (Salamo 90:10; Roma 5:12) Jerry bona Yoshi Toma, Gilead amo Japan idia lao taudia ginigunadia rua, be Shibuya ena bisinesi gabuna dekenai idia haroro loulou ema bona hari. Yoshi ia gwau: “Lagani 1949 ai iniseniai ia noho rumana, sitori rua gauna, dekenai ai mai neganai, ai be idia geia guridia ai idia karaia kalagadia ta ta dekenai ai lao. Hari inai negai Tokyo ia senisi vadaeni, siti badana ai ia lao vadaeni. Ai buruka bona ai gaukara goada diba lasi, guna ai gaukara hegeregerena. To haroro gaukarana amo ai lou mai negadiai, emai lalona idia goada lou.”

Lagani 40 lalonai Lillian Samson be misinari ta Japan ai, bona ena haroro gaukarana ia moalelaia bada. Ia gwau: “Hari lau ese lagani 80 hahinena ta lau durua noho. Guna ia be egu bamona, Adeline Nako, ida idia stadi hebou, to Adeline be Hawaii dekenai ia giroa lou vadaeni, ena gorere sinana naria totona. Vanegai, hari hahine be tubuna tomadiho henidia karadia ia hadokoa murinai, ia be Basileia harorolaia hahinena ta ai ai lao. Ia be dubu ia lao bona hahelaga tauna ena adavana ia hereva henia, ia gwau, ‘Lau senisi bona Keristani tomadiho dalana lau badinaia matamaia!’ ” Lillian ese unai bamona moale ia davaria dainai, guna iena mauri laganidia be 19 neganai ena moni gaukarana ia rakatania bona painia gaukarana ia karaia matamaia dinana, be nega ta ia lalohisihisilaia lasi.

Ruth Ulrich and Martha Hess be lagani 45 mai kahana lalonai misinari gaukarana idia karaia hebou; lagani 35 lalonai hari misinari rumana amo idia gaukara. Edia teritori dekenai idia noho taudia ese idia manadalaidia vadaeni. Nega ta sekit naria tauna ta ese Martha ia noia, ia gwau: “Mani emu vairana do lau abiatorehai bena ruma ta ruma ta do lau lao.” Badina be taunimanima be Martha ena vairana idia diba bona edia imadia idia toia roro magasin abidia totona, to sekit naria tauna ese ia hereva henidia matamaia be auka.

Ruth ese hahine ta ia vadivadi henia loulou bona magasin ia henia loulou. Hahine ese ia duahidia diba lasi, badina be ena matana idia hegeregere lasi, to ia abidia loulou noho bona buka ladana Mankind’s Search for God ia abia dae danu. Ruth ia laloa reana namona be magasin do ia henia lou lasi, badina be toana be ta ese ia duahidia lasi. Bena dina ta hahine ena adavana ese unai buka ia abia lao Ruth dekenai, ma ia gwau: “Inai buka be namo herea! Ena hereva iboudiai be nega rua lau duahia vadaeni.” Vadaeni, Ruth ese Baibel stadi ia hamatamaia, unai tau bona ena adavana dekenai.

Unai misinari rumana sibona ese kamonai taudia ia veridia. Adorahi ta tauhau ta be ruma dekenai ia lao bona ia gwau: “Lau diba bema lau be iniseni lau mai, heduru do lau abia diba, Baibel do lau dibaia totona.” Vadaeni Baibel stadi be ia dekenai idia hamatamaia. Ia be kuki ta China taudia edia aniani rumana ta lalonai. Ia be lagani momo gunanai iseda orea amo idia atoa siri hahinena ta ida idia gaukara hebou. Pablisa ta be unai aniani rumana ai ia haroro neganai magasin haida ia rakatania, bena unai tauhau ese aniani nadua daiutuna lalonai ia davaridia. Ia ura henidia bona henanadai haida be unai hahine ia henia. Hahine ese ena henanadai ia haerelaidia diba lasi dainai, ia hamaoroa namona be misinari rumana dekenai do ia lao. Hari, unai tauhau be kongregesen ena hesiai tauna ta bona painia ta. Gabeai, unai hahine be orea lalonai idia abia dae lou, bena ia danu be regula painia ta ai ia lao.

Unai misinari taudia iboudiai unai ruma lalonai idia noho ese Iehova be idia dainai ia karaia karadia idia laloa bada. Guna idia be Australia, Canada, Hawaii, Switzerland, bona United States amo idia mai, bona 11 be Gilead misinari sikulina ena klas namba 11 amo o klas gunadia amo. Basileia gaukarana be Japan dekenai ia bada ia lao be idia itaia vadaeni, bona edia lalohadai be King Davida ena hegeregerena; ia gwau: “Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi. Bona tau namona ena natuna be nega ta idia hitolo, a? O iena natuna ese aniani totona taunimanima idia noia, a? Lasi, nega ta lau itaia lasi. Lasi momokani.” (Salamo 37:25) Dirava ese unai misinari taudia ia naria mai ena lalokau ida, bona idia ese unai idia laloa bada dainai, edia lalona idia hadaia, do idia ritaea lasi to Iehova ena hesiai do idia lao henia noho.