Tomadiho Herevalaia Ena Namo be Dahaka?

TAMA SINA ese edia beibi do ia gwauraia herevana ginigunana idia naria mai edia ura bada ida. Ia herevahereva toho lalonai, reana inai hereva, “Ina” o “Mama,” idia kamonai, bena idia moale bada. Karaharaga unai sivarai be edia turadia bona edia dekena taudia idia hamaorolaia. Momokani, beibi ena hereva ginigunana sivaraina be namo bona ia ese moale ia havaraia.

Beibi ese ia kamonaia regedia, ia itaia gaudia, bona ia bonaia gaudia dainai, ia moale eiava mamina idauna ta ia abia. To bema nega momo unai gau dainai mamina ta ia abia lasi, ena tamana sinana do idia laloa momo, do idia laloa ena kwarana ia dika sisina.

Beibi ese idia manada henidia taudia idia moalelaia bada. Hahine ta ese ena beibi ia rosia negadiai, vaia ena kara beibi ia kiri bada. To, ena vadivadi varavarana ta ese ia daua toho neganai, reana beibi ia tai, ia ura lasi momokani do ia rosia. Varavara momo, ena be beibi ena kara be unai bamona, to idia hesikulaia lasi. Beibi ese ia manada henidia neganai, ena gari ia ore bena ia kiri henidia; unai idia moalelaia bada.

Unai hegeregerena, taunimanima badadia momo idia ura lasi idia abia dae tomadiho herevadia be idia diba momokani lasi tauna ta ida do idia herevalaia. Reana idia diba lasi dahaka dainai ia ura ia be sibodia edia gau, edia tomadiho unai, be idia ida do idia herevalaia hebou. Unai dainai magu ta be idia bona Dirava idia herevalaia taudia padadiai idia haginia. Ena be Dirava ese tomadiho urana be taunimanima iboudiai lalonai ia atoa, to idia gwau tomadiho be ma ta ida do idia herevalaia lasi.

Momokani, namona be ita ura ita ia karaia Diravana sivaraina do ita diba, bona ma haida ida ita herevahereva neganai reana ita be mai eda dala unai diba do ita abia. Unai be momokani, badina be nega daudau lalonai Dirava ese taunimanima ia hereva henidia. Ena kara mani ita tahua.

‘Kamonai Bona Lalona Kehoa’

Dirava ese taunimanima ta ia hereva henia negana ginigunana be Eden umana lalonai, Adamu ia hereva henia neganai. To, Adamu bona Heva idia gwau-edeede murinai, Dirava ese ia boiridia do ia hereva henidia totona neganai, idia ura lasi dainai idia komu. (Genese 3:​8-13) To, tatau bona hahine, Dirava ese ia hereva henidia neganai ena hereva idia abia dae taudia, edia sivarai be Baibel lalonai idia noho.

Dirava ese Noa ia hereva henia, ia hamaoroa ena nega lalonai idia noho taudia dikadia be kahirakahira do ia hadikaia ore, bena Noa be ‘kara maoromaoro harorolaia tauna’ ta ai ia lao. (2 Petero 2:5) Noa be Dirava ena gwaukau tauna iena nega lalonai idia noho taudia dekenai; ia hahedinaraia Dirava ena kara taunimanima dekenai be ena lalona ese ia abia dae, bona taunimanima edia vairanai ia gwau ia ese Iehova ia badinaia noho. Unai dainai, idia be edena bamona idia kara? Madi, idia momo “idia laloa lasi dahaka do ia vara, . . . vadaeni abata ranu ese ibounai ia abia lao.” (Mataio 24:​37-39) To ita moale, badina be Noa ena ruma bese taudia 7 ese ena hereva idia kamonai, Dirava ena hahegani idia badinadia, bena tanobada hegegemadai ia vara Abatana Badana amo idia roho mauri. Hari inai negai ita noho taudia iboudiai be idia edia amo ita vara.

Gabeai, Dirava ese bese ibounai ta, idaunegai Israelana, ia hereva henidia. Mose ena amo, Dirava ese Taravatu 10 bona taravatu ma 600 bamona ia henidia. Iehova ia ura Israela taudia ese iboudiai do idia badinaia. Mose ese ia haganidia, lagani 7 do idia ore negadia iboudiai, lagani ta ta ai idia karaia ariana ladana Au Raurau Ruma Maragidia Ariana, negana lalonai, Dirava ena Taravatu do idia duahia hedinarai. Ia gwau: “Taunimanima ibounai do umui haboua, tau bona hahine, memero bona kekeni, bona idau taudia, emui hanua dekenai idia noho danu.” Dahaka totona? “Do idia kamonai, edia lalona be do idia kehoa, bona Lohiabada emui Dirava do idia gari henia. Bona inai Taravatu ena hereva ibounai do idia badinaia, bona edia kara do idia karaia.” Iboudiai do idia kamonai bona edia lalona do idia kehoa. Edia kara mani oi laloa; idia kamonai herevadia idia herevalaia hebou mai edia moale bada ida!​—Deuteronomi 31:​10-12.

Lagani 500 mai kahana murinai, Iuda ena king Iehosapata ese lohia taudia haida bona Levi taudia haida ia siaia, Iehova tomadiho henia karana goevana hamatamaia lou totona. Unai tatau be Iuda ena hanua iboudiai dekenai idia lao, idia noholaidia taudia be Iehova ena taravatu idia hadibalaidia. King ena oda hegeregerena idia gwauraidia hedinaraia neganai, unai ese ia hahedinaraia tomadiho momokanina ia goadalaia. Ia lohiaia taudia be do idia kamonai bona edia lalona do idia kehoa be namo.​—2 Sivarai 17:​1-6, 9.

Hereva Gwauraia Hedinarai

Dirava ese sibona ena Natuna, Iesu, ia siaia mai tanobada dekenai, Iena Gwaukau Tauna ai do ia lao totona. (Ioane 1:14) Hahediba taudia toi vairanai Iesu ena toana ia idau neganai, Dirava ena gadona idia kamonai, ia gwau: “Egu Natuna be inai, lauegu lalokau Tauna. Lauegu lalona ia moale ia dekenai. Iena hereva do umui kamonai henia.” (Mataio 17:5) Mai edia ura ida unai bamona idia karaia.

Unai hegeregerena, Iesu ese ena aposetolo ia haganidia idia ese Dirava ena palani be taunimanima dekenai do idia hadibalaia. To ena hesiai gaukarana tanobada ai ena nega orena be hua 6 sibona neganai, ia gwau guba Basileiana harorolaia gaukarana be bada herea dainai, hahediba taudia ma haida do idia gaukara be namo. Dirava ena Basileia be idau taudia dekenai herevalaia dalana be ia ese tatau 70 ia hadibaia, bena ia siaidia lao, unai hereva do idia harorolaia totona. (Luka 10:​1, 2, 9) Ena Tamana guba ai ia lou henia gwauraia neganai, Iesu ese ia murinai idia raka taudia ia hagania unai hereva be ma haida dekenai do idia herevalaia, ia gwau: “Umui lao, bese ibounai be diba tahua taudia do umui halaoa, bona . . . idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:​19, 20) Tanobada hegegemadai, Keristani taudia momokanidia hari inai negai ese unai hahegani idia badinaia; Dirava ena Basileia ena sivarai namona be edia dekena taudia ida idia herevalaia. Unai dala amo idia ese gau iboudiai ia karaia Diravana, Iehova, sivaraina momokanina idia gwauraia hedinarai diba.​—Mataio 24:14.

Mai Manau ida Idia Hereva, Taunimanima Hagoadadia Totona

Iesu ia ura ena hahediba taudia ese idia abia dae herevadia be edena dala amo do idia herevalaia ma taunimanima haida ida? Ia ura lasi edia hereva idia inai henia taudia do idia habadua eiava idia ida do idia heai. To, ia ura idia ese sivarai namona idia abia dae mai edia moale ida taudia do idia tahua, bena Buka Helaga amo unai sivarai do idia hamomokania. Momokani, ena Natuna ena hahediba taudia ese idia hedavari henia taudia edia kara be Dirava ese ia laloa. Iesu ia gwau: “Umui ia abia dae tauna ese lau danu ia abia dae, bona lau ia abia dae tauna ese lau ia siaia Diravana danu ia abia dae.” (Mataio 10:40) Iesu ena nega lalonai idia noho taudia momo ese iena hereva idia dadaraia neganai, Dirava idia dadaraia momokani unai!

Keristani aposetolo tauna Paulo ia gwau: “Lohiabada ena hesiai tauna be do ia heai lasi, to taunimanima ibounai dekenai do ia bogahisihisi henia. Ia ese Dirava ena dala do ia hadibaia namonamo, mai ena goada bona haheauka danu. Ia ese, iena hereva idia utua taudia do ia sisiba henidia, mai ena manau danu. Badina be bema ia manau neganai, sedira Dirava ese idia do ia durua, vadaeni edia lalona do idia giroa, bona hereva momokani do idia davaria.” (2 Timoteo 2:​24, 25) Akaia tanona ai Paulo ese sivarai namona be Atena taudia dekenai ia harorolaia dalana be haheitalai namona. Iuda taudia edia dubu lalonai ia be idia ida ia herevahereva. Hoihoi gabuna lalonai, dina dina iboudiai “unuseni ia davaria taudia” ida ia herevahereva. Ena be haida idia ura hereva matamatadia do idia kamonaia sibona, to Paulo ia hereva maoromaoro mai ena gado namo ida. Dirava ena hereva, do idia helalo-kerehai be namo herevana, be ena hereva idia kamonaia taudia ida ia herevalaia. Ena hereva dainai idia kara, hari inai negai idia noho taudia idia kara bamona. “Haida ese Paulo idia kirikirilaia. Bona haida idia gwau, ‘Ai ura inai oiemu hereva ma dohore ai kamonai lou.’ ” Paulo ese hereva ma haida ia gwauraia toho lasi. Ena hereva ia harorolaia vadaeni, unai dainai “idia ia rakatania.”​—Kara 17:​16-34.

Gabeai, Efeso lalonai Paulo ese Keristani kongregesen taudia ia hamaoroa, ‘idia dekenai ia haroro bona hadibaia neganai, edia ruma dekenai, bona taunimanima edia vairana dekenai durua hereva ta ia hunia lasi idia dekenai. Iuda taudia bona Helene taudia danu dekenai ia sisiba henia goada edia lalona do idia giroa Dirava dekenai, bona Lohiabada Iesu do idia abidadama henia.’​—Kara 20:​20, 21.

Unai sivarai Buka Helaga lalonai ese idia hahedinaraia, Baibel negadiai Dirava ena hesiai taudia mai edia kamonai ese edena dala ai tomadiho be taunimanima ida idia herevalaia. Unai dainai, hari inai nega lalonai Iehova ena Witness taudia be Baibel ena oda hegeregerena, tomadiho be edia dekena taudia ida idia herevalaia.

Unai Herevahereva amo Anina Bada Idia Havaraia

‘Dirava ena Hereva umui kamonai.’ ‘Iena hahegani umui kamonaidia.’ Inai bamona sisiba herevadia momo be Baibel lalonai! Iehova ena Witness taudia ese oi do idia hereva henia neganai, unai sisiba Baibel lalonai do oi badinaia diba. Baibel amo idia mailaia sivaraina mani oi kamonaia. Unai hereva be politikol herevana ta lasi, to Dirava ena guba gavamanina, iena Basileia unai, be ia gwauraia. Tuari be hari inai negai idia havaraia gaudia be Dirava ese unai Basileia amo do ia kokia. (Daniela 2:44) Unai murinai, Dirava ena lohia siahuna guba amo ese tanobada ibounai be paradaiso, Eden umana hegeregerena, ai do ia halaoa.

Iehova ena Witness taudia ese Baibel ena hereva be pulisi ditektiv gunana ta dekenai idia herevalaia toho negadiai, ia dadaraidia loulou. To ia itaia taravatu utua karadia idia momo idia lao, unai dainai mauri ena anina ia lalohisihisilaia. Unai dainai, gabeai Witness tauna ta ese ia vadivadi henia neganai, ia hamaoroa Baibel ena hereva hamomokania gaudia do ia tahua. Unai murinai idia herevahereva hebou loulou. Ena be nega haida pulisi tauna ese ena ruma ia rakatania bona ma ta dekenai ia lao bena unuseniai ia noho, to ena noho gabudia matamatadia ai Witness taudia ese idia tahua loulou mai edia moale ida, ia ida do idia herevahereva lou totona. Gabeai pulisi tauna ia gwau: “Lau tahua herevadia be Buka Helaga lalonai idia noho nega ibounai. Bema Witness taudia ese lau idia hereva henia toho loulou lasi, lau be murimuri ai lau do noho bona mauri ena anina lau do daradaralaia noho. To hereva momokani lau dibaia vadaeni, bona guna Dirava lau tahua hegeregerena hari idia tahua taudia be egu mauri dinadia oredia lalonai do lau tahudia.”

Ta ese ia abia dae herevadia be haida ia hadibalaidia neganai, mai edia ura ida idia kamonai taudia idia ura momokani iena hereva edia badina danu do ia gwauraia hedinarai, bona unai bamona idia ura be maoro. (1 Petero 3:15) Mero maragina ese henanadai momo be ena tamana sinana ia henidia bona ia laloa do idia haere henia be maoro; unai hegeregerena oi laloa Witness taudia ese haere namodia be oi do idia henia be maoro. Momokani, mai edia moale ida oi do idia lou henia bona Baibel ena hereva be oi ida do idia herevalaia lou.

Reana Baibel oi diba sisina vadaeni. Reana oi diba Dirava ena ura do oi badinaia totona, emu kara haida do oi haidaua be namo. Namo lasi oi naria, badina be oi gari, emu ura karadia momo be Dirava ena taravatu dainai do oi dadaraia garina. Unai taravatu ese moale korikori sibona do idia havaraia. Emu diba do ia bada ia lao lalonai, unai do oi lalo-pararalaia.

Mani inai oi laloa guna: Iehova be daika? Iena ura oi dekenai be dahaka? Bona oi ia henia gwauraia gaudia be dahaka? Witness taudia oi noia, Baibel ena hereva unai gau dekenai be oi dekenai do idia hahedinarai. Edia hereva be sibomu emu Baibel lalonai oi hamomokania. Do oi diba Witness taudia ese tomadiho herevadia momokanidia idia gwauraia, bena do oi ura Baibel ena hereva namodia momo do idia hahedinaraia oi dekenai.​—Aonega Herevadia 27:17.

Witness taudia edia hebou rumana, Kingdom Hall, dekenai do oi lao diba, edia kara do oi itaia totona. Unuseniai Dirava ena Hereva idia herevalaia. Unai hereva do oi kamonai neganai, namo do oi davaria. Do oi itaia idia hebou taudia ese Dirava ena ura herevalaia heheni karana idia moalelaia. Dala mani oi kehoa, Witness taudia ese oi do idia durua, Dirava ena ura ita dekenai herevadia momokanidia do oi dibaia totona. Dirava ena hereva mani oi kamonai henia; ia ese taunimanima ia boiridia, tomadiho momokanina do idia herevalaia bona ena lalo-namo do idia abia, bona mauri hanaihanai be Paradaiso lalonai do idia abia danu.​—Malaki 3:16; Ioane 17:3.

[Picture on page 5]

Noa ese Dirava ena palani ia gwauraia hedinarai

[Picture on page 7]

Idaunegai Atena ai Paulo ese ia karaia hegeregerena, Iehova ena Witness taudia ese Baibel ena hereva momokanidia be taunimanima idia hadibalaidia