“Ia Marere” Ororona

IRELAND ena west kahanai be ororo ta ladana Croagh Patrick, ena harana ena lata be 765 mita, bona ena toana be idia gegea ororodia edia toana hegeregerena lasi. Lagani ta ta iboudiai, July huana ena Sunday ginigabena ai, toana be unai ororo ena dorina ia marere, badina be taunimanima 30,000 bamona, matamatadia bona burukadia, be vaia tomadiho laolaona dekenai ororo ena dorina dekenai idia daekau.

Unai dina ai, tomadiho laolaona taudia be dala maragina dikana ta amo idia daekau bona idia diho. Ororo ena dorina kahirakahira, 300 mita bamona ai, idia daekau mai edia hekwarahi bada ida bona idia naria namonamo danu, badina be unai be haga bona nadi momo gabuna.

Haida be aena kavakava idia daekau, bona dala ena kahana haida ai, ta ta be edia tuina ai idia raka. Gunaguna, tomadiho laolaona taudia be hanuaboi ena dibura neganai idia raka matamaia.

Dahaka dainai taunimanima momo idia laloa Croagh Patrick ororona dekenai idia daekau be mai anina bada?

Nega Daudau Lalonai Idia Lao Henia Loulou

Lagani 400 C.E. murinai, Roman Katolik Oreana ese bisop ta ladana Patrick idia siaia Ireland dekenai, misinari gaukarana do ia karaia totona. Ia tahua gauna badana be, Ireland taudia edia lalona do ia veria bena Keristani tomadihona do idia abia dae. Idia gwau, Patrick be idia bogaragidiai ia haroro bona ia gaukara laganidia ai, Katolik Oreana ena badina be unuseniai ia atoa.

Ena gaukara dainai unai tano ena gabu idauidau dekenai ia lao. Unai gabu ta be Ireland ena west kahanai. Haida idia gwau Patrick be unuseniai dina 40 bona hanuaboi 40 ororo ta ena dorina ai ia noho, bena gabeai ororo ena ladana idia hatoa Croagh Patrick (anina be “Patrick ena Ororo Maragina”). Unuseniai ia anivaga bona ena gaukara ai do ia kwalimu totona ia guriguri.

Unai nega murinai, gori momo, iena gaukara idia gwauraia gaudia, be idia vara. Unai gori ta, Patrick be unai ororo ai ia noho neganai gaigai iboudiai be Ireland amo ia lulua oho sivaraina, be taunimanima momo idia diba.

Sene taudia idia gwau unai ororo ena dorina latanai dubu maragina ta ia haginia. Ena be nega daudau lalonai unai dubu be ia gini lasi, to ena badina ia do noho, bona lagani momo herea lalonai tomadiho laolaona taudia idia lao unuseni.

Tomadiho Laolaona Karadia

Unai ororo dalana ena daudau be kilomita ima. Bema tau burukana ta eiava ororo dekenai daekau karana ia manadalaia lasi tauna ta be unai dala dekenai ia raka daekau bena ia diho namonamo danu, unai be kara badana ta ia dekenai.

Dala ena gabu haida ai, taunimanima be dala isena ai idia noho hegaegae, bero taudia durua totona.

Unai dala dekenai, tomadiho laolaona taudia be gabu toi dekenai kara idauidau idia karaia, edia helalo-kerehai toana unai. Idia daekau matamaia gabuna ai, notisbod ta ia noho, ena revareva ese unai kara idia gwauraia hedinarai.​—Maua itaia.

Dahaka Dainai Idia Daekau?

Dahaka dainai taunimanima momo be unai dala aukana ai idia raka daekau? Dahaka dainai haida be kara aukadia idia karaia, idia daekau lalonai?

Haida idia laloa unai tomadiho laolaona ai bema idia guriguri, Dirava ese edia noinoi sibodia edia gau totona be do ia abia dae haraga. Ma haida be idia daekau, Dirava ese edia dika do ia gwauatao totona. Haida be unai dala amo Dirava idia tanikiu henia. Momokani, momo be laolao taudia edia hebamo dainai idia lao. Diba tauna ta ia gwau, unai kara amo ‘idia hahedinaraia idia be edia hanua taudia ida idia lalo-tamona bona idia lalokau henidia.’ Ma ia gwau, Croagh Patrick dekenai daekau karana amo idia hahedinaraia “St. Patrick ena aena gabudia ai idia raka bona idia diba iena gaukara dainai Keristani abidadamana idia abia.” Ma ia gwau, gau badana be, idia daekau lalonai, “sibodia edia tauanina idia hahisia edia helalo-kerehai toana hahedinaraia totona. Ororo dorina dekenai idia daekau metairametaira lalonai, unai kara be nega daudau lalonai idia karaia.”

Tau ta be mai ena hekokoroku ida ia gwau ia be nega 25 unai ororo dekenai ia daekau! Ia gwau ia daekau, ‘helalo-kerehai toana hegeregerena, hisihisi sisina do ia ania totona!’ Ma tau ta ia gwau, “Bema hisihisi be lasi, heduru be lasi!”

Ena be idia haganidia lasi, to momo be aena kavakava ororo dekenai idia daekau. Badina be dahaka? Badina ginigunana be, idia laloa unai tano ia “helaga,” unai dainai edia tamaka idia kokia. Iharuana be, edia ura hegeregerena ‘hisihisi sisina idia ania, edia helalo-kerehai toana’ hegeregerena. Unai dainai, unai gabu toiosi dekenai haida be edia tuina ai idia raka.

Ia Dainai Dirava Ai Laloa

To bema ta ese tomadiho dinana badana ta ai idia daekau taudia edia tomadiho karadia ia abia dae lasi, ia daekau be maoro, eiava? Bema medu be lasi bona ta be mai ena tamaka aukadia, ia ura henia dinana ai ia daekau diba. Ai daekau, tomadiho laolaona taudia hutuma be idia daekau lasi dinana ai. Ai daekau lalonai, nega momo ai laga-ani bona daekau karana bona ena anina taunimanima momo dekenai ai laloa. Tomadiho laolaona taudia tausen tausen edia kara ai laloa, ororo dekenai idia daekau mai edia hekwarahi ida bona helalo-kerehai karadia idauidau idia karaia. Emai lalona ai ai henanadai, ai gwau, ‘Unai be Iehova ena ura, a? Tomadiho karana ta bamona ororo dekenai daekau karana eiava nadi senudia rakaia hegege neganai guriguri gwauraia loulou karana ese ta ia veria momokani Dirava kahirakahira dekenai, a?’ Mataio 6:​6, 7 ai, Iesu ese guriguri gwauraia loulou karana be edena bamona ia sisibalaia?

Momokani, ai be ororo dekenai ai daekau be tomadiho karana ta hegeregerena lasi. To, ai daekau neganai, mamina ai abia ai be ita ia karaia Diravana kahirakahira dekenai ai noho, badina be ia karaia gaudia ai moalelaia diba, bona ororo be tanobada ena hoa gaudia. Ororo dorina amo gabu mai hairaina ai itaia diba, Atlantic Davarana ena kone danu. Kahana ta dekenai be davara, motumotu maragidia ia lalonai idia diaridiari, bona kahana ma ta dekenai be ororo, idia dekenai tubutubu gaudia be lasi bona hagahaga be momo.

Unai tomadiho gabudia toiosi ai laloa neganai, Iesu ena hereva danu ai laloa; idia gavaia momokani taudia ia hereva henia, ia gwau: “Umui guriguri neganai, hereva kava momo do umui gwauraia lou, gwauraia lou lasi, Dirava diba lasi taudia bamona, badina be idia laloa edia hereva momo dainai, Dirava ese idia do ia kamonai.”​—Mataio 6:7.

Emai lalona idia parara, unai ororo dekenai idia hekwarahilaia karadia be sene karadia, bona unai kara ese taunimanima tausen tausen idia guia. Bena gau idauna ta, taunimanima ia hametaua lasi gauna, ai laloa. Aposetolo Ioane ese unai ia herevalaia, ia gwau: “Dirava ena taravatu do ita badinaia. Iena taravatu be metau lasi.”​—1 Ioane 5:3.

Croagh Patrick ororona dekenai ai daekau neganai ai moale. Ia dainai ai ese nega vaira ai laloa, unai nega lalonai, Baibel ese ia gwauraia lasi karadia ese taunimanima do idia guia lasi, bona taunimanima ese tanobada ia karaia Diravana mai lalokauna be “lauma bona momokani dekena amo” do idia tomadiho henia diba.​—Ioane 4:24.

[Box on page 27]

Tomadiho Laolaona Karadia Badadia

Tomadiho laolaona taudia, bema St. Patrick Dinana ai eiava nega ta unai aria negana ena dina 8 lalonai, eiava nega ta June, July, August o September huadia lalonai unai ororo ai idia daekau bona Pope ena palani dainai DUBU MARAGINA LALONAI EIAVA BADINAI IDIA GURIGURI, bona bema Ororo Dorina ai eiava nega ta unai pura lalonai edia kara dika idia gwauraia hedinarai fada tauna dekenai bona idia lao Anibou Helagana dekenai, idia iboudiai edia kara dika davana do idia koua.

IDAUNEGAI IDIA GWAURAIA HIDI GABUDIA

Gabu be toi (1) Ororo ena badina, Leacht Benain ai, (2) Ororo ena dorina ai, (3) Roilig Muire ai, ororo ena gabana ai, Lecanvey hanuana ena kahanai.

Gabu Ginigunana - LEACHT BENAIN

Tomadiho laolaona tauna ese nadi senuna be nega 7 ia rakaia hegege lalonai, Iseda Tamana gurigurina be nega 7 ia gwauraia, Maria Hanamoa gurigurina be nega 7 ia gwauraia bona Abidadama herevana tamona ia gwauraia

Gabu Iharuana - ORORO DORINA

(a) Tomadiho laolaona tauna ia tui diho bena Iseda Tamana gurigurina be nega 7 ia gwauraia, Maria Hanamoa gurigurina be nega 7 ia gwauraia bona Abidadama herevana tamona ia gwauraia

(b) Dubu maragina badinai tomadiho laolaona tauna be Pope ena palani dainai ia guriguri

(c) Tomadiho laolaona tauna ese Dubu maragina be nega 15 ia rakaia hegege lalonai, Iseda Tamana gurigurina be nega 15 ia gwauraia, Maria Hanamoa gurigurina be nega 15 ia gwauraia bona Abidadama herevana tamona ia gwauraia

(d) Tomadiho laolaona tauna ese Leaba Phadraig [Patrick ena Mahuta Patana] be nega 7 ia rakaia hegege lalonai, Iseda Tamana gurigurina be nega 7 ia gwauraia, Maria Hanamoa gurigurina be nega 7 ia gwauraia bona Abidadama herevana tamona ia gwauraia

Gabu Ihatoina - ROILIG MUIRE

Tomadiho laolaona tauna ese nadi senudia [toiosi] ta ta be nega 7 ia rakaia hegege lalonai, Iseda Tamana gurigurina be nega 7 ia gwauraia, Maria Hanamoa gurigurina be nega 7 ia gwauraia bona Abidadama herevana tamona ia gwauraia, bena dokonai Roilig Muire maguna ibounai be nega 7 ia rakaia hegege lalonai ia guriguri.