Idia Duahia Negadia Bona Idia Abia Hahenamodia

Daba Rere:

Tau ta bona ena adavana, ruaosi be moni gaukarana idia karaia. Edia lalona idia hadaia, daba iboudiai do idia toreisi haraga, bena ruma idia do rakatania haraga lasi neganai, miniti 10 lalonai Baibel do idia duahia hebou. Ruma idia rakatania murinai, idia duahia vadaeni herevadia namodia idia herevalaia hebou.

Nigeria dekenai, elda ta mai ena famili ida ese Haroro Sikuli ena sediual hegeregerena Baibel idia duahia hebou. Dina iboudiai, dina ena siri idia herevalaia hebou murinai, Baibel ena kahana ta idia duahia; nega momo unai be dabai. Ena natuna ta ta ese siri haida idia duahia, bena ia noidia, unai siri do idia henanadailaia.

Japan dekenai, lagani 1985 amo ema bona hari, ruma hahinena ta ese lagani ta ta amo Baibel ibounai ia duahia ore. Dina iboudiai ia be miniti 20 ela bona 30 lalonai ia duahia; 5 okaloka dabai ia duahia matamaia. Unai kara ena hahenamo ia gwauraia, ia gwau: “Unai ese egu abidadama ia hagoadaia. Ia dainai egu gorere lau laloa lasi bona Paradaiso helarona lau laloa bada.”

Taihu ta be lagani 30 lalonai painia gaukarana ia karaia, to ena adavana be Witness tauna lasi. Dina iboudiai 5 okaloka ai ia toreisi Baibel duahia totona. Ia ese Heberu Revarevadia edia rau hani bamona, Keristani Greek Revarevadia edia karoa ta, bona Aonega Herevadia edia siri tamona ia duahia. Lagani 1959 amo lagani ta ta amo Baibel ibounai ia duahia. Ia gwau: “Lau duahia dainai, mamina lau abia Iehova ese ese lau ia lalokau henia . . . goada, heduru, bona sisiba lau abia.” Ma ia gwau: “Baibel lau duahia be hegeregere Iehova ese dina iboudiai egu mauri ia hasiahua lou bamona.”

Taihu ta ese hereva momokani be Iehova ena Witness taudia edia gaukara idia taravatua tanona ta dekenai ia dibaia, bona ena adavana ese ena tomadiho ia badulaia. Baibel ia duahia diba, Monday ela bona Friday, dabai 6 okaloka bona 7 okaloka padadiai. Unai ese ena lalona ia hagoadaia. Ena duahiduahi ena anina ia herevalaia, ia gwau: “Iehova bona Iesu lalokau henidia karana ita manadalaia, bona ena be hekwakwanai bona hekwarahi ita davaria, to ita moale, badina be ita diba Iehova ena gwauhamata idia moru lasi.”

Painia Gaukara Sikuli dekenai idia sisiba henidia Baibel be dina iboudiai do idia duahia be namo, bena taihu ta ese ena lalona ia hadaia unai sisiba do ia badinaia. Matamanai, ia ese dabai 5 okaloka bona 6 okaloka padadiai ia duahia diba. Moni gaukarana idauna ia abia neganai, dabai 9 okaloka bona 10 okaloka padadiai ia duahia. Ia gwau, hekwakwanai ma haida idia vara negadiai, ‘iena sediual be unai hegeregerena ia haidaua loulou.’

Dina:

Brazil ena Betele taudia rua, hahine ta mai ena tadina, be vaia dina tubua anianina murinai Baibel be miniti 20 bamona lalonai idia duahia hebou. Baibel ibounai be nega 25 bamona idia duahia vadaeni; to idia gwau: “Nega iboudiai gau matamatadia ai davaria dainai, Baibel duahia karana ai hesikulaia lasi.”

Haneulato ta Japan dekenai be ia diba, ena be ena kekeni negana amo ia be Witness ta, to Baibel ia diba namonamo lasi. Painia ta ai ia lao neganai, ena lalona ia hadaia do ia duahia loulou. Hari inai negai, pura iboudiai dina ta hospital ia lao henia lalonai, Haroro Sikuli ena sediual hegeregerena ia duahia. Gabeai, ena ruma dekenai, ma ia stadilaia lou. Pura ena dokonai, Baibel ia duahia lou; buka idia toredia negadia hegeregeredia, ta ia duahia guna ma ta be gabeai.

Lagani 13 merona ta ese Baibel ibounai be nega toi ia duahia vadaeni, bona hari inai negai sikuli amo ena ruma ia lou henia negadia iboudiai, karoa ta ia duahia. Ia gwau unai ese ia durua bena “Iehova ia lalokau henia bada.”

Witness tauna ta ia bisi herea, badina be moni gaukarana bona elda gaukarana ia karaia, bona ena adavana bona ena natuna ia naria danu. Tereini lalonai gaukara gabuna ia lao henia lalonai, Baibel kaset ia kamonaidia. Gabeai unai hereva be ena ruma dekenai ia duahia.

France dekenai, painia hahinena ta ese Baibel ia duahia sibona lasi, to aniani ia hegaegaelaia negadiai, motuka ia taria negadiai, ia hekwarahi negadiai bona moale ia tahua negadiai danu, kaset ia kamonaidia.

Lagani 21 painia tauna ta Japan dekenai be ia gwau, guna ena sinana ese ia hagania lauma anianina be dina iboudiai do ia ania, bona ena be nega haida duahia negana ia haidaua, to ena lagani be toi negana amo Baibel be dina iboudiai ia duahia. Ia abia hidi kahana ia duahia murinai, anina bada siridia ia duahia lou, bena ia duahia herevadia edia anina be nega sisina lalonai ia laloa lou.

Idia hanai laganidia 12 lalonai, painia hahinena ta ese Baibel ibounai be nega 10 bamona ia duahia vadaeni. Ena adavana be abidadama lasi tauna, unai dainai adorahi lalonai ia duahia.

Hanuaboi:

Japan dekenai, regula painia tauna ta mai ena elda dagina be idia hanai laganidia 8 lalonai hanuaboi iboudiai Baibel ia duahia, ia do hekure lasi neganai. Ia gwau: “Iehova ena lalohadai bona ena mamina bona ena kara idia gwauraia siridia lau ura henia bada. Unai siri lau lalodia namonamo dainai, Iehova ena lalona lau abia, bona egu Keristani tadikaka bona taihu bona egu famili taudia danu lau durudia diba.”

France dekenai, lagani 1979 amo ema bona hari, elda ta ese hanuaboi iboudiai Baibel be hora ta lalonai ia duahia. Nega momo Baibel idauidau 5 o 6 edia hereva ia hahegeregerea. Ia gwau, Baibel ia duahia namonamo dainai, ‘Baibel lalonai ia dibaia herevadia dina ta ta iboudiai badinaia dalana be ia lalo-pararalaia.’ Unai ese ia durua dainai, Baibel amo tadikaka ia sisiba henidia namonamo diba danu.

Idia hanai laganidia 28 lalonai, Nigeria dekenai tadikaka ta ese hanuaboi ta ta iboudiai Baibel ena siri ta, Dina Iboudiai Buka Helaga Tahua lalonai idia torea kerukeru daba ena, be ia duahia. Bona unai karoa ibounai danu Baibel lalonai ia duahia. Ia headava murinai unai bamona ia karaia noho; ia mai ena adavana ida ese idia duahia bona idia herevalaia hebou.

Kekeni badana ta ena tamana sinana be Witness taudia lasi. Hanuaboi iboudiai, ia do mahuta lasi neganai, miniti 5 ela bona 10 lalonai ia duahia. Unai nega kwadogina be mai anina bada ia dekenai, bona ia duahia vairanai bona murinai ia guriguri. Ia ura Iehova ese Baibel torea taudia ta ta ia haganidia do idia torea herevadia be do ia diba.

Headava tauna ta Betele dekenai ia gaukara, be ia gwau, idia hanai laganidia 8 ta ta lalonai Baibel ibounai ia duahia. Hanuaboi ai ia do hekure lasi neganai, miniti 20 ela bona 30 ia duahia. Ia taedi herea neganai danu, bema ia duahia lasi, ia mahuta diba lasi. Bena ia toreisi bona ena lauma hitolona ia haorea.