Dina Iboudiai Baibel Duahia Karana Ena Namo

“Lohiabada ena Taravatu dekenai idia moale, bona Lohiabada ena Taravatu idia laloa, dina bona hanuaboi ibounai lalonai.”​—SALAMO 1:​1, 2.

1. (a) Watch Tower Society ena hedikwota dekenai, dahaka saini badana be faktori ta ena haba ta dekenai? (b) Unai hereva bema ita badinaia, dahaka namo do ita davaria?

“DINA TA TA IBOUDIAI, DIRAVA ENA HEREVA, BUKA HELAGA, OI DUAHIA.” Brooklyn, New York lalonai, unai hereva be faktori ta ena haba ta ai ia hedinarai, ia lalonai Watchtower Bible and Tract Society ese Baibel bona Baibel herevalaia bukadia idia printaia. Unai be tanobada taudia sibodia mo sisiba henia totona lasi. Iehova ena Witness taudia idia diba idia danu ese idia laloa be namo. Baibel idia duahia loulou bona ena hereva idia badinaia taudia ese namo idia davaria, badina be ia hadibadia, ia sisiba henidia, edia kerere ia hamaoromaorodia bona kara maoromaoro ai ia hakaudia.​—2 Timoteo 3:​16, 17.

2. Tadikaka Russell ese edena bamona ia hahedinaraia Baibel duahia karana be mai anina bada?

² Iehova ena Witness taudia ese edia Baibel stadi bukadia, Gima Kohorona danu, idia laloa bada bona idia gaukaralaia loulou. To idia diba unai gau ta ese Baibel ena gabuna ia abia lasi. Lagani 1909 ai, Charles Taze Russell, Watch Tower Bible and Tract Society ena presiden ginigunana, ese Gima Kohorona duahia taudia ia tore henia, ia gwau: “Inai do umui laloaboio lasi: Baibel be iseda Hahetoho Gauna, bona ena be iseda heduru bukadia be Dirava ena amo, to idia be ‘heduru gaudia’ mo, bona Baibel ena gabunai ita atodia lasi.”

³ Buka Helaga, Dirava ese ena lauma amo ia havaraia gauna, ena hereva edia dobu bona edia siahu ese buka oredia iboudiai edia idia hereaia. “Dirava ena hereva be ia mauri noho, bona ia be mai ena siahu. . . . Iena matana ese kaia mai ena kahana ruaosi ena matana ia hereaia momokani. Ia ese tau ta ia gwadaia neganai, unai tau ena lalona momokani dekenai ia vareai. Ia vareai ela bona lalona bona lauma ruaosi ia hapararaia. Bona ia ese iseda lalona bona iseda kudouna ena ura ibounai ia tahua diba.” (Heberu 4:12) Hahediba tauna Luka ese Berea taudia ia hanamoa, ia gwauraidia “namo taudia,” badina be aposetolo Paulo bona ena bamona Sila ese idia haroro henidia neganai, edia hereva idia abia dae sibona lasi, to idia ese danu ‘dina iboudiai Buka Helaga idia tahua, inai hereva be ia momokani o lasi.’​—Kara 17:11.

Dina Iboudiai Duahia

⁴ Baibel ia gwau lasi nega hida do ita duahia be namo. To ia lalonai idia gwau, Iehova ese Iosua ia hagania, ‘Taravatu Buka be dina bona hanuaboi do ia tahua,’ bena Dirava ese ia henia gaukarana do ia karaia neganai, ena raka do ia namo, bona ena kara ena anina do ia vara momokani. (Iosua 1:8) Baibel ia gwau, idaunegai Israelana ena king dagina ia abia tauna ese Buka Helaga be “iena mauri dinadia ibounai lalonai do ia duahia.” (Deuteronomi 17:19) Ma ia gwau: “Inai bamona taudia be idia moale momokani: Idia ese kara dika taudia edia sisiba, bona edia laloa idia abia dae lasi. . . . Lohiabada ena Taravatu dekenai idia moale, bona Lohiabada ena Taravatu idia laloa, dina bona hanuaboi ibounai lalonai.” (Salamo 1:​1, 2) Inai danu, Mataio ena Evanelia ese ita ia hamaoroa, Iesu Keriso ese Satani ena hedibagani ia dadaraia neganai, Ia ese Heberu Revarevadia Helagadia edia hereva ta amo ia haere henia, ia gwau: “Buka Helaga lalonai ia torea vadaeni, ‘Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.’ ” (Mataio 4:4) Aniani be nega hida ita ania be namo? Dina iboudiai! Lauma anianina ita abia be mai anina bada, badina be ia amo mauri hanaihanai do ita abia diba.​—Deuteronomi 8:3; Ioane 17:3.

5. Dina iboudiai Baibel duahia karana ese ita edena bamona ia durua diba, iseda abidadama do idia tohoa negadiai, ‘Lohiabada ena ura hegeregerena do ita noho’ totona?

⁵ Namona be dina iboudiai Dirava ena Hereva ese ita ta ta ibounai ia hagoadaia. Dina iboudiai​—ruma ai, gaukara ai, sikuli ai, dala ai, sitoa ai, iseda haroro gaukarana ai​—iseda abidadama tohoa gaudia ita davaria. Edena bamona do ita kara? Baibel ena hahegani bona ena sisiba do ita laloa haraga, a? Baibel ia gwau lasi ita be siboda eda goada do ita abidadama henia, to ia gwau: “Tau ta bema ia laloa ia gini goada, namona be ia naria namonamo, do ia moru garina.” (1 Korinto 10:12) Bema Baibel be dina iboudiai ita duahia, unai ese ita do ia durua, ‘Lohiabada ena ura hegeregerena do ita noho, bona nega ibounai ita ese ia do ita hamoalea’ totona, bena tanobada ena oromana do ita tohotohoa lasi.​—Kolose 1:​9, 10; Roma 12:2.

Baibel Ita Duahia Loulou be Namo

⁶ Baibel duahia be idau, bona tau ta ese ia laloa davari sivaraina bukana duahia be ma idau. Badina be ta ese unai sivarai bona ena dokona be nega tamona ia duahia be hegeregere. To herevana Baibel be nega hida ita duahia vadaeni, to ita duahia lou neganai, namo bada ita abia. (Aonega Herevadia 9:9) Lalo-parara tauna dekenai, Baibel ena hereva edia anina idia matamata loulou. Vanegai ia itaia, ia kamonai, bona ia dekenai idia vara gaudia dainai, dina gabedia perovetalaia herevadia edia anina ia dekenai be ia bada ia lao. (Daniela 12:4) Guna, sisiba herevadia haida ia duahia neganai, reana ia laloa maragi, to kara ma haida dekenai ia manada bona hekwakwanai ia haheaukalaidia neganai, unai hereva ia laloa bada. (Aonega Herevadia 4:18) Bema gorere metauna ia abia, Baibel ena gwauhamata, hisihisi bona gorere do idia doko herevadia, be ia laloa bada matamaia. Iena turana o ena varavarana idia mase neganai, toreisi lou gwauhamatana ia laloa bada matamaia.

7. Maduna matamatana ta ita abia neganai, dahaka ese ita ia durua, bona dahaka dainai?

⁷ Reana oi ese Baibel oi duahia vadaeni bona lagani haida lalonai ena sisiba oi badinaia vadaeni. To reana hari oi ese maduna matamatadia oi abia. Oi headava gwauraia a? Emu natuna do ia vara a? Kongregesen lalonai elda dagina o hesiai dagina be oi idia henia, a? Ful-taim haroro tauna ai oi lao dainai, emu haroro bona hadibaia gaukarana do oi habadaia diba, a? Unai maduna matamatadia oi laloa noho lalonai, Baibel ibounai do oi duahia lou be dahaka namo!​—Efeso 5:​24, 25; 6:4; 2 Timoteo 4:​1, 2.

⁸ Reana lauma ena huahua oi hahedinaraia namonamo ema bona hari. (Galatia 5:​22, 23) To bema emu mauri do ia idau, reana emu diba unai kara namodia dekenai do oi habadaia be namo. (Heberu 5:8 itaia.) Sekit naria tauna ta ese ena tamana sinana burukadia do ia naria totona ena gaukara ia rakatania murinai, ia gwau: “Guna lau laloa lau ese lauma ena huahua lau hahedinaraia namonamo. To hari lau be mamina lau abia lau hamatamaia lou.” Unai hegeregerena, bema ta ena adavana ia gorere bada o ena lalona ia metau momokani, ia ese ia naria noho lalonai, reana ia sibona ena hekwarahi dainai ena lalona danu ia metau. Baibel duahia loulou karana ese unai bamona taudia ia hagoadaia bada bona ia durua bada.

Duahia Negadia Namodia

⁹ Momokani, idia bisi herea taudia ese kara ma ta do idia karaia loulou be auka. To, namona be Iehova ena haheitalai ita laloa. Baibel ese ia hahedinaraia ia be ‘ia gwauraia guna negadia’ dekenai kara ia karaia. (Genese 21:2; Esodo 9:5; Luka 21:24; Galatia 4:4) Bema Dirava ena Hereva duahia loulou karana ita laloa bada, hora ta do ita gwauraia hidi, dina iboudiai unai hora ai do ita duahia. (Efeso 5:​15-17) Gau badana be elda taudia be unai bamona idia kara, badina be unai amo idia ese Baibel ena hereva hegeregeredia do idia sisiba, bona ‘Dirava dekena amo ia mai aonegana’ ena toana be edia kara lalodiai do ia hedinarai.​—Iamesi 3:17; Tito 1:9.

10. Baibel be dina iboudiai idia duahia taudia ese edena negai idia duahia?

¹⁰ Baibel duahia karana ai idia kwalimu taudia momo be daba rere ai idia karaia guna, bena edia kara ma haida be gabeai idia karaia. Ma haida ese idia davaria idia be hora idauna dekenai dina iboudiai idia duahia loulou diba. Baibel kaset idia abia diba gabudiai, unai kaset ese gaukara taudia idia durua, edia lao mai horadia idia gaukaralaia namonamo totona, bona Witness taudia haida ese idia kamonaidia, edia ruma gaukarana idia karaia noho lalonai. Baibel duahia daladia, Europe, Africa, North America, South America, bona Orient dekenai Witness taudia idauidau ese idia kwalimulaia daladia, be rau 20 bona 21 ai idia hedinarai, inai hereva “Idia Duahia Negadia Bona Idia Abia Hahenamodia” henunai.

11. Ena be emu nega be bada lasi, to Baibel be dina iboudiai edena bamona oi duahia diba?

¹¹ Oi be miniti hida Baibel oi duahia be mai anina maragi, to oi be nega hida oi duahia loulou be mai anina bada. Reana oi davaria, bema hora ta bamona lalonai oi duahia bona ena anina be ma buka haida lalonai oi tahua mai emu lalona ibounai ida, emu lalona ia hegeregere. To oi be unai bamona oi karaia loulou diba, a? Dina iboudiai Baibel be miniti 15 o miniti 5 sibona oi duahia be namo; dina haida lalonai oi duahia lasi be dika. Namona be emu lalona do oi hadaia, Baibel be dina dina iboudiai do oi duahia. Bona oi be mai emu dala negadiai, ena anina be ma buka haida amo do oi tahua namonamo danu be namo.

Baibel Duahia Daladia Idauidau

¹² Baibel duahia daladia be momo. Namona be do oi duahia, Genese amo ela bona Apokalupo. Tanobada ibounai lalonai Betele taudia iboudiai, Society ena hedikwota dekenai bona ena brens opesi dekenai idia gaukara taudia, idia haganidia, edia Betele gaukarana laganina ginigunana lalonai Baibel ibounai do idia duahia ore. (Anina be, karoa edia lata hegeregeredia, toi o hani o ima, eiava rau hani o ima, be dina ta ta iboudiai do idia duahia.) Watchtower Bible School of Gilead ena stiuden taudia idia haganidia, edia kosi negana lalonai Baibel do idia duahia ore. Unai amo idia durudia toho, Baibel be dina iboudiai duahia karana dekenai do idia manada totona.

13. Bapatiso matamata Witness taudia be edena bamona idia kara be namo?

¹³ Namona be bapatiso matamata Witness taudia ese dala idia tahua, Baibel ibounai do idia duahia. Lagani 1975 lalonai, France lalonai tauhau ta be bapatiso totona ia hegaegae neganai, elda ta ese ia nanadaia, Baibel do ia duahia dalana ia lalohadailaia vadaeni eiava. Unai nega amo ia ese lagani ta ta amo Baibel ibounai ia duahia; ia be vaia dabai ia duahia guna bena ia lao gaukara. Unai ena anina ia herevalaia, ia gwau: “Iehova lau dibaia namonamo. Lau diba ia karaia karadia iboudiai be iena palani hegeregerena ia karaia, bona ena palani koua gaudia ia kokidia dalana danu lau diba. Ma lau diba Iehova be ia maoromaoro bona ia namo, ena kara iboudiai lalonai.”

14. (a) Baibel duahia sediual, do ia hesiriu gauna, be edena bamona oi hamatamaia be namo? (b) Dahaka ese ita ia durua diba, Baibel ena buka ta ita duahia lalonai, ena oromana ita laloatao totona?

¹⁴ Baibel ibounai oi duahia vadaeni, a? Bema lasi, namona be hari oi duahia matamaia. Sediual korikorina ta oi torea, bena oi badinaia. Oi laloa guna karoa hida eiava rau hida be dina ta ta lalonai do oi duahia, eiava oi laloa miniti hida bona edena hora ai do oi duahia. Haida mo ese Baibel ibounai be lagani tamona lalonai do idia duahia ore, to gau badana be Dirava ena Hereva do oi duahia loulou, bona bema mai dalana, dina iboudiai do oi duahia. Baibel do oi duahia neganai, reana do oi davaria buka haida ese oi do idia durua, Baibel ena buka ta ta edia oromadia do oi laloa namonamo totona. Bema buka ladana Insight on the Scriptures* be emu gado ai oi abia diba, Baibel ena buka ta oi do duahia matamaia lasi neganai, ena hereva badadia edia autlain unai buka lalonai oi duahia guna. Kwara maragidia, autlain lalonai leta koremakoremadia amo idia torea, be oi laloa namonamo. Eiava buka ladana “All Scripture Is Inspired of God and Beneficial”a be unai bamona oi gaukaralaia; ia lalonai be hereva ma haida idia noho.

15. (a) Dahaka sisiba herevadia rau 16 bona 17 dekenai ese emu Baibel duahia karana ena anina idia habadaia diba? (b) Namona be rau haida do ita duahia kava lasi, to dahaka gau badana do ita tahua be namo?

¹⁵ Baibel ena siri oi duahidia hesiriu be namo, to namona be oi duahidia kava lasi. Namo lasi dina iboudiai rau haida oi duahia, badina be oi ura do oi heagi diba, do oi gwau lagani ta ta iboudiai Baibel oi duahia ore. Maua ladana “Emu Baibel Duahia Karana Ena Anina Habadaia Daladia” (rau 16 bona 17) lalonai, be Baibel do oi duahia bona do oi moalelaia daladia momo. Herevana edena dala oi gaukaralaia, to momokani unai amo emu darana bona emu lalona oi ubua noho.

Oi Duahia Herevadia Oi Lalo-Pararalaia

¹⁶ Iesu ese ena hahediba taudia ia hadibaia neganai, ia hahedinaraia ena hereva do idia lalo-pararalaia be gau badana. Gau badana be, unai hereva do idia dibaia sibona lasi, to “edia lalona do idia kehoa” danu, edia mauri lalodiai do idia badinaia totona. (Mataio 13:​14, 15, 19, 23) Dirava ese taunimanima edia lalona ia laloa momo. (1 Samuela 16:7; Aonega Herevadia 4:23) Unai dainai, namona be Baibel ena hereva edia anina do ita lalo-pararalaia sibona lasi, to edia anina iseda mauri lalodiai be do ita laloa namonamo danu be namo.​—Salamo 48:9; 1 Timoteo 4:15.

17. Baibel lalonai ita duahia herevadia be edena dala idauidau ai ita laloa namonamo diba?

¹⁷ Baibel ena hakaua herevadia haida, iena sivarai lalodiai do oi davaria diba gaudia, be oi tahua, emu mauri lalonai do oi badinaia diba totona. (Mataio 9:13; 19:​3-6 itaia.) Iehova ena kara namodia herevadia oi duahia bona unai kara oi laloa namonamo negadiai, ia do oi badinaia namonamo dalana oi lalohadailaia, unai dala do oi rakalaia totona. Iehova ena palani herevadia oi duahia neganai, unai hereva hegeregeredia do oi gaukara dalana be oi laloa. Sisiba herevadia oi duahia neganai, emu lalona ai oi gwau lasi, ‘Unai lau diba vadaeni,’ to oi henanadai, oi gwau, ‘Unai lau badinaia noho a?’ Bema oi badinaia noho, oi henanadai, oi gwau, ‘Edena dala amo unai kara do lau “habadaia” diba?’ (1 Tesalonika 4:1) Dirava ena hahegani oi dibadia neganai, gunaguna unai hahegani idia badinaia taudia bona idia badinaia lasi taudia danu edia sivarai oi laloa. Edia kara edia badina bona edia dokona oi laloa. (Roma 15:4; 1 Korinto 10:11) Iesu ena mauri sivaraina oi duahia neganai, inai oi laloatao: Iehova ese king dagina ia henia vadaeni, tanobada ibounai do ia lohiaia; unai amo emu ura, Dirava ena tanobada matamatana ura henia urana, oi habadaia. Inai danu, emu kara, Dirava ena Natuna tohotohoa karadia, do oi habadaia diba dalana be oi lalohadailaia.​—1 Petero 2:21.

18. Baibel duahia karana bona ‘hesiai tauna mai ena kamonai bona mai ena kara maoromaoro’ ena amo ita abia bukadia gaukaralaia karana, ruaosi be edena bamona ita karaia be namo?

¹⁸ To, momokani, stadi bukadia namodia gaukaralaia karana be Baibel duahia totona do oi hadokoa be maoro lasi. Unai gau be Iehova ese ‘hesiai tauna mai ena kamonai bona mai ena kara maoromaoro’ ena amo ita ia henia. Idia danu be ena harihari gaudia namo hereadia. (Mataio 24:​45-47) Dala oi tahua momokani, Baibel duahia loulou karana do oi goadalaia totona. Bema mai dalana, “DINA TA TA IBOUDIAI, DIRAVA ENA HEREVA, BUKA HELAGA, OI DUAHIA.”

[Footnotes]

Edena Bamona Do Oi Haere?

◻ Dahaka dainai Baibel be dina iboudiai ita duahia be namo?

◻ Dahaka dainai Baibel ita duahia loulou be namo?

◻ Oi dekenai edena nega be namo, Baibel be dina iboudiai do oi duahia?

◻ Baibel oi duahia loulou lalonai, dahaka dala idaudia amo oi duahia diba?

◻ Dahaka dainai ita duahia herevadia edia anina ita laloa namonamo be gau badana?

3. (a) “Dirava ena hereva” ese idia kamonai o idia duahia taudia edena bamona ia kara henidia? (b) Nega hida Berea taudia ese Buka Helaga idia duahia bona idia stadilaia?

4. Baibel be edena bamona ia hahedinaraia ita ese nega momo ita duahia be namo?

6. Dahaka dainai Baibel ita duahia loulou be namo?

8. Ena be ita laloa iseda diba be hegeregere, to iseda mauri idia senisi neganai, reana unai ese edena bamona ia hahedinaraia iseda diba be ma do ita habadaia lou be namo?

9. (a) Dahaka ese ia bisi herea tauna ia durua diba, nega do ia davaria, Baibel be dina iboudiai do ia duahia totona? (b) Dahaka dainai Dirava ena Hereva duahia karana be mai anina bada elda taudia dekenai?

12. Betele taudia matamatadia bona Gilead stiuden taudia edia Baibel duahia sediual be edena bamona?

16. Dahaka dainai gau badana be nega ita atoa, ita duahia herevadia edia anina do ita laloa totona?

[Box on page 16, 17]

Emu Baibel duahia karana ena anina habadaia daladia

(1) Taunimanima momo ese Baibel bukadia idia duahia, Baibel lalonai idia haboudia hegeregerena, Genese ela bona Apokalupo. Matamanai idia toredia negadia hegeregeredia danu oi duahia diba. Mani inai oi laloatao, Dirava ese ena lauma amo ia havaraia bukadia 66 be Baibel lalonai idia haboua. Duahia dalana idauna ta be inai: sivarai bukadia haida oi duahia guna, unai murinai peroveta bukadia, ma unai murinai sisiba revarevadia. Oi duahia vadaeni bukadia edia ladadia oi torea, ela bona Baibel ibounai oi duahia; buka ta oi reaia lasi be namo.

(2) Baibel ena kahana ta oi duahia murinai, emu lalona ai oi henanadai, unai ese Iehova, iena palani, bona iena dala edena bamona ia hahedinaraia; ia dainai emu mauri be edena bamona do oi haidaua be namo; ia amo ta be edena bamona do oi durua diba?

(3) Lista ladana “Main Events of Jesus’ Earthly Life,” Insight on the Scriptures lalonai kwara ladana “Jesus Christ” henunai (bona “All Scripture Is Inspired of God and Beneficial” lalonai danu) idia printaia gauna, hegeregerena, Evanelia bukadia edia sivarai ta ta, idia hegeregere gaudia, be oi duahia, ta ta ena nega ena nega ai. Bona unai sivarai be Tau Hereadaena bukana lalonai oi duahia danu.

(4) Paulo ena mauri bona ena haroro gaukarana sivaraidia be Aposetolo edia Kara lalonai oi duahia neganai, iena revareva danu oi duahia. Unai hegeregerena, ia haroro hanuadia o gabudia sivaraidia oi duahia neganai, ia ese gabeai unai gabu noholaia Keristani taudia ia tore henia revarevadia danu oi duahia. Ena laolao gabudia be mapu ta dekenai oi itaia be namo; mapu namona ta be New World Translation ena dokonai.

(5) Esodo ela bona Deuteronomi oi duahia neganai, Heberu bukana danu oi duahia; ia ese peroveta laulaudia momo edia anina ia gwauraia. Insight on the Scriptures lalonai, “Law” henunai, lista ladana “Some Features of the Law Covenant” oi duahia.

(6) Peroveta bukadia oi duahia neganai, idia torea negadia sivaraidia danu be Baibel lalonai oi duahia. Unai hegeregerena, Isaia ena buka oi duahia neganai, Isaia 1:1 dekenai ia gwauraia pavapavadia, Usaia, Iotama, Ahasa bona Hesekaia, edia sivarai be buka idaudia lalonai oi tahua. (2 King Taudia, karoa 15-20; 2 Sivarai, karoa 26-32) Eiava, Hagai bona Sekaraia oi duahia neganai, Esera ena buka ena hereva oi duahia lou danu.

(7) Baibel ena buka ta oi abia hidi, ena kahana ta (reana karoa ta) oi duahia, bena, bema Watch Tower Publications Index eiava kompiuta ena Watchtower Library be emu gado ai oi abia diba, unai gau amo oi tahua. Ena hereva be emu mauri lalonai oi badinaia. Tok lalodiai bona haroro gaukarana lalonai oi herevalaia. Bena kahana ma ta oi duahia.

(8) Bema Watch Tower bukana ta o magasin ta ese Baibel bukana ta o ena kahana ta ia gwauraia, unai hereva Baibel lalonai oi duahia neganai, unai gau ena hereva oi tahua loulou. (Haheitalai be inai: Solomona ena Ane dekenai, The Watchtower, December 1, 1957, rau 720-34; Esekiela dekenai, “The Nations Shall Know That I Am Jehovah”​—How?; Daniela dekenai, “Your Will Be Done on Earth” o Our Incoming World Government​—God’s Kingdom; Hagai bona Sekaraia dekenai, Paradise Restored to Mankind​—By Theocracy!; Apokalupo dekenai, Apokalupo​—Ena Hagugurua Negana Ia Kahirakahira!)

(9) Oi duahia lalonai, cross-reference haida oi tahua. Heberu Revarevadia siridia 320, Keristani Greek Revarevadia lalonai idia torea hanai siridia, be oi itaia namonamo, bona idia makaia siridia ma handred haida bona edia anina danu. Cross-reference ese Baibel ena peroveta herevadia hamomokania gaudia, taunimanima bona gabu sivaraidia, bona hereva aukadia edia anina hahedinaraia herevadia be idia duanaia.

(10) Bema emu gado ai oi abia diba, Reference Edition of the New World Translation ena footnote bona appendix herevadia, oi duahia siridia idia gwauraia gaudia, be oi tahua. Idia ese siri edia hereva edia badina bona hereva badadia hahanaia daladia idaudia idia hahedinaraia. Reana do oi ura siri haida be Baibel idaudia lalonai idia torea siridia ida do oi hahegeregerea danu.

(11) Karoa ta oi duahia ore murinai, ena hereva badana be hereva kwadogi hereana dekenai oi torea. Gabeai oi gaukaralaia, unai karoa laloa lou bona laloa namonamo totona.

(12) Baibel oi duahia neganai, oi ura do oi laloatao siridia be oi makaia, o kadi dekenai oi torea hanai bena unai kadi be gabu ta dekenai oi atodia, dina iboudiai do oi itaia totona. Unai hereva oi lalodia tao, oi lalodia namonamo, bona oi gaukaralaidia. Momo be nega tamona oi laloatao toho lasi, reana pura ta lalonai tamona eiava rua sibona be hegeregere; bena Baibel oi duahia lou neganai, ma ta o rua oi abia hidi.

[Pictures on page 15]

Oi be dina iboudiai Baibel oi duahia o ena kaset oi kamonaidia, a?