Mauri Matamatana Eda Sene Taudia Totona Ia Kahirakahira

DIRAVA ena Hereva, Baibel, ia gwau taunimanima ibounai idia mase neganai, idia hanaia lao lauma gabuna dekenai idia mauri noho, a? Lasi, unai bamona ia hereva lasi. Baibel ese mase murinai taunimanima be do idia mauri lou ia gwauraia, to momo ese idia laloa bamona ia gwauraia lasi.

Mani ita laloa, Baibel be edena bamona iseda sene tauna ginigunana, Adamu, ia herevalaia. Iehova ese “tano ena kahu dekena amo” ia karaia. (Genese 2:7) Unai neganai, Adamu be tanobada dekenai mai moale ida do ia noho hanaihanai diba. (Genese 2:​16, 17) To, ia ese ena lalokau Havaraia Diravana ia gwau-edeede henia dainai, ia mase.

Adamu ia mase neganai edeseniai ia lao? Dirava ese ia hamaoroa: “Tano dekenai do oi giroa lou, badina be tano dekena amo oi mai. Oi be tano dekena amo karaia gauna, bona tano dekenai do oi giroa lou.”​—Genese 3:19.

Dirava ese kahu amo Adamu ia do karaia lasi neganai, Adamu be edeseniai? Gabu ta dekenai ia noho lasi. Ia mauri lasi. Unai dainai, Iehova ia gwau Adamu be “tano dekenai do [ia] giroa lou” neganai, anina be Adamu be do ia mauri lasi, kahu hegeregerena. Adamu be ia ‘hanaia lao’ lasi sene taudia edia lauma idia noho gabuna ia hamatamaia totona. Ia lao lasi guba dekenai mauri namona ia abia totona eiava ia lao lasi hisihisi hanaihanai gabuna ta dekenai. Ia vara gauna tamona be, guna ia mauri noho to gabeai, ia mauri lasi bona ia noho lasi.

Taunimanima oredia be edena bamona? Adamu ena natudia danu be edia mauri ia doko idia mase neganai, a? Baibel ia haere ia gwau: “Idia ibounai [taunimanima bona animal] be gabu tamona dekenai idia lao noho, tano ena kahu. Idia ruaosi be kahu dekena amo idia mai, bona idia ruaosi be kahu dekenai do idia giroa lou.”​—Hadibaia Tauna 3:​19, 20.

Mase Taudia be Edena Bamona

Oibe, mase taudia dekenai mauri be lasi momokani, idia kamonai diba lasi, idia itaia diba lasi, idia hereva eiava idia lalohadai diba lasi. Hegeregere, Baibel ia gwau: “Badina be mauri taudia idia diba do idia mase, to mase taudia be gau ta idia diba lasi. . . . Edia lalokau, edia badu, bona edia mama be idia ore momokani.” Baibel ma ia hereva: “Badina be mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.”​—Hadibaia Tauna 9:​5, 6, 10.

Dirava ena Hereva hegeregerena, taunimanima be idia mauri noho lalonai, idia diba do idia mase. To idia mase neganai, gau ta idia diba lasi. Edia mase tauanina badinai idia gini lasi, bona dahaka ia vara idia itaia lasi. Idia noho lasi neganai, idia lalo-namo o hisihisi lasi bona idia moale o lalohisihisi lasi. Mase taudia be nega ia hanaia idia diba lasi. Idia mase neganai, gau ta idia diba lasi momokani; mahuta bamona lasi.

Guna, Dirava ena hesiai tauna ta, Iobu, ia diba taunimanima idia mase murinai, idia mauri noho lasi. Bona ia diba danu, bema Dirava ese gau ta ia karaia lasi, dala be lasi idia mauri lou totona. Iobu ia gwau: “Tau be ia mase neganai, iena goada ia ore momokani, iena hahodi ia doko, vadaeni ia be edeseni? Taunimanima be idia hekure, vadaeni idia toreisi lou lasi.” (Iobu 14:​10, 12) Iobu ia diba momokani, ia mase neganai ena sene taudia do ia hedavari henidia lasi lauma edia noho gabuna dekenai.

Toreisi Lou Helarona

Mauri taudia be idia mase neganai idia noho lasi dainai, Iobu ese mai anina bada henanadai ta ia gwauraia, ia gwau: “Bema tau ta ia mase, ia be do ia mauri lou, a?” Iobu sibona ese inai haere ia henia: “Lau ese nega namodia totona do lau naria noho. Do lau naria noho, ela bona inai hisihisi bona hekwarahi idia ore. Unai neganai oi ese lau dekenai do oi boiboi, vadaeni oi dekenai do lau haere, bona lau, oi ese oi karaia tauna dekenai, do oi moale noho.”​—Iobu 14:​14, 15.

Atai hereva hegeregerena, ena be Iobu be do ia noho lasi, Dirava ese do ia laloaboio lasi. Iobu ia diba nega ta do ia mai, Iehova Dirava ese toreisi lou karana amo do ia “boiria” bona do ia mauri lou.

Dirava Natuna, Iesu Keriso, ese ia hahedinaraia Iobu ena helaro toreisi lou dekenai be helaro momokanina. Iesu ia hahedinaraia mase taudia do idia toreisi lou diba. Edena dala amo? Ia ese ia karaia! Iesu ia noho lasi Iobu hatorea isi lou totona, to tanobada dekenai ia noho neganai, ia ese Naina hanua vabu ena natuna merona ia hatorea isi lou. Iesu ese Iairo ena natuna kekeni, ena mauri lagani be 12, ia hatorea isi lou. Bona ena turana Lasaro, dina hani ia mase vadaeni tauna, ia hatorea isi lou.​—Luka 7:​11-15; 8:​41, 42, 49-56; Ioane 11:​38-44.

Iesu ese unai hoa karadia ia karaia bona vaira negana ena toreisi lou badana danu ia herevalaia. Ia gwau: “Mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi.” (Ioane 5:​28, 29) Gabeai, Iehova ese aposetolo Paulo ia gaukaralaia tauhau ta ia hatorea isi lou totona, bona Paulo be vaira neganai do ia vara toreisi lou ia abia dae. Ia gwau: “Lau be mai egu abidadama Dirava dekenai, . . . Mase taudia dohore idia toreisi lou, kara maoromaoro taudia, bona kara maoromaoro lasi taudia danu.”​—Kara 20:​7-12; 24:15.

Vaira negana ena toreisi lou idia gwauraia Baibel siridia, be lauma edia gabu dekenai mase taudia do idia mauri noho idia herevalaia lasi. Idia ese taunimanima milioni momo be tauanina dekenai do idia toreisi lou, bona inai tanobada dekenai do idia mauri noho idia herevalaia. Idia toreisi lou taudia be idia laloatao guna idia be tanobada dekenai idia noho. Idia be natu maragidia bamona do idia vara lou lasi. To, idia be guna idia do mase lasi neganai bamona, gau ibounai do idia laloatao bona edia kara be idau lasi. Do idia laloatao idia be daika bona haida ese do idia lalodia tao danu. Do idia moale bada edia turadia bona edia ruma bese taudia ida idia hedavari lou neganai! Bona do ita moale bada herea iseda sene taudia ita hedavari henidia neganai!

Guba Maurina Dekenai Idia Toreisi Lou

Iesu ia gwau haida do idia lao guba, a? Oibe, ia hereva. Adorahi ginigabena ai idia do hamasea lasi neganai ia gwau: “Egu Tamana ena ruma dekenai noho gabudia be momo herea, . . . Bona lau lao, emui gabu ta do lau karaia hegaegae murinai, lau be do lau giroa mai, lau dekenai do lau abia dae umui, vadaeni lau noho gabuna dekenai be umui danu unuseni do umui noho.” (Ioane 14:2, 3) Iesu be ena aposetolo taudia ia hereva henidia, to iena hereva anina be taunimanima namodia ibounai be guba dekenai do idia lao lasi.

Iesu ia hahedinaraia guba dekenai idia toreisi lou taudia be mauri maoromaorona sibona do idia noholaia lasi, to kara haida danu do idia karaia be namo. Unai kara ta be Iehova bona do ia karaia gaudia idia diba namonamo be maoro. (Ioane 17:3) Kara ma haida be, Iesu Keriso ena boubou gauna do idia abidadama henia, bona Dirava do idia kamonai henia. (Ioane 3:16; 1 Ioane 5:3) Bona idia karaia karana ma ta be do idia “vara lou” anina be lauma helaga ese do ia horodia bapatiso Keristani taudia ai idia lao be namo. (Ioane 1:​12, 13; 3:​3-6) Guba maurina abia totona idia karaia karana ma ta be, Iesu bamona do idia haheauka, ena be do idia mase to Dirava idia abidadama henia noho be namo.​—Luka 22:29; Apokalupo 2:10.

Unai kara idia karaia be mai badina. Idia toreisi lou bona guba maurina idia abia taudia be gaukara badana do idia karaia. Iehova ia diba taunimanima edia gavamani ese tanobada idia biagua namonamo diba lasi. Unai dainai ia ese guba gavamanina ta, Basileia unai, ia haginia taunimanima ia lohiaia totona. (Mataio 6:​9, 10) Iesu be unai Basileia ena Pavapava. (Daniela 7:​13, 14) Tanobada amo haida idia abia hidi, do idia toreisi lou bona guba dekenai Iesu ida do idia lohia. Baibel ese unai toreisi lou taudia ia perovetalaidia ia gwau, “idia be Basileia ta. Bona Dirava ena hahelagaia taudia, be oi ese idia oi halaoa vadaeni, bona idia ese tanobada do idia gunalaia.”​—Apokalupo 5:10.

Taunimanima momo be guba maurina abia totona, unai kara do idia badinadia diba, a? Lasi. Ena be edia kerere dainai lasi, to idia mase vadaeni taudia momo be idia hegeregere lasi. Idia momo be dala lasi hereva momokani, Iehova bona ena ura dekenai idia dibaia totona. Idia mauri noho ela bona idia mase, to Iesu Keriso eiava Dirava ena Basileia sivarai idia diba lasi.

Iesu ese guba dekenai do idia lao taudia ia gwauraidia “orea maragi.” (Luka 12:31) Gabeai ia hedinarai, “tanobada dekena amo ia hamauria” taudia, Keriso danu guba dekenai do idia lohia taudia, edia namba be 144,000. (Apokalupo 14:​1-3; 20:6) Ena be 144,000 be namba badana bona idia hegeregere Iesu ese ia gwauraia “noho gabudia” ibounai do idia noholaia, to Adamu amo idia vara taunimanima milioni momo ida oi hahegeregerea neganai, ia be namba maragina sibona.​—Ioane 14:2.

Tanobada Toreisi Lou Ia Do Vara Lasi Neganai Idia Vara Gaudia

Namona be ita herevalaia vadaeni gaudia ita laloa lou. Baibel ia hereva hegeregerena, mase taudia be gau ta idia karaia lasi ela bona Iehova Dirava ese ia hatoredia isi lou. Haida be do idia toreisi lou bona guba maurina idia abia, Iesu Keriso danu Basileia gavamanina lalonai do idia lohia. Taunimanima momo be tanobada dekenai do idia toreisi lou bona unai Basileia henunai do idia noho.

Tanobada dekenai toreisi lou karana amo Iehova ese ena ura ta tanobada totona do ia hagugurua. Iehova ese tanobada ia karaia “taunimanima idia noholaia” totona. (Isaia 45:18) Taunimanima ese do idia noholaia ela bona hanaihanai. Unai dainai, salamo torea tauna ese ane ia abia, ia gwau: “Guba be Lohiabada sibona ese ia biagua noho, to tanobada be Lohiabada ese taunimanima dekenai ia henia.”​—Salamo 115:16.

Tanobada dekenai toreisi lou ia do matamaia lasi neganai, kara haida do idia vara be namo. Reana do oi abia dae, Dirava be ia ura lasi inai tanobada be tuari, miro, kara dika bona ala-ala karadia ese do ia hahonua. Unai hekwakwanai be Dirava bona ena taravatu maorodia idia matauraia lasi taudia ese idia havaraia. Unai dainai Dirava ena Basileia ese “tanobada idia hadikaia vadaeni taudia do [ia] alaia ore,” ena ura be tanobada dekenai ia vara totona. (Apokalupo 11:18) Unai Basileia ese kara dika taudia ibounai do ia haoredia, bena kara maoromaoro taudia sibona ese tanobada do idia noholaia hanaihanai.​—Salamo 37:​9, 29.

Paradaiso Tanobada Dekenai

Tanobada dekenai do idia toreisi lou taudia be manau bona kara maoromaoro idia badinaia taudia. (Mataio 5:5 itaia.) Dirava ena Basileia henunai do idia noho mai moale bona gari lasi ida. Baibel ese do idia vara gau namodia ia herevalaia ia gwau: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—Apokalupo 21:4.

Oibe, inai tanobada be paradaiso ai do ia lao. (Luka 23:43) Mani oi laloa unai anina be dahaka? Hospital bona buruka taudia edia noho gabudia be do idia noho lasi. Hari, buruka dainai idia hisihisi taudia be paradaiso lalonai do idia goada bona do idia gorere lasi. (Iobu 33:25; Isaia 35:​5, 6) Mase tauanina hagoevaia gabudia, gara gabudia bona gara nadi be do idia noho lasi. Iehova ena Basileia amo, ia ese “mase do ia haorea momokani ela bona hanaihanai.” (Isaia 25:8) Momokani, unai hahenamo ese mauri matamata do idia mailaia diba, ita bona iseda sene taudia totona.

[Picture on page 7]

Tanobada dekenai idia toreisi lou taudia be Basileia henunai do idia noho