Headava Lasi Maurina, Moni Ena Hekwarahi Negadia Ai

CHUKS, West Africa dekenai ia noho merona be inai bamona ia gwau: “Egu mauri lagani be 25 neganai lau ura lau headava. Kekeni ta lau laloa vadaeni, bona ia be lau ia ura henia. To hekwakwanai be moni dekenai. Egu tamana bona kakana be idia gaukara lasi, bona egu tadina memero bona kekeni be idia do sikuli noho. Ruma bese taudia ibounai be lau ese lau durudia. Ma danu, egu tamana bona sinana idia gorere neganai, unai hekwarahi ia habadaia, bona anina be gorere hanamoa ena davana karaia totona ma moni haida do lau abia.”

Iehova ena Witness merona Chuks ia ura lasi ia headava bena adavana do ia naria namonamo diba lasi. Ia be Paulo ena hereva, 1 Timoteo 5:8 dekenai ita davaria herevana, ia laloa: “Ma, oi kamonai. Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.”

Chuks ma ia gwau, “Lau gaukara goada to hanaihanai moni be ia hegeregere lasi. Unai dainai, emai headava ena nega ai haidaua loulou. Bena gabeai unai kekeni amo revareva ta lau davaria, ia gwau mero ta ese ena tamana ia hereva henia bena ia noia ia do ia adavaia totona. Tamana ese ena noinoi ia abia dae. Revareva lau davaria bena dina haida sibona murinai edia bese be maoheni ariana idia karaia.”

Chuks hegeregerena, Keristani tatau matamata momo be edia headava ena palani idia dika eiava ena nega idia haidaua badina moni dekenai idia hekwarahi dainai. Tano momo dekenai gau ibounai edia davana ia bada herea. Hegeregere, Africa ena ihuana tanona ta dekenai, kohu edia davana be 8,319 pesen amo idia habadaia daekau lagani tamona lalonai! Tano haida dekenai moni gaukara davaria be auka. Danu, nega momo gaukara ena pei be maragi dainai tau ta be sibona ena mauri durua gaudia ia davaria be auka, bona ena adavana bona natuna naridia be auka herea momokani. Tau matamata ta Nigeria dekenai be mai lalohisihisi ida ia gwau faktori ta dekenai idia henia gwauraia gaukarana ena pei hua ta ta ai be K20.00 bamona sibona​—hua ta lalonai basi amo gaukara dekenai ia lao mai lao mai ena davana henunai!

Keristani headava lasi hahine matamatadia momo danu be moni dekenai idia hekwarahi dainai edia headava ena palani idia dika. Headava lasi tatau matamatadia haida be unai idia itaia neganai, idia ura lasi headava, badina idia diba unai bamona mauri lalonai ia headava tauna be ena adavana sibona lasi, to ena adavana ena famili naria totona moni bada do ia abia be namo. Ayo, iunivesiti amo ia raka lasi kekenina ta, be ia hekwarahi ia sibona ia naria, bona ena sinana, bona ena tadina memero bona kekeni ia naridia totona. Mai lalohisihisi ida ia gwau, “Lau ura headava, to haida ese egu maduna idia itaia neganai idia ura lasi lau idia adavaia.”

Herevana moni dekenai idia hekwarahi, to headava lasi Keristani taudia momo be varavara ese idia doria, idia headava bena natuna idia havaraia totona. Nega haida edia doria dalana be idia kirikirilaidia. Hegeregere, Africa ena tano haida dekenai, ta idia hanamoa neganai, ena adavana bona natudia edia namo idia henanadailaia be vaia edia kara. Nega haida, unai bamona hanamoa hereva amo headava lasi taudia idia hevasehalaia. John, ena mauri lagani be kahirakahira 50 ia abia tauna, ia gwau: “Bema taunimanima ese lau idia hauraia, idia gwau, ‘Oiemu adavana be edeseni?,’ unai neganai lau gwau, ‘Ia mai noho.’ To hereva momokani be, adavana ta be edena bamona do lau abia diba bema ia lau naria namonamo diba lasi?”

John bona ia hegeregerena taudia momo edia noho dalana be inai Yoruba aonega herevana ese ia herevalaia: “Headava haraga be heagi gauna lasi; hekwarahi gauna be aniani ena davana.”

Emu Noho Dalana Oi Gaukaralaia Namonamo

Iseda ura gauna ta ia vara lasi neganai, ita be ita lalo-hekwarahi haraga. Aonega Herevadia 13:12 ia gwau: “Bema tau ta ia laloa gau namona ta do ia abia, to unai gau totona nega daudau ia naria kava, unai be lalohisihisi ia davaria noho.” Bema oi ura dikadika oi headava to moni ena hekwarahi dainai oi hegeregere lasi, reana emu hemami be unai bamona. Do oi lalo-hekwarahi bada bema oi be Paulo ese ia herevalaia taudia ta bamona, ‘ura dikadika ese oi ia araia, lahi bamona.’​—1 Korinto 7:9.

Unai hekwakwanai hanaidia be reana do ia auka, to oi be kara haida oi karaia diba oi haheauka bona emu noho dalana oi moalelaia totona. Ia headava lasi tauna, Iesu Keriso, be Baibel ena hakaua hereva ta ia gwauraia; unai ese oi ia durua diba, emu lalohisihisi haorea totona. Ia gwau: “Henia kara ena moale be bada, abia kara ena moale be maragi.”​—Kara 20:35.

Emu ruma bese taudia bona kongregesen taudia haida dainai kara namodia oi karaia amo unai hereva oi badinaia diba. Keristani hesiai gaukarana lalonai reana emu gaukara oi habadaia diba. Bema henia karana, mai emu ura ida, be oi goadalaia, do oi davaria ‘oiemu lalona ia auka, bona mai emu goada ida emu ura do oi biagua.’​—1 Korinto 7:37.

Headava lasi tauna ma ta, aposetolo Paulo, be inai heduru sisibana ia torea: “Unai dainai umui emui kara do umui naria namonamo. Aonega taudia bamona do umui noho, kavakava taudia bamona lasi.” (Efeso 5:​15, 16) Headava lasi Keristani taudia momo be edia nega idia gaukaralaia Iehova kahirakahira dekenai idia lao totona; guriguri, Dirava ena Hereva stadilaia karana, bona Keristani heboudia lalonai kahana haida idia karaia amo unai idia karaia. Unai amo ‘edia laumana be ia laga-ani.’ (Mataio 11:​28-30) Bema unai bamona oi karaia, mai emu goada ida moni ena hekwarahi do oi haheaukalaia. Bona unai ese oi do ia durua bena lauma huahua do oi hahedinaraia namonamo, unai amo bema gabeai oi headava neganai adavana namona ai do oi lao.

Oi laloaboio lasi Iehova be ena hesiai idia lao henia taudia ibounai ia lalodia. Oi davaria hekwakwanaidia bona metau gaudia be ia diba. Iseda lalokau guba Tamana ia diba nega daudau lalonai dahaka be oiemu namo do ia havaraia, lauma dalanai bona emu hemami dekenai. Bema mai haheauka ida iena Hereva ena hakaua herevadia be emu mauri lalonai oi gaukaralaia, ia ese nega korikori ai namo do ia mailaia bona namo do oi davaria ela bona hanaihanai dalanai oiemu ura do ia hagugurua. Baibel be ita ia hadibaia: “Bema tau ta ese kara maoromaoro ia karaia neganai, Lohiabada ese gau namona ta unai tau dekena amo do ia koua lasi.”​—Salamo 84:11.

Headava Lasi Ena Namo Oi Laloa

Namona be oi laloatao, headava lasi maurina be mai ena namo danu. Aposetolo Paulo be inai ia torea: “Bema tau ta ese iena kekeni ia adavaia, ia be kara namo ia karaia vadaeni. To bema . . . ia headava lasi, ia be kara namo herea ia karaia vadaeni.”​—1 Korinto 7:38.

Dahaka dainai headava lasi maurina ena namo ese headava maurina ena namo ia “hereaia”? Paulo ia gwau: “Headava lasi tauna ese Lohiabada do ia hamoalea daladia ia laloa. To headava tauna ese tanobada gaudia ia laloa, badina be ia ura iena hahine do ia hamoalea. Unai dainai iena laloa be rua. Headava lasi hahine, bona tau ia diba lasi kekeni ese Lohiabada ena gaukara idia laloa, badina idia ura edia tauanina bona lauma be helaga. To headava hahine be tanobada gaudia ia laloa, badina be ia ura iena tau do ia hamoalea.”​—1 Korinto 7:​32-34.

Ita gwau diba, headava Keristani taudia ese edia adavana durua gaudia, bona idia ura henia bona ura henia lasi gaudia idia laloa be maoro. To headava lasi Keristani taudia be Iehova ena hesiai gaukara sibona idia laloa badabada diba. Headava taudia danu ita hahegeregerea neganai, headava lasi taudia be mai edia dala ‘Lohiabada ena gaukara do idia karaia momokani mai laloa rua lasi.’​—1 Korinto 7:35.

Paulo ia gwau lasi headava lasi Keristani tauna dekenai laloa rua be lasi. Lasi. Bema moni ena hekwarahi ese oi ia hametaua, reana do oi mamia gau momo ese oiemu lalona idia veria oho toho, emu hesiai gaukarana amo. Ena be unai ia vara diba to headava lasi tauna o hahinena ese Dirava ena hesiai lao henia totona, ena dala koua gaudia be momo lasi; headava tauna be unai bamona lasi.

Aposetolo Paulo be headava lasi maurina ia gwauraia namo, to ia gwau lasi headava be kerere. Ia toretore, ia gwau: “To bema oi headava, inai be kara dika lasi.” To ia hadibadia, ia gwau: “Headava taudia be inai tanobada ena metau bada do idia abia.”​—1 Korinto 7:28.

Iena hereva ena anina be dahaka? Headava be mai ena lalo-hekwarahi haida. Moni ena hekwarahi negadiai, unai metau ta be reana tama ese ena adavana bona natuna ubua bona naria karana do ia laloa momo. Gorere danu ese ruma bese dekenai moni ena hekwarahi do ia habadaia bona edia lalona do ia hametaua.

Reana hari emu noho dalana be guna oi ura abia hidi dalana hegeregerena lasi, to reana unai ena namo ese bema oi headava bona natuna naria ena maduna oi huaia ena namo ia hanaia. Hari oi davaria hekwakwanaidia be do idia noho hanaihanai lasi; Dirava ena nega matamatana ai do idia ore​—bona haida be reana do idia ore haraga.​—Salamo 145:16 itaia danu.

Emu Hesiai Gaukara Oi Habadaia Diba, A?

Ena be ibounai be ful-taim hesiai gaukara idia karaia diba lasi, to haida ese idia karaia, herevana moni dainai idia hekwarahi. Chuks, guna ita kikilaia merona, be toretore kohudia ia hoia bena ma ia hoihoilaidia ena ruma bese taudia durua totona. Ena headava ena palani ia dika negana ai, ia be revareva ta ia davaria, ia idia boiria unai gabu ena Watch Tower Society ena brens opesi dekenai pat-taim ruma haginia gaukara do ia karaia. Iena kakana be moni ia laloa dainai, iena lalona ia ania do ia lao lasi totona. To, Chuks ia lalo-parara ena toretore kohudia hoihoilaia bisinesi be Iehova ena heduru amo ia haginia dainai, namona be Basileia gaukarana do ia atoa guna bona Dirava ena heduru dalana dekenai do ia tabekau. (Mataio 6:​25-34) Ma danu, ia laloa hua toi sibona do ia gaukara.

Chuks ese unai noinoi ia abia dae bona bisinesi be ena kakana ia henia. Hari, lagani 6 murinai, Chuks be ful-taim hesiai gaukara ia do karaia noho, ia be Keristani kongregesen ena elda ta, bona ena moni be hegeregere do ia headava totona. Ena mauri lalonai hari idia vara gaudia dainai ia lalohisihisi, a? Chuks ia gwau: “Lau ura do lau headava negana ai lau headava lasi dainai lau lalohisihisi, to idia vara gaudia ese egu namo ia havaraia. Lau be gau momo lau moalelaia bona hesiai gaukara dekenai hahenamo momo lau abia, bema lau headava vadaeni bona natuna ai havaraia reana unai do lau moalelaidia diba lasi.”

Nega Vaira Ena Mauri Hanamoa Gauna

Nega aukadia lalonai momo idia laloa gabeai headava dainai idia vara gaudia ese edia moni ena hekwarahi do ia hanamoa. Tano haida, mai edia abitorehai metaudia tanodia, be buruka taudia idia durua sisina sibona eiava durua lasi vaitani. Heduru idia abia lasi dainai tama sina be edia bese amo heduru idia abia, bona nega momo unai be edia natuna amo. Unai dainai, herevana headava lasi tatau bona hahine edia moni be hegeregere lasi, to idia doridia, do idia headava bona natudia idia abia.

To headava bona natuna havaraia be vaira negana ena mauri hanamoa gaudia lasi. Keristani lasi natu haida idia ura lasi edia tama sina burukadia idia naria, haida be idia karaia diba lasi, to ma haida be idia mase guna, edia tama sina idia do mauri noho lalonai. Keristani taudia be dala idauna ta ai noho namona idia laloa, idia be Dirava ena gwauhamata idia laloatao: “Lau ese umui do lau negea lasi, bona umui do lau rakatania lasi. Lasi bona lasi momokani.”​—Heberu 13:5.

Iehova ese iena hesiai lao henia totona idia headava haraga lasi taudia ia rakatania lasi. Christiana ena mauri lagani be 32 bona ia headava lasi. Ia be idia hanaia laganidia 9 lalonai regula painia gaukara ia karaia Nigeria dekenai. Ia gwau: “Iehova lau abidadama henia, Ia ese ita ia hamaoroa ita do ia rakatania lasi. Iena gwauhamata be egu lalona hagoadaia gauna. Iehova ese lauma dalanai bona tauanina dalanai lau ia naria. Ia hahedinaraia ia be hebogahisi Tamana. Hegeregere, guna lau hanaia lao Witness taudia edia heduru idia ura henia gabuna ta dekenai, painia gaukara lau karaia. Ena be noho hanamoa gaudia be momo lasi, to gabeai lau haheaukalaia diba. Typhus gorerena dainai hospital dekenai lau noho neganai, egu kongregesen gunana amo tadikaka momo idia mai, lau idia vadivadi henia bona naria totona.

“Ful-taim hesiai gaukarana ese egu lalona ia hamoalea bada. Lau gwau ia be hahenamo badana: gau ibounai Havaraia Tauna bona tanobada hegegemadai ai tadikaka bona taihu momo herea ida ita gaukara hebou. Matamata taudia momo lau itaia, idia dekenai idia vara gaudia dainai idia lalohisihisi bona edia mauri be anina lasi bamona. To lauegu mauri be mai ena anina; mai lalo-goada ida vaira negana lau naria. Lau diba Iehova kahirakahira dekenai ita noho be hari ita davaria hekwakwanaidia hanaia dalana hereadaena.”

Bema oi ura headava to moni ena hekwarahi dainai oi headava lasi, oi lalo-goada noho! Oi sibona be unai bamona lasi. Momo be Iehova ena heduru amo unai hetoho idia haheaukalaia diba. Emu noho dalana oi gaukaralaia namonamo, haida totona kara namodia oi karaia goadagoada bona lauma dalanai emu goada oi habadaia. Iehova kahirakahira dekenai oi lao; ia ese oi do ia durua momokani badina ia ese oi ia laloa bada.​—1 Petero 5:7.