Dirava Ena Hesiai Taudia Gunadia ese Hahine Idia Matauraidia
“Lohiabada Dirava ma ia gwau, ‘Unai tau sibona ia noho be ia namo lasi, lau ese durua tauna ia bamona do lau karaia.’ ”—GENESE 2:18.
1. Baibel diksenari ta ese idaunegai idia noho hahinedia edia noho be edena bamona ia herevalaia?
“IDAUNEGAI Meditereinien eiava Near East tanodia dekenai, gabu ta be lasi unuseniai hahine be mai edia ura kwalimu, hari inai negai Western besedia lalodiai idia noho hahinedia edia ura kwalimu hegeregerena. Unai neganai hahine be tatau edia siahu henunai idia noho, igui hesiai taudia be ura kwalimu taudia edia siahu henunai idia noho hegeregerena, bona eregabe taudia be buruka taudia edia siahu henunai idia noho hegeregerena. . . . Memero idia laloa bada, kekeni idia laloa maragi, bona nega haida vara matamata kekenidia be idia kumia lasi bona idia rakatania, do idia mase totona.” Baibel ena diksenari ta ese idaunegai idia noho hahinedia edia noho be unai bamona ia herevalaia.
2, 3. (a) Ripoti ta ese ia hahedinaraia, hari inai negai hahine momo edia noho be edena bamona? (b) Dahaka henanadai idia vara?
2 Hari inai negai tanobada ena kahana momo dekenai hahine edia noho ese unai hahine edia noho ia hereaia sisina mo. Lagani ta ta amo U.S. State Department ese taunimanima be mai edia maoro idia karaia karadia edia ripoti idia torea, to lagani 1994 be nega ginigunana hahine kara henia karadia be unai ripoti lalonai idia herevalaia momo. Niuspepa ta ladana New York Times ese unai ripoti ia herevalaia; ena hereva kwarana be inai: “Tano 193 Edia Ripoti ese Idia Hahedinaraia Dina Dina Iboudiai Maka Tamona amo Idia Kara Henidia Lasi.”
3 Tanobada hegegemadai bese idauidau be mai edia kara idauidau; unai bese hahinedia momo be Iehova ena orea taudia edia kongregesen lalodiai idia vareai dainai, henanadai haida idia vara: Matamanai Dirava ia ura taunimanima ese hahine do idia kara henidia, hari ai gwauraia vadaeni karadia hegeregerena, a? Baibel negadiai Iehova tomadiho henia taudia bogaragidiai idia noho hahinedia be edena bamona idia kara henia? Bona hari inai negai taunimanima ese hahine be edena bamona idia kara henidia be maoro?
“Durua Tauna” Bona “Bamona”
4 Matamanai Adamu be sibona Eden umana lalonai ia noho, bena gabeai Iehova ia gwau: “Unai tau sibona ia noho be ia namo lasi, lau ese durua tauna ia bamona do lau karaia.” (Genese 2:18) Ena be Adamu be tau goevadaena, to ia karaia Diravana ena ura do ia hagugurua totona, gau ta ai ia dabu. Unai dainai, Iehova ese hahine ia karaia bena ia henia, ena adavana; headava ginigunana unai.—Genese 2:21-24.
5. (a) Baibel torea taudia ese inai Heberu gado herevana ʽeʹzer, anina be “durua tauna,” be edena bamona idia gaukaralaia momo? (b) Iehova ese hahine ginigunana ia gwauraia tau ena “bamona”; unai ena anina be dahaka?
5 Inai hereva “durua tauna” bona “bamona” ese idia hahedinaraia Dirava ese hahine ia henia dagina ese ia hadikaia, a? Lasi vaitani. Baibel torea taudia be nega momo inai Heberu gado herevana ʽeʹzer, anina be “durua tauna,” amo Dirava idia gwauraia. Hegeregere, Iehova be “iseda durua Tauna bona iseda kesi.” (Salamo 33:20; Esodo 18:4; Deuteronomi 33:7, NW) Hosea 13:9 (NW) dekenai, Iehova ese sibona ia gwauraia Israela ena “durua tauna.” Heberu gado herevana neʹghedh, “bamona” ida idia hahegeregerea herevana, be Baibel tahua namonamo tauna ta ese inai bamona ia gwauraia: “Ia tahua heduruna be dina dina iboudiai ia karaia gaukaradia lalonai ia abia heduruna eiava natuna havaraia karana lalonai ia abia heduruna sibona lasi . . . to hebamo amo idia heduru heheni karana danu.”
6. Hahine ia karaia murinai, Dirava be dahaka ia gwau, bona dahaka dainai?
6 Iehova ese hahine be “durua tauna” bona “bamona” ia gwauraia neganai ia hadikaia lasi. Hahine ena lalona, ena hemami, bona ena tauanina ena toana be idau, tau ena hegeregerena lasi. To ia be bamona namona tau totona. Ena be idia ruaosi be idauidau, to Dirava ena ura hegeregerena tanobada hahonua karana lalonai idia ruaosi edia kara be mai anina. Toana be tau bona hahine ia karaia murinai, “Dirava ese ia karaia vadaeni gaudia ibounai ia itaia, bona momokani idia be namo herea.”—Genese 1:28, 31.
7, 8. (a) Kara dika be Eden lalonai ia vara, anina be dahaka hahine ena dagi dekenai? (b) Genese 3:16 ena anina be Iehova idia tomadiho henia taudia bogaragidiai ia vara dalana be edena bamona ita henanadailaia?
7 Kara dika ia vara murinai, tau bona hahine edia noho ia senisi. Iehova ese idia ruaosi ia hahemaoro henia, ia gwauraidia kara dika taudia. Heva dekenai do ia vara gauna ia hamaorolaia neganai, Iehova ia hereva hegeregere ia ese unai gau do ia havaraia, ia gwau: “Oiemu rogorogo ena hekwarahi, do lau habadaia, bona oiemu hisihisi mara neganai.” Ma ia gwau: “To oiemu adavana do oi ura henia noho, bona ia ese oi do ia biagua.” (Genese 3:16) Unai nega amo ema bona hari, hahine momo be edia adavadia ese idia biagudia, bona nega momo idia biagudia auka. Namona be idia laloa idia be edia heduru taudia bona edia bamodia, to nega momo idia kara henidia idia be edia hesiai taudia o igui hesiai taudia bamona.
8 To, Genese 3:16 ena anina be dahaka, Iehova idia tomadiho henia hahinedia dekenai? Tatau ese edia adavadia be edia hesiai hahinedia ai idia halaoa bona idia hahemaraidia, a? Lasi vaitani! To Baibel ese ia gwauraia karadia haida, gunaguna hahine dekenai o idia dainai idia karaia karadia, be reana hari inai negai bese haida edia matana ai be idia hegeregere lasi; vadaeni unai kara be edena bamona?
Baibel Negadiai Idia Karaia Karadia Lalo-Pararalaia
9 Baibel negadiai Dirava ena hesiai taudia bogaragidiai idia noho hahinedia idia kara namo henia. Momokani, unai negadiai hahine dekenai o idia dainai idia karaia karadia ita tahua neganai, namona be gau haida ita laloa. Gau ginigunana be inai: Ena be Baibel ese ia hahedinaraia hahine haida edia noho ia dika badina be tatau dikadia ese sibodia edia namo tahua dalana amo idia biagudia, to Dirava ese unai kara ia moalelaia lasi. Gau iharuana be inai: Ena be ena hesiai taudia ese idia karaia karadia haida be Iehova ese ia koua haraga lasi, to unai kara dekenai taravatu haida ia atoa, hahine naridia totona. Gau ihatoina be inai: Namo lasi hari inai nega taudia edia lalohadai hegeregerena ai idaunegai taudia edia kara ita gwauraia maoro o kerere. Reana hari inai negai idia noho taudia idia laloa idaunegai taudia edia kara haida be namo lasi, to reana unai neganai idia noho hahinedia idia laloa lasi unai kara ese idia hadikadia. Namona be unai kara haida do ita laloa.
10. Iehova ese adavana rua o ma haida adavaia karana be edena bamona ia laloa, bona dahaka ese ia hahedinaraia matamanai ia haginia taravatuna, tau ta be mai ena adavana tamona gauna, ia negea lasi?
10 Adavana rua o ma haida: Iehova ese matamanai ia karaia palanina hegeregerena, hahine ena adavana ese ma hahine ta do ia adavaia lasi. Dirava ese hahine tamona sibona ia karaia bena Adamu ia henia. (Genese 2:21, 22) Gwau-edeede be Eden lalonai ia vara murinai, Kaino ena bese lalonai hahine rua o ma haida adavaia karana ia matamaia. Gabeai taunimanima ese unai kara be edia kastom ta ai idia halaoa bona Iehova idia tomadiho henia taudia haida danu ese idia abia dae. (Genese 4:19; 16:1-3; 29:21-28) Ena be Iehova ese unai kara ia koua lasi bona unai kara amo Israela besena ia bada ia lao, to ia ese hahine edia namo ia tahua, unai dainai taravatu haida ia atoa, hahine bona edia natudia naria totona. (Esodo 21:10, 11; Deuteronomi 21:15-17) Inai danu, Iehova ese matamanai ia haginia taravatuna, tau be mai ena adavana tamona gauna, ia negea lasi. Noa bona ena natuna memerodia ta ta be mai edia adavana tamona; Dirava ese ia hamaorodia ‘natuna momo do idia havaraia, edia bese be tanobada gabu ibounai dekenai do idia noho.’ (Genese 7:7; 9:1; 2 Petero 2:5) Ia ese Israela ia kara henia dalana ia gwauraia neganai, ia gwau ia sibona be hahine tamona ia adavaia tauna ta bamona. (Isaia 54:1, 5) Bona, Iesu Keriso ese matamanai Dirava ese ia haginia taravatuna, tau ta be mai ena adavana tamona gauna, ia haginia lou, bona Keristani ekalesiana ginigunana lalonai unai taravatu idia badinaia.—Mataio 19:4-8; 1 Timoteo 3:2, 12.
11. Baibel negadiai dahaka dainai hahine edia davana idia henia, bona unai ese hahine ia hadikaia eiava?
11 Hahine ena davana henia karana: Buka ladana Ancient Israel—Its Life and Institutions ia gwau: “Israela taudia edia headava taravatuna hegeregerena moni eiava ma gau haida be kekeni ena famili idia henia dainai, haida edia matana ai unai be kekeni hoia karana bamona. To toana be [hahine ena davana] be ia hoia totona lasi, to ia be ena famili ese idia haboioa gaudia edia davana.” Unai hegeregerena, hahine ena davana be ena famili idia henia neganai, unai be hahine ena heduru, idia edia amo do ia boio gauna, bona guna idia naria gaukarana ena hekwarahi, bona ia dainai idia haorea monina edia davana. Unai kara ese hahine ia hadikaia lasi, to ia hamomokania ia be mai anina bada ena famili dekenai.—Genese 34:11, 12; Esodo 22:16; Gima Kohorona, September 1, 1989, rau 8-11 itaia.
12. (a) Baibel siridia haida ese tatau bona hahine be edena bamona idia gwauraia, bona hahine idia laloa unai hereva be dika eiava? (b) Eden lalonai Iehova ese ia gwauraia herevana ena mamina be edena bamona? (Futnout itaia.)
12 Headava tataudia be “biagudia”: Lagani 1918 B.C.E. bamona ai, gau ta be Aberahamo bona Sara edia mauri lalonai ia vara neganai, ia hahedinaraia unai nega lalonai taunimanima be vaia idia laloa headava tauna be ena adavana (Heberu gado, beʽu·lahʹ) ena “biaguna” (Heberu gado, baʹʽal). (Genese 20:3, NW) Unai murinai unai hereva be Baibel siridia haida lalonai idia torea, bona gau ta ese ia hahedinaraia lasi Keriso ia do vara lasi negana lalonai idia noho hahinedia idia laloa unai hereva edia mamina be dika.a (Deuteronomi 22:22, NW) To tatau ese edia adavadia be kohu bamona idia kara henia diba lasi. Tano o kohu be idia hoia mai bona idia hoia lao diba, bona edia tamadia edia amo idia abia diba, to edia adavadia be unai bamona idia kara henia diba lasi. Baibel ena aonega herevana ta be inai: “Tamana ese iena natuna tau dekenai, ruma bona kohu ia henia diba, to Lohiabada sibona ese, unai mero dekenai hahine mai aonegana ta ia henia diba.”—Aonega Herevadia 19:14; Deuteronomi 21:14.
Dagi mai Hematauraina
13 Keriso ia do vara lasi negana ai, Dirava ena hesiai taudia bogaragidiai idia noho hahinedia edia dagi be edena bamona? Edena bamona idia lalodia bona idia kara henidia? Dirava gari henia tataudia ese Iehova ena kara idia tohotohoa bona ena Taravatu idia badinaia negadiai, hahine idia hadikadia lasi, bona hahine be mai edia maoro edia ura karadia idia karaia bona hahenamo momo idia abia.
14, 15. Dahaka dahaka ese idia hahedinaraia tatau ese Israela lalonai idia noho hahinedia idia matauraia, bona dahaka dainai Iehova ia ura ia idia tomadiho henia tataudia ese do idia matauraidia be maoro?
14 Hahine idia matauraidia be maoro. Dirava ese Israela taudia ia henidia Taravatuna ese ia haganidia edia tamadia bona sinadia ruaosi do idia matauraia. (Esodo 20:12; 21:15, 17) Levitiko 19:3 ia gwau: “Umui ibounai emui sinana bona emui tamana do umui matauraia.” Nega ta Bataseba ese ena natuna Solomona dekenai ia lao neganai, hemataurai dainai “ia toreisi, iena sinana Bataseba ena vairana dekenai ia tui diho.” (1 King Taudia 2:19) Encyclopaedia Judaica ia gwau: “Dirava ese Israela ia lalokau henia karana be tau ese ena adavana ia lalokau henia karana ida idia hahegeregerea; unai be hahine idia matauraidia besena sibona lalonai idia karaia diba.”
15 Iehova ia ura ia idia tomadiho henia tataudia ese hahine do idia matauraidia, badina be ia ese ia matauraidia. Siri haida ese unai idia hahedinaraia, badina be idia lalonai parabole herevadia amo Iehova ese hahine dekenai idia vara gaudia haida ia gwauraia, bena iena mamina be hahine edia mamina ida ia hahegeregerea. (Isaia 42:14; 49:15; 66:13) Unai ese duahia taudia ia durua, Iehova ena mamina do idia lalo-pararalaia totona. “Bogahisihisi” be Heberu gado herevana ta ida idia hahegeregerea; unai hereva, ia amo Iehova ese sibona ia gwauraia herevana, be hereva ma ta bamona, unai hereva ena anina be “hahine bogana,” ia amo “sina ena mamina” idia gwauraia.—Esodo 33:19; Isaia 54:7, NW.
16. Edena sivarai ese idia hahedinaraia Dirava badinaia hahinedia edia sisiba idia laloa bada?
16 Dirava badinaia hahinedia edia sisiba idia laloa bada. Dirava gari henia tauna Aberahamo ese ena adavana, Dirava badinaia hahinena, Sara, ena sisiba be nega ta ia abia dae haraga lasi neganai, Iehova ese ia hamaoroa, ia gwau: “Sara ena ura do oi karaia.” (Genese 21:10-12) Esau ena adavana rua, Hiti taudia edia natudia, dainai, “Isako bona Rebeka edia lalona idia hekwarahi momo.” Gabeai, Rebeka ia gwau bema edia natuna Iakobo ese Hiti taudia edia natuna ta do ia adavaia, ena lalona do ia metau. Isako be edena bamona ia karaia? Baibel ia gwau: “Isako ese Iakobo ia boiria, ia hanamoa, ia hamaoroa, ia gwau, ‘Kanana taudia edia natuna ta do oi adavaia lasi.’ ” Oibe, ena be Rebeka ese ena tau ia hamaoroa lasi edena bamona do ia karaia be namo, to tau ese ena adavana ena mamina ia laloa, bena unai hegeregerena ena lalona ia hadaia. (Genese 26:34, 35; 27:46; 28:1) Gabeai King Davida ese Abigaila ena noinoi ia abia dae dainai, ia alaia gwauraia tauna ia alaia lasi.—1 Samuela 25:32-35.
17. Dahaka ese ia hahedinaraia hahine be mai edia siahu ruma bese lalonai?
17 Hahine be mai edia siahu ruma bese lalonai. Solomona ese memero kekeni ia noia, ia gwau: “Lauegu natuna e, oiemu tamana bona sinana, edia hadibaia hereva do oi kamonai henia.” (Aonega Herevadia 1:8) Aonega Herevadia karoa 31 ese “hahine namona” ena toana ia gwauraia; ia hahedinaraia gaukara goada hahinena ese ena famili naria gaukarana sibona ia karaia lasi, to reana tano hoia gaukarana, uma hadoa gaukarana, eiava bisinesi maragina haheaua gaukarana danu ia karaia, bona ia be mai ladana namona iena aonega herevadia dainai. Unai ibounai ia hereaia karana be, hahine ese Iehova ia gari henia mai ena hemataurai ida. Unai dainai unai bamona hahinena “ena namo ese davana bada herahera nadi, edia namo ia hereaia”! Davara nadinadina kakakakana idia ura henia bada, badina be ia amo herahera gaudia idia karaia.—Aonega Herevadia 31:10-31.
Hahenamo Hereadia Iehova Ena amo Idia Abia Hahinedia
18 Baibel negadiai Iehova ese hahenamo hereadia be hahine haida ia henidia, unai amo ia hahedinaraia ia matauraidia. Aneru ese Hagara, Sara, bona Manoa ena adavana idia vadivadi henidia, Dirava ena hereva hamaorodia totona. (Genese 16:7-12; 18:9-15; Gunalaia Taudia 13:2-5) Palai dubuna dekenai be “hesiai gaukara idia karaia hahine taudia” bona Solomona ena pavapava rumana lalonai be ane abia hahinedia.—Esodo 38:8; 1 Samuela 2:22; Hadibaia Tauna 2:8.
19. Nega haida, Iehova ese hahine ia gaukaralaidia, ena ladana ai dahaka do idia karaia totona?
19 Israela taudia edia sivarai hegeregerena, nega haida Iehova ese hahine ta ia gaukaralaia, iena ladana ai gaukara ta do ia karaia eiava ia dainai do ia hereva totona. Baibel ese peroveta hahinena Debora ia gwauraia, ia gwau: “Israela taudia be ia dekenai idia lao, ia ese edia hepapahuahu ia hamaoromaoroa.” (Gunalaia Taudia 4:5) Israela taudia ese Kanana pavapavana, Iabina, idia halusia murinai, Debora ese hahenamo hereana momokanina ta ia abia. Ia ese kwalimu anena ena kahana ta ia torea bena gabeai unai ane be Iehova ese ena lauma amo ia havaraia bukana lalonai idia torea.b (Gunalaia Taudia, karoa 5) Lagani handred haida murinai, King Iosaia ese hahelaga tauna badana bona ma haida ia siaia peroveta hahinena Hulida dekenai, Iehova do ia nanadaia totona. Ena dagi dainai Hulida ese ia hamaorodia, ia gwau: “Lohiabada, Israela ena Dirava be lau dekenai inai bamona ia gwau.” (2 King Taudia 22:11-15) Unai neganai pavapava ese unai tatau ia hagania peroveta hahinena ta dekenai do idia lao, to unai be Iehova ena hakaua herevadia do idia abia totona.—Malaki 2:7 itaia.
20. Edena sivarai ese idia hahedinaraia Iehova ese hahine edia mamina ia laloa bona edia namo ia tahua?
20 Iehova ese ia idia tomadiho henia hahinedia haida dainai ia karaia karadia amo ia hahedinaraia hahine edia namo ia tahua. Aberahamo ena adavana Sara, ia hairai dikadika hahinena, do ia naria totona, Iehova ese nega rua ia dainai kara ta ia karaia, do idia hadikaia lasi totona. (Genese 12:14-20; 20:1-7) Iakobo ena adavana Lea, ia ura henia maragi hahinena, be Dirava ese ia hanamoa, “ia dekenai natuna ia henia.” (Genese 29:31, 32) Dirava idia gari henia Israela hahinedia rua, mara neganai hahine idia durua hahinedia, ese sibodia edia mauri idia laloa lasi, to Aigupito ai idia noho Heberu hahinedia edia natudia memerodia idia laloa bona idia hamauria. Iehova ese edia kara ia moalelaia dainai, “edia natuna ia henidia.” (Esodo 1:17, 20, 21) Bona Hana ese mai ena taitai ida ia noia gauna be ia henia danu. (1 Samuela 1:10, 20) Bona peroveta tauna ta ena vabu be ena abitorehai ena davana ia henia diba lasi dainai ia heniatorehai tauna ia mai, ena natuna memero ruaosi do ia abia iena davana ia gwauraia neganai, Iehova ese hahine ia rakatania lasi. Ia hebogahisi henia, unai dainai siahu be peroveta tauna Elisaia ia henia, bena ia ese hahine ena dehoro ia habadaia, bena ia be mai ena dala moni do ia abia, ena abitorehai ena davana henia totona. Unai amo ena famili ia hamauria bona taunimanima edia vairanai ia hemarai lasi.—Esodo 22:22, 23; 2 King Taudia 4:1-7.
21. Heberu Revarevadia ese hahine edia ahuna namona bona edia hekwarahi be edena bamona idia hahedinaraia?
21 Heberu Revarevadia ese hahine idia hadikadia lasi, to Dirava ena hesiai taudia bogaragidiai idia noho hahinedia edia ahuna namona bona edia hekwarahi danu idia hahedinaraia. Ena be Iehova ese Genese 3:16 ena anina be ia idia tomadiho henia hahinedia dekenai ia koua lasi, to Iehova ena kara idia tohotohoa bona iena Taravatu idia badinaia tataudia ese hahine idia kara henidia mai edia hemataurai ida.
22. Iesu be tanobada dekenai ia vara neganai, hahine edia noho bona edia dagi be edena bamona idia senisi vadaeni, bona unai dainai edena bamona ita henanadai?
22 Heberu Revarevadia idia torea ore negana murinai, lagani handred momo lalonai, Iuda hahinedia edia noho bona edia dagi idia senisi. Iesu be tanobada dekenai ia vara neganai, Iuda tomadihona hadibaia taudia ese edia taravatu amo hahine edia kara momo, tomadiho lalonai bona taunimanima bogaragidiai idia karaia karadia, be idia koua vadaeni. Iesu ese unai taravatu hegeregeredia hahine ia kara henidia, a? Hari inai negai tatau ese Keristani hahinedia be edena bamona idia kara henia be maoro? Hereva gabena ese unai henanadai do ia herevalaidia.
[Footnotes]
a Mani oi laloa, Gunalaia Taudia 5:7 dekenai be inai hereva: “lau, Debora.”
b Heberu Revarevadia lalonai, nega momo headava tauna be idia gwauraia iena hahine ena “adavana” (Heberu gado, ʼish) bona headava hahinena idia gwauraia iena tau ena “adavana” (Heberu gado, ʼish·shahʹ). Unai hegeregerena, Eden lalonai Iehova ese tau ia gwauraia lasi hahine ena “biaguna,” to ia gwauraia iena “adavana,” bona hahine ia gwauraia tau ena “adavana.” (Genese 2:24; 3:16, 17) Hosea ia peroveta, ia gwau Israela be Babulonia amo do ia lou lao murinai, ia helalo-kerehai dainai ia ese Iehova do ia gwauraia lasi “Lauegu biaguna,” to “Lauegu adavana” do ia gwauraia. Reana unai ese ia hahedinaraia inai hereva “adavana” lalonai hebogahisi toana ia hedinarai goevagoeva, to inai hereva “biaguna” lalonai ia hedinarai lasi.—Hosea 2:16, NW.
Edena Bamona Do Oi Haere?
◻ Inai hereva “durua tauna” bona “bamona” ese idia hahedinaraia Dirava ese hahine ia henia dagina be edena bamona?
◻ Baibel negadiai hahine dekenai o idia dainai idia karaia karadia ita tahua neganai, dahaka ita laloa be namo?
◻ Dahaka ese ia hahedinaraia, gunaguna Dirava ena hesiai taudia bogaragidiai idia noho hahinedia edia dagi be mai hematauraina?
◻ Keriso ia do vara lasi negana ai, edena dala ai Iehova ese hahenamo hereadia be hahine ia henidia?
4. Matamanai tau ginigunana be sibona Eden umana lalonai ia noho bena gabeai Iehova be dahaka ia gwau, bena dahaka ia karaia?
9. Baibel negadiai hahine dekenai o idia dainai idia karaia karadia ita tahua neganai, dahaka gau toi ita laloa be namo?
13. Dirava idia gari henia tataudia ese Iehova ena kara idia tohotohoa bona ena Taravatu idia badinaia negadiai, hahine edia noho be edena bamona?
18. Baibel negadiai edena dala ai Iehova ese hahenamo hereadia be hahine haida ia henidia?