Koua Gaudia Oi Hanaia Diba!

PELEINI badana ta be pasendia handred momo bona kohu momo ia udaia diba. Unai peleini mai metau bada be edena bamona ia roho diba? Hodahoda ese ia abia isi dainai.

Peleini be heau dalana dekenai ia heau haraga momokani neganai, hodahoda be iena apena ataiai bona henunai ia lao. Unai ese abia isi siahuna ia havaraia. Hodahoda ia hegeregere abia isi karana ia vara totona neganai, peleini ese tano ia rakatania diba bona ia roho. To, momokani, kohu momo ia udaia peleini ena abia isi siahuna ia hegeregere lasi ia roho totona.

Nega haida, ita danu be metau herea gaudia ita huaia. Lagani momo idia ore vadaeni, Pavapava Davida ia gwau ‘iena kerere ena metau be bada herea, ia huaia diba lasi.’ (Salamo 38:4) Unai hegeregerena, Iesu Keriso ese ita ia hadibaia mauri ena lalo-metau momo gaudia ese ita do idia guia garina. (Luka 21:34) Ita idia durua lasi lalohadai eiava hemami ese ita idia hametaua diba bena do ia auka ita “roho” totona. Oi be unai bamona dala ai metau bada oi huaia, a? Eiava, oi davaria lauma dalana ai emu tubu dalana be hekwakwanai ta ese ia koua, a? Bema unai ia vara, dahaka ese oi ia durua diba?

Oi Hesiku A?

Hesiku​—momo ese idia maumaulaia hari​—be lalohadai koua gauna, bona Iehova ena Witness taudia haida dekenai ia vara diba. Vaia, matamata taudia edia kara, idia ese gaukara haida idia lalodia bada lasi, idia hesikulaia. Nega haida, Keristani heboudia be unai bamona oi lalodia, a? Bema unai bamona oi laloa, dahaka oi karaia diba hebou oi lao henidia neganai, oi hesiku lasi totona?

Gauna be inai: Hebou dekenai oi helai kava lasi. Paulo ese tau matamata Timoteo ia tore henia, ia gwau: “Dirava ena ura kara do oi tahua, bona do oi badinaia noho. Tauanina hagoadaia totona treinini bema ita karaia, inai kara ese ita do ia durua sisina. To bema Dirava totona ita treinini noho, ia ese iseda lauma do ia hagoadaia, bona inai kara ese ita do ia durua bada herea. Io, bema iseda lauma idia namo neganai, durua do ita abia inai tanobada ena mauri dekenai, bona gabeai do ita abia mauri dekenai danu.” (1 Timoteo 4:​7, 8) Tauanina hagoadaia treinini bukana do ita hesikulaia bona ia be do anina lasi bema ia gwauraia karadia ita karaia lasi. Keristani heboudia idia karaia iseda lalona ita hagoadaia totona, bona bema hebou totona ita hegaegae bona ita haere, iseda lalona ita hagoadaia unai. Unai bamona ita karaia neganai, hebou amo heduru do ita abia bona hebou do ita ura henidia bada.

Unai kara dekenai, Keristani hahine matamatana ladana Mara, ia gwau: “Bema hebou totona lau hegaegae lasi, lau moalelaidia lasi. To, lau hegaegae guna neganai, egu lalona bona kudouna ese hereva ibounai idia kamonai namonamo. Hebou edia anina be lau dekenai idia bada idia lao, bona lau ura do lau haere.”

Kamonai karana oi dibaia neganai, unai ese oi do ia durua danu. Miusiki namona oi kamonai neganai, karaharaga oi moalelaia. To moale ibounai be unai bamona lasi. Hebou ena program amo moale ita abia diba bema hereva ibounai ita kamonai henidia namonamo. Keristani hahine ta Rachel, ia gwau: “Bema haroro tauna be ia hereva goadagoada lasi, lau hekwarahi bada ena hereva lau kamonai henia totona. Egu taravatu be: ‘Bema hereva henia dalana be ia namo lasi, lau hekwarahi bada lau kamonai namonamo totona.’ . . . Baibel siri lau kamonai henidia namonamo, edia anina ibounai lau abia toho.” Rachel bamona, ita sibona ita biagua be namo ita kamonai namonamo totona. Aonega Herevadia bukana ia gwau: “Egu natuna tau e, egu aonega bona laloa kehoa dekenai, do oi kamonai bona laloa namonamo.”​—Aonega Herevadia 5:1.

Hereva haida hebou dekenai idia henia be ita diba vadaeni gaudia. Idia gwauraia be mai anina bada! Dirava ena hesiai taudia ibounai ese idia diba vadaeni herevadia idia kamonai lou be namo. Iseda kara dika tauanina mai ena ura dikadia bona laloaboio momo karana dainai, heduru momo ita abia be namo. Ena be tadikaka be ‘inai gaudia idia diba vadaeni, bona Dirava ena hereva momokani lalonai idia gini goada noho,’ to Aposetolo Petero ese ia hamaorodia lou. (2 Petero 1:12) Iesu danu, ia gwau “hadibaia tauna . . . be ruma badana ena biaguna ta bamona. Ia ese kohu matamata bona kohu gunana danu edia haboua gabuna dekena amo do ia kokia, vadaeni idia do ia hedinaraia.” (Mataio 13:52) Unai hegeregerena, iseda hebou dekediai ita diba vadaeni Baibel lalohadaidia, eiava ‘kohu gunadia’ idia herevalaia, to ‘kohu matamatadia’ danu idia henia ita moalelaia totona.

Emu ura ibounai ida hebou edia heduru ibounai oi abia neganai, lauma dalanai do oi goada. Iesu ia gwau: “Idia diba lauma gaudia idia tahua be namo taudia idia moale [lauma helaga totona idia noinoi taudia].” (Mataio 5:3, NW) Ita idia hagoadaia lauma aniani ita laloa bada neganai, hesiku karana do ia ore momokani.​—Mataio 24:​45-47.

Haheitalai Dikana ta Dainai Oi Manoka, A?

Kongregesen lalonai, ta ena kara ese oi ia hahisia, a? Reana oi laloa, ‘Edena bamona, unai tadikaka ena kara be unai bamona, to iena ladana be ia do namo noho?’ Unai bamona lalohadai be iseda lalona ia koua gauna ai ia lao diba, bona Dirava ena taunimanima ida ita hebamo karana ena namo bada ita lalo-pararalaia lasi.​—Salamo 133:1.

Reana, Kolose kongregesen taudia haida be unai bamona hekwakwanai idia davaria. Paulo ese ia sisiba henidia, ia gwau: “Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao.” (Kolose 3:13) Paulo ia diba, reana Kolose Keristani haida edia kara be namo lasi dainai, ma haida ese idia maumauraidia be mai badina. Unai dainai, namona be ita hoa bada lasi, bema iseda tadikaka eiava taihu be nega haida Keristani karana ta dekenai ia dabu sisina. Iesu ese sisiba namona ia henia hepapahuahu badadia hamaoromaoroa dalana dekenai. (Mataio 5:​23, 24; 18:​15-17) To kahirakahira nega iboudiai, ita ese iseda tadikaka edia kara ita laloaboio sibona bona ita gwauatao diba. (1 Petero 4:8) Momokani, unai bamona ita karaia be namo do ia havaraia idia bona ma haida dekenai. Dahaka dainai unai ia vara?

Aonega Herevadia 19:11 ia gwau: “Tau ta ena aonega ese haheauka ia henia noho, vadaeni ia badu haraga lasi. Bema tau ta ese oi dekenai ia kara dika, do oi laloaboio be kara namona momokani.” Ita gwauatao heheni be kara namona; ita badu bona lalo-dika noho be namo lasi! Lalokau ia hahedinaraia elda ta ladana Salvador, ia gwau: “Tadikaka ta ese lau ia kara dika henia eiava ia hereva dika neganai, lau sibona lau henanadai: ‘Edena bamona egu tadikaka lau durua diba? Edena bamona lau karaia diba ia danu egu hetura karana namona ia dika lasi totona?’ Nega ibounai lau naria namonamo badina hereva kererena ta gwauraia be auka lasi. Bema ta be ia laloa namonamo lasi bona ia hereva kava, hanamoa dalana hereadaena be, ena hereva kereredia dainai ia sori bona dala namona ai ia hereva lou. To unai ia vara diba lasi dainai, lau ese kara namona ma ta lau karaia, iena hereva lau laloa bada lasi. Lau laloa ita be kara dika taudia dainai unai ia vara; lau laloa lasi unai be egu tadikaka ena kara momokani.”

Reana oi laloa unai ita herevalaia diba, to karaia be auka. To iseda laloa dalana ese ita ia durua diba. Paulo ia gwau: “Inai bamona sibona karadia do umui laloa . . . lalokau karadia.” (Filipi 4:8) “Lalokau karadia” anina be “iseda kara dainai haida ese ita idia ura henia.” Iehova ia ura ita ese taunimanima edia kara namo ita tahua, unai kara dainai do ita lalokau henidia, bona ita lalo-dika henidia lasi. Ia be iseda haheitalai hereadaena unai kara dekenai. Salamo torea tauna ese ita ia hadibaia lou, ia gwau: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba?”​—Salamo 103:12; 130:3.

Momokani, nega haida tadikaka ta ena kara dainai ita lalohisihisi, to kahirakahira iseda tadikaka iboudiai be haheitalai namona idia hahedinaraia edia Keristani mauri lalonai. Bema unai ita laloa, Davida bamona mai moale ida ‘Lohiabada do ita hanamoa, do ita hanamoa, taunimanima momo edia huanai.’​—Salamo 109:30.

Toana be Witness Tauna Ena Mauri be Auka, A?

Madi, lalona ia koua gauna ma ta dainai, momo be Iehova idia do hanamoa matamaia lasi. Tatau haida be Iehova ena Witness taudia lasi, to edia ruma bese idia naria bona edia adavadia idia durua Keristani haroro gaukarana dekenai. Idia hetura namonamo bona kongregesen idia laloa, to idia ura lasi Dirava ena gwauhamata hesiai taudia ai idia lao. Dahaka ese ia koudia noho?

Reana, hekwakwanai ta be unai tatau idia itaia edia adavadia be tiokratik gaukara lalonai idia bisi bada herea bona unai dainai idia laloa, Witness ai idia lao ena maduna be momo. Eiava reana, idia gari badina idia laloa ruma-ta-ruma-ta haroro gaukara do idia karaia diba lasi. Edia lalohadai be inai: toana be maduna momo ese hahenamo idia hanaia. Dahaka dainai unai bamona idia lalohadai? Baibel stadi taudia momo be hereva momokani idia dibaia bona metairametaira edia mauri lalonai idia badinaia matamaia. To, nega momo, murimuri tatau be Keristani maduna idia abia dae urana idia do habadaia lasi neganai, unai maduna idauidau idia diba vadaeni.

Manuel be unai bamona, ia gwau: “Lagani 10 lalodiai, egu adavana ida lau lao hebouhebou badadia bona hebou maragidia dekenai. Lau hereva momokani, lau ese Witness taudia edia hebamo lau ura henia bona murimuri taudia edia lau ura lasi, bona lau hegeregere neganai mai moale ida lau durudia. Idia huanai ia noho lalokau lau hoalaia. To, ruma-ta-ruma-ta haroro gaukara do lau karaia lalohadaina ese lau ia koua, egu gaukara turadia ese lau idia hevasehalaia garina lau gari.

“Egu adavana be lau ia haheaukalaia bona lau ia doria lasi Baibel lau stadilaia totona. Ia bona emai natudia be edia haheitalai namona amo idia ‘haroro.’ Kongregesen ena elda ta ladana Jose, ese lau ia durua bada. Lau laloa ia ese lau ia hagoadaia dainai, stadi lau matamaia. Bapatiso murinai, lau lalo-parara lau idia koua gaudia be anina lasi bona idia be egu lalona sibona dekenai. Egu lalona lau hadaia Iehova do lau hesiai henia neganai, lau mamia lau ia durua egu gari gaudia hanaia totona.”

Hahine bona Keristani elda taudia ese Manuel bamona tatau be edena bamona idia durudia diba edia lalona dekenai koua gaudia idia hanaia totona? Baibel stadi ese do ia durudia diba, Dirava do idia laloa bada bona do idia ura ena ura do idia karaia totona. Oibe, Baibel dibaia namonamo karana be abidadama bona nega vairai do idia vara gaudia abia dae momokani karana ena badina.​—Roma 15:13.

Dahaka ese unai tatau do ia hagoadaia Baibel idia stadilaia totona? Nega momo, kongregesen tadikaka ta ese mai lalo-parara ida ia tura henidia neganai, ia durudia diba. Reana, elda ta eiava lo tadikaka ta ese unai tau ia tura henia diba. Idia hetura namonamo murinai, reana durua gauna be ta ese do ia volantia ia stadi henia totona. (1 Korinto 9:​19-23) Unai ia vara noho lalonai, mai ena hemataurai Keristani hahine ese ena murimuri adavana dekenai, lauma aniani sisina sisina do ia henia. Ia diba ena adavana ia doria neganai, do ia ura lasi.​—Aonega Herevadia 19:14.

Manuel ese ia davaria bamona, ta be lauma dalanai ia goada neganai, ororo badadia bamona koua gaudia be do idia maragi idia lao. Iehova ese ia idia hesiai henia taudia ia hagoadadia. (Isaia 40:​29-31) Dirava ena goada amo bona lo Witness taudia edia heduru amo, murimuri tatau idia koua gaudia idia kokia diba. Edia lalona ibounai ida Dirava hesiai henia gaukarana do idia moalelaia bada, bena ruma-ta-ruma-ta gaukara be do ia auka lasi, bona edia gaukara taudia ese do idia hagaridia lasi.​—Isaia 51:12; Roma 10:10.

Oi Goada Karaia Lao

Ita gwauraidia vadaeni koua gaudia toi ita hanaia diba. Peleini ta be tano ia rakatania bona ia roho neganai, ensini be paua bada herea ia gaukaralaia bona peleini taria taudia ese unai idia naria namonamo. Tano ia rakatania neganai, ensini ese bensin bada ia gaukaralaia, ma ia roho negana ta lalonai ia gaukaralaia bamona lasi. Unai hegeregerena, lalohadai bona hemami dikadia oi rakatania totona, namona be oi hekwarahi bada mai goada ida. Hamatamaia negana be reana do ia auka bada, to oi hekwarahi karaia lao ela bona do oi goada.​—2 Petero 1:10 itaia.

Oi goada oi lao karana be Baibel ena hahegoada herevadia ese do idia durua. (Salamo 119:60) Ita diba kongregesen taudia do idia ura idia heduru. (Galatia 6:2) To, gau iboudiai ia hanaia gauna be Iehova Dirava ena heduru. Davida ia hereva bamona, “Lohiabada do ita hanamoa. Ia ese dina ibounai iseda maduna metaudia ia huaia noho.” (Salamo 68:19) Guriguri amo iseda lalo-metau gaudia ita gwauraia neganai, ita huaia gauna do ia metau bada lasi.

Nega haida, peleini ese ia medu bona dibura tanobadana ia rakatania, ori lalonai ia roho vareai lao, bena dina ese ia hadiaria gubana lalonai ia roho vareai. Ita danu be lalohadai metaudia ita rakatania diba. Dirava ena heduru ida, ori bamona koua gaudia ita hanaia diba, bona mai diari bada bona moale ida, Iehova idia tomadiho henia tanobada ibounai besena lalonai do ita vareai.

[Pictures on page 23]

Dirava ena heduru ida, ita ese lalona koua gaudia ita hanaia diba