Inai Oi Laloatao, A?

Gima Kohorona, vanegai gaudia, edia hereva oi moalelaia a? Bema oibe, inai hereva do oi lalodia lou mai emu moale ida:

▫ Tomadiho ena hereva momokani davaria dalana ia noho, a?

Iesu Keriso ia gwau: “Hereva momokani be do umui diba, bona hereva momokani ese umui do ia ruhaia.” (Ioane 8:32) Iesu ese ia hahedinaraia hereva momokani davaria dalana ia noho, bona ia hahedinaraia namona be ita davaria, Dirava do ita tomadiho henia totona. Ia ese Samaria hahinena ia hamaoroa, ia gwau: “Tomadiho taudia momokani ese mai Lauma bona mai momokani danu Tamana do idia tomadiho henia.” (Ioane 4:23)​—⁠4/15, rau 5.

▫ Robert Estienne be daika, bona dahaka ia karaia?

Robert Estienne be printa tauna ta, lagani 1500 C.E. murinai ia noho. Ena mauri ibounai ia gaukaralaia Revareva Helagadia printaia totona bona ia hekwarahi, Baibel idia torea guna taudia ese idia torea herevadia edia anina hahedinaraia totona. Ia ese Baibel ena hereva iboudiai ia hapararaia, siri ta ta mai edia namba dekenai. Hari inai negai iboudiai ese unai kara idia badinaia noho.​—⁠4/15, rau 10, 14.

▫ Baibel be dina iboudiai duahia karana amo dahaka namo ita davaria diba?

Baibel ena hereva edia anina ita dekenai idia matamata loulou, bona ita itaia, ita kamonai, bona ita dekenai idia vara gaudia dainai, dina gabedia perovetalaia herevadia edia anina ita dekenai be ia bada ia lao. Kara ma haida dekenai ita manada bona hekwakwanai ita haheaukalaidia neganai, Baibel ena sisiba ita laloa bada. (Aonega Herevadia 4:18)​—⁠5/1, rau 15.

▫ Baibel siridia laloatao dalana be dahaka?

Baibel oi duahia neganai, oi ura do oi laloatao siridia be oi makaia, o kadi dekenai oi torea hanai bena unai kadi be gabu ta dekenai oi atodia, dina iboudiai do oi itaia totona. Unai siri oi lalodia tao toho lalonai, oi lalodia namonamo, bona oi gaukaralaidia. Momo be nega tamona oi laloatao toho lasi, reana pura ta lalonai tamona eiava rua sibona be hegeregere.​—⁠5/1, rau 16, 17.

▫ Luka ena Evanelia lalonai dahaka sivarai ia torea, Evanelia oredia ai idia torea lasi gaudia?

Ena be Luka ese ia torea herevadia momo be Mataio ese ia torea gaudia hegeregeredia, to ena buka ena kahana badana, 59 pesen, be hereva ma haida. Iesu ena hoa karadia 6 bona ena parabole 12, Evanelia torea taudia oredia ese idia gwauraia lasi gaudia, be Luka ese ia gwauraia.​—⁠5/15, rau 12.

▫ Lagani 1935 ai, dahaka hereva momokanina badana idia gwauraia hedinarai?

Unai lagani lalonai Iehova ena orea taudia idia lalo-parara, Apokalupo 7:​9-17 ese ia gwauraia taudia hutuma bada herea be guba oreana iharuana lasi, to edia helaro be tanobada ai do idia mauri. (Ioane 10:16)​—⁠5/15, rau 20.

▫ Dahaka ita karaia diba, mase idia lalohisihisilaia taudia do ita durua totona?

Edia hereva do ita kamonai. Edia lalona do ita hagoadaia. Iseda heduru do idia abia haraga dalana do ita kehoa edia. Nega maorona ai do ita durudia sibona. Edia lalona hagoadaia revarevana o kadina ta do ita torea. Idia ida do ita guriguri. (Iamesi 5:16) Do ita durudia noho.​—⁠6/1, rau 13, 14.

▫ Lauma tadikakadia bona taihudia ese dahaka idia karaia diba, tomadiho dainai idia parara ruma besedia lalonai idia noho taudia do idia durua totona?

Nega ibounai hahegoada hereva namodia amo oi hereva henidia bona oi durudia. (1 Tesalonika 5:14) Unai ese edia lalona bona edia tauanina do ia hagoadaia lou. Bema hegeregere bona bema idia mai diba, oi boiridia, haroro gaukarana lalonai bona moale karadia dekenai oi do idia bamoa totona. Idia dainai oi guriguri. (Roma 1:9; Efeso 1:16)​—⁠6/1, rau 29.

▫ Haroro tauna ese haroro gaukarana ia karaia lalonai bema ia haheauka, dahaka hahenamo idia vara diba?

Haheauka ese Basileia harorolaia tauna ia durua, taunimanima edia lalo-hesiku bona edia badu do ia haheaukalaia totona. Bema ruma taudia idia badu, haroro taudia mai edia haheauka be idia ida do idia hepapahuahu lasi, to do idia haere henidia mai edia manau ida eiava manau dalanai do idia rakatania; unai amo edia maino bona edia moale do idia dogoatao. (Mataio 10:​12, 13) Ma danu, mamoe bamona taudia do idia veria, Basileia sivaraina do idia abia dae totona.​—⁠6/15, rau 9.

▫ Dahaka dainai Baibel ena hereva momokani ita diba be mai anina bada?

Hereva momokani ita diba dainai, hereva koikoi, lalohadai kereredia, bona gari kava amo ita ia ruhaia. Hereva momokani hegeregerena ita noho neganai, ita ia hagoadaia, hisihisi idauidau do ita haheaukalaia totona bona ia ese helaro ia henia ita dekenai; unai helaro dainai, hetoho ita davaria neganai ita gini auka diba.​—⁠7/1, rau 8.

▫ Israela ena gabunai horoa Keristani ekalesiana ese dahaka gaukara badana idia karaia?

Iehova ena goada be bese idauidau bogaragidiai idia gwauraia hedinarai. (Isaia 43:21; 1 Petero 2:⁠9)​—⁠7/1, rau 19.

▫ Petero ena hereva, tau ese ena adavana do ia “matauraia,” ena anina be dahaka? (1 Petero 3:⁠7)

Ena adavana ia matauraia tauna ese ia hahemaraia lasi eiava ia hadikaia lasi. To, ena hereva bona ena kara amo ia hanamoa​—⁠sibodia idia noho neganai bona taunimanima edia vairanai idia noho neganai danu. (Aonega Herevadia 31:​10-31)​—⁠7/15, rau 19.

▫ Dahaka dainai ia helalo-kerehai lasi kara dika tauna be Keristani kongregesen murimurinai idia atoa be lalokau karana?

Unai ese Iehova lalokau henia bona ena dala ura henia karana ia hahedinaraia. (Salamo 97:10) Unai be kara maoromaoro dalana idia ura badinaia taudia lalokau henia karana badina idia edia huanai amo edia lalona do ia ania kerere tauna idia kokia. Unai be kongregesen ena lalo-goevagoeva naria karana danu. (1 Korinto 5:​1-13)​—⁠7/15, rau 25.

▫ Mataio 24:​45-47 dekenai Iesu ese ‘hesiai tauna mai ena kamonai bona mai ena kara maoromaoro’ ia herevalaia; hari inai negai edena bamona ita dibaia diba?

Edia gaukara amo ita dibaia diba; Baibel idia gwauraia bukadia idia halasia, “Basileia ena Sivarai Namona” idia hahedibalaia bona idia harorolaia, bona Dirava ena Hereva, Baibel, idia badinaia goevagoeva. (Mataio 24:14; 28:​19, 20)​—⁠8/1, rau 16.