Sene Karadia Mirodia Dadaraia!

IESU KERISO ia gwau: “Hereva momokani ese umui do ia ruhaia.” (Ioane 8:32) Oibe, Keristani dalana badinaia karana ese taunimanima ia ruhaia​—⁠lauma gari henia, hereva bona helaro koikoidia, bona idia ia kwatua bamona kara dikadia idauidau amo ia ruhadia.

Gunaguna bamona, hari iseda nega lalonai idia noho Keristani taudia idia doria sene karadia idia karaia lou totona. (Galatia 4:​9, 10) Kastom karadia iboudiai idia dika lasi. Reana Keristani tauna do ia ura kastom karadia namodia ia badinaia. To bema kastom karana ta be Dirava ena Hereva ia utua, Keristani taudia ese do idia badinaia lasi vaitani. Momo idia diba vadaeni, Iehova ena Witness taudia be Kerisimasi, vara dinana moalelaia, bona Dirava ena Hereva idia utua kastom karadia ma haida idia dadaraia.

Nega momo mai lalo-goada ida idia gini goada dainai edia turadia, dekena taudia, bona varavara ese idia kirikirilaia bona dagedage henidia. Unai be Africa tanodia haida dekenai idia vara, unuseniai mase, headava, eiava natuna ia vara neganai, sene karadia idauidau momo idia karaia. Badinaia totona taunimanima idia doria auka masemase​—⁠nega momo hagaria herevadia o dagedage karadia amo. Unuseniai idia noho Keristani taudia be edena bamona do idia gini goada diba? Dala ia noho ta ese ia doridia lasi totona, a? Haere abia totona, namona be sene karadia idia vara neganai, kamonai Keristani taudia be dahaka idia karaia do ita itaia.

Mase Negana ai, Lauma Gari Henia

Africa ena saut kahana lalonai, mase ia vara neganai bona idia guria neganai, sene karadia idauidau momo idia karaia. Idia taitailaia taudia be hanuaboi ibounai​—⁠eiava hanuaboi haida lalonai​—⁠mase rumana dekenai idia noho, bona unuseniai lahi ta be ia aria noho, idia habodoa lasi. Taravatu idia atoa mase tauna ena varavara be idia nadunadu lasi, huina idia utua lasi, bona digudigu lasi ela bona mase tauna idia guria. Gabeai, ranu mai au-rau idauidau lalonai idia digu. Keristani taudia ese unai bamona kastom idia abia dae, a? Lasi. Unai gaudia idia karaia badina idia laloa souli ia mauri noho bona mase taudia idia gari henia dainai.

Hadibaia Tauna 9:5 ai ia gwau: “Mauri taudia idia diba do idia mase, to mase taudia be gau ta idia diba lasi.” Unai hereva momokanina oi diba neganai, ‘mase taudia edia lauma’ gari henia karana amo oi do ia ruhaia. To, bema varavara idia laloa idia ese Keristani tauna ena namo idia tahua dainai mai goada ida idia doria unai sene karadia lalonai ia vareai, dahaka do ia karaia?

Mani Africa Witness hahinena Jane ita laloa. Ena tamana be ia mase. Mase rumana ai ia ginidae neganai, idia hamaoroa ia bona ena famili ibounai be mase tauna ena lauma hamoalea totona, hanuaboi ibounai lalonai do idia mavaru bona ena mase tauanina do idia gegea. Jane ia gwau: “Idia lau hamaoroa, lau be Iehova ena Witness hahine ta dainai unai bamona kara do lau karaia diba lasi. To, idia guria dinana murinai, varavara burukadia idia gwau mase tauna ena varavara iboudiai do idia hadigua, mase tauna ena lauma amo henari karana ma ta karaia totona. Ma lau dadaraia lou. Unai negana ai, Sinagu be sibona ruma ta dekenai idia atoa. Bema ta ia ura ia itaia, idia hegaegaelaia inuinu kekero muramura ta do ia inua guna bena do ia lao itaia.

“Unai bamona kara ibounai lau dadaraia. Lau giroa egu ruma dekenai bona aniani lau hegaegaelaia bona Sinagu ia noho rumana dekenai lau abia lao. Egu famili idia lalohisihisi bada. Idia laloa lau kavakava.” Unai sibona lasi, ia idia kirikirilaia, bona idia gwauraia dika, idia gwau: “Oiemu tomadiho oi laloa bona sene karadia oi dadaraia dainai, emu tamana ena lauma ese oi do ia hahekwakwanaia. Danu, natudia do oi abia lasi.” To, Jane ia gari lasi. Dahaka ia vara? Ia gwau: “Unai neganai egu natudia be rua. Hari egu natudia be 6! Idia gwau natudia do lau havaraia diba lasi taudia ia hahemaraia unai.”

“Hagoevaia” Mahuta Hebou Amo

Kastom ma ta, adavana ia mase murinai, be kara ta amo idia hagoevaia. Bema hahine ia mase, iena famili ese unai dogae ena nakimi eiava iena mase adavana ena varavara hahinena ma ta do idia abia mai. Idia doria ia mahuta hebou. Unai ia karaia sibona murinai, ia ura hahinena ia adavaia diba. Unai bamona do idia karaia danu vabu ta dekenai. Idia laloa unai kara ese ia do ia hagoevaia; mase tauna o hahinena ena “lauma” amo.

Unai “hagoevaia” karana idia dadaraia taudia be edia varavara do idia habadua dikadika. Reana ia do idia rakatania bona idia kirikirilaia bona idia gwau, dika do ia abia. Herevana, dahaka ia vara to Keristani taudia ese unai bamona kastom idia badinaia lasi. Idia diba unai be “hagoevaia” karana lasi, Dirava ena matana ai unai headava lasi mahuta hebou karana ese idia do ia hamiroa. (1 Korinto 6:​18-20) Danu, Keristani taudia be ‘Keristani tauna sibona do idia adavaia.’​—⁠1 Korinto 7:⁠39.

Zambia Keristani hahinena ta, ladana Violet, ena adavana be ia mase. Ena mase murinai, varavara ese tau ta idia abia mai, idia gwau ia ida do ia mahuta hebou. Violet ese unai kara ia dadaraia, unai dainai taravatu idia atoa ranu abia gabuna dekenai ranu do ia utua lasi. Ia idia hamaoroa, dala badana dekenai ia raka lasi, dika ia vara garina. To varavara bona hanua taudia ese ia idia hagaria diba lasi.

Gabeai Violet idia samania hanua ena kota dekenai. Idia vairanai, Baibel amo ia hahedinaraia goevagoeva dahaka dainai unai sihari kava karana do ia karaia lasi. Kota ia gwau ia maoro, bona kota be mai ena maoro lasi ia ia doria iena abidadama do idia hadikaia kastom bona sene karadia ia karaia totona. Namo herea, badina ia gini goada dainai, unai hanua dekenai idia noho Witness taudia dekenai, mase ia vara neganai, idia doria auka lasi.

Africa Witness hahine ta, ladana Monika, ena adavana ia mase murinai, ia be unai bamona hekwakwanai ia haheaukalaia. Iena tau ena varavara idia ura adavana ma ta idia abia hidi ia totona. Monika ia gwau: “Lau ura lasi, badina lau ura 1 Korinto 7:39 ai ia noho hahegani lau badinaia.” To idia doria noho. Monika ia gwau: “Idia ura lau idia hagaria. Idia gwau: ‘Bema inai tau oi adavaia lasi, do oi headava lou lasi.’ Idia gwau egu Keristani tadikaka haida be hunia dalana ai unai hagoevaia karana idia karaia vadaeni.” To, Monika ia manoka lasi, ia gini auka. Ia gwau: “Lagani rua lau sibona lau noho, bena unai murinai Keristani dalana ai lau headava lou.” Hari Monika be regula painia gaukara ia karaia.

Natuna Negea Bona Ia Mase Vadaeni Natuna Ia Vara

Africa ena saut kahana dekenai, ta be natuna ia negea o ia mase vadaeni beibi ia abia neganai idia karaia kastom momo ese Keristani taudia ia tohoa diba. Unai lalohisihisi ia vara badina ita goevadae lasi dainai​—⁠Dirava ena panisi henia karana dainai lasi. (Roma 3:23) Africa ena tanodia haida lalonai, bema hahine be natuna ia negea, sene karana be do idia vadivadi henia lasi, nega sisina lalonai sibona do ia noho.

Beibi ia negea hahine ta ia hoa badina Witness ta be ena ruma dekenai ia raka mai. Ia lao kahirakahira neganai, ia boiboi ia gwau: “Iniseniai oi mai lasi! Aiemai kastom be, natuna ia negea hahine oi vadivadi henia lasi.” To, unai Witness tauna ese ia hamaoroa Iehova ena Witness taudia be Baibel ena sivarai taunimanima ibounai dekenai idia harorolaia bona unai kastom idia badinaia lasi. Isaia 65:​20, 23 ia duahia, bona ia hahedinaraia Dirava ena Basileia henunai idia noho hahinedia ese natuna do idia negea lasi, bona ia mase vadaeni natuna do idia havaraia lasi. Unai dainai, unai hahine ese Baibel stadi ia abia dae.

Idia mase vadaeni beibi ia vara bena idia guria neganai, lauma gari henia karadia idia karaia. Witness tauna ta, ladana Joseph, be unai bamona beibi idia guria neganai ia lao. Unai neganai ia idia hamaoroa idia lao taudia ibounai ese ranu mai ena au-raudia dekenai edia imana idia huria bona unai muramura be edia kemena dekenai do idia dahua. Unai ese natuna ena “lauma” do ia koua bona idia do ia hadikaia lasi. Mai hemataurai ida ia gwau do ia karaia lasi, badina Baibel ena hahediba ia diba, mase taudia ese mauri taudia idia hadikaia diba lasi. To, haida idia ura unai muramura ia atoa bona idia doria. Joseph be ma ia gwau do ia karaia lasi. Ia gari lasi dainai, idia noho taudia ma haida danu idia gwau unai muramura idia ura lasi.

Hepapahuahu Havaraia Lasi, to Gini Auka

Idia mauri taudia gari henia karana bona oi sibona do oi noho garina ese oi idia hamanokaia diba. Aonega Herevadia 29:25 ia gwau: “Taunimanima do oi gari henia neganai, . . . tarapu lalonai oi moru bamona.” Ita herevalaia sivaraidia ese inai siri ena kahana ta ia hamomokania: ‘Iehova oi abidadama henia neganai, mauri do oi davaria noho.’

To, nega momo hekwakwanai do oi reaia diba. Hegeregere, bema Keristani tauna ta idia boiria ena varavara ena mase tauanina do idia guria neganai do ia lao, namo lasi ia naria ela bona hekwakwanai ta ia vara. “Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.”​—⁠Aonega Herevadia 27:⁠12.

Aonega dalana be mai hemataurai ida oi henanadai dahaka kastom karadia do idia badinaia. Bema unai kara be maoro lasi neganai Keristani tauna ese do ia hahedinaraia dahaka dainai do ia karaia diba lasi, to “mai mataurai bona manau danu” do ia gwauraia. (1 Petero 3:15) Bema guna mai hemataurai ida Baibel amo iena kara ena badina ia hahedinaraia, nega momo iena varavara be unai do idia matauraia bona ia do idia dagedage o hereva auka henia lasi.

Reana ena varavara idia moale o idia moale lasi, to Keristani tauna be Dirava ese ia ura henia lasi sene karadia do ia dadaraia​—⁠herevana edena bamona dagedage eiava hereva dikadia do ia abia. Lauma gari henia karana ese hari ita ia guia lasi. Aposetolo Paulo ia gwau: “Keriso ese . . . ita ia ruhaia vadaeni. Ura Kwalimu ita abia vadaeni. Inai ura kwalimu do umui dogoatao noho, tau haida ese umui do idia guia lou garina.”​—⁠Galatia 5:⁠1.

[Picture on page 29]

Momo idia laloa hari idia mase taudia ese guna idia mase taudia dekenai edia sivarai ta idia henia diba