Basileia Haroro Ripoti
Keristani Momokanidia ese Dagedage Do Idia Davaria
ABELA ena nega amo, Iehova ena hesiai taudia momo be tomadiho dagedage taudia amo idia abia hisihisi idia haheaukalaia. (Luka 11:48-51) Unai be hoa gauna lasi badina Baibel ia gwau, “Keriso Iesu danu idia hakapua dainai, Dirava badinaia idia ura taudia ibounai ese dagedage ena hisihisi do idia abia”! (2 Timoteo 3:12) Unai hegeregerena, hari Iehova ena Witness taudia be tano 25 mai kahana lalonai edia gaukara idia taravatua bona dagedage idia haheaukalaia noho.
Tano ta dekenai, Iehova ena Witness taudia edia gaukarana idia taravatua sibona lasi to dubu oreadia ese idia dagedage henidia danu, to ena be unai ia vara, pablisa taudia 12,000 mai kahana ese sivarai namona harorolaia gaukara idia karaia goadagoada, bona taunimanima 15,000 ida Baibel stadi idia karaia. To vaia, edia haroro gaukara be mai aonega danu idia karaia. Edia Keristani heboudia be tadikaka edia ruma dekenai idia karaia, bona kamonai taudia idia boiridia neganai idia naria namonamo.
Vanegai, gavamani ese edia taravatu idia hamanokaia sisina, bona hari Witness taudia ese edia gaukara idia karaia diba bona dagedage idia davaria lasi. To, tomadiho oreadia ese ma haida edia lalona idia anina kerere idia havaraia totona.
Taoni ta dekenai, tomadiho dagedage taudia ibounai 200 bamona be mai badu ida Iehova ena Witness taudia 50 bamona be edia kongregesen hebouna idia karaia noho rumana dekenai idia raka lao. Unai orea lalonai haida be nadi idia dogoatao bona tomadiho herevadia idia lololaia. Edia ura be Witness taudia do idia botadia bona ruma do idia hadikaia. Nega sisina daudau lalonai dubu gunalaia taudia be Witness taudia edia hebou idia itaia noho bona do idia heai henidia negana namona idia naria. Unai orea be kahirakahira ruma dekenai idia vareai gwauraia neganai, pulisi taudia 15 idia mai bona idia oda henidia idia siri totona. Witness taudia be unai idia hoalaia badina idia ta be nega lasi pulisi idia hadibadia totona.
To nega haida, dagedage taudia be edia ura gauna idia karaia. Witness haida be kota dekenai idia abidia lao bona dibura dekenai idia koudia. Samania hereva ta be lagani momo kota dekenai ia noho ela bona samani idia karaia taudia be idia hesiku. To, unai gabu ena dubu gunalaia tauna ese ia herevalaia lou dainai, idia abia lao kota bona Witness tauna idia siaia lao dibura dekenai.
Gabu ta dekenai, Witness taudia haida be ruma ta dekenai idia hebou, Lohiabada ena Anibou idia karaia totona. Unai hanuaboi, pulisi haida ese ruma tauna bona hebou ia naria elda tauna idia abidia. Pulisi steiseni dekenai idia botadia dikadika. Hora momo lalonai mai dagedage bada ida idia nanadaidia. Witness tauna ta be ranu keruma gurina lalonai idia udaia, to unai kara dikana ia haheaukalaia.
To dahaka dainai pulisi ese idia dagedage henidia noho? Tomadiho dagedage taudia bona unai gabu ena dubu gunalaia tauna ese pulisi idia doria unai idia karaia totona. Gabeai, pulisi oreana ena tau badana ia gwau ia ese gwaumaoro ia henia lasi, to tadikaka idia abidia kava. Edia sori herevana idia gwauraia, bona tadikaka idia botaia taudia idia panisidia.
Tanobada hegegemadai, ena be dagedage bada idia abia, to Iehova ena Witness taudia ese Dirava ena Basileia ena sivarai namona idia harorolaia noho. Iesu ena sisiba idia badinaia ia gwau: “Lau ese lau siaia umui, mamoe, uda sisia edia huanai bamona. Unai dainai, do umui aonega, gaigai bamona, bona do umui dagedage lasi, pune manu bamona.”—Mataio 10:16.
[Picture on page 31]
Dagedage ia davaria tauna ginigunana be Abela