‘O, Bema Taunimanima Ibounai be Idia Bamona!’

Unai be Luxembourg ena niuspepa toretore tauna ta ese ia torea, Letzebuerger Journal lalonai. Daidia ia herevalaidia?

Ia be Poland dekenai ia lao, Auschwitz dibura kamepa taudia idia ruhadia negana ena lagani 50 laloa tao bona moalelaia totona, bona ia itaia unai gabu dekenai hisihisi bada idia davaria taudia edia grup ta ladana idia hatoa lasi. February 2, 1995 ena niuspepa lalonai unai grup ia gwauraia, Iehova ena Witness taudia. Bona ia gwau: “Ena be idia kara dika henidia bada dibura ruma o kamepa dekenai idia koudia, eiava aniani lasi rumadia lalonai idia koudia, eiava ira o guillotine amo do idia hamasedia gwauraia, to unai ese edia abidadama karana ia hamanokaia lasi.” Ma ia gwau: “Iehova ena Witness taudia be idia gini auka ela bona idia mase dainai SS gadi taudia ese edia lalo-goada idia hoalaia bada.”

Iehova ena Witness taudia idia ura lasi do idia mase. To, Witness taudia tausen tausen be Keristani ginigunadia bamodia, idia ura lasi edia Keristani taravatu idia makohia dainai mase idia abia hidi. Nazi Gavamani ena lohia negadia dikadia lalonai, Iehova ena Witness taudia be unai bamona abidadama idia hahedinaraia dainai idia idau momokani.

Niuspepa toretore tauna ena hereva dokonai inai bamona ia gwau: “O, bema taunimanima ibounai be Iehova ena Witness taudia bamona!” Bema idia be unai taudia bamona, tanobada tuarina iharuana bema ia vara lasi.