Iehova Ena Ura Idia Karaia
Filipo ese Etiopia Dagi Bada Tauna Ia Bapatisoa
ETIOPIA TAUNA ta be ena kariota dekenai ia heau noho lalonai, iena nega ia gaukaralaia namonamo. Ia duahiduahi badabada noho—aposetolo taudia edia negai loaloa taudia momo be vaia unai bamona idia karaia. Unai tau be dagi bada tauna, “Kanedake, Etiopia ena kwini hahine ena kohu ia naria tauna”—ia be moni ia naria ena minista.a Unai dagi bada tauna be Dirava ena Hereva ia duahia noho, diba ia abia totona.—Kara 8:27, 28.
Haroro tauna Filipo be kahirakahira ai ia noho. Aneru ta ese unai gabu dekenai ia siaia lao, bona ia hamaoroa, “Oi lao, kariota dekenai.” (Kara 8:26, 29) Ita laloa diba reana Filipo be sibona dekenai ia henanadai, ‘Unai tau be daika? Dahaka ia duahia noho? Dahaka dainai ia dekenai lau idia siaia mai?’
Filipo be kariota badinai ia heau neganai, ia kamonai Etiopia tauna ese inai hereva ia duahia: “Mamoe bamona idia hakaua lao, alaia totona, bona mamoe natuna ena huina idia utua neganai ia boiboi lasi, inai bamona ia danu be regena lasi. Idia ese hemarai idia henia, bona iena kota dala idia koua. Iena bese taudia daika ese do ia gwauraia? Badina be iena mauri tanobada dekena amo idia kokia vadaeni.”—Kara 8:32, 33.
Karaharaga Filipo be unai hereva ia diba. Unai be Isaia ena toretore. (Isaia 53:7, 8) Etiopia tauna be ia duahia herevana ia daradaralaia. Filipo ese kiki ia hamatamaia, ia nanadaia: “Oi diba dahaka oi duahia, a?” Etiopia tauna ia haere, ia gwau, “Bema hadibaia tauna lasi, edena bamona lau diba?” Bona Filipo dekenai ia noinoi, ena kariota dekenai do ia guia.—Kara 8:30, 31.
“Dahaka ese Egu Bapatiso Ia Koua?”
Etiopia tauna ese Filipo dekenai ia gwau: “Mani lau oi hamaoroa, edena tauna be peroveta tauna ese ia herevalaia inai bamona? Ia sibona o idau tauna ta ia herevalaia?” (Kara 8:34) Etiopia tauna ena daradara be hoa gauna lasi, badina be Isaia ena peroveta herevana lalonai ia gwauraia “mamoe” eiava “hesiai tauna” edia anina nega daudau lalonai ia hedinarai lasi. (Isaia 53:11) Filipo ese Etiopia tauna dekenai “Iesu ena Sivarai Namona ia hadibaia” murinai reana unai ia hedinarai goevagoeva! Nega sisina murinai Etiopia tauna ia gwau: “Oi itaia, ranu be inai. Dahaka ese egu bapatiso ia koua.” Vadaeni maoromaoro Filipo ese ia bapatisoa.—Kara 8:35-38.
Unai bapatiso idia karaia haragaharaga, a? Lasi vaitani! Unai Etiopia tauna be Iuda taudia edia tomadiho dalana ia badinaia tauna.b Unai dainai ia be Iehova ia tomadiho henia tauna, mai ena diba Baibel dekenai bona Mesia perovetalaia herevadia dekenai. To, ia be gau ibounai ia diba lasi. Hari unai Etiopia tauna be Iesu Keriso ena gaukara dekenai diba mai anina bada ia abia neganai, ia lalo-parara Dirava ia ura dahaka do ia karaia bona ia hegeregere ia badinaia totona. Ia bapatiso be maoro.—Mataio 28:18-20; 1 Petero 3:21.
Gabeai, “Lohiabada ena Lauma ese Filipo ia abia lao.” Ia lao gaukara ma ta ia karaia. Etiopia tauna be “ena dala dekenai ia lao, mai moale danu.”—Kara 8:39, 40.
Ita Dibaia Gauna
Ita be Iehova ena hesiai taudia dainai, iseda gaukara be kudou-namo momokani taudia do ita durudia Dirava ena Hereva momokani idia dibaia totona. Momo be idia loaloa neganai eiava nega bona gabu idauidau ma haida dekenai sivarai namona be haida dekenai idia harorolaia neganai, anina namona idia davaria. Unai Basileia harorolaia gaukarana dainai, lagani ta ta lalonai taunimanima tausen momo ese edia gwauhamata Iehova dekenai be bapatiso amo idia hahedinaraia.
To momokani, namona be kamonai matamata taudia ita doridia haraga lasi idia bapatiso totona. Namona be idia ese Iehova Dirava bona iena Natuna, Iesu Keriso idia dibaia namonamo guna. (Ioane 17:3) Bena namona be idia helalo-kerehai, edia kara dika idia rakatania bona idia giroa Dirava ena taravatu hegeregerena ai do idia noho. (Kara 3:19) Unai karaia totona nega daudau lalonai do idia hekwarahi, bema lalohadai bona kara kereredia idia manadalaia neganai. Ena be kamonai matamata taudia ese Keristani hahediba taudia ai do idia lao ena maduna idia laloa namonamo be gau badana, to gwauhamata amo Iehova Dirava idia tura henia karana ese hahenamo badadia do ia havaraia. (Luka 9:23; 14:25-33 itaia.) Iehova ena Witness taudia be mai edia ura ibounai ida kamonai matamata taudia idia hakaudia lao, Dirava ese ena ura hagugurua totona ia gaukaralaia oreana dekenai. (Mataio 24:45-47) Etiopia tauna bamona, unai taudia do idia moale Dirava ena ura idia dekenai be dahaka idia dibaia bena unai hegeregerena idia karaia neganai.
[Footnotes]
a “Kanedake” be lada korikorina ta lasi to ia be Etiopia ena kwini ta ta ese idia gaukaralaia dagi ena ladana (hegeregere “Farao” bona “Kaisara”).
b Iuda ena tomadiho idia badinaia taudia be Israela taudia lasi to sibodia idia ura Mose ena Taravatu idia badinaia.—Levitiko 24:22.
[Box on page 8]
Dahaka Dainai Idia Gwauraia Eunuko Tauna?
Kara karoa 8 ibounai lalonai, Etiopia tauna be idia gwauraia “eunuko tauna.” To, Mose ena Taravatu ese edia abona idia kokia o edia usina idia utua taudia ia taravatua kongregesen lalonai do idia vareai lasi dainai, unai tau be tauanina dalanai eunuko tauna ta lasi. (Deuteronomi 23:1) Greek gado ai “eunuko” gwauraia herevana ena anina ma ta be dagi bada tauna. Unai hegeregerena, unai Etiopia tauna be dagi bada tauna Etiopia ena kwini henunai.