Dibura Taudia Dekenai Lauma Dalanai Ura Kwalimu Idia Mailaia

“UMUI ai naria noho.” “Idia hanaia hanuaboi haida lalonai, do umui mai lau nihilaia.” “Tanikiu bada tau ta umui abia hidi ai ia vadivadi henia hanaihanai totona.” “Iehova bona ena orea amo ai abia hahenamo ta ta dainai bona nega maorona ai lauma aniani ai abia dainai, emai tanikiu ai ura gwauraia.”

Unai tanikiu herevadia edia badina be dahaka? Unai be Mexico ena dibura idauidau lalonai idia noho dibura taudia edia hereva haida. Idia ese Iehova ena Witness taudia edia heduru idia laloa bada, unai heduru dainai ena be dibura lalonai idia noho, to lauma dalanai idia ese ura kwalimu idia abia. Mexico dekenai, Iehova ena Witness taudia ese dibura 42 dekenai idia noho taudia be hanaihanai lauma dalanai idia durua. Unai gabudia idia gwauraia Centro Readaptación Social (Social Rehabilitation Center). Unai dibura haida dekenai, Keristani heboudia be hanaihanai idia karaia bona anina namona idia havaraia. Hegeregere, vanegai sibona idia duahia neganai, unai gabudia ai taunimanima 380 idia lao hebou dekenai. Unai neganai, Baibel stadi edia averes be 350. Taunimanima 37 idia hegeregere haroro gaukara idia hamatamaia totona, bona 32 ese Iehova dekenai edia mauri idia gwauhamatalaia, bona bapatiso amo unai idia hahedinaraia.

Gaukara Idia Karaia Dalana

Unai gabudia ai, Iehova ena Witness taudia ese edena bamona edia haroro gaukarana idia karaia? Dibura dekenai vareai totona gwaumaoro pepana be siahu taudia amo idia noia guna, bona edia vadivadi edia badina idia hahedinaraia​—Dibura taudia idia hadibaia edia mauri idia hanamoa totona bona Dirava ia abia dae dalanai ia idia hesiai henia totona.

Nega ta ta ibounai siahu taudia ese edia gwaumaoro idia henia. Dibura taudia dekenai Baibel idia hadibaia karana be opesa taudia ese idia laloa bada. Dibura ena siahu taudia idia itaia Iehova ena Witness taudia ese unai gabu edia sekuriti taravatudia idia badinaia. Idia ese gwaumaoro idia henia unai vadivadi haroro taudia be opesi, aniani daiutudia, bona gaukara daiutudia dekenai edia hebou idia karaia. Gabu ta dekenai gwaumaoro idia henia Witness taudia ese Kingdom Hall maragina idia haginia totona, saut ist Mexico ai ia gaukara loaloa naria tauna ia gwauraia ekspiriens ese ia hahedinaraia hegeregerena.

“Lagani 1991 matamana kahanai Tehuantepec ena dibura, Oaxaca dekenai, ai vadivadi matamaia, unuseniai lauma dalanai idia hitolo mase. Baibel stadi 27 ai hamatamaia haraga. Dibura taudia idia ura bada dainai, sediual ai karaia kongregesen hebou ima abia totona. Unai dibura taudia ta, Iehova ia lalokau henia bada tauna, ia ura dibura gabuna lalonai Kingdom Hall maragina do ia haginia, hebou do idia karaia totona. Dibura ena biaguna dekenai ia lao bona gwaumaoro ia noia, bona siahu taudia ese gwaumaoro idia henia. December 1992 ena matamana kahanai, dibura taudia 6 be idia hegeregere sivarai namona harorolaia pablisa taudia ai idia lao. Lauma dalanai idia tubu dainai, tadikaka idia hegaegae dibura lalonai Memorial do idia karaia. Dibura ena biaguna ai noia Memorial gaudia​—uaina bona paraoa​—do ai mailaia totona, bona hora hani ai herevahereva murinai, gwaumaoro ai abia.

“April 3, 1993 ai (dina toi Memorial vairanai), dibura taudia haida idia ruhaia. Idia ta be ia pablisa vadaeni, bona ena ruhaia pepana ia abia neganai, ia ura dibura biaguna ida ia herevahereva, ia ura gwaumaoro ia abia do ia noho ela bona Memorial ai karaia murinai. Dibura biaguna ese unai ia hoalaia bada, badina unai bamona noinoi be nega momo ia kamonai lasi, to dibura tauna ia ura bada Memorial be dibura lalonai do ia karaia dainai, gwaumaoro ia henia. Taunimanima 53 be Memorial dekenai idia mai, bona program ia ore murinai mai moale ida idia taitai. Ai ura unai grup ai gwauraia ‘Freedom Cereso,’ badina lauma dalanai idia be mai edia ura kwalimu vadaeni.”

Unai gabudia ai Iehova ena Witness taudia edia gaukara idia laloa bada. Unai dibura ta lalonai, naria tauna ese dibura taudia ia hagoadaia Iehova ena Witness taudia edia hebou dekenai idia lao totona, ia gwau ia be ‘heduru’ namona dibura taudia be taunimanima namodia ai idia lao haraga.

Anina Ia Havaraia Haidaua Program

Iehova ena Witness taudia edia gaukara ese dibura taudia momo ia haidaua vaitani. Ena be nega momo, dibura dekenai idia noho taudia be dibura idia rakatania murinai kara dika idia karaia lou, to Dirava ena Hereva idia abia dae momokani taudia ese edia mauri idia haidaua vaitani. Edia mauri idia idau dainai aposetolo Paulo ena hereva ita laloatao, ia gwau: “Heudahanai taudia, . . . henaoa taudia, mataganigani taudia, kekero taudia, edia hereva dekenai haida idia hadikaia taudia, o haida edia gau idia dadia taudia. Inai bamona taudia ta lasi be Dirava ena Basileia do ia davaria diba. Umui haida be guna unai bamona umui karaia. To Dirava ese umui emui kara dika ia huria goeva vadaeni, ia ese helaga taudia umui ia halaoa vadaeni. Bona hari Dirava ena vairana dekenai umui be maoromaoro, Lohiabada Iesu Keriso dainai, bona Dirava ena Lauma dainai.”—1 Korinto 6:9-11.

Edia lalona mamina idia herevalaia ese ia hedinarai edia kara idia haidaua momokani. Campeche dibura, Campeche City dekenai ia noho tauna, Miguel, be inai bamona ia gwau: “Mai moale ida hari lau gwau diba lau danu be 2 Petero 3:​13 bona Mataio 5:⁠5 lalonai edia helaro idia gwauraia mamoe idaudia ta.” Campeche dibura, Koben dekenai, ia noho tauna, José, ia gwau: “Ena be lau be dibura tauna bona reana egu kara dika be idia bada herea, to lau lalo-parara Iehova ena hebogahisi be bada bona ia ese egu guriguri bona noinoi ia kamonai. Ia ese egu kara dika ia gwauatao diba bona dala ia kehoa egu mauri orena be Dirava ena Basileia harorolaia totona do lau gaukaralaia diba. Emai elda taudia ai tanikiu henia, badina nega idia atoa dibura dekenai ai idia vadivadi henia, Dirava ena Basileia gwauhamatana amo namo do ai abia totona. Unai be hahenamo namodia! Ia maoro bema lau gwau lau be dibura tauna ta, a? Lasi, Iehova ese anina bada gauna, lauma dalanai ura kwalimu lau ia henia.”

Dahaka ese ala-ala taudia, hahine hadikaia taudia, ruma araia taudia, henaohenao taudia, bona ma haida ia senisidia bona mauri namona idia noholaia Keristani taudia ai ia halaodia? Unai tatau edia hereva hegeregerena, ia be Dirava ena Hereva ena siahu bona edia tomadiho idia laloa bada taudia edia hebamo. Mazatlán dibura, Sinaloa dekenai ia noho tauna, Tiburcio, ena haheitalai ese unai haidaua program ena anina ia hahedinaraia. Ia be Concordia ena dibura, Sinaloa ai ia noho bona ena badu haraga karana dainai hekwakwanai ia davaria. Ena adavana be Iehova ena Witness ta, bona dibura ia vadivadi henia neganai danu ia kara dika henia. Adavana ia haheauka bona ia vadivadi henia loulou, unai dainai Tiburcio ese ia noia Mauri Hanaihanai Tanobada Dekenai bukana do ia mailaia, bona unai buka be ia sibona ia stadilaia matamaia.a Bena ia noia ta do ia mai dibura dekenai ia stadi henia totona. Lauma dalanai ia goada ia lao, bona ena turana karana ma haida ida be ia namo ia lao. Ia idia siaia lao Mazatlán ena dibura dekenai, unuseniai Baibel idia stadilaia taudia edia grup ia noho, bona hari ia be pablisa ta. Ia gwau: “Hari, egu adavana bona natudia ida bona lauegu dibura turadia ida, lau moale bada inai gabu dekenai Baibel ena hereva momokani lau kamonai dainai, egu helaro be nega sisina murinai lau do idia ruhaia bona hebouhebou badadia bona kongregesen heboudia dekenai do lau lao diba.”

Conrado danu be iena mauri ia haidaua dainai ia moale bada. Ena headava lalonai hekwakwanai badadia idia vara dainai ena adavana ese ia rakatania. Unai dainai drag dikadia amo heduru ia tahua. Nega ia lao murinai drag hoihoilaia tauna ai ia lao. Mariuana bona kokein ia hoihoilaia dainai, pulisi ese idia abia bona hahemaoro herevana dainai dibura dekenai idia atoa. Dibura dekenai grup ta ese Iehova ena Witness taudia ida Baibel idia stadilaia, bona ia idia boiria idia ida do ia stadi totona. Iena lalona ena mamina be inai bamona ia gwauraia: “Hebou idia karaia dalana namona, buka idauidau amo Baibel tahua karana, bona idia herevalaia gaudia ibounai be Baibel amo karana, lau hoalaia bada. Maoromaoro Baibel stadi lau noia bona hebou lau lao henia matamaia.” Unai be January 1993 ai ia vara. Hari Conrado be dibura ia rakatania vadaeni bona Keristani kongregesen lalonai lauma dalanai ia tubu noho.

Islas Marías

Mexico dekenai be mai gari bada dibura ta ia noho, ia be motumotu hani bona unai idia gwauraia Islas Marías. Dibura taudia be unai dibura motumotuna ai idia loaloa diba. Haida be mai edia adavadia bona natudia ida unuseniai idia noho.

Kongregesen maragina idia haginia vadaeni. Mazatlán amo tadikaka toi be hua ta ta ai nega tamona idia lao, hebou karana idia durua, buka bona magasin idia abia lao, bona grup taudia idia hagoadaia. Nega haida sekit naria tauna ia lao idia ia vadivadi henia totona. Hebou dekenai idia mai taudia edia averes be 20 ia lao 25. Unuseniai bapatiso taudia hani bona bapatiso lasi pablisa rua idia noho. Sekit naria tauna ia gwau “haida be kilomita 17 idia raka Sunday ai hebou dekenai idia mai totona bona hebou idia rakatania haraga, noho gabuna ai edia ladana idia boiria neganai do idia noho totona. Ena be idia raka haraga, to hora rua murinai idia ginidae.” Vanegai sibona, unai dibura dekenai hereva momokani ia abia tadikaka ta ia gwau: “Guna lau ura dibura do lau rakatania haraga, to hari lau laloa unai be Iehova ena ura hegeregerena do ia vara be namo, badina lau be mai egu gaukara badana iniseniai.”

Ai moale bada badina ai itaia hereva momokani ena siahu ese Iehova hanamoa dalana idia tahua kudou momokani taudia ia ruhaia. Dibura lalonai hereva momokani idia diba taudia 12 bona ma haida be dibura idia rakatania vadaeni, bapatiso idia abia bona Dirava ena hesiai taudia edia mauri namona idia noholaia, idia haida be kongregesen elda taudia ai idia lao danu. Baibel ena siahu, kudouna bona taunimanima ia hanamoa siahuna, be dala goadana ai ia hedinarai unai. Edia kara dikadia dainai dibura dekenai idia siaia taudia unai be Dirava ena Hereva ena diari dalana dekenai idia vareai neganai, idia ese ura kwalimu korikorina idia abia, Iesu ese ia gwauhamatalaia gauna, ia gwau: “Hereva momokani be do umui diba, bona hereva momokani ese umui do ia ruhaia.”—Ioane 8:32; Salamo 119:105.

[Footnotes]

[Picture on page 23]

Momo be dibura dekenai Keristani hereva momokanina idia diba dainai namo idia davaria