Idia Noga Noho Taudia Do Idia Moale!
“Kamonai! Lau be henaoa tauna bamona do lau mai. Ia noga noho, bona iena dabua ia dogoatao tauna be namo.”—APOKALUPO 16:15, NW.
IEHOVA ena dina badana be kahirakahira, bona ena anina be tuari do ia vara! Matahanai ta lalonai, aposetolo Ioane ia itaia “lauma dikadia” ese idia havaraia herevadia, edia toana be paroparo bamona, be “tanobada edia king ibounai” o ena lohia taudia ibounai dekenai idia halasia. Dahaka do idia karaia totona? Idia ura “king ibounai be do idia haboua, Siahu Ibounai Diravana ena Dina Badana” ena tuari totona! Ioane be ma ia gwau: “Unai lauma dikadia ese king ibounai idia haboua gabu ta dekenai. Inai gabu ena ladana Heberu gado dekenai be Aramagedono.”—Apokalupo 16:13-16.
2 Kahirakahira, Iehova ese inai tanobada ena gavamani do ia ha-uraia Babulonia Badana, tanobada ena tomadiho orea koikoidia ibounai, do idia hadikaia totona. (Apokalupo 17:1-5, 15-17) Magoga tano tauna Goga, Satani Diabolo unai, hari tanobada ai idia negea vadaeni tauna, ese ena demoni oreana do ia hakaua Iehova ena maino taudia, toana be tuari koua dalana idia diba lasi taudia unai, do idia tuari henia totona. (Esekiela 38:1-12) To Dirava ese kara ta do ia karaia, ena taunimanima do ia hamauria. Unai be ‘Iehova ena dina badana, taunimanima ibounai do idia gari bada herea dinana’ hamatamaia negana.—Ioela 2:31; Esekiela 38:18-20.
3 Oibe, Iehova ese ena taunimanima do ia hamauria bona Satani ena nega oromana ena kahana oredia ibounai do ia hadikaia ore Har–Magedon, o Aramagedono lalonai. Esekiela 38:21-23 ena peroveta herevadia oi duahia, bona idia vara gaudia oi laloa. Iehova ese ena siahu ia gaukaralaia abata, medu bada herea, aisi bamona medu, lahi, bona dai-hanai goreredia ia havaraia. Goga ena orea taudia idia daradara, bona idia tuari heheni lalonai tanobada ibounai lalonai gari bada herea ia noho. Siahu Ibounai Diravana inai henia taudia oredia idia do mase lasi taudia, be Iehova ese ena siahu amo do ia haoredia, ena hesiai taudia ia hamauria neganai. Bena “hisihisi bada herea” ia ore neganai, Satani ena nega oromana, Dirava dadaraia oromana, ena kahana ta do ia noho lasi. (Mataio 24:21) Idia mase gwauraia neganai, kara dika taudia do idia diba daika ese idia ia hamasea. Iseda kwalimu Diravana ia gwau: ‘Do idia diba lau be Iehova.’from Esek 38:23 Unai hoa karadia do idia vara iseda nega ai, Iesu ena noho ena nega ai.
Henaoa Tauna Bamona Ia Mai
4 Mai ena hairai Lohiabadana Iesu Keriso ia gwau: “Kamonai! Lau be henaoa tauna bamona umui dekenai do lau mai.” Bema henaoa tauna bamona ia mai, do ia vara haraga, oi gini hegaegae lasi negana, bona taunimanima momo idia mahuta negana ai. Iesu be inai tanobada dikana hadikaia totona henaoa tauna bamona ia mai neganai, idia noga momokani taudia do ia hamauria. Ioane ia hamaoroa: “Ia noga noho, bona iena dabua ia dogoatao tauna be namo, badina be namo lasi kopina kavakava do ia raka lao bona taunimanima ese iena hemarai do idia itaia.” (Apokalupo 16:15, NW) Unai hereva ena anina be dahaka? Bona edena dala ai lauma dalanai ita noga noho diba?
5 Bema gima tauna ta be ena gaukara negana lalonai ia mahuta, ena dabua be vaia do idia kokia lasi. To Iesu be tanobada ai ia noho bona hahelaga taudia bona Levi taudia be Ierusalema ena dubu ai idia gaukara neganai, unai ia vara Ierusalema ena dubu ai. Lagani 1100 B.C.E. murinai, King Davida ese Israela ena hahelaga taudia handred haida bona edia durua Levi taudia tausen momo ia atoa orea ta dekenai, ena kahana be 24. (1 Sivarai 24:1-18) Kahana ta ta ai taunimanima 1,000 bona ma haida idia noho, idia ta ta be edia nega ai dubu hesiai gaukara idia karaia dina 7 lalodiai, bona lagani ta ai nega rua idia karaia. To, Au Raurau Ruma Maragidia Ariana ai, kahana 24 idia gini hegaegae gaukara karaia totona. Pasova Aria negana lalonai durua ma haida idia abia danu.
6 Iesu ia gwau, “Namo lasi kopina kavakava do ia raka lao” neganai, reana ia ese dubu ena gima tauna dekenai idia karaia karana ia gwauraia. Iuda taudia edia Mishnah bukana ia gwau: “Hahelaga taudia be Dubu ena gabu toi dekenai gima gaukara idia karaia: Abtinas ena Daiutu, Lahi Hururu Daiutuna, bona Hasiahua Daiutuna dekenai; bona levi taudia edia gima gabudia be 21: Ima be Dubu Badina ena geiti ima dekenai, hani be lalonai daiguni hani ai, ima be Dubu Ariara ena geiti ima ai, hani be ena murina daiguni ai, bona ta be Boubou Daiutuna ai, bona ta be Hapararaia Dabua Daiutuna ai, bona ta be Hebogahisi Ena Ikouna murinai [Helaga Herea ena murina haba murinai]. Dubu Badina ena ofesa ese sekit ia karaia bona gima tauna dekenai ia lao mai ena lahi tosi ida, bona bema gima tauna ia gini toreisi lasi bona ia gwau lasi, ‘Dubua Badina ena ofesa e, maino oi abia!’ bona ia itaia ia mahuta, do ia dadabaia ena raka auna amo, bona mai ena maoro iena dabua ia kokia bona gabua diba.”—The Mishnah, Middoth (“Measurements”), 1, paragraf 1-2, Herbert Danby ese ia hahanaia.
7 Idia gaukara kahana taudia, idia gima noho Levi bona hahelaga taudia momo herea unai, be hanuaboi ibounai idia noga noho, bona dubu idia gimaia, miro taudia be dubu ena ariara ai idia vareai lasi totona. Badina be “Dubu Badina ena ofesa” o “dubu ena kapten” be hanuaboi ai gima negana lalonai gima gabudia iboudiai 24 dekenai do ia lao dainai, gima taudia ta ta be ena gabu dekenai ia noga noho be gau badana, bema lasi, unai ofesa ese do ia hahoaia.—Kara 4:1.
8 Horoa Keristani taudia bona edia hesiai bamodia be lauma dalanai idia noga noho bona edia lauma dabuadia idia dogoatao be gau badana. Unai amo ia hedinarai Iehova ena lauma dubuna ai hesiai gaukara ita dekenai ia henia. Unai dainai, Dirava ena lauma helaga, o ena gaukara siahuna, ese ita ia durua iseda maduna bona iseda gaukara ita hagugurua iseda Basileia harorolaia gaukarana lalonai. Ita be Dirava ena haroro taudia, to bema lauma dalanai ita mahuta, Iesu, lauma dubuna ena Kapten, ese ita do ia hahoaia. Unai neganai bema lauma dalanai ita mahuta, iseda lauma dabua do ia kokia bona gabua bamona. Unai dainai lauma dalanai edena bamona do ita noga noho?
Ita Noga Noho Dalana
9 Baibel bona Keristani bukadia stadilaia namonamo karana ese lauma dalanai ita do ia hanogaia. Unai bamona stadi karana ese iseda haroro gaukara lalonai bona dika ita davaria neganai ita do ia durua, bona moale hanaihanai dalana do ia hahedinaraia. (Aonega Herevadia 8:34, 35; Iamesi 1:5-8) Namona be ita stadi namonamo bona ita stadi loulou. (Heberu 5:14–6:3) Aniani namona ania loulou ese ita ia durua ita noga bona gima noho totona. Unai ese hesiku, aniani namona ania lasi karana ese ia havaraia mamina, ia koua diba. Lauma dalanai ita dabu bona ita mahuta be mai badina lasi, badina be Dirava ese lauma aniani bada herea ia henia ena horoa “hesiai tauna mai ena kamonai, bona mai ena kara maoromaoro” amo. (Mataio 24:45-47) Lauma aniani ania loulou, sibona emu stadi bona ruma bese stadi amo, be noga noho bona ‘abidadama maoromaoro’ dalana ta.—Tito 1:13.
10 Keristani heboudia, sekit bona dina tamona hebouhebou, bona distrik hebouhebou ese ita idia durua lauma dalanai ita noga noho totona. Idia be dala namodia ita hagoadaia heheni bona ita durua heheni “lalokau dekena amo kara namodia” ita karaia totona. “Lohiabada ena Dina be kahirakahira do ia ginidae” dainai, ita hebou hanaihanai be gau badana. Unai dina ia kahirakahira momokani. Unai be ‘Iehova ena Dina,’ ena lohia siahuna do ia hamomokania negana. Bema unai dina be gau badana ita dekenai—bona namona be ita laloa bada—vadaeni, ‘guriguri hebou kara do ita hadokoa lasi.’—Heberu 10:24, 25; 2 Petero 3:10.
11 Mai emu kudouna ibounai ida Keristani haroro gaukara karaia be gau badana, lauma dalanai ita noga noho totona. Sivarai namona ita harorolaia loulou bona mai goada ida ita karaia ese ita ia hanogaia noho. Iseda hesiai gaukara ese dala momo ia kehoa taunimanima dekenai Dirava ena Hereva, ena Basileia, bona ena ura herevalaia totona. Ita moale bada ruma-ta-ruma-ta gaukara ita karaia, lou-henia ita karaia, bona Baibel stadi, hegeregere Diba ese Mauri Dekenai Ita Ia Hakaua Lao bukana amo, ita karaia neganai. Idaunegai Efeso dekenai idia noho elda taudia idia gwau diba Paulo ese edia ‘ruma dekenai, bona taunimanima edia vairana dekenai’ idia ia hadibaia. (Kara 20:20, 21) To momokani, abidadama Iehova ena Witness taudia haida idia gorere bada herea bona unai ese edia haroro gaukara ia koua sisina, to dala idia tahua Iehova bona ena king dagina ena maoro idia herevalaia totona bona unai kara amo moale bada herea idia davaria.—Salamo 145:10-14.
12 Inuinu o aniani momo karana dadaraia ese ita do ia durua lauma dalanai ita noga noho. Iesu ese ena noho ia herevalaia neganai, ena aposetolo taudia ia hagoadaia, ia gwau: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina, vadaeni Lohiabada ena Dina do ia mai haraga, umui hegaegae lasi garina. Badina be unai Dina be tanobada latanai idia noho taunimanima ibounai dekenai do ia ginidae.” (Luka 21:7, 34, 35) Aniani momo ania bona inuinu kekero karana be Baibel ena hakaua herevadia hegeregerena lasi. (Deuteronomi 21:18-21) Aonega Herevadia 23:20, 21 ia gwau: “Kekero muramura momo idia inua taudia, danu do oi inua hebou lasi, bona aniani idia ania momo taudia, danu do oi noho lasi.”—Aonega Herevadia 28:7.
13 Ena be tau ta ena aniani momo bona inuinu karadia idia do bada herea lasi, to idia dainai ia hesiku diba, reana ia lahedo bona Dirava ena ura ia karaia namonamo lasi. Momokani, ruma bese dainai, ita gorere dainai, eiava gau ma haida dainai do ita lalo-hekwarahi. To do ita moale bema Basileia ita atoa guna iseda mauri lalonai bona ita diba iseda guba Tamana ese ita do ia durua. (Mataio 6:25-34) Bema unai ita karaia lasi, “unai Dina” do ia mai tarapu ta bamona, reana unai tarapu do ita itaia lasi dainai ia lalonai ita moru, eiava tarapu mai ena guma, ita ura gauna be ia lalonai, unai bamona tarapu be idia diba lasi animal idia veria mai bena idia dogoatao. Unai do ia vara lasi bema ita noga noho, bona ita lalo-parara momokani “dokona negana” ai ita noho.—Daniela 12:4.
14 Mai momokani ida guriguri karana be ma durua gauna ta, lauma dalanai ita noga noho totona. Iesu ena peroveta herevana badana ai, ma ia gwau: “Unai dainai, do umui naria, bona nega ibounai do umui guriguri, vadaeni inai dika ibounai dekena amo do umui heau mauri, vadaeni Taunimanima ena Natuna ena vairana dekenai do umui gini.” (Luka 21:36) Oibe, namona be iseda guriguri be Iehova ena kahana ai ita gini hanaihanai bona Iesu, taunimanima ena Natuna, be inai tanobada dikana hadikaia totona ia mai neganai, ia vairanai ita gini diba mai maoro ida. Iseda namo totona bona iseda tadikaka edia namo totona, namona be ita ‘guriguri goada, ita hesiku lasi.’—Kolose 4:2; Efeso 6:18-20.
Nega Ia Ore Gwauraia
15 Iehova ena dina badana ita naria noho lalonai, ita ura mai iseda goada ibounai ida ena hesiai gaukara ita karaia. Bema mai momokani ida ia dekenai unai ita gurigurilaia, reana gaukara badana ena “iduara badana” do ia kehoa ita totona. (1 Korinto 16:8, 9) Dirava ia abia hidi vadaeni negana ai, Iesu ese taunimanima do ia hahemaoro henia, bona kara maoromaoro taudia, mauri hanaihanai do idia abia “mamoe” taudia, be Dirava idia dadaraia taudia, mase hanaihanai do idia abia “nanigosi” taudia, edia amo do ia hapararaia. (Ioane 5:22) Ita be mamoe taudia bona nanigosi taudia hapararaia gaukarana karaia taudia lasi. To hari iseda kara maoromaoro harorolaia gaukarana ese taunimanima ia durua Dirava hesiai henia maurina idia abia hidi totona bona unai amo edia helaro be hapararaia neganai, Iesu be “mai ena hairai danu do ia mai” neganai, mauri do idia abia. Inai tanobada ena oromana ena dokona be kahirakahira dainai, “mauri hanaihanai idia ura kudou-maoro taudia” tahua gaukara ita karaia haraga mai eda lalonai ibounai ida be mai anina.—Mataio 25:31-46; Kara 13:48, NW.
16 Noa ena nega ai ia noho tanobadana ena nega ia ore, bona karaharaga hari tanobada ena oromana ena nega do ia ore danu. Unai dainai namona be Basileia ita harorolaia goadagoada. Iseda haroro gaukara ese namo ia havaraia, badina be lagani ta ta ai taunimanima handred tausen momo be edia mauri idia gwauhamatalaia Dirava dekenai bona bapatiso amo unai idia hahedinaraia. Iehova ia hanamoa oreana taudia ai idia lao—‘iena bese taudia, iena mamoe, ia ubua gaudia.’ (Salamo 100:3) Basileia harorolaia gaukarana ese taunimanima momo dekenai helaro ia henia ‘Iehova ena dina badana, taunimanima ibounai do idia gari bada herea dinana,’ ia do ginidae lasi neganai, bona unai gaukara ita karaia neganai, unai ese ita ia hamoalea bada!
17 Noa bamona, Dirava ese ita ia durua bona gimaia. Oibe, taunimanima, tanobada tauanina idia karaia anerudia, bona Nefilim taudia be Noa ena sivarai idia kirikirilaia, to unai ese Noa ia koua lasi. Hari iseda nega ai, ita hahedinaraia idia vara gaudia amo ita be “nega ena dokona dekenai” ita noho neganai, haida ese unai idia kirikirilaia danu. (2 Timoteo 3:1-5) Unai bamona kara ese Baibel ena peroveta hereva Keriso ena noho ena toana dekenai ia hagugurua, badina Petero ia gwau: “Nega dokona dekenai, tauanina ena ura sibona idia karaia taudia be do idia hedinarai. Dirava badinaia kara do idia kirikirilaia. Vadaeni, umui dekenai do idia gwau, ‘Iesu ia gwauhamata, do ia giroa mai, a? Edeseni ia noho? Do ia mai lasi. Badina be iseda tubuna idia mase vadaeni, to tanobada ia karaia negana ia mai bona harihari gau ta be idau lasi.’ ”—2 Petero 1:16; 3:3, 4.
18 Hari idia hevaseha taudia be reana idia laloa: ‘Matamanai ema bona hari gau ta be idau lasi. Iseda mauri ia heau noho, taunimanima idia aniani, inuinu, idia headava, bona ruma bese idia havaraia. Ena be Iesu ia noho, to egu nega lalonai kota henia do ia karaia lasi.’ Edia hereva be maoro lasi! Bema badina ma ta dainai do idia mase lasi, Iehova ena gari havaraia dinana ese idia bona edia nega ai idia noho taudia do ia hadikaia, Noa ena nega ai Abata badana ese ena uru taudia idia hamasea ore bamona.—Mataio 24:34.
Namona be Ita Noga Noho!
19 Bema iseda mauri ita gwauhamatalaia vadaeni Iehova dekenai, namona be lalohadai kereredia ese ita idia hamahutaia bamona lasi. Hari be noga noho negana, Dirava ena peroveta herevadia ita abidadama henia negana, bona ‘bese ibounai be diba tahua taudia do ita halaoa’ gaukarana ena nega. (Mataio 28:19, 20) Inai tanobada ena nega dokona momokanina ia mai kahirakahira lalonai, Iesu Keriso ena gunalaia karana henunai Iehova Dirava ita hesiai henia bona “Basileia ena Sivarai Namona be tanobada ibounai dekenai” ita harorolaia bena dokona ia mai be hahenamo hereadaena.—Mataio 24:14; Mareko 13:10.
20 Iehova ena taunimanima haida be ia idia hesiai henia lagani momo lalodiai, reana edia mauri ibounai. Bona ena be ita be lagani haida sibona hereva momokani ita abia dae, to namona be ita be Israela tauna, Kaleba, bamona, ia be “Lohiabada ia abidadama henia mai ena kudouna ibounai danu.” (Deuteronomi 1:34-36) Israela taudia be Aigupito amo Dirava ese ia hamauria murinai, ia bona Iosua idia gini hegaegae Gwauhamata Tanona ai idia vareai totona. To Israela tatau bona hahine momo be abidadama lasi bona lagani 40 lalonai tano kaukauna dekenai idia loaloa bona unuseniai idia mase. Kaleba bona Iosua be idia ida unai mauri aukana idia abia danu bona idia haheaukalaia unai laganidia ibounai lalonai, to gabeai unai tau ruaosi be Gwauhamata Tanona ai idia vareai. (Numera 14:30-34; Iosua 14:6-15) Bema ‘Iehova ita abidadama henia mai eda kudouna ibounai danu’ bona lauma dalanai ita noga noho, Dirava ia gwauhamatalaia tanobada matamatana ai do ita vareai mai moale ida.
21 Hari idia vara gaudia idia hedinarai goevagoeva nega dokona ai ita mauri noho bona Iehova ena dina badana be kahirakahira. Hari inai nega be mahuta bamona bona Dirava ena ura laloaboio negana lasi. Hahenamo do ita abia bema lauma dalanai ita noga noho bona iseda lauma dabuadia, Keristani haroro taudia bona hesiai taudia edia toana, ita dogoatao noho. Namona be ita ura ita ‘naria namonamo, abidadama dekenai ita gini goada, metau ibounai lalonai do ita haheauka, do ita goada.’ (1 Korinto 16:13) Ita be Iehova ena hesiai taudia dainai, namona be ita ta ta ita marere lasi bona ita gari lasi. Unai amo Iehova ena dina badana ia mai neganai idia gini hegaegae taudia huanai do ita noho, bona mai abidadama ida idia moale bona idia noga noho taudia ida ita gaukara noho!
Edena Bamona Do Oi Haere?
◻ Iseda lauma dabuadia be edena bamona oi gwauraia, bona edena bmona ita dogoatao noho diba?
◻ Lauma dalanai ita noga noho daladia haida mani oi gwauraia?
◻ Dahaka dainai ita diba haida be iseda sivarai do idia kirikirilaia, bona edena bamona do ita laloa?
◻ Hari ita karaia hahediba taudia halaoa gaukarana be edena bamona ita laloa inai dina dokodia ai?
[Study Questions]
1. Iehova ena dina be kahirakahira dainai, dahaka ita diba do ia vara?
2. Magoga tano tauna Goga be daika, bona dahaka do ia vara Iehova ena taunimanima ia dagedage henia neganai?
3. Esekiela 38:21-23 ese ia perovetalaia gaudia be edena bamona oi herevalaia diba?
4. Iesu be edena dala amo do ia mai inai tanobada dikana hadikaia ore totona?
5. Iesu be tanobada ai ia noho neganai, dubu ena gaukara dalana be edena bamona?
6. Iesu ia gwau, “Namo lasi kopina kavakava do ia raka lao” neganai, reana ia be dahaka ia gwauraia?
7. Dahaka dainai hahelaga taudia bona Levi taudia be gima gaukarana dubu ai idia karaia neganai idia noga be gau badana?
8. Keristani tauna ena lauma dabuadia be dahaka?
9. Dahaka dainai Baibel bona Keristani bukadia stadilaia karana be mai anina bada?
10. Edena dala ai Keristani heboudia, sekit bona dina tamona hebouheboudia, bona distrik hebouheboudia ese ita idia durua lauma dalanai ita noga noho totona?
11. Dahaka dainai ita gwau diba Keristani haroro gaukarana be gau badana lauma dalanai ita noga noho totona?
12, 13. Dahaka dainai ita aniani bada lasi bona ita inuinu bada lasi be namo?
14. Dahaka dainai mai momokani ida ita guriguri be namo?
15. Kara maoromaoro ita harorolaia gaukarana ese dahaka anina namona ia havaraia?
16. Dahaka dainai Basileia ita harorolaia goadagoada be namo?
17, 18. (a) Ita haroro neganai, ita diba haida be dahaka do idia karaia? (b) Dahaka do ia vara unai sivarai idia kirikirilaia taudia dekenai?
19. Ita ese iseda hahediba taudia halaoa gaukarana be edena bamona ita laloa?
20. Kaleba bona Iosua edia haheitalai be dahaka, bona idia badinaia dalana ese dahaka ia hahedinaraia ita dekenai?
21. Bema lauma dalanai ita noga noho, dahaka do ia vara ita dekenai?
[Picture on page 15]
Oi ura momokani lauma dalanai oi noga noho bona emu dabua oi dogoatao noho, a?
[Blurb on page 16]
Keristani taudia be Dirava ena lauma helaga ese ia durudia idia noga noho bona edia gaukara idia karaia noho totona