“Dirava Ena Hereva Abidadama Henia” Distrik Hebouhebouna Dekenai Oi Mai!
TANOBADA hegegemadai, taunimanima milioni momo be gabu handred momo ai do idia hebou. South Pacific dekenai, hebouhebou 54 do idia karaia. Ginigunana be July 18-20 bona ginigabena be December 26-28 do idia karaia. Reana unai dina toi hebouhebouna ta—Friday ia lao Sunday hebouhebouna—be oiemu ruma kahirakahira ia noho hanuana ai do idia karaia.
Baibel ena hadibaia herevadia momo amo namo do oi abia. Hebouhebou momo edia program be daba 9:30 ai miusiki amo do idia hamatamaia. Friday dabai, miniti 25 lalonai, Dirava ena Hereva idia abidadama henia dainai edia mauri ia hanamoa bada tadikakadia do idia henanadai henia. Unai kahana ginigunana be inai hereva badana amo do idia haorea, “Matana amo Lasi, to Abidadama amo Ita Raka.”
Friday adorahi ena hereva ginigunana ese memero kekeni edia mai anina gaukarana Keristani kongregesen lalonai do ia herevalaia. Unai murinai, kahana toi herevana ese Baibel ena taravatu Keristani kara, hereva, bona toana dekenai do idia herevalaidia. Bena inai hereva, “Naria Namonamo Abidadama be Lasi Garina” bona “Dirava Ena Hereva Ia Mauri Noho” amo Heberu karoa 3 bona 4 edia sisiba namona do idia herevalaia. Friday ena program ena hereva dokona be “Buka ta, Taunimanima Iboudiai Edia.”
Saturday daba ena hereva ginigunana be “Abidadama mai Ena Kara Lasi be Mase Gauna.” Daba ena hereva badana ma ta, “Hereva Momokani Lalonai Oi Gini Auka Bona Marere Lasi,” ese do ia hahedinaraia edena bamona lauma dalanai ita tubu daekau diba. Daba ena hereva ginigabena be hebouhebou dekenai hanaihanai ita abia kahana ta, “Dirava Ena Hereva Abidadama Henia ese Ita Ia Hakaua Lao Bapatiso Dekenai,” bena hahediba taudia matamatadia do idia bapatiso.
Saturday adorahi ena hereva ginigunana, “Emui Abidadama Lalonai Do Umui Gini Goada Noho,” ese Baibel buka Iuda ena sisiba do ia herevalaia. Hora ta lalonai, kahana toi herevana ladana, “Iehova Ena Ruma Dekenai Do Ita Lao,” ese Keristani hebou edia namo do ia herevalaia. Adorahi ena hereva dokona be “Oiemu Abidadama—Hari Ena Goada Idia Tohoa.”
Sunday daba ena program lalonai kahana toi herevana amo Ioela bukana bona ena anina hari iseda nega ai do idia herevalaia. Bena unai murinai Baibel drama do ita itaia, ena ladana be “Emu Matana Do Ia Namo.” Hebouhebou ena hereva badana ta be adorahi ena pablik tok, “Abidadama Bona Oiemu Vaira Negana.”
Bema inai hebouhebou oi lao henia, lauma dalanai oi do idia hagoadaia momokani. Hebou ena nega ibounai lalonai mai moale ida oi do idia abia dae. Namona be hari oi hegaegae, oi lao totona. Oi kahirakahira do idia karaia hebouhebou ena gabu davaria totona, emu gabu dekenai ia noho Iehova ena Witness taudia edia Kingdom Hall dekenai oi lao, eiava inai magasin halasia taudia dekenai revareva oi torea. Papua New Guinea, New Zealand, Australia, bona Solomon Islands dekenai idia karaia hebouhebou edia gabu do oi davaria August 22 ena Awake! magasin lalonai.