Ita Gini Siri, Tanobada Hegegemadai Ia Do Ita Hanamoa mai Eda Moale ida Totona
‘Iehova do umui hanamoa. Iehova ena hesiai taudia e, Iehova ena ladana do umui hanamoa.’—SALAMO 113:1.
1, 2. (a) Salamo 113:1-3 hegeregerena, daika sibona ia hegeregere iseda hanamoa hereva abia totona? (b) Edena henanadai ita gwauraia be namo?
IEHOVA DIRAVA be guba bona tanobada edia Havaraia Tauna Badana bona noho hanaihanai Pavapavana. Ia sibona mo be hegeregere iseda hanamoa hereva abia totona. Unai dainai Salamo 113:1-3 ena hahegani be inai: ‘Iehova do umui hanamoa. Iehova ena hesiai taudia e, Iehova ena ladana do umui hanamoa. Iehova ena ladana do ita hanamoa noho, hari ela bona hanaihanai. Dina daekau kahana ela bona dina diho kahana dekenai, Iehova ena ladana do ita hanamoa be namo.’
2 Ita be Dirava ena Witness taudia dainai, unai bamona ita karaia mai eda moale bada ida. Ita moalelaia gauna be, kahirakahira Iehova Dirava ese hari ita abia hanamoa anena mai moalena ese tanobada ibounai do ia hahonua! (Salamo 22:27) Unai tanobada ibounai ane abia oreana lalonai oiemu gadona idia kamonai, a? Bema emu gadona idia kamonai, oi moale diba badina inai lalo-tamona lasi, moale lasi tanobadana amo oi gini siri!
3. (a) Dahaka kara dainai Iehova ena taunimanima be idia idau? (b) Edena dala ai tanobada amo ita noho siri?
3 Iehova ita hanamoa mai eda lalo-tamona ida dainai ita idau. Mai iseda lalo-tamona ida Iehova ena “kara namodia” ita herevalaia, ita hadibaia, bona ita harorolaia daladia be tamona. (Salamo 145:7) Oibe, Iehova Dirava ita gwauhamata henia vadaeni dainai, ia ese ita ia abia hidi, iena hesiai do ita lao henia totona. Dirava ese ia idia gwauhamata henia idaunegai taudia, Israela, ia hamaoroa namona be dekena besedia amo do idia noho siri bona unai bese edia kara ese do idia hamirodia lasi. (Esodo 34:12-16) Ia ese iena bese taudia dekenai taravatu ia henia, unai amo ia durudia unai bamona do idia karaia totona. Hari inai negai danu, Iehova ese ena Hereva Helagana, Baibel, be ita ia henia vadaeni. Ena hadibaia herevadia ese ita dekenai inai tanobada amo ita noho siri dalana ia hahedinaraia. (2 Korinto 6:17; 2 Timoteo 3:16, 17) Ita gini siri lasi tomadiho orea rumadia ai ita sibona ita noho totona, Babulonia Badana ena pris bona dubu sisita haida idia noho bamona. Iesu Keriso ena haheitalai ita tohotohoa, taunimanima vairanai Iehova ita hanamoa.
Iehova Ena Hanamoa Tauna Badana Tohotohoa
4. Iehova hanamoa karana dekenai, Iesu ese dala maorona be edena bamona ia hahedinaraia?
4 Iesu be ena Iehova hanamoa gaukara amo ia siri lasi. Bona unai dainai tanobada taudia amo ia idau. Dubu maragidia bona Ierusalema ena dubu helaga ai, Dirava ena ladana helagana ia hanamoa. Taunimanima idia hebou gabudia iboudiai, ororo dorina ai bona kone ai danu, Iesu ese Iehova ena hereva momokanidia ia harorolaia. Ia gwau: “Egu Tamana e, guba bona tanobada edia lohia, lau hanamoa oi.” (Mataio 11:25) Kota totona Iesu be Pontio Pilato vairanai ia gini neganai, ia gwau: “Hereva momokani gwauraia hedinarai totona lau vara, bona lau mai inai tanobada dekenai.” (Ioane 18:37) Iesu ia diba ena gaukara be mai anina bada gauna. Iesu ia lao gabudia ibounai dekenai, Iehova ia gwauraia hedinarai bona ia hanamoa taunimanima vairanai.
5. Salamo 22:22 ese daika ia perovetalaia, bona namona be iseda laloa dalana be edena bamona?
5 Salamo 22:22 ai, Iehova ena Hanamoa Tauna Badana ia perovetalaia herevana ita davaria, ia gwau: “Lauegu bese taudia dekenai, oiemu kara do lau hadibaia. Oiemu ladana be, hebou taudia edia vairanai do lau hanamoa.” Bona Heberu 2:11, 12 ai, aposetolo Paulo ese inai siri ia gaukaralaia Lohiabada Iesu bona Iehova Dirava ese ia horoa, guba hairaina do idia abia taudia dekenai. Iesu bamona, Iehova ena ladana be kongregesen lalonai idia hanamoa mai edia hemarai ida lasi. Hebou ita lao henia neganai, iseda laloa dalana be edia bamona, a? Hebou dekenai haere henia, ane abia, bona hereva hakala henia mai eda ura ida karadia ese Iehova idia hanamoa. To iseda hanamoa mai eda moale ida karana be unuseniai ia ore, a?
6. Iesu ese ena hahediba taudia dekenai edena hahegani ia henia, bona diari ura henia taudia be edena dala ai Dirava idia hanamoa?
6 Mataio 5:14-16 ia gwau, Lohiabada Iesu ese ia murinai idia raka taudia ia hagania, edia diari do idia hahedinaraia, bena unai amo ma haida ese Iehova do idia hanamoa. Ia gwau: “Umui be tanobada taudia ibounai edia diari. . . . Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.” Diari ura henia taudia ese Dirava do idia hanamoa. Taunimanima hebogahisi henia karadia bona herevadia amo do idia karaia, a? Lasi, to mai lalo-tamona ida Iehova hanamoa gaukarana amo do idia karaia. Oibe, diari ura henia taudia edia mauri be Dirava dekenai idia gwauhamata henia bona ia do idia hanamoa mai edia moale ida. Unai bamona kara oi karaia vadaeni, a?
Iehova Hanamoa amo Moale Abia
7. Dahaka dainai Iehova hanamoa taudia idia moale bada, bona Pentekoste dinana 33 C.E. ai dahaka moale idia abia?
7 Badina be dahaka Iehova hanamoa taudia idia moale bada? Badina be moale be Dirava ena lauma helaga ena huahua ta. Galatia 5:22 ai, lalokau murinai moale ia gwauraia. Aposetolo edia nega ai Iesu ena hahediba taudia ese unai lauma huahuana idia hahedinaraia. Pentekoste dinana lagani 33 C.E. ai, Dirava ena lauma helaga be Iesu ena hahediba taudia 120 bamona latanai ia bubua neganai, idia iboudiai be gado idauidau ai Iehova idia hanamoa matamaia. Dirava idia laloa bada Iuda taudia, tano idauidau amo Ierusalema idia mai taudia, be “idia laloa momo bona idia hoa.” Idia gwau: “Edena bamona ita ibounai be ta ta iseda gado korikori dekenai, idia hereva neganai ita kamonai noho? . . . Dirava ena hoa gaudia idia herevalaia ita dekenai, iseda gado korikori dekenai”! (Kara 2:1-11) Gado idauidau ai Iehova idia hanamoa dainai, dahaka ia vara? Iuda taudia bona Iuda ai idia halaoa taudia 3,000 bamona ese Basileia ena sivarai namona, Mesia sivaraina, idia abia dae. Bapatiso idia abia, lauma helaga idia abia, bena idia danu ese Iehova idia hanamoa mai edia moale ida. (Kara 2:37-42) Unai be hahenamo badana ta!
8. Pentekoste dinana murinai, Keristani taudia ese dahaka idia karaia edia moale idia habadaia totona?
8 Unai sivarai be ma ia gwau: “Dina ibounai mai laloa tamona danu Dubu Helaga lalonai idia haboua, bona edia ruma dekenai idia aniani hebou, mai moale bona mai laloa manau danu. Idia ese Dirava idia hanamoa noho, bona taunimanima ibounai be idia dekenai idia moale. Vadaeni dina ibounai, Lohiabada ese mauri ia henia taudia, be abidadama taudia edia orea lalonai ia haboua.” (Kara 2:46, 47) Idia moale bada ena badina tamona be idia hebou bona idia aniani hebou, a? Lasi, idia moale ena badina be dina dina iboudiai Iehova Dirava idia hanamoa. Bona idia itaia taunimanima tausen tausen be edia hahemauri sivaraina idia abia dae neganai, edia moale ia habadaia. Hari inai negai ita danu be unai bamona.
Bese Iboudiai Taudia ese Ia idia Hanamoa
9. (a) Edena negai bona edena dala ai Dirava be bese iboudiai taudia dekenai dala ia kehoa ena sivarai namona idia kamonai henia totona? (b) Dahaka dainai Korenelio bona ena bamodia be idia do bapatiso lasi neganai idia latanai lauma helaga ia diho?
9 Iehova ia ura lasi iena orea taudia ese bese tamona dekenai diari do idia hahedinaraia. Unai dainai lagani 36 C.E. ai, dala ia kehoa, bese iboudiai taudia ese sivarai namona do idia kamonaia diba. Dirava ena hakaua dainai, Petero ia lao Idau Bese tauna ta, tuari biaguna, ena ruma Kaisarea dekenai. Unuseniai Korenelio ia davaria, ia be ena tura korikoridia bona ena varavara ida idia hebou. Petero ena hereva idia kamonaia namonamo lalonai, edia lalona ai Iesu idia abidadama henia. Unai be edena bamona ita diba? Badina be Dirava ena lauma helaga be unai Idau Bese taudia mai edia abidadama latanai ia diho. Vaia taunimanima be bapatiso idia abia murinai Dirava ese ena lauma ia henia, to unai neganai Iehova ese ia hahedinaraia guna unai Iuda lasi taudia ia lalo-namo henia. Bema Iehova ese unai bamona ia karaia lasi, Petero ia diba lasi Dirava dekenai idia be hegeregere Iena hesiai taudia ai idia lao bona ranu lalonai bapatiso do idia abia diba.—Kara 10:34, 35, 47, 48.
10. Idaunega amo, bese iboudiai lalonai taunimanima ese Iehova do idia hanamoa herevana be edena bamona idia perovetalaia?
10 Idaunega amo, Iehova ia peroveta bese iboudiai lalodiai taunimanima ese ia do idia hanamoa. Tanobada hegegemadai ia do idia hanamoa mai edia moale ida. Unai ia hamomokania totona, aposetolo Paulo ese Heberu Revarevadia amo peroveta herevadia ia gwauraia. Ia ese bese idauidau Keristani taudia Roma kongregesen lalonai ia hamaoroa: “Umui ta ta do umui abia dae, Keriso ese umui ia abia dae hegeregerena, taunimanima ese Dirava do idia hanamoa totona. Badina be umui lau hamaoroa, Keriso be Iuda taudia durua bona hanamoa totona ia mai, bona ia mai be Dirava ena hereva momokani do ia hedinaraia totona. Inai anina be, Dirava ese iena gwauhamata Iuda sene taudia dekenai ia hamomokania vadaeni. Bona Iuda lasi bese idauidau taudia ese danu Dirava idia hanamoa diba, iena bogahisihisi dainai, Buka Helaga dekenai ia torea bamona, [Salamo 18:49] ia gwau: ‘Unai dainai Iuda lasi taudia edia huanai oi do lau hanamoa.’ Ma [Deuteronomi 32:43 ai] ia gwau: ‘Iuda lasi taudia e, iena abia hidi besena danu do umui moale hebou.’ Ma Buka Helaga [Salamo 117:1 ai] ia gwau, ‘Umui Iuda lasi taudia ibounai e, Lohiabada do umui hanamoa. Taunimanima ibounai e, Lohiabada do umui hanamoa.’ ”—Roma 15:7-11.
11. Edena dala ai Dirava ese bese iboudiai taudia ia durua ena hereva momokanidia idia dibaia totona, bona unai dainai dahaka ia vara?
11 Bema taunimanima ese Iesu Keriso, Dirava ese bese iboudiai taudia lohiaia totona ia abia hidi tauna, idia abidadama henia lasi, Iehova idia hanamoa diba lasi mai edia lalo-tamona ida. Mauri hanaihanai dekenai idia ia hakaua lao hereva momokanidia do idia lalo-pararalaia totona, Dirava ese tanobada hegegemadai hahediba gaukara ta amo idia ia durua. Iena hakaua ia henia iena kamonai hesiai tauna oreana amo. (Mataio 24:45-47) Dahaka ia vara? Taunimanima milioni ima be tano 230 lalodiai Iehova ena namo idia anelaia. Bona taunimanima ma milioni momo idia hahedinaraia idia ura unai idia karaia danu. Lagani 1996 ai, Memorial dekenai idia mai taudia edia momo mani oi laloa: taunimanima 12,921,933. Ia be hoa gauna!
Dirava Idia Hanamoa mai Edia Moale ida Hutuma Badana Ia Perovetalaia
12. Aposetolo Ioane ese edena bamona matahanai ta ia abia, bona hari ia vara gauna be dahaka?
12 Matahanai ta lalonai, aposetolo Ioane ese bese iboudiai amo ‘hutuma bada herea’ ia itaia. (Apokalupo 7:9) Hutuma bada herea be Dirava ena horoa orena taudia ida idia anelaia hanamoa anena ena sinado be dahaka? Ioane ese ita ia hamaoroa, ia gwau: “Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.” (Apokalupo 7:10) Unai be tanobada ena kahana iboudiai lalonai idia gwauraia hedinarai mai edia gari lasi ida. Pama au rauraudia ita davea bamona, ita be mai eda lalo-tamona ida Dirava ita hanamoa, badina be ia be guba bona tanobada edia Pavapava, bona guba bona tanobada vairanai, mai eda moale ida ita gwau ia bona iena Natuna, Mamoe Natuna, Iesu Keriso dainai hahemauri ita abia. Aposetolo Ioane ese unai matahanai lalonai unai hutuma bada herea ia itaia neganai, ia moale bada herea! Bona hari inai negai ita moale badina Ioane ia itaia gauna be hari ia vara bona ita itaia sibona lasi, to ita be ena kahana ta danu!
13. Dahaka dainai Iehova ena taunimanima be inai tanobada amo idia idau?
13 Ita be Iehova ena hesiai taudia dainai iena ladana ita abia bona ita heagilaia. (Isaia 43:10, 12) Ita be Iehova ena Witness taudia dainai, tanobada amo ita idau. Dirava ena ladana tamona ita abia bona ena gaukara ita karaia be iseda mauri ena badina! Iehova ena ura hereadaena, Basileia amo ena ladana helagana do ia hahelagaia bona iena lohia siahuna do ia hamomokania, ese anina bada ia havaraia iseda mauri lalonai. Bona ia ese ita ia durua iena ladana bona ena Basileia totona ia karaia urana lalonai, gaukara ta do ita karaia. Dala toi amo unai ia karaia.
Hereva Momokanina Ia Henia
14, 15. (a) Edena dala ai Dirava ese ita ia durua ita be mai iseda gaukara iena ura ena ladana bona ena Basileia dekenai? (b) Edena dala amo lagani 1914 C.E. ai ia haginia Basileiana be lagani 607 B.C.E. ai ia moru basileiana amo ia idau?
14 Ginigunana be, Iehova ese hereva momokanina ia henia ena taunimanima dekenai. Hereva badana be iena Basileia be lagani 1914 ai ia lohia matamaia. (Apokalupo 12:10) Unai guba gavamani be Ierusalema dekenai Davida ena iduhu amo idia lohia pavapavadia edia gavamani amo ia idau. Unai basileia idia hadikaia ore, bena lagani 607 B.C.E. ai, Ierusalema be Idau Bese taudia edia basileia ese idia lohiaia matamaia. Basileia matamatana, Iehova ese lagani 1914 ai guba lalonai ia haginia Basileiana, be Iehova henunai sibona do ia noho, bona ta ese do ia hadikaia lasi ela bona hanaihanai. (Daniela 2:44) Danu, iena lohia dalana be idau. Edena bamona? Apokalupo 11:15 ia haere, ia gwau: “Gado badadia guba dekenai idia hereva, idia gwau, ‘Tanobada biagua siahuna be iseda Lohiabada bona iena Keriso idia abia vadaeni. Bona Lohiabada ese tanobada do ia biagua momokani, ela bona hanaihanai.’ ”
15 “Iseda Lohiabada bona iena Keriso” edia Basileia be tanobada taudia iboudiai ia lohia basileiana. Iehova ena lohia siahuna hahedinaraia dalana matamatana lalonai be iena Natuna, Mesia, bona Iesu ena tadikaka 144,000, idia momo idia lao vadaeni guba dekenai. Ia be taunimanima ese idia stadilaia o idia herevalaia gauna sibona lasi. Lasi, unai guba Basileiana be gavamani korikorina. Bona ena lohia dainai, mauri hanaihanai goevadaena do it abia helarona ita moalelaia diba noho. Iehova ena Hereva amo idia mai hereva momokanidia ita abia dainai, hanaihanai unai Basileia ita hanamoa. (Salamo 56:10) To hanaihanai unai oi karaia, taunimanima ibounai dekenai Dirava ena Mesia Basileiana be guba dekenai ia lohia vadaeni oi harorolaia, a?
Lauma Helaga Bona Tanobada Ibounai Tadikaka Oreana ese Idia Durudia
16, 17. Dirava be ena ura lalonai gaukara ta ita karaia diba totona, ita ia durua dalana iharuana bona ihatoina be dahaka dahaka?
16 Dirava ese ita ia durua iena ura lalonai gaukara ta ita karaia diba totona dalana iharuana be iena lauma helaga ia henia ita dekenai. Unai ese ita ia durua lauma huahua namodia ita havaraia bona ena lalo-namo ita abia totona. (Galatia 5:22, 23) Danu, Paulo ese horoa Keristani taudia ia tore henia, ia gwau: “Ita be . . . Dirava dekena amo ia mai Lauma ita abia vadaeni, Dirava ese ita dekenai ia henia harihari gaudia do ita diba namonamo totona.” (1 Korinto 2:12) Iehova ena lauma ita abia dae dainai, ita ia henia harihari gaudia iboudiai be hari ita diba bona ita lalo-pararalaia—iena gwauhamata, taravatu, hakaua herevadia, bona unai bamona gaudia.—Mataio 13:11 itaia.
17 Dirava ese ita ia durua dalana ihatoina be, iseda tanobada ibounai tadikaka oreana bona Iehova tomadiho henia oreana namona idia noho. Aposetolo Petero ese unai ia herevalaia neganai, ita ia hamaoroa, “Keristani taudia ibounai do umui lalokau henia.” (1 Petero 2:17) Iseda tadikaka bona taihu mai edia lalokau, bese idauidau lalodiai, ese ita idia durua Iehova ena hesiai do ita lao henia mai eda moale bada ida. Salamo 100:2 ena hahegani be inai: “Lohiabada do umui tomadiho henia, mai emui moale danu. Lohiabada ena vairana dekenai umui mai, mai moale anedia danu.” Bona siri 4 ia gwau: “Lohiabada ena Dubu Helaga lalonai do ita raka vareai, mai tanikiu danu. Iena Ruma lalonai Lohiabada ena ladana do ita abia isi, Lohiabada do ita tanikiu henia. Iena ladana do ita hanamoa bada.” Unai dainai herevana ita be taunimanima edia vairanai ita haroro eiava iseda hebou lalodiai ita hebou, moale bada ita davaria diba. Iehova ena lauma dubuna ena ariara mai hairaina ai maino bona noho namona ita davaria vadaeni!
Mai Eda Moale ida Iehova Hanamoa!
18. Ena be dagedage eiava hekwakwanai ma ta ita davaria, to dahaka dainai Iehova ita hanamoa noho diba mai eda moale ida?
18 Herevana noho aukana, dagedage, eiava hekwakwanai ma haida ita davaria, to namona be Iehova ena tomadiho rumana ai ita noho dainai ita moale. (Isaia 2:2, 3) Oi laloatao moale be iseda lalona ai ia noho gauna. Idaunegai Keristani tadikaka bona taihu ese Iehova idia hanamoa mai edia moale ida, herevana edia mauri idia auka bona edia kohu idia haboioa. (Heberu 10:34) Iseda tadikaka hari be idia hegeregerena.—Mataio 5:10-12.
19. (a) Edena hahegani ese ita idia hagoadaia Iehova ita hanamoa totona? (b) Mauri hanaihanai do ita abia diba bema dahaka ita karaia, bona namona be iseda lalona ita hadaia dahaka do ita karaia totona?
19 Iehova ita hesiai henia taudia iboudiai ita ura Baibel ena hahegani, Dirava hanamoa haheganina, ita badinaia. Dirava hanamoa herevadia momo Apokalupo bukana lalonai be inai hereva “Aleluia!” amo idia hamatamaia loulou. (Apokalupo 19:1-6) Salamo 150 ena siri 6 lalodiai, torea tauna ese nega 13 ita ia hamaoroa Iehova do ita hanamoa. Ia ese mauri gaudia iboudiai guba ai bona tanobada ai ia noia Iehova hanamoa anena do idia abia mai edia moale ida. Mauri hanaihanai ita abia diba bema inai Aleluia anena ita abia! Oibe, Iehova idia hanamoa loulou taudia sibodia do idia noho ela bona hanaihanai. Unai dainai, inai nega dokona ia ore gwauraia lalonai, iseda lalona ita hadaia vadaeni iena tanobada ibounai oreana do ita badinaia noho. Bena, iseda helaro be Salamo 150 ena siri ginigabena ena guguru vaitani negana do ita itaia: ‘Umui mauri noho gaudia ibounai e, Iehova ena ladana do umui hanamoa! Iehova do umui hanamoa!’
Edena Bamona Do Oi Haere?
◻ Dahaka kara dainai Iehova ena taunimanima be idia idau?
◻ Dahaka dainai Iehova ena hesiai taudia idia moale bada?
◻ Edena kara dainai tanobada amo ita noho siri?
◻ Dirava ese ita ia durua ena ura lalonai gaukara ta ita karaia totona daladia toi be dahaka?
[Picture on page 17]
Herevana edeseniai ia noho, Iesu ese Iehova ia gwauraia hedinarai bona taunimanima vairanai ia hanamoa