Lau Maragi Negana amo mai Haheauka ida Iehova Lau Naria

RUDOLF GRAICHEN ESE IA SIVARAILAIA

Egu mauri lagani be 12 neganai, kevaru ta bamona, kara dika bada ia vara emai ruma bese dekenai. Kara ginigunana be, egu tamana be dibura rumana dekenai idia atoa. Bena, lau bona egu taihuna be mai dagedage ida emai ruma bese amo ai idia abia oho bona ai diba lasi taudia dekenai ai idia siaia. Gabeai, Gestapo taudia ese lau bona egu sinana idia dogoatao. Lau be dibura rumana dekenai lau lao, bona ia be dibura kamepa dekenai ia lao.

LAU be Iehova ena Witness mero matamatana ta, bona unai kara ese nega sisina daudau lalonai lau mamia hisihisi bada dagedage karana ia matamaia. Ia kara dika bada Nazi Gestapo oreana bena gabeai East German Stasi eiava pulisi ese egu abidadama Dirava dekenai idia hadikaia toho. Hari, lagani 50 idia ore vadaeni iena hesiai gaukara lau karaia murinai, Salamo torea tauna bamona lau hereva diba, ia gwau: “Lau be mero neganai ia mai bona hari, lau idia hadikaia gwauraia taudia ese, lau idia dagedage henia dikadika, to idia ese lau idia halusia lasi.” (Salamo 129:⁠2) Iehova lau tanikiu henia bada!

Lau be June 2, 1925 ai lau vara, taoni maragina Lucka, Leipzig kahirakahira dekenai, Germany ai. Lau do vara lasi neganai, egu tama sina, Alfred bona Teresa, ese Baibel ena hereva momokani idia itaia Bible Students taudia edia buka lalodiai, unai neganai Iehova ena Witness taudia be unai ladana idia gaukaralaia. Lau laloatao dina ibounai emai ruma ena haba dekenai idia noho Baibel ena hereva edia laulau lau raraidia. Laulau ta ese uda sisia bona mamoe, taiga bona nanigosi, boromakau natuna bona laiona natuna ia hahedinaraia​—⁠idia ibounai be maino ai idia noho bona mero maragina ese ia hakaudia. (Isaia 11:​6-9) Unai bamona laulau be egu lalona dekenai idia noho hanaihanai.

Bema mai dalana, egu tama sina ese kongregesen gaukara lalonai lau idia hakaua danu. Hegeregere, February 1933 ai, Hitler be siahu ia abia bena dina haida sibona murinai, “Photo-Drama of Creation”​—⁠ena slaid piksa, muvini piksa, bona rekodi​—⁠be emai taoni maragina dekenai idia halasia. Lau moale bada herea, lau be mero maragi egu lagani be 7 sibona, bona taraka murinai lau helai taoni lalonai ai heau loaloa “Photo-Drama” halasia negana ai harorolaia! Unai neganai bona nega ma haida ai, ena be lau be maragi sibona, to tadikaka ese lau idia kara henia kongregesen ena memba namona ta bamona. Unai dainai, lau do maragi negana lalonai, Iehova ese lau ia hadibaia bona iena Hereva lau badinaia.

Hahediba Lau Abia Iehova Abidadama Henia Totona

Keristani taudia edia gini siri karana aukana dainai, Iehova ena Witness taudia be Nazi politikol karadia lalonai idia vareai lasi. Unai dainai, lagani 1933 ai Nazi taudia ese haroro gaukara, hebou, bona aiemai Baibel bukadia duahia karana idia taravatua. September 1937 ai, aiemai kongregesen lalonai tadikaka iboudiai, egu tamana danu, be Gestapo ese idia dogodia tao. Unai kara dainai lau hebogahisi bada herea. Egu tamana idia siaia lagani ima dibura rumana dekenai ia noho.

Ruma dekenai emai mauri be ia auka. To Iehova abidadama henia karana ai dibaia haraga. Nega ta sikuli amo lau giroa mai neganai, egu sinana be Gima Kohorona ia duahia noho. Ia ura egu dina tubua aniani ia hegaegaelaia dainai, magasin be kabodi maragina latanai ia atoa. Dina tubua anianina murinai, mereki ai atodia lou neganai, iduara dekenai pidipidi regena badana ai kamonai. Ia be pulisi tauna ta, ia ura Baibel bukadia totona emai ruma ia sekea. Lau gari bada herea.

Unai dina be ia idau, ia siahu bada herea. Unai dainai pulisi tauna ese ena kwara gauna ia kokia bona teibolo latanai ia atoa. Bena ena tahua gaukara ia hamatamaia. Teibolo henunai ia sekea noho lalonai, iena kwara gauna be ia moru gwauraia. Unai dainai egu sinana ese karaharaga kwara gauna ia abia bona kabodi latanai ia atoa, Gima Kohorona latanai! Pulisi tauna ese emai ruma ia sekea namonamo to buka ta ia davaria lasi. Oibe, ia laloa lasi iena kwara gauna henunai do ia sekea. Ia lao gwauraia neganai, egu sinana dekenai sori herevana ia gwauraia bona imana ia toia lao murina kahana dekenai ena kwara gauna ia abia. Egu gari ia ore!

Unai bamona ekspiriens ese lau idia hegaegaelaia hetoho aukadia totona. Hegeregere, sikuli dekenai lau idia doria Hitler ena Matamata Taudia edia orea lau vareai totona, unai orea lalonai natudia be ami treinini idia karaia bona Nazi hahediba herevadia idia hadibadia. Tisa haida edia tahua gauna be edia stiuden iboudiai be unai orea lalonai do idia vareai. Egu tisa, Herr Schneider, be reana ia laloa ia be hegeregere lasi, badina sikuli ibounai lalonai, iena klas dekenai stiuden tamona be unai orea lalonai ia vareai lasi. Unai stiuden be lau.

Dina ta Herr Schneider ese klas taudia ibounai ia hamaorodia: “Memero, kerukeru do ita lao loaloa.” Ibounai ese unai hereva idia moalelaia. Bena ia gwau: “Umui ibounai ese emui Hitler ena Matamata Taudia edia orea ena unifom do umui hahedokilaia, unai amo dala dekenai ita raka lao neganai, ibounai do idia itaia umui be Hitler ena memero namodia.” Kerukeru dabai memero ibounai be edia unifom idia hahedokilaia, to lau sibona lau hahedokilaia lasi. Tisa ese klasrum ena vairana dekenai lau ia boiria lao bona lau ia nanadaia: “Memero ibounai oi itadia bona oi sibona oi itaia.” Bena ia gwau: “Lau diba oiemu tama sina be ogogami bona moni lasi dainai unifom idia hoia lasi, to mani gau ta oi dekenai lau hahedinaraia.” Ena gaukara patana dekenai lau ia abia lao, droa ia kehoa, bona ia gwau: “Lau ura inai unifom matamatana lau henia oi dekenai. Ia be mai hairaina, ani?”

Lau laloa lau mase be namo, lau ura lasi unai Nazi unifom do lau hahedokilaia. Lauegu tisa ia itaia lau ura lasi lau hahedokilaia neganai, ia badu, bona klas taudia ibounai ese lau idia lolo henia. Vadaeni ai ia abia lao loaloa, to ia hekwarahi lau ia hunia dainai unifom idia karaia memero iboudiai edia huanai lau raka. To, taunimanima momo taoni dekenai idia itaia lau be egu klas taudia amo lau idau. Taunimanima ibounai idia diba egu tama sina bona lau be Iehova ena Witness taudia. Iehova lau tanikiu henia badina lau do maragi neganai lauma dalanai goada ia henia lau dekenai.

Dagedage Ia Bada Ia Lao

Dina ta, lagani 1938 ena matamanai, sikuli amo lau bona egu taihuna idia abia bona pulisi motuka amo ai idia abia lao panisi idia henia sikuli ta dekenai, ia be Stadtroda dekenai, ena daudau be kilomita 80 bamona. Dahaka dainai? Kota idia ura emai tama sina edia hahediba karana amo ai idia kokia bona Nazi natudia ai ai idia halaoa. Nega sisina murinai, unai panisi henia sikuli idia naria taudia idia itaia ena be aiemai Keristani gini siri karana ai goadalaia, to lau bona egu taihuna be hemataurai bona kamonai natudia. Unai gabu ena dairekta be ia hoa bada dainai ia ura egu sinana ia hedavari henia. Dala idia karaia, bona egu sinana ese ai ia vadivadi henia diba. Lau, egu taihuna, bona egu sinana be ai moale bada herea bona Iehova ai tanikiu henia badina dala ia karaia dina ta ibounai lalonai ai ese ta ta ai hagoadaia heheni diba. Hahegoada karana dekenai ai dabu momokani.

Unai panisi sikuli dekenai hua hani bamona ai noho. Bena ai idia siaia lao ruma bese ta ida do ai noho Pahna dekenai. Idia hamaorodia emai varavara taudia amo ai do idia abia siri. Gwaumaoro danu idia henia lasi egu sinana ese ai ia vadivadi totona. To, dala ia davaria nega haida ai ia itaia totona. Unai nega ta ta ai, egu sinana ese ai ia hagoadaia Iehova do ai abidadama henia goadagoada noho, herevana dahaka hahetoho eiava dika ai dekenai ia koua lasi.​—⁠1 Korinto 10:⁠13.

Bona unai hahetoho idia vara momokani. December 15, 1942 ai, lauegu mauri lagani be 17 sibona neganai, Gestapo ese lau idia dogoatao bona Gera ena dibura rumana dekenai lau idia atoa. Pura ta ia hanaia murinai, egu sinana idia dogoatao danu bona idia abia mai lau noho dibura rumana dekenai. Egu lagani be do bada lasi dainai, kota ese lau idia hahemaoro henia diba lasi. Unai dainai lau bona egu sinana be dibura rumana dekenai hua 6 ai noho, kota idia naria ela bona egu mauri lagani be 18. Egu mauri lagani be 18 ia abia dinana ai, lau bona egu sinana idia abia lao kota dekenai.

Dahaka ia vara lau do lalo-pararalaia lasi neganai, kota be ia ore vadaeni. Lau diba lasi egu sinana do lau itaia lou lasi. Egu lalona dekenai ia lau do laloatao, lau badinai, helai auna latanai ia helai kota rumana lalonai. Kota ia gwau ai ruaosi be kerere taudia. Lau idia siaia dibura ruma dekenai lagani hani lau noho bona egu sinana be lagani tamona mai kahana idia henia.

Unai nega lalodiai, Iehova ena Witness taudia tausen momo be dibura ruma bona kamepa dekenai idia atodia. To, lau idia siaia dibura rumana, Stollberg dekenai, lau sibona be Witness tauna. Lagani tamona lalonai lau sibona lau noho, to Iehova be lau danu ia noho. Lau do maragi neganai Iehova lau lalokau henia karana ese lau ia durua lauma dalanai lau goada noho totona.

May 9, 1945 ai, dibura dekenai lagani rua mai kahana lau noho murinai, sivarai namona ai kamonai​—⁠tuari ia ore! Unai dinai lau idia ruhaia. Kilomita 110 lau raka murinai, ruma dekenai lau ginidae mai gorere, badina lau manoka bona hitolo bada dainai. Hua haida murinai lau goada lou.

Ruma dekenai lau ginidae neganai, lau ese sivarai dikadia lau kamonai. Ginigunana be egu sinana ena sivarai. Ia be lagani tamona mai kahana dibura dekenai ia noho murinai, Nazi taudia ese idia nanadaia Iehova inai henia pepana do ia sainia. Ia ura lasi. Unai dainai Gestapo ese idia abia lao hahine edia dibura kamepa, Ravensbrück dekenai. Unuseniai tuari be kahirakahira do ia ore gwauraia neganai, typus gorerena amo ia mase. Ia be Keristani hahinena goadana​—⁠ia gini goada, ia manoka lasi. Mani Iehova ese mai hebogahisi ida do ia laloatao.

Egu kakana, Werner, Iehova ia gwauhamata henia lasi merona, ena sivarai danu lau kamonai. Ia be German ami lalonai ia vareai bona Russia dekenai ia mase. Egu tamana? Ia giroa mai ruma, to madi, ia be edia abidadama idia inai henia pepana idia sainia Witness taudia ta. Lau itaia neganai ena toana be ia moale lasi bona ia kavakava bamona.​—⁠2 Petero 2:⁠20.

Nega Sisina Lalonai Lauma Dalanai Lau Gaukara Goadagoada

March 10, 1946 ai, nega ginigunana tuari murinai hebouhebou dekenai lau lao Leipzig ai. Ai idia hadibaia unai dina ai bapatiso do idia karaia neganai, lau moale bada herea! Ena be lagani haida gunanai, egu mauri lau gwauhamatalaia vadaeni inai be egu nega namona ginigunana bapatiso lau abia diba totona. Unai dina do lau laloaboio diba lasi.

March 1, 1947 ai, hua tamona lau painia murinai, lau idia boiria Betele dekenai, Magdeburg ai. Society ena opesi be bomu ese ia hadikaia bada. Unai opesi hanamoa gaukarana lau durua be hahenamo ta! Unai siahu negana murinai, lau idia siaia Wittenberge siti dekenai, spesel painia gaukara karaia totona. Hua haida lalonai, lau ese hora 200 mai kahana lalonai ma haida dekenai Dirava ena Basileia ena sivarai namona lau harorolaia. Lau moale bada herea ura kwalimu lau davaria dainai​—⁠tuari lasi, dagedage lasi, dibura ruma be lasi!

To madi, unai ura kwalimu be ia noho daudau lasi. Tuari murinai Germany be idia hapararaia, bona lau noho gabuna be Komiunis edia siahu henunai ia lao. September 1950 ai, East Germany ena hehuni pulisi, idia gwauraidia Stasi, be metairametaira tadikaka ia dogodia tao. Lau idia samania herevadia be anina lasi momokani. Idia gwau lau be American gavamani ena spai tauna. Lau idia siaia lao Stasi dibura rumana dikana momokani dekenai, Brandenburg ai.

Heduru Egu Lauma Tadikakadia Amo

Unuseniai Stasi taudia ese lau idia rakatania lasi dina ai lau mahuta totona. Bena hanuaboi ibounai lalonai mai dagedage ida lau idia nanadaia. Dina haida lalonai unai bamona dagedage lau abia murinai, mauri be ia dika bada ia lao. Daba ta ai, egu daiutu dekenai lau idia abia giroa lasi, to edia U-Boot Zellen daiutuna dikana ta dekenai lau idia abia lao (idia gwauraidia sabmarini daiutu badina idia be dibura ruma henunai idia noho). Iduara gunana mai rasta danu idia kehoa bona lau idia hamaoroa lau vareai. Iduara dekenai geiti lau hanaia. Egu aena lau atoa diho neganai, lau mamia ranu ese floa ibounai ia koua. Iduara be regerege bada danu idia koua auka. Laiti bona uindo be lasi. Ia dibura masemase.

Ranu sisina dobu ese floa ia koua dainai, lau helai, hekure, eiava lau mahuta diba lasi. Unuseniai lau noho nega sisina daudau murinai, lau idia abia lao mai dagedage ida bona laiti diarina momokani henunai lau idia nanadaia totona. Lau diba lasi edena be ia dika momokani​—⁠dina ibounai lalonai dibura masemase gabuna ai ranu lalonai lau gini eiava hanuaboi ibounai lalonai diari bada herea momokani laiti lau haheaukalaia.

Nega momo idia gwau lau do idia pidia. Mai dagedage ida lau idia nanadaia hanuaboidia haida murinai, daba ta ai Russia ami opesa badana ta ese lau ia vadivadi henia. Unai neganai lau hamaoroa German Stasi ese lau idia kara dika henia bada, Nazi Gestapo edia kara idia hanaia. Lau hamaoroa Iehova ena Witness taudia be Nazi gavamani idia durua lasi bona Komiunis gavamani danu idia durua lasi bona tanobada ena kahana ta dekenai ai be politikol karadia lalonai ai vareai lasi. To, lau gwau, hari Stasi opesa taudia momo be guna Hitler ena Matamata Taudia edia orea lalonai idia noho, reana unuseniai kerere lasi taunimanima idia hahisidia karadia idia dibaia. Lau hereva noho lalonai, egu tauanina be keru, hitolo bona manoka dainai ia heudeheude.

Hoa gauna be, unai Russia opesa be lau dekenai ia badu lasi. To idau, ia ese bilankesi amo lau ia koua bona mai hebogahisi ida lau ia kara henia. Nega sisina iena vadivadi murinai, lau idia atoa daiutu namona ta dekenai. Dina haida murinai, German kota dekenai lau idia henia hanai. Egu kota negana lau naria lalonai, lau moale bada badina Witness taudia ima ida daiutu tamona dekenai ai noho. Dagedage bada lau haheaukalaia murinai, lau davaria egu lauma tadikakadia ida lau hebamo be hahegoada gauna!​—⁠Salamo 133:⁠1.

Kota dekenai idia gwau lau be spai gaukara lau karaia dainai lau kerere bona lau idia siaia lagani hani dibura ruma dekenai. Idia gwau unai be panisi aukana lasi. Tadikaka haida be lagani 10 mai kahana idia henidia. Dibura rumana mai ena sekuriti aukana gabuna dekenai lau idia siaia. Lau laloa unai gabu dekenai sekuriti be auka momokani dainai, reana bita ta be unai dibura rumana lalonai ia rau vareai eiava ia rakatania diba lasi. To, Iehova ena heduru amo gari lasi tadikaka ese henuni dalana amo Baibel ta idia abia vareai. Unai Baibel ai kokia buka ta ta ai bona dibura tadikaka huanai ai haria.

Edena bamona ai karaia? Ia be auka momokani. Ta ta ida ai hedavari heheni negana tamona be pura rua rua dokonai digu totona digu gabuna dekenai ai idia abia lao neganai. Nega ta, lau digu noho lalonai, tadikaka ta ese egu taiana dekenai ia hereva maragimaragi ia gwau, ena tauele lalonai Baibel ena rau haida ia hunia. Lau digu murinai egu tauele do lau rakatania bona iena tauele do lau abia.

Gadi ta ese unai tadikaka ia itaia egu taiana dekenai ia hereva maragimaragi noho bona ena au amo ia botaia dikadika. Lau be karaharaga tauele lau abia bona dibura taudia ma haida huanai lau hunia. Lau moale bada lau idia abia lasi unai Baibel raudia danu. Bema lasi, emai lauma aniani abia dalana be ia dika. Unai bamona ekspiriens momo ai davaria. Hanaihanai hunia gabudia ai Baibel ai duahia, ena be dika bada ai davaria diba. Unai neganai aposetolo Petero ena hereva, “Umui laloa maoromaoro, bona naria namonamo” be mai anina bada.​—⁠1 Petero 5:⁠8.

Badina ta dainai, dibura ruma naria taudia ese ai haida idia siaia loulou dibura ruma ma haida dekenai. Lagani hani lalonai, lau idia siaia dibura rumadia 10 dekenai. To, lau ese tadikaka lau davaridia diba. Unai tadikaka lau lalokau henidia bada, bona nega ibounai lau idia siaia gabu ta dekenai neganai, egu kudouna ibounai ida lau lalohisihisi bada.

Dokonai Leipzig dekenai lau idia siaia, bona unuseniai dibura amo lau idia ruhaia. Lau ia ruhaia dibura gadi be bamahuta ia hereva lasi, to ia gwau, “Daudau lasi lalonai oi do ai itaia lou.” Ena kara dika lalona ia ura lau be dibura rumana ena auri murinai do lau noho. Nega momo Salamo 124:​2, 3 ena hereva lau laloa, unuseniai ia gwau: “Ita dekenai idia dagedage taudia ese ita idia tuari henia, bona bema Lohiabada ese ita ia durua lasi neganai, unai dagedage taudia ese ita do idia hadikaia ore, idia edia badu mai siahu bada dekena amo.”

Iehova ese Iena Kamonai Hesiai Taudia Ia Hamauridia

Hari lau be ura kwalimu tauna lou. Egu hekapa taihuna, Ruth, bona Taihu Herta Schlensog be geiti dekenai lau idia naria noho. Dibura dekenai lau noho lagani momo lalodiai, hua ta ta ibounai Herta ese aniani pasolo maragina ta ia siaia. Lau abia dae momokani bema unai aniani pasolo maragidia be lasi, dibura dekenai lau mase vadaeni. Mani Iehova ese mai hebogahisi ida do ia laloatao.

Dibura lau rakatania murinai, maduna idauidau amo Iehova ese lau ia hanamoa. Spesel painia gaukarana lau karaia lou Gronau, Germany dekenai bona sekit gaukara lau karaia German Alps dekenai. Gabeai lau idia boiria misinari taudia edia Watchtower Bible School of Gilead ena klas 31 dekenai lau lao totona. Emai sikuli ai haorea hebouna be Yankee Stadium dekenai ai karaia, lagani 1958 Iehova ena Witness taudia edia intenesenel hebouhebouna dekenai. Lau ese tadikaka bona taihu hutuma bada dekenai egu sivarai lau herevalaia.

Sikuli ai haorea murinai Chile dekenai lau lao misinari gaukara lau karaia totona. Sekit gaukara lau karaia lou unuseniai, Chile ena saut momokani kahana dekenai​—⁠lau idia siaia lao tanobada ena dokona momokani dekenai. Lagani 1962, ai Patsy Beutnagel lau adavaia, ia be misinari namo hereana San Antonio, Texas, U.S.A. amo. Lagani namodia momo lau moalelaidia, Iehova lau hesiai henia bona ia be lauegu badinai ia noho.

Lauegu mauri laganidia 70 bona ma haida lalonai, lau ese moale bada negadia bona dika bada negadia lau davaria. Salamo torea tauna ia gwau: “Kara maoromaoro tauna ena hisihisi be momo, to Lohiabada ese unai tau do ia durua, vadaeni unai hisihisi do ia ore.” (Salamo 34:19) Lagani 1963 ai, Chile dekenai ai do noho neganai, lau bona Patsy emai beibi kekeni ia mase. Unai be dika bada negana. Gabeai, Patsy ia gorere bada herea, bona ai lao Texas dekenai. Iena mauri lagani be 43 sibona neganai, ia mase, unai be dika bada neganai ia vara danu. Nega momo lau guriguri Iehova ese lauegu adavana namona do ia laloatao.

Hari, ena be lau gorere momo bona lau buruka, Brady, Texas dekenai lau be regula painia gaukara bona elda gaukara lau moalelaia. Momokani, mauri lalonai gau namodia sibona idia vara lasi, bona reana hahetoho ma haida do lau davaria. To, Salamo ia torea tauna hegeregerena, lau hereva diba: “Dirava e, lau be mero negana dekena amo, oi ese lau oi hadibaia vadaeni, bona unai negana ia mai bona hari, lau ese oiemu hoa karadia lau gwauraia vadaeni, bona do lau gwauraia noho.”​—⁠Salamo 71:⁠17.

[Picture on page 23]

(1) Hari lau be elda bona painia gaukara lau karaia, (2) lau bona Patsy, kahirakahira do ai headava gwauraia neganai, (3) Herr Schneider bona ena klas, (4) egu sinana, Teresa, Ravensbrück dekenai ia mase