Mamoe Bamona Taudia Edia Rei Gabuna Navajo Tanona Ai

HÓZHÓNÍ ena anina, Navajo Indian taudia edia gado ai, be “mai hairaina,” bona edia tano be unai bamona idia gwauraia. Lagani 1868 murinai, United States ena gavamani ese notist Arizona ai gabu ta ia henia Navajo taudia dekenai, ena bada be sikoea kilomita 62,000. Iena ladana idia hatoa daiguni hani, ia be provinsi hani, Arizona, Colorado, New Mexico, bona Utah, edia hetoadia gabuna ai. Taunimanima momo be Monument Valley idia diba, kauboi piksa momo dainai. Hari unai koura be Navajo Bese Gabu, bona taunimanima tanobada ena kahana iboudiai amo ese idia vadivadi henia. Unai koura lalonai be nadi latadia kakakaka, edia lata be mita 300. Tano gagaena ai idia ta ta be mai padadia, bona edia toana be namo herea. Navajo gado ai, unai koura ena ladana idia hatoa herevana be maoro, ena anina be “nadi badadia huanai ia noho gabuna.”

Navajo taudia momo be manau taudia, heabidae taudia, bona sibona edia varavara idia badinadia momokani. Unai gabu idia noholaia taudia 170,000 be hanua maragidia ta ta ai idia noho bona edia sene daladia idia badinaia noho. Haida ese mamoe idia do naridia noho bona ruma maragidia, tano amo idia koua ruma ladana hogan, idia noholaidia. Navajo taudia be edia imana amo idia karaia gaudia be taunimanima momo ese idia ura henidia. Idia ura henia bada gaudia be edia geda bona bilankesi, mamoe huidia amo idia karaia gaudia mai revareva idauidau, kala idauidau ai. Navajo taudia edia herahera gaudia danu, siliva gaudia mai nadi buludia bona unai bamona gaudia ma haida, be taunimanima momo idia diba.

Sivarai Namona be Navajo Tanona Dekenai Idia Laohaia

Lagani 30 mai kahana lalodiai, Iehova ena Witness taudia be Navajo tanona dekenai idia lao loulou, itaia totona sibona lasi, to danu Dirava ena Basileia sivarai namona be unai gabu daudauna taudia dekenai do idia laohaia totona. (Mataio 24:14) Iehova ena Witness taudia edia regula bona spesel painia taudia ese unai haroro gaukarana idia gunalaia. Idia momo idia lao, badina be sekit naria taudia bona Witness taudia unai gabu ai idia noho ese idia boiridia, heduru ai idia dabu bada gabuna dekenai do idia lao. Haida be kongregesen kahirakahira amo idia mai, bona ma haida, America ena Indian besedia idaudia taudia danu, be United States ena kahana idauidau amo.

Unai tatau bona hahine, sibona edia namo idia tahua lasi taudia, idia laloa edia gaukara unuseniai be misinari gaukarana hegeregerena. Dahaka dainai? Gau ginigunana be, Indian gado idauidau idia dibaia be auka badina be unai gado be auka herea. Inai danu, unai bese taudia momo ese edia sene daladia ai idia tomadiho, edia varavara idia badinaia, bona edia tano idia gaukaralaia. Danu, Indian lasi taudia ese ruma bona moni gaukarana unuseniai idia davaria be auka dainai, idia mai taudia idia noho daudau be auka. Inai danu, nega daudau lalonai kurokuro taudia ese unai bese taudia idia hadikaia dainai, idau bese taudia idia abidadama henia momokani lasi.a

Matamanai, Witness taudia be ruma ta ruma ta idia lao neganai, idia be kouti bona neketai idia hahedokilaia, unai dainai momo idia laloa idia be Mormon taudia, bona idia momo ese iduara idia kehoa lasi. Dabua idaudia idia hahedokilaia neganai, idia abidia dae, nega momo unai be hora ta o hora ta mai kahana lalonai. Hari inai negai, ena be haroro gaukarana lalonai Iehova ena Witness taudia be mai edia kouti bona neketai, to taunimanima idia diba idia be Witness taudia.

Navajo gabuna idia noholaia taudia idia lao henidia be mai hekwarahi bada. Dala dikadia mai edia nadi momo o miri o kopukopu dekenai kilomita momo idia lao. Unai ese edia motuka ia hadikadia bona gui taudia idia hesiku. Nega haida motuka be miri o kopukopu dekenai idia kamokau, to raka hanai taudia ese idia durudia. Nega momo, kamonai taudia idia vadivadi henidia neganai, o Baibel stadi ta idia lao henia neganai, o ta be Keristani hebouna dekenai idia laohaia neganai, hora momo idia heau. To Witness taudia idia hekwarahi mai edia ura ida, unai amo idia hahedinaraia Indian taudia idia lalokau henidia.​—1 Tesalonika 2:8 itaia.

Navajo taudia ese Baibel herevahereva karana idia moalelaia. Idia be vaia edia ruma bese ibounai​—natudia, tama sina, bona tubudia​—idia hebou, taunimanima be nega vairai do idia noholaia paradaisona ena sivarai kamonai totona. Navajo tauna ta idia nanadaia, ia laloa Paradaiso be edena bamona, bena ia haere, “Ia be mai ena rei gabudia namodia, bona mamoe be momo.” Unai ese ia hahedinaraia edia tano bona edia mamoe idia ura henidia. Idia ese Baibel bukadia idia laloa bada danu, unai dainai nega haida idia ese kavabukavabu, sopu, miliki tini, o unai bamona gaudia idia henia, Basileia gaukarana durua totona. Lagani tamona lalonai spesel painia ta ese Gima Kohorona bona Awake! edia sabskripsen 200 bamona ia abia, idia rua be hosi gui tauna ta ena amo.

“Mamoe Kamepa” ta Idia Karaia

Siahu negana ia ginidae neganai, Navajo mamoe naridia tauna o hahinena ese ena mamoe be mamoe kamepa ta dekenai ia hakaudia lao. Unai gabu, siahu negana lalonai mamoe ese do idia noholaia, be ia ese ia abia hidi, badina be ia be rei gabuna namona bona ranu gabuna namona, bona unuseniai mamoe do idia goada idia lao. Kingdom Hall ta be unai bamona kamepa ta hegeregerena​—ia be lauma rei gabuna bona hereva momokani ranuna gabuna. Idia lao henia taudia ese lauma aniani idia davaria diba, ia dainai lauma dalanai do idia goada.

Nega sisina daudau lalonai hebou be sikuli klasrum ta lalonai idia karaia, Kayenta, Arizona ai. Bena August 1992 ai, Witness volantia taudia handred momo provinsi haida amo ese idia durua neganai, Kingdom Hall matamatana ta be Kayenta ai idia haginia. Unai Kingdom Hall bona ma haida be unai gabu ai idia noho dainai, unai gabu taudia idia diba Witness taudia edia haroro gaukarana unuseniai do ia doko lasi. Unai gabu badana ai Kingdom Hall ma haida idia noho Tuba City ai bona Chinle ai, ruaosi be Navajo tanona ai, ma ta be Keams Canyon ai, Hopi besena tanona ai, Navajo tanona bogaraginai, bona ma haida be unai gabu ena hetoana taoni ai. Vadaeni, unai dainai dahaka ia vara?

Momo ese Basileia Sivaraina Idia Abia Dae

Kayenta ai, Kingdom Hall idia haginia negana amo, unai gabu taudia 12 bamona be bapatiso idia abia, unai ese ia hahedinaraia Iehova ese unai tomadiho momokani gabuna ia hanamoa. Kingdom Hall be toa ta, ia hahedinaraia Iehova ena Witness taudia be unai gabu do idia rakatania lasi, bona ia dainai, idia harorolaia Basileia sivarai namona be taunimanima ese idia abidadama henia. Vanegai, Navajo gado ai pablik tok ginigunana be unuseniai idia karaia. Kongregesen taudia 40 ese taunimanima 245 idia abia dae mai edia moale ida, bena unai hereva, tama sina edia maduna herevana, idia kamonai. Mai edia ura ida famili ta taudia 8 be hora toi idia mai unai hereva kamonai totona, bena ma hora toi idia lou​—Kingdom Hall idia lao henia negana ginigunana be unai.

Iehova ese ia henidia tulu namona ma ta be buklet ladana Mauri Hanaihanai Tanobada Dekenai Oi Abia! Navajo gado ai. Hari buklet be unai gado ai idia hahanaia be mai hekwarahi bada, badina be unai gado be auka herea. Gado hahanaia taudia be hora 1,000 mai kahana lalonai idia gaukara, Basileia sivaraina be buklet lalonai torea maoromaoro totona. Unai buklet be lagani 1995 ena dokona ai idia halasia negana amo, unai gabu ena Witness taudia ese tausen haida idia hariharilaia vadaeni, bona unai dainai Baibel stadi momo be hereva momokani tahua taudia dekenai idia karaia.

Basileia harorolaia taudia be Navajo gado idia dibaia noho bona haroro gaukarana lalonai idia gaukaralaia momo. Unai gabu ena kongregesen ese Navajo gado be Haroro Sikuli lalonai idia gaukaralaia matamaia, bona pablisa taudia dekenai be unai gado idia hadibaia. Inai danu, edia hebouhebou lalodiai hereva be Navajo gado ai idia hahegeregeredia. Momokani, unai kara iboudiai dainai, unai gabu taudia momo be do idia kamonai.

Basileia ena huahua idauidau be unai Indian gabuna ai idia vara, idia ta be iseda tadikaka, Navajo taudia, edia abidadama karadia namo hereadia. Lagani 7 lalodiai, Jimmy bona Sandra ese edia natudia ima be kilomita 120 idia laohaia pura ta ta edia hebou dekenai. Edia laolao daudau lalodiai, Basileia anedia idia abia bona Baibel idia stadilaia hebou, hari unai famili ese unai kara idia laloatao mai edia moale ida. Jimmy bona Sandra ese hereva momokani idia ura henia bona idia goadalaia dainai, edia natudia ese edia kara idia tohotohoa, Iehova hanamoa taudia ai idia lao bona edia mauri be ia dekenai idia gwauhamatalaia. Hari idia hani be regula painia taudia, bona Jimmy be elda. Unai famili ena moale ia habadaia gauna ta be vanegai Jimmy ena taihuna Elsie ese bapatiso ia abia. Ia be bapatiso idia abia Navajo gado sibona idia veria taudia ginigunana.

Navajo tanona ai, mamoe bona naria taudia ese unai gabu mai ena nadi latadia ena toana be maino gabuna ai idia halaoa. Idaunegai peroveta tauna Isaia ese Iehova ia perovetalaia, ia gwau: “Ia ese iena mamoe do ia ubua, mamoe naria tauna ia ubua noho bamona. Ia ese mamoe edia natudia do ia haboua, bona iena imana dekenai idia do ia rosia, idia do ia huaia lao. Bona edia sinadia bona rogorogo gaudia, be ia ese metairametaira do ia hakaudia lao.” (Isaia 40:11) Iena Mamoe Naria Tauna Namona, Iesu Keriso, amo, Iehova ese Navajo taudia, idia ura Basileia sivaraina namona do idia kamonai bona iena hahenamo hanaihanai do idia abia taudia, be ena lauma rei gabuna ai ia haboudia noho.

[Footnote]

[Picture on page 24]

Navajo mamoe naria hahinena ta, ese sivarai namona ia kamonai