Ful-taim Hesiai Gaukarana Oi Moalelaia Dalana
BAIBEL ena peroveta herevadia idia guguru ese ia hahedinaraia goevagoeva ita be Dirava ia dadaraia tanobadana ena dina gabediai ita noho. Unai idia diba dainai, Iehova Dirava ena hesiai taudia ese nega bada be Basileia ena sivarai namona harorolaia gaukarana dekenai idia atoa. Iehova ena Witness taudia 600,000 mai kahana ese edia mauri dalana idia haidaua, ful-taim hesiai gaukarana idia karaia totona. Idia haida be ful-taim Basileia harorolaia taudia, idia gwauraidia painia taudia. Ma haida be Betele volantia taudia, Watch Tower Society ena hedikwota eiava ena brens opesi idauidau dekenai. Bona ma haida be misinari taudia bona sekit bona distrik naria taudia.
Baibel ia gwau nega dokona ai “metau dikadia momo do idia vara.” (2 Timoteo 3:1-5) Greek Baibel ese ia gaukaralaia herevana ita hahanaia diba “do idia mai dagedage bada negadia.” Unai dainai, hari iseda negai namona be ta ia laloa lasi ena mauri lalonai hekwakwanai do idia vara lasi. Keristani hesiai taudia haida edia hekwakwanai be mai anina bada dainai, reana sibona idia nanadaia, ‘Ful-taim hesiai gaukarana lau karaia noho diba, eiava namona be do lau rakatania?’
Dahaka gaudia dainai reana ta ese ena painia, Betele, sekit o distrik, eiava misinari gaukarana be do ia karaia noho diba eiava lasi ia laloa lou? Reana ia gorere bada. Reana ena varavara ta ia buruka eiava ia gorere dainai ta ese ia naria hanaihanai be namo. Reana headava tauna bona ena adavana be natuna do idia abia. Unai bamona gaudia dainai bona Baibel ia henia maduna dainai ena ful-taim hesiai gaukara ia rakatania tauna be ena mauri ia haidaua dainai ia hemarai be namo lasi.
To, bema ta ia laloa ena ful-taim hesiai gaukarana do ia rakatania badina ia moalelaia lasi be edena bamona? Reana painia ta ia itaia ena gaukara amo anina bada ia havaraia lasi bona ia henanadai, ‘Badina be dahaka lau sibona egu ura dadaraia maurina lau badinaia noho ena be haida sibona idia kamonai?’ Reana Betele volantia tauna be idia henia gaukarana ia moalelaia lasi. Eiava reana gorere dainai, ena be ta ia painia noho diba, to ia moale lasi. Edena dala ai unai bamona taudia idia moale noho diba? Hesiai gaukara idia manadalaia taudia haida edia haheitalai mani ita itaia.
Lalohisihisi Haheaukalaia Dalana
Anny, Switzerland amo ia mai, be lagani 1950 ai Watchtower Bible School of Gilead dekenai ia lao. Ia ura bada tano daudauna dekenai misinari gaukara do ia karaia. Europe dekenai Betele gaukarana ia karaia totona idia siaia neganai, Anny ia lalohisihisi. To, Translation Department dekenai ena gaukara ia abia dae bona ia do karaia noho. Edena bamona ena lalohisihisi ia hanaia? Anny ia gwau: “Guna bona hari gaukara badana ia noho. Egu hemami bona ura be gau badadia lasi, to unai gaukara be mai ena anina bada.”
Bema iseda gaukara ita lalohisihisilaia, reana Anny ena lalohadai ita abia diba. Ita sibona eda hemami be mai anina bada lasi. Gau badana be Basileia sivarai harorolaia gaukarana ena maduna ibounai do ita huaia namonamo. Aonega Herevadia 14:23 ese ita ia hadibaia “hekwarahi ibounai ese davana namona idia henia noho.” Herevana edena gaukara ita idia henia, bema mai eda kamonai ida ita karaia noho, unai ese Basileia gaukarana do ia hagugurua. Bona Dirava ia henia gaukarana amo lalo-namo—oibe, moale—do ita abia diba.—1 Korinto 12:18, 27, 28 itaia.
Ma Haida Ida Lalo-Tamona Dalana
Ful-taim hesiai gaukarana ita karaia neganai, taunimanima idauidau ida ita gaukara hebou—haroro gaukarana ai, Betele ai, misinari rumana ai, eiava sekit o distrik naria gaukarana lalonai kongregesen ta amo ta dekenai loaloa neganai. Unai dainai, moale ita davaria diba bema ma haida ida ita lalo-tamona. To, idia perovetalaia ‘dagedage negadia’ be hari inai negai idia vara bona taunimanima edia turana karana idia hadikaia haraga. To hesiai gaukara ia karaia tauna be edena bamona ia moale noho diba ena be ta ese ena lalona ia hahisia? Reana Wilhelm amo gau haida do ita dibaia.
Lagani 1947 ai, Europe dekenai, Wilhelm be Betele dekenai ia vareai. Unai murinai, ia ese painia gaukara bona sekit gaukara ia karaia. Wilhelm ia gwau: “Bema lau bona egu adavana ese ai itaia gaudia be ai laloa idia maoro lasi eiava idia ai lalohisihisilaia, emai hemami be Iehova dekenai ai hamaoroa bena ai rakatania, ia ese do ia hamaoromaoroa totona.”—Salamo 37:5.
Reana oi danu oi lalohisihisi, badina Keristani tadikaka ta ese hemataurai lasi dalanai eiava ia laloa namonamo lasi dalanai oi ia hereva henia. Namona be oi laloatao nega momo ita ibounai be iseda hereva dekenai ita kerere. (Iamesi 3:2) Reana unai neganai “guriguri kamonaia Diravana” kahirakahira oi lao be namo, ani? (Salamo 65:2, NW) Unai gauna be Iehova dekenai oi herevalaia, bena iena imana lalonai oi rakatania. Bema Dirava ia ura do ia haidaua, vadaeni do ia haidaua. Bema misinari ruma ai idia noho taudia ese unai bamona hekwakwanai idia davaria, reana unai idia laloatao be namo, badina unai ese do ia durudia Iehova ena hesiai gaukara lalonai do idia moale noho totona.
Gorere Neganai
Taunimanima haida sibona be hanaihanai idia namo. Idia do buruka lasi goada taudia danu be idia daradoko eiava idia gorere diba. Gorere dainai haida ese edia ful-taim hesiai gaukarana idia rakatania, to gabeai Basileia haroro gaukara namo hereana idia karaia. To, ma haida, ena be idia gorere, to ful-taim hesiai gaukarana idia karaia diba. Hegeregere, Hartmut bona Gislind oi laloa.
Hartmut bona Gislind be headava taudia rua, idia be lagani 30 lalonai painia, misinari, bona sekit gaukara idia karaia. Idia ruaosi ese nega haida gorere dikadia idia abia bena gorere murinai edia tauanidia bona edia lalona idia goada lasi. To, idia ese gaukara namona idia karaia bona unai bamona hahetoho idia davaria taudia idia hagoadaia diba. Dahaka sisiba idia henia? “Nega vaira oi laloa, guna gaudia oi laloa lasi. Herevana dahaka ia vara to oi karaia diba gaudia oi karaia. Reana dina ta ta ese Iehova oi hanamoa dalana tamona ia kehoa. Unai dala oi gaukaralaia, bona oi moalelaia.”
Hannelore ena mauri mani oi laloa. Lagani 30 lalonai ia ese ia vara loulou gorerena ia haheaukalaia, to painia bona misinari gaukara, ena adavana ida sekit gaukara bona Betele gaukara ia karaia. Hannelore ia gwau: “Lau ese Satani ia gwauraia hepapahuahu lau laloa noho—ia gwau hekwakwanai be lasi neganai sibona taunimanima ese Iehova idia hesiai henia. Hahetoho lau haheaukalaia neganai, lau ese Satani lau hakoikoia diba danu.” Unai lalohadai ese iseda lalona ia veria goadagoada diba. Laloaboio lasi, hahetoho neganai Iehova oi badinaia noho karana be mai anina bada ia dekenai.—Iobu 1:8-12; Aonega Herevadia 27:11.
Gorere dainai abia hidi maorona ta oi ura oi karaia neganai, Iesu Keriso ena hereva rua inai tanobada ena dokona ia perovetalaia neganai oi laloa. Iesu ia gwau gabu ibounai gorere do idia vara. Ma ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:3, 14; Luka 21:11) Iesu ia diba nega dokona lalonai, ia murinai idia raka taudia be gorere ese do ia hahisidia. To ia diba danu haroro gaukara be goada taudia sibona ese do idia karaia lasi to gorere bada idia abia taudia danu ese do idia karaia. Ena be ita gorere, to ful-taim hesiai gaukarana bema ita karaia noho, Iehova ena ladana ita lalokau henia dainai ita karaia karadia do ia laloaboio lasi.—Heberu 6:10.
Taunimanima Idia Kamonai Lasi Neganai Moale Noho Dalana
Taunimanima ese Basileia haroro gaukarana idia abia dae eiava lasi ese iseda lalohadai ia haidaua diba. Haroro gaukara ia manadalaia tauna ta ia gwau: “Painia taudia danu idia davaria ruma tauna ida herevahereva matamaia be auka herea. Ita ibounai do ita hekwarahi ita moale noho totona.” Oibe, kamonai lasi karana ese iseda moale haroro gaukara lalonai ia hamaragia diba. Unai dainai, bema hanaihanai painia tauna ia davaria taunimanima be idia kamonai lasi, edena bamona ia moale noho diba? Haroro gaukara idia manadalaia taudia ese idia tohoa vadaeni dala idia herevalaia.
Kamonai lasi karana be hekwarahi ta ia havaraia, to ita laloa lasi ita ia halusia vadaeni. Taunimanima momo idia kamonai lasi be badina namona lasi ful-taim hesiai gaukarana rakatania totona. Herevana kamonai lasi karana ita davaria, to ita moale noho diba bema nega bada ita atoa Baibel ita stadilaia namonamo totona. Baibel ese ita ia durua ‘kara namodia ibounai do ita karaia’ totona, bona unai karadia ta be sivarai namona idia kamonai lasi taudia dekenai ita haroro. (2 Timoteo 3:16, 17) Ena be taunimanima idia ura lasi peroveta tauna Ieremia idia kamonai, to unai dainai ena gaukara ia hadokoa lasi. (Ieremia 7:27) Keristani buka amo ita abia heduru ida Baibel ita stadilaia neganai, namo bada do ita davaria bema iseda abidadama idia hagoadaia herevadia bona kamonai lasi karana haheaukalaia herevadia ita laloa bada.
Ita abia dae kamonai lasi karana be hekwarahi ta, to iseda lalohadai be edena bamona ita haroro henia taudia dekenai, mani ita laloa. Dahaka dainai idia kamonai lasi? Hegeregere, Europe ena kahana haida dekenai taunimanima momo herea idia kamonai lasi ena badina ta be tomadiho koikoi ena kara dikadia dainai. Taunimanima idia laloa tomadiho be mai anina lasi edia mauri lalonai, bona tomadiho idia ura henia lasi momokani. Namona be iseda hereva ita haidaua, edia mauri lalonai mai anina bada gaudia ita herevalaia, hegeregere gaukara be lasi, gorere, taravatu utua karana, taunimanima idaudia abia dae lasi karana, hodahoda bona davara hadikaia karana, bona tuari ena dika.
Ruma tauna dekenai ita hereva matamaia neganai, reana unai gabu dekenai ia vara gauna ta do ita gwauraia. Dietmar be hanua ta dekenai ia haroro to taunimanima idia kamonai lasi neganai, ia ese unai bamona ia karaia toho. Hanua tauna ta ia gwau varani unai hanua dekenai dika ta ia vara. Unai murinai iduara ta ta ai, Dietmar ese unai dika dainai ena hebogahisi herevana ia gwauraia. Ia gwau: “Karaharaga taunimanima idia herevahereva matamaia. Iboudiai be unai dika idia laloa. Unai dina ai taunimanima momo ida lau herevahereva namonamo, badina lau hahedinaraia edia mauri lau laloa bada.”
Edeseniai taunimanima ita davaridia, idia dekenai Basileia ita harorolaia be namo. Nega bona gabu idauidau haroro gaukarana ese anina namona ia havaraia diba, bona ita sibona ita hadibaia diba unai gaukara ita karaia totona Baibel bukadia ai idia gwauraia dala ita gaukaralaidia neganai. Ruma tauna ida hereva namodia haida sibona ita herevalaia eiava ia dekenai Gima Kohorona bona Awake! magasin ita rakatania ese moale ia havaraia diba. Bema lou henia ita karaia bona Baibel stadi ita hamatamaia vadaeni, reana taunimanima ta ena ladana do ita abia bema ita henanadai: “Baibel stadi ia ura tauna ta oi diba, a?” Reana unai amo Baibel stadi ma ta do oi hamatamaia diba. Nega ibounai namona be lalohadai namodia ita laloa, Iehova dekenai ita tabekau, bona kamonai lasi karana ese lalo-metau ia havaraia karana ita koua.
Haida Edia Hagoadaia Herevadia
Jürgen bona Christiane be lagani 30 mai kahana painia bona sekit gaukara idia karaia vadaeni. Nega ta gabu ta dekenai idia siaidia bona unuseniai taunimanima momo herea idia kamonai lasi bona idia ura lasi edia lalohadai idia haidaua. Unai nega lalonai Jürgen bona ena adavana idia ura dikadika hagoadaia herevadia haida idia abia! To reana badina haida dainai, kongregesen taudia ma haida ese idia hagoadadia lasi.
Unai ia vara dainai Jürgen ia diba “painia taudia haida edia mauri ia auka. Namona be elda taudia bona ma pablisa taudia ese idia hagoadadia.” Dirava ese Mose ia hamaoroa Iosua do ia hagoadaia. (Deuteronomi 3:26-28) Bona Keristani taudia ese ta ta idia hagoadaia heheni be namo. (Roma 1:11, 12) Basileia idia harorolaia taudia ese ful-taim hesiai gaukara idia karaia taudia be edia hereva amo bona nega haida idia ida idia haroro hebou karana amo idia hagoadadia diba.
Iehova Ia Henia Moalena —Eda Goada Gabuna
Kahirakahira edia mauri ibounai be painia gaukara, misinari gaukara, Betele gaukara, eiava sekit ai kongregesen idia vadivadi gaukarana idia karaia Keristani taudia idia davaria hekwarahi momo be nega kwadogi lalonai idia noho, to haida be nega daudau lalonai idia noho. Namo lasi toana be idia ore lasi hekwakwanai haida ese iseda moale idia hadikaia. Ramon, lagani 45 lalonai tano idauna dekenai hesiai gaukara ia karaia tauna, ia gwau hekwakwanai dainai ita moale lasi neganai, “namona be ita abia vadaeni hahenamo momo do ita laloa bona edia hekwakwanai ese iseda hekwakwanai idia hanaia taudia tausen momo ita laloa danu.” Oibe, tanobada hegegemadai iseda tadikaka ese hekwakwanai idia haheaukalaidia, bona Iehova ese ita ibounai ia naria momokani.—1 Petero 5:6-9.
Unai dainai, bema ita hegeregere ful-taim hesiai gaukara ita karaia noho bona ita rakatania lasi, namona be iseda guba tamana dekenai ita tabekau bena do ita moale noho. Ia ese ena hesiai taudia ia hagoadaia, bona namona be ita ibounai ita laloatao ‘Iehova ese ia henia moalena dainai ita goada.’—Nehemia 8:10.
[Picture on page 21]
“Egu hemami bona ura be gau badadia lasi, to unai gaukara be mai ena anina bada”
[Picture on page 22]
“Emai hemami be Iehova dekenai ai hamaoroa bena ai rakatania”
[Picture on page 23]
“Herevana dahaka ia vara to oi karaia diba gaudia oi karaia. Reana dina ta ta ese Iehova oi hanamoa dalana tamona ia kehoa”
[Picture on page 23]
“Hahetoho lau haheaukalaia neganai, lau ese Satani lau hakoikoia diba danu”
[Picture on page 24]
“Painia taudia haida edia mauri ia auka. Namona be elda taudia bona ma pablisa taudia ese idia hagoadadia”
[Picture on page 24]
“Namona be ita abia vadaeni hahenamo momo do ita laloa”