Abidadama ese Ita Ia Doria Kara ta Ita Karaia Totona!
“Oi itaia, Aberahamo ena abidadama be iena kara namona danu nega tamona idia gaukara. Bona unai dainai iena kara namodia ese iena abidadama idia hamomokania vadaeni.”—IAMESI 2:22.
1, 2. Bema ita be mai eda abidadama, iseda kara be edena bamona?
TAUNIMANIMA momo idia gwau Dirava idia abidadama henia. To, idia gwauraia sibona abidadama ia mauri lasi, ia be mase vadaeni tauanina ta bamona. Hahediba tauna Iamesi ia gwau: “Bema abidadama sibona ia noho, to kara be lasi, unai abidadama be anina lasi [“mase gauna,” NW].” Ia gwau danu Dirava gari henia tauna Aberahamo ena abidadama be “iena kara namona danu nega tamona idia gaukara.” (Iamesi 2:17, 22) Unai hereva edia anina ita dekenai be dahaka?
2 Bema abidadama korikorina ita abia, Keristani hebou dekenai ita kamonai gaudia do ita abia dae sibona lasi. Iseda abidadama do ita hahedinaraia, badina ita be Iehova ena gaukara goadalaia noho Witness taudia. Oibe, abidadama ese ita do ia doria iseda mauri lalonai Dirava ena Hereva ita badinaia bona ita do ia ha-uraia kara ta ita karaia totona.
Haida Sibona Kara Namo Henia be Abidadama Korikorina Lasi
3, 4. Abidadama dainai ma haida be edena bamona do ita kara henia?
3 Bema Dirava bona Keriso dekenai abidadama korikorina ita hahedinaraia, haida sibona do ita kara namo henia lasi. (Iamesi 2:1-4) Iamesi ese ia tore henia taudia haida be Keristani taudia momokanidia edia kara idia hahedinaraia lasi, maka tamona dekena amo taunimanima ibounai idia kara henia lasi. (Roma 2:11) Unai dainai, Iamesi ia gwau: “Ita be Lohiabada Iesu Keriso ita abidadama henia noho. Ia be guba ena hairai diarina ena Lohiabada momokani. Unai dainai namo lasi umui ese toana namo o dagi bada taudia do umui laloa bada, to ogogami bona dagi lasi taudia do umui laloa maragi. Unai be maoro lasi.” Bema abidadama lasi tauna mai ena ima kwakikwaki rini, golo gauna, bona dabua namodia be hebou dekenai ia mai, bona abidadama lasi “ogogami tauna ta, mai ena dabua dikana,” ia raka vareai danu, idia ruaosi idia hanamoa hegeregere be namo, to taga taudia idia laloa guna. “Helai gauna namona” idia abia, to ogogami abidadama lasi taudia idia hamaoroa idia gini noho, o ta ena aena badinai foloa dekenai idia helai.
4 Iehova ese Iesu Keriso ena mauri davalaia boubouna ia henia taga taudia bona ogogami taudia danu durua totona. (2 Korinto 5:14) Bema taga taudia sibona ita laloa bada, Keriso abidadama henia karana amo ita siri, ‘ia be kohu momo tauna, to ita ia durua totona ogogami tauna bamona ia lao, iena ogogami dekena amo ita ese kohu momo do ita abia totona.’ (2 Korinto 8:9) Namo lasi ita be unai bamona dalana ai taunimanima ita laloa—sibona eda mataganigani urana dainai haida ita abia isi. Dirava be maka tamona dekena amo taunimanima ia kara henia, to bema unai ita karaia lasi, ita be ‘ita laloa kerere, kota biaguna dikana ia karaia bamona.’ (Iobu 34:19) Bema ita ura Dirava ita hamoalea, haida sibona do ita kara namo henia lasi bona ‘haida do ita hanamoa koikoi lasi, edia gau namodia do ita davaria totona.’—Iuda 4, 16.
5. Dirava ese daidia ia abia hidi “guba ena kohu momo” idia abia totona, bona nega momo kohu momo herea taudia edia kara be edena bamona?
5 Iamesi ese daidia be taga taudia korikoridia ia hahedinaraia bona ia gwau lalokau be ibounai dekenai ita hahedinaraia, haida dekenai sibona lasi. (Iamesi 2:5-9) ‘Dirava ese ogogami taudia ia abia hidi vadaeni iena Basileia do idia abia totona, bona edia abidadama be guba ena kohu momo bamona.’ Unai be momokani badina nega momo ogogami taudia ese sivarai namona idia kamonaia. (1 Korinto 1:26-29) Kohu momo herea taudia momo be dala idauidau ai ma haida idia kara auka henia, hegeregere moni abiatorehai bona heniatorehai daladia ai, gaukara ena davana maorona idia henia lasi dalana ai, bona gavamani ena kota dekenai. Keriso idia gwauraia dika bona ita idia dagedage henia badina ena ladana ita abia. To namona be iseda lalona ita hadaia “Basileia ena Taravatu” do ita kamonaia, anina be iseda dekena taudia do ita lalokau henia—herevana idia taga eiava idia ogogami. (Levitiko 19:18; Mataio 22:37-40) Unai be Dirava ena ura dainai, ‘kara dika oi karaia’ bema haida sibona oi kara namo henia.
Hebogahisi be Kota Henia Karana Ia Hanaia
6. Hebogahisi lasi dalana ai ma haida ita kara henia neganai, edena dala ai ita be taravatu utua taudia?
6 Bema hebogahisi lasi karana, haida sibona kara namo henia karana unai, ita karaia, taravatu ita makohia. (Iamesi 2:10-13) Bema unai dala tamona dekenai ita kerere, ita ese Dirava ena taravatu ibounai ita utua. Idia sihari kava lasi to idia henaohenao Israela taudia be Mose ena Taravatu idia utua taudia. Ita Keristani taudia be “kara dika ena siahu dekena amo idia ia ruhaia” taudia—gwauhamata matamatana lalonai ia noho lauma Israelana, ena taravatu be edia kudouna ai taudia—edia taravatu ese ita ia kota henia.—Ieremia 31:31-33.
7. Dahaka dainai haida sibona idia kara namo henia taudia be Dirava ena hebogahisi do idia abia lasi?
7 Bema ita gwau ita be mai eda abidadama, to haida sibona ita kara namo henia, dika do ita davaria. Lalokau lasi bona hebogahisi lasi taudia be hebogahisi lasi hahemaoro do idia abia. (Mataio 7:1, 2) Iamesi ia gwau: “Bogahisihisi ia henia tauna ese Kota Biaguna ena bogahisihisi do ia davaria.” Bema Iehova ena lauma helaga ena hakaua ita abia dae bona iseda kara ibounai be mai hebogahisi ida ita karaia, kota negana ai ita do idia gwauraia dika lasi. To, ita do idia hebogahisi henia bona hahemaoro aukana o dikana do ita davaria lasi.
Abidadama ese Gaukara Namodia Do Ia Havaraia
8. Bema tau ta ia gwau ia be mai ena abidadama to kara namodia ia havaraia lasi, dahaka do ia vara?
8 Abidadama dainai iseda lalokau bona hebogahisi idia bada, bona abidadama ese kara namodia ma haida ia havaraia danu. (Iamesi 2:14-26) Ita gwauraia sibona to kara namodia ia havaraia lasi abidadama ese ita do ia hamauria lasi. To momokani, Taravatu badinaia karana amo Dirava vairanai do ita gini mai eda maoromaoro ida be iseda kara ena davana bamona lasi. (Roma 4:2-5) Iamesi ese taravatu dainai ita karaia karadia ia herevalaia lasi to abidadama bona lalokau dainai ita karaia karadia. Bema unai bamona karadia ese ita idia doria, ia ogogami tadikaka dekenai iseda hebogahisi do ita gwauraia sibona lasi. Dabua lasi o ia hitolo tadikaka o taihu dekenai kohu o moni do ita henia. Iamesi ia gwau: “Vadaeni umui ta ese bema [dabu tadikaka] ia hamaoroa, ia gwau, ‘Dirava ese oi do ia hanamoa, oi ese oiemu kopina do oi hasiahua, bona do oi boga kunu.’ Bema unai bamona umui hamaoroa, to dabua ta o aniani ta umui henia lasi neganai, emui hereva be anina lasi.” (Iobu 31:16-22) Unai bamona “abidadama” be ia mauri lasi gauna!
9. Dahaka ese ia hamomokania ita be mai eda abidadama?
9 Reana nega haida Dirava ena taunimanima ita bamoa, to bema ita gwau ita be mai eda abidadama, mai eda kudouna ibounai ida ita karaia kara namodia sibona ese iseda hereva do idia hamomokania diba. Bema Toi Tamona hahediba herevana ita dadaraia bona ita abia dae Dirava momokanina be tamona, unai be namo. To, unai gaudia abia dae sibona karana be abidadama korikorina lasi. “Lauma dikadia danu unai bamona idia abidadama,” bona idia diba Dirava ese idia do ia hadikaia ore dainai, “mai gari danu idia heudeheude noho.” Bema abidadama korikorina ita abia, ita do ia doria kara namodia karaia totona, hegeregere sivarai namona do ita harorolaia bona ogogami tadikakadia dekenai aniani bona dabua do ita henia. Iamesi ia henanadai: “[Dirava ena diba maoromaoro oi abia lasi] kavakava tauna e, bema oi abidadama, to kara namodia oi karaia lasi, vadaeni oiemu abidadama be anina lasi. Inai anina oi diba lasi, a?” Oibe, abidadama ena anina be kara ta karaia.
10. Dahaka dainai Aberahamo idia gwauraia abidadama taudia iboudiai edia tamana?
10 Dirava ia gari henia tauna bona iduhu kwarana tauna Aberahamo be ena abidadama ese ia doria kara ta ia karaia totona. Aberahamo be abidadama taudia iboudiai edia tamana, badina “iena natuna Isako be pata helagana ena latanai boubou totona ia atoa neganai, Dirava ese . . . Aberahamo ena kara namona ia itaia dainai, ia gwauraia maoromaoro.” (Roma 4:11, 12; Genese 22:1-14) Dahaka do ia vara bema Aberahamo be Dirava ese Isako do ia hatorea isi diba bona ia amo garana do ia mai gwauhamatana ia abidadama henia lasi? Unai neganai Aberahamo ese ena natuna do ia bouboulaia toho lasi. (Heberu 11:19) Aberahamo ena kamonai karadia ese ena “abidadama idia hamomokania” eiava idia hagugurua. Unai amo “Buka Helaga ena hereva [Genese 15:6] be momokani, ani? Ia gwau, ‘Aberahamo ese Dirava ia abidadama henia, bona iena abidadama dainai Dirava ia gwau ia be maoromaoro vadaeni.’ ” Aberahamo be Isako ia bouboulaia toho karana amo ia hamomokania Dirava ena hereva gunana, ia gwau Aberahamo be kara maoromaoro tauna, be maoro. Unai abidadama karadia amo ia hahedinaraia Dirava ia lalokau henia bona ia idia gwauraia “Dirava ena turana.”
11. Edena dala ai Rahaba ia hahedinaraia ia be mai ena abidadama?
11 Aberahamo ia hamomokania “kara namodia dainai, taunimanima be Dirava ena vairanai idia maoromaoro, abidadama sibona dainai lasi.” Ieriko ena ariara hahine Rahaba dekenai unai be momokani danu. Ia be “iena kara dainai Dirava ena vairanai ia maoromaoro. Badina be ia ese Israela ena hesiai taudia iena ruma dekenai ia abidia dae, bona dala idauna dekena amo ia siaidia lao,” bena edia inai taudia, Kanana taudia, ese idia abidia lasi. Israela spai taudia ida ia do hedavari lasi neganai, ia diba Iehova be Dirava momokanina, bona ena hereva amo bona ena ariara karana ia rakatania amo ia ese ena abidadama ia hamomokania. (Iosua 2:9-11; Heberu 11:31) Unai abidadama mai ena kara ena sivarai iharuana murinai, Iamesi ia gwau: “Ita diba, tauanina bema mai ena lauma lasi, ia be mase gauna, ani? Vadaeni unai bamona danu, abidadama mai ena kara namodia lasi, be mase gauna.” Tau ta be ia mase vadaeni neganai, ia hamauria siahuna, eiava “lauma” be lasi, bona gau ta ia karaia diba lasi. Ta ese ia gwauraia sibona abidadama be unai mase tauanina bamona, ia mauri lasi bona gau ta ia karaia lasi. Bema abidadama korikorina ita abia, Dirava ia ura karadia do ita karaia.
Emu Malana Oi Biagua!
12. Kongregesen ena elda taudia ese dahaka idia laloa be namo?
12 Hereva henia bona hadibaia karadia ese idia hamomokania diba abidadama ia noho, to namona be idia karaia taudia idia naria namonamo. (Iamesi 3:1-4) Elda taudia be kongregesen ena hadibaia taudia dainai, edia maduna be metau bona Dirava ese edia kara do ia tahua. Unai dainai, namona be mai manau ida edia lalohadai unai gaukara dekenai bona unai gaukara karaia totona idia hegeregere eiava lasi idia tahua. Diba bada idia abia sibona lasi, to unai tatau be Dirava bona edia tadikaka idia lalokau henia bada be gau badana. (Roma 12:3, 16; 1 Korinto 13:3, 4) Namona be elda taudia edia sisiba be Baibel amo. Bema elda tauna be sisiba kererena ia henia bona unai amo ma haida be hekwakwanai idia davaria, Dirava ese Iesu Keriso amo do ia hahemaoro henia. Unai dainai, namona be elda taudia idia manau bona Dirava ena Hereva idia stadilaia bona idia badinaia mai edia abidadama ida.
13. Dahaka dainai hereva dekenai ita kerere?
13 Hadibaia taudia namodia—momokani ita ibounai—ita goevadae lasi dainai “nega momo kerere ita karaia.” Hereva dekenai ita kerere be nega momo ia vara bona ia be dika bada ia havaraia diba hekwakwanai ta. Iamesi ia gwau: “To bema tau ta ese iena hereva dekena amo kerere ta ia karaia lasi, ia be goeva bona namo momokani. Ia ese iena tauanina ibounai ia biagua bona naria diba.” Ita be Iesu Keriso bamona lasi, ita goevadae lasi dainai iseda malana ita biagua hanaihanai diba lasi. Bema unai ita karaia diba, iseda tauanina ena kahana ibounai do ita biagua diba. Hosi be auri maragina bona varo haida amo ita biagua bona iseda ura hegeregerena idia lao, bona bouti badana be lai badana ese ia botaia neganai, tari maragimaragi ta amo bouti taria tauna ese ena ura hegeregerena bouti ia hakaua.
14. Edena dala ai Iamesi ia haheitalaia malana biagua karana be mai ena hekwarahi?
14 Ita ibounai ita diba momokani iseda malana ita biagua be mai ena hekwarahi. (Iamesi 3:5-12) Hosi ia bada, to ia biagua aurina mai ena varo be ia maragi; bouti danu be ia bada bema ena taria gauna ida oi hahegeregerea. Bona tauanina ibounai ida malana oi hahegeregerea neganai, malana ia maragi, “to ia be hekokoroku momo.” Baibel ia hahedinaraia goevagoeva heagi ese Dirava ia hamoalea lasi, unai dainai namona be iena heduru ita tahua unai ita karaia lasi totona. (Salamo 12:3, 4; 1 Korinto 4:7) Ita laloatao, lahi maragina ese uda bada herea ia araia diba, unai dainai ita badu neganai, iseda malana ita biagua be namo. Iamesi ia hahedinaraia “mala be lahi bamona,” bona dika bada herea ia havaraia diba. (Aonega Herevadia 18:21) Gwau-edeede malana ese “kara dika idauidau ia havaraia diba”! Dirava badinaia lasi tanobadana ese ia havaraia dika iboudiai be malana biagua lasi karana dainai idia vara. Malana idia biagua lasi dainai ladana hadikaia herevadia bona hadibaia koikoi idia gwauraia. (Levitiko 19:16; 2 Petero 2:1) Dahaka oi laloa? Iseda abidadama ese ita ia doria bona ita hekwarahi bada iseda malana ita biagua namonamo totona be namo, ani?
15. Ta ese ia biagua lasi malana ese dahaka dika ia havaraia diba?
15 Ita biagua lasi malana ese ‘iseda mauri ibounai ia hadikaia diba.’ Hegeregere, bema taunimanima ese idia davaria hereva koikoi ita gwauraia loulou, momo ese ita do idia gwauraia koikoi taudia. To edena dala ai gwau-edeede malana be ‘iseda noho dalana ibounai ia hakererea momokani diba, badina lahi bamona ita ia araia noho’? Ia dainai iseda mauri lalonai hekwakwanai do idia vara loulou. Ta ese ia biagua lasi malana tamona sibona dainai reana kongregesen taudia ibounai do idia lalohisihisi. Iamesi ese “Gehena” (NW), Hinoma Koura ia herevalaia. Guna, ia be natu bouboulaia gabuna totona idia gaukaralaia, to gabeai ia be Ierusalema ena momoru gabua gabuna ai ia lao. (Ieremia 7:31) Unai dainai Gehena ese hadikaia ore momokani karana ia laulaulaia. Dala ta ai, Gehena ena hadikaia siahuna be gwau-edeede malana dekenai. Bema iseda malana ita biagua lasi, ita hamatamaia lahi dekenai do ita mase ore diba. (Mataio 5:22) Reana ta ita gwauraia dika dainai kongregesen amo ita do idia atoa siri.—1 Korinto 5:11-13.
16. Gwau-edeede malana ia havaraia diba dika ita laloa neganai, dahaka ita karaia be namo?
16 Dirava ena Hereva duahia karana amo oi diba, Iehova ia gwau taunimanima ese animal ibounai do idia biagua. (Genese 1:28) Bona hari animal idauidau momo idia hamanadaia. Hegeregere, falcon manudia idia hadibaia bona labana karana ai idia gaukaralaia. Iamesi ese “idia rau gaudia” ia herevalaia neganai, reana idia haida be idia hamanadaia gaigaidia. (Salamo 58:4, 5) Taunimanima ese lakaradonodono ia biagua diba danu, to kara dika taudia be edia malana idia hamanadaia momokani diba lasi. To, namona be hereva dika, hahemaraia, eiava ladana hadikaia herevadia ita gwauraia lasi. Gwau-edeede malana ese dika bada ia havaraia diba, ia be taunimanima alaia poisini dekena amo ia honu momokani. (Roma 3:13) Madi, hadibaia koikoi taudia edia malana dainai idaunegai Keristani taudia haida ese Dirava idia dadaraia. Unai dainai namona be ita ese hereva momokani negea taudia edia poisini herevadia ita dadaraia, herevana idia herevalaia eiava revareva o buka amo idia halasia.—1 Timoteo 1:18-20; 2 Petero 2:1-3.
17, 18. Iamesi 3:9-12 ese ia hahedinaraia dahaka kerere ia vara diba bona dahaka ita karaia be namo?
17 Dirava abidadama henia bona hamoalea urana ese ita do idia durua hereva momokani negea karana ita dadaraia totona bona iseda malana gaukaralaia kerere karana do ita koua totona. Iamesi ese unai malana gaukaralaia kerere karana ia herevalaia, ia gwau: “Mala dekena amo iseda Lohiabada bona Tamana ita hanamoa noho. Bona mala dekena amo danu taunimanima, Dirava ese iena toana bamona ia karaia taudia, ita hadikaia noho.” (Genese 1:26) Iehova be iseda Tamana badina “ia sibona ese mauri bona laga bona gau ibounai ia henia noho taunimanima dekenai.” (Kara 17:24, 25) Lauma dalanai ia be horoa Keristani taudia edia Tamana danu. Ita ibounai be “Dirava ese iena toana bamona ia karaia taudia,” unai dainai iseda laloa dalana, bona iseda kara maorodia, hegeregere iseda lalokau, hahemaoro maoromaoro, bona aonega danu be iena bamona, animal amo ita idau. Unai dainai, bema Iehova ita abidadama henia, iseda kara be edena bamona?
18 Bema taunimanima ita gwau henia, ena anina be idia latanai dika ita gwauraia, eiava hadikaia herevana ita henia. Ita be lauma helaga ese ia hasiahua peroveta taudia lasi bona ta ita gwauraia dika totona gwaumaoro ita abia lasi dainai, unai bamona hereva ita gwauraia ese ia hahedinaraia idia ita inai henia bona unai kara dainai Dirava ita hanamoa karadia be anina lasi. Uduna tamona amo “hanamoa hereva bona hadikaia hereva” ita gwauraia be maoro lasi. (Luka 6:27, 28; Roma 12:14, 17-21; Iuda 9) Hebou dekenai Dirava hanamoa anedia ita abia bona murinai ita danu idia hebou taudia ita gwauraia dika be kara dikana! Ranu mai mamina namo bona ranu mai iditana be guri tamona amo idia lohilohi daekau hebou diba lasi. “Fig auna ese olive huahua do ia atoa” lasi hegeregerena, damena ranuna ese ranu mai mamina namo ia havaraia diba lasi. Bema ita, hanamoa herevadia do ita gwauraia be namo taudia, be hanaihanai hadikaia herevadia ita gwauraia, lauma dalanai gau ta ia kerere. Bema unai kara ita manadalaia, namona be Iehova ena heduru ita noia, unai bamona hereva dalana ita rakatania totona.—Salamo 39:1.
Dirava Dekena amo Ia Diho Mai Aonega ida Oi Kara
19. Bema guba amo ia mai aonegana ese ita ia hakaua, ma haida ese dahaka namo do idia davaria?
19 Ita ibounai be aonega ita abia be namo bena abidadama taudia hegeregerena do ita hereva bona do ita kara. (Iamesi 3:13-18) Bema Dirava ita gari henia mai hemataurai ida, guba amo ia mai aonegana do ia henia, diba gaukaralaia maoromaoro aonegana unai. (Aonega Herevadia 9:10; Heberu 5:14) Iena Hereva ese ita ia hadibaia ‘ita hekokoroku lasi, to iseda diba namona ese iseda aonega do ia hedinaraia.’ Bona ita hekokoroku lasi dainai, kongregesen ena maino ita habadaia. (1 Korinto 8:1, 2) Bema haida idia heagi idia gwau idia be tadikaka hadibaia namonamo taudia, unai be “koikoi aonega” bona Keristani “hereva momokani” idia hadikaia, badina unai hereva ese hekokoroku ia gwauraia dika. (Galatia 5:26) Edia “aonega” be “tanobada gauna sibona”—Dirava idia dadaraia kara dika taudia edia toana. Ia be “tauanina sibona gauna,” badina tauanina ena ura ese ia havaraia. Danu, ia be “Satani” dekena amo, badina Satani bona ena lauma dikadia idia hekokoroku! (1 Timoteo 3:6) Unai dainai namona be mai aonega bona mai manau ida ita kara bena “kara dikadia ibounai,” hegeregere ladana hadikaia bona haida sibona kara namo henia karadia habadaia dalana ta do ita karaia lasi.
20. Guba amo ia mai aonegana be edena bamona oi herevalaia diba?
20 “Dirava dekena amo aonega ia abia tauna ena kara ginigunana be inai: Ia laloa goevagoeva.” Lauma dalanai bona tauanina dalanai iena kara idia goeva. (2 Korinto 7:11) Ia be “mai ena maino,” bona ita ia ha-uraia maino ita tahua totona. (Heberu 12:14) Guba amo ia mai aonegana dainai ita “laloa manada,” lalohadai aukadia do ita dogoatao lasi bona ma haida do ita kara auka henia lasi. (Filipi 4:5) Ataiai amo ia mai aonegana dainai “kamonai kara totona [ita] hegaegae” (NW); Iehova ena hahediba herevadia ita kamonaia bona ena orea ida ita gaukara hebou. (Roma 6:17) Unai ataiai amo ia mai aonegana dainai hebogahisi ita hahedinaraia. (Iuda 22, 23) “Kara namodia momo” ita havaraia dainai, ma haida ita laloa bona kara namo, kara maoromaoro, bona hereva momokanina hegeregerena do ita kara henidia. (Efeso 5:9) Bona ita be maino havaraia taudia dainai “kara maoromaoro ena huahua” do ita moalelaia, maino ia noho gabudia ai ia tubu namonamo huahua unai.
21. Iamesi 2:1–3:18 ena hereva hegeregerena, iseda abidadama Dirava dekenai ese ita do ia doria dahaka kara idauidau ita karaia totona?
21 Ia hedinarai goevagoeva, abidadama ese ita ia doria kara ta ita karaia totona. Ia dainai maka tamona amo taunimanima ibounai ita kara henia, ita hebogahisi henia, bona kara namodia ita karaia goadagoada. Abidadama ese ita ia durua iseda malana ita biagua bona guba amo ia mai aonegana ida ita kara totona. To unai revareva amo ita dibaia gaudia be unai sibona lasi. Iamesi ena sisiba ma haida ese ita do idia durua Iehova idia abidadama henia taudia hegeregerena ita kara diba totona.
Edena Bamona Do Oi Haere?
◻ Haida sibona kara namo henia karana ena dika be dahaka?
◻ Abidadama bona kara be edena dala ai ita gwauraia hebou?
◻ Dahaka dainai malana biagua be mai anina bada?
◻ Guba amo ia mai aonegana be edena bamona do oi herevalaia?