“Emui Dika Umui Gwauatao Heheni Noho mai Emui Ura Ida”
“Umui haheauka heheni bona emui dika umui gwauatao heheni noho mai emui ura ida.”—KOLOSE 3:13, NW.
“LOHIABADA E, lauegu tadikakana do ia hadikaia lau dekenai, bona iena dika do lau gwauatao ela bona nega hida? Nega 7, o?” (Mataio 18:21) Reana Petero ia laloa ena hereva be hebogahisi bada herevana. Unai neganai, rabi edia sene taudia edia hereva be ta ese ma ta ena kara kererena tamona be nega toi sibona ia gwauatao diba.a Mani oi laloa, Petero be Iesu ena haere ia abia neganai ia hoa! Iesu ia gwau: “Umui lau hamaoroa, nega 7 sibona lasi, to nega 70 x 7.” (Mataio 18:22) Unai namba 7 gwauraia loulou be hegeregere idia gwau “dokona be lasi.” Iesu ena lalohadai be Keristani tauna be ma haida edia dika do ia gwauatao loulou be namo, nega hida do ia karaia be mai ena hetoana lasi bamona.
2, 3. (a) Edena nega haida ai, toana be unai sisiba badinaia be auka? (b) Dahaka dainai ita diba momokani ma haida edia kerere gwauatao be iseda namo do ia havaraia karana?
2 Unai sisiba badinaia be nega haida ia auka. Ita ibounai be kara maoromaoro lasi karana ta ese ia havaraia hisihisina ita mamia vadaeni, ani? Reana oi abidadama henia momokani turana ta be emu hehuni herevana ia gwauraia hedinarai. (Aonega Herevadia 11:13) Emu turana namona ta ena hereva kava karana be reana ‘tuari kaia bamona oi ia gwadaia.’ (Aonega Herevadia 12:18) Guna oi lalokau henia eiava oi abidadama henia tauna ese oi ia kara dika henia dainai, oi ia haberoa dikadika bamona. Unai bamona gaudia idia vara neganai, vaia iseda hemami be ita badu. Reana ita ura lasi kerere tauna ita hereva henia, bona bema dala ia noho ia ita dadaraia vaitani. Reana iseda lalohadai be bema iena kara dika ita gwauatao, ita ia hahisia ena davana do ia abia lasi. To, unai bamona badu ita dogoatao neganai, sibona ita hahisia.
3 Unai dainai, Iesu ese ita ia hadibaia namona be dika ita gwauatao—“nega 7 sibona lasi, to nega 70 x 7.” Iena hahediba herevadia be nega ta ita do idia hadikaia lasi. Ia hadibaia gaudia ibounai be Iehova amo, ‘iseda namo dalana be ita dekenai ia hadibaia noho’ Tauna. (Isaia 48:17; Ioane 7:16, 17) Unai dainai, ma haida edia dika ita gwauatao karana amo namo do ita davaria. Dahaka dainai ta ena dika ita gwauatao be namo bona edena bamona ita karaia ita do herevalaia lasi neganai, reana ita do ia durua gauna be dika gwauatao karana be dahaka bona ia be dahaka lasi do ita herevalaia guna. Ma haida be ita idia habadua neganai, iseda lalohadai dika gwauatao karana dekenai be mai anina bada edia kerere do ita gwauatao diba totona.
4. Ma haida edia dika gwauatao karana be dahaka kara lasi, bona buka ta ese ena anina be edena bamona ia gwauraia?
4 Ita dekenai idia kara kerere taudia edia dika ita gwauatao neganai, ena anina be edia kara ita gwauraia maoro lasi eiava ita hamaragia lasi; danu ita gwau lasi ena anina be iseda hebogahisi idia gaukaralaia kerere taudia do ita koua lasi. Lasi. Mani oi laloa, Iehova ese iseda dika ia gwauatao neganai, iseda kara dika be anina maragi gauna ai ia halaoa lasi, bona kara dika taudia be ena hebogahisi idia gaukaralaia kerere diba lasi. (Heberu 10:29) Insight on the Scriptures ia gwau, dika gwauatao karana be “kerere tauna ena dika gwauatao, ena kara dika dainai ia oi badu henia noho lasi, bona gabeai davana do oi noia lasi.” (Volium 1, rau 861)b Baibel ese ma haida edia dika ita gwauatao ena badina namodia ia henia ita dekenai.
Dahaka Dainai Ma Haida Edia Dika Ita Gwauatao be Namo?
5 Ma haida edia dika ita gwauatao ena badina namona ta be Efeso 5:1 dekenai, ia gwau: “Umui be Dirava ena natuna taudia, iena lalokau. Unai dainai, Dirava ena kara bamona do umui karaia be namo.” Edena dala ai ‘Dirava ena kara bamona do ita karaia’? Unai siri be ia vairanai ia noho sirina dekenai idia hakapua danu, unai siri ta ia gwau: “Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.” (Efeso 4:32) Oibe, dika gwauatao karana dekenai, namona be Dirava ena kara bamona ita karaia. Mero maragina ese ena tamana ena kara ia tohotohoa hegeregere, namona be ita, Iehova ese ia lalokau henia natudia, ita ura iseda hebogahisi guba Tamana bamona ita kara. Iehova be guba amo ena tanobada natudia ia itaia, edia gwauatao heheni karana amo ia idia tohotohoa neganai, unai ese iena kudouna ia hamoalea bada!—Luka 6:35, 36; Mataio 5:44-48 itaia.
6. Edena dala ai Iehova ena dika gwauatao karana bona iseda dika gwauatao karana idia idau?
6 Momokani, dala goevadaena ai dika ita gwauatao diba lasi Iehova bamona. To unai ese ita ia hadibaia dahaka dainai ta ta eda kara kerere ita gwauatao be namo. Mani inai oi laloa: Iehova ena gwauatao karana bona iseda gwauatao karana be idau herea. (Isaia 55:7-9) Ita idia kara dika henia taudia edia kerere ita gwauatao neganai, nega momo ita diba gabeai idia do ita noia iseda dika idia gwauatao totona. Ita taunimanima ibounai be kara dika taudia dainai hanaihanai kara dika tauna ta be kara dika tauna ma ta ena kerere ia gwauatao. To Iehova ese iseda dika ia gwauatao neganai, vadaeni, ia ore. Iseda dika ia gwauatao, to Ia dekenai unai bamona ita karaia ena badina ta be lasi. Bema Iehova, ia kara dika diba lasi Diravana, be mai ena lalokau ida iseda kerere ia gwauatao vaitani, namona be ita kara dika taudia be iseda dika ita gwauatao heheni be namo, ani?—Mataio 6:12.
7. Bema badina namona ia noho ma ta dekenai hebogahisi ita hahedinaraia bona ena kerere ita gwauatao totona, to unai kara ita dadaraia, iseda hetura karana Iehova ida dekenai dahaka do ia vara?
7 Mai anina bada gauna ta be, bema badina namona ia noho ma ta dekenai hebogahisi ita hahedinaraia bona ena kerere ita gwauatao totona, to unai kara ita dadaraia, iseda hetura karana Dirava ida ia hadikaia diba. Iehova ese ita ta ta eda dika ita gwauatao heheni totona ita ia noia sibona lasi, to ia gwau do ita karaia. Baibel ena hereva hegeregerena, ita ura ma haida edia dika ita gwauatao badina ita ura Iehova ese iseda dika do ia gwauatao, eiava ia gwauatao vadaeni dainai. (Mataio 6:14; Mareko 11:25; Efeso 4:32; 1 Ioane 4:11) Bema badina namona ta ia noho ta ena kerere gwauatao totona, to ita ura lasi ita karaia, edena bamona ita laloa diba badina namona ta dainai Iehova ese iseda dika do ia gwauatao?—Mataio 18:21-35.
8. Dahaka dainai dika gwauatao karana ese iseda namo ia havaraia?
8 Iehova ese ena taunimanima dekenai ‘kara maoromaoro dalana ia hadibaia.’ (1 King Taudia 8:36) Ita ia hadibaia iseda dika ita gwauatao heheni neganai, ita diba momokani iseda namo ia tahua. Badina namona dainai Baibel ia gwau: “Dika ena davana do umui henia lasi.” (Roma 12:19) Iseda mauri lalonai badu noho karana be hegeregere maduna metauna ita huaia. Ita dogoatao noho neganai, iseda lalohadai ibounai ia biagua, iseda maino ia hadikaia, bona iseda moale ia hamaragia. Nega daudau ia noho badu be mama hegeregerena, iseda tauanina ia hamanokaia bona gorere ia havaraia. (Aonega Herevadia 14:30) Unai hemami idauidau ita haheaukalaia lalonai, reana unai kerere tauna ena mauri ia idau lasi bona ia diba lasi ita lalo-hekwarahi! Iseda Havaraia Tauna lalokauna ia diba namona be ita hahedinaraia ma haida edia kerere ita gwauatao, edia namo totona sibona lasi, to iseda namo totona danu. Baibel ena sisiba be ta ena dika oi gwauatao, unai be “kara maoromaoro dalana.”
‘Umui Haheauka Heheni Noho’
9, 10. (a) Edena nega ai kerere tauna ita hereva henia lasi to iseda lalona ai ena dika ita gwauatao be namo? (b) Inai hereva ‘umui haheauka heheni noho’ ese dahaka ia hahedinaraia?
9 Tauanina ena bero haida idia maragi sibona to bero ma haida be dobu, bona idia ta ta ibounai be dala tamona ai do oi naria lasi. Ta ese ma ta dekenai ia havaraia lalohisihisina be bero hegeregerena—haida edia dobu be ma haida edia ia hereaia. Taunimanima ita tura henia neganai, iseda hemami idia haberoa sisina karadia ta ta ibounai ita lalo-hisihisilaia bada be namo, a? Ma haida ese ita idia hahesikua kara maragidia idia karaia be vaia mauri lalonai idia vara gaudia, bona reana idia do ita hereva henia lasi, to iseda lalona ai edia kerere do ita gwauatao. Bema taunimanima momo idia diba gau maragina ta dainai idia do ita dadaraia haraga, bona idia ita hamaoroa edia sori herevana ita abia murinai mai hemataurai ida idia do ita kara henia lou, reana unai kara garina dainai ita idia bamoa neganai do idia naria namonamo—eiava ita do idia bamoa momo lasi!
10 Namona be ita be “taunimanima ese idia gwauraia laloa maoromaoro tauna.” (Filipi 4: 5, Phillips) Ita be goevadae lasi taudia bona ita gaukara hebou dainai, ita diba nega ta ta reana iseda tadikaka ese ita do idia habadua bona reana ita ese idia do ita habadua danu. Kolose 3:13 ese ita ia hamaoroa, ia gwau: ‘Umui haheauka heheni noho.’ Unai hereva ia hedinarai ma haida edia kara dainai ita boga-auka be namo; ena be edia kara toana ita ura henia lasi eiava edia lalohadai haida ese ita idia habadua, to ita haheauka. Unai boga-auka bona sibona eda ura biagua karana ese ita do idia durua taunimanima ita kara henia negadia ai ita abia bero maragidia do ita haheaukalaia—bona kongregesen ena maino do ita hadikaia lasi.—1 Korinto 16:14.
Bero Idia Dobu Neganai
11 To edena bamona bema ma haida ese ita idia kara dika henia bona bero dobuna idia karaia? Bema unai be kara dika badana lasi, reana Baibel ena sisiba, ‘ta ta emui kara dika do umui gwauatao,’ ita gaukaralaia haraga diba. (Efeso 4:32) Unai bamona kara, ta ena dika gwauatao totona oi gini hegaegae karana, be Petero ena hereva hegeregerena. Lauma helaga ena siahu amo ia torea, ia gwau: “Gau hereadaena be inai: Umui ura heheni mai emui lalona ibounai ida, badina be lalokau ese kara dika momo ia koudia.” (1 Petero 4:8, NW) Bema ita laloatao ita danu be kara dika taudia, ma haida edia kerere do ita tahua haraga lasi. Dika ita gwauatao neganai, anina be badu ita dogoatao noho lasi bona ita ubua lasi. Unai amo reana iseda hetura karana unai kerere tauna ida do ia dika hanaihanai lasi, bona kongregesen ena dava bada gauna, ena maino, do ita naria. (Roma 14:19) Gabeai, reana unai kerere tauna ena kara do oi laloaboio.
12 To edena bamona bema ta be ita ia kara dika henia momokani, bona bero dikana ita abia bamona? Hegeregere, oi abidadama henia turana ta ese oi ura lasi ia herevalaia sivaraina ta, oi ia hahemaraia diba sivaraina, be ma haida dekenai ia gwauraia hedinarai. Oi lalohisihisi, oi hemarai, oi laloa oi ia badinaia lasi. Reana oi ura oi laloaboio, to oi laloa noho. Unai neganai, namona be kara ta oi karaia unai hekwakwanai oi hanamoa totona, reana kerere tauna oi hereva henia. Aonega dalana be oi naria lasi ela bona oi badu momokani. Paulo ia gwau: ‘Bema umui badu neganai, kara dika do umui karaia lasi. Bona dina ia do diho lasi neganai, emui badu do umui haorea.’ (Efeso 4:26) Paulo ena hereva ena anina ia habadaia gauna be, Iuda taudia dekenai dina ia diho neganai unai dina ia ore bona dina matamatana ia hamatamaia. Unai dainai ena sisiba be inai: Unai hekwakwanai oi hamaoromaoroa haraga!—Mataio 5:23, 24.
13. Ita ia kara dika henia tauna ita hereva henia neganai, iseda tahua gauna be dahaka, bona edena sisiba ese ita do ia durua unai ita havaraia totona?
13 Unai kerere tauna be edena bamona oi hereva henia be namo? Petero Ginigunana 3:11 ia gwau: ‘Maino do oi tahua, bona maino ena dala do oi badinaia noho.’ Emu tahua gauna be emu badu do oi hahedinaraia lasi, to emu tadikaka ida maino oi havaraia lou dalana oi tahua. Unai oi karaia totona, namona be hereva aukadia bona emu toana eiava imana gaukaralaia dalana amo emu badu oi hahedinaraia lasi; oi hereva henia tauna danu ese do ia karaia garina. (Aonega Herevadia 15:18; 29:11) Danu, namona be inai bamona hereva oi gaukaralaia lasi, “Nega ibounai oi . . . !” eiava, “Nega ta lasi oi . . . !” Unai bamona herevadia ese ia do idia doria sibona ena maoro ia hepapahuahulaia totona. Namona be emu gadona ena regena bona emu vairana ena toana amo oi hahedinaraia oi ura unai hekwakwanai, oi ia hahisia bada gauna, oi hamaoromaoroa. Namona be emu hemami, ia vara gauna dekenai, be oi hahedinaraia goevagoeva. Nega oi henia iena kara ena anina ia herevalaia totona. Iena hereva oi kamonai henia. (Iamesi 1:19) Unai amo dahaka namo do ia vara? Aonega Herevadia 19:11 ia gwau: “Tau ta ena aonega ese haheauka ia henia noho, vadaeni ia badu haraga lasi. Bema tau ta ese oi dekenai ia kara dika, do oi laloaboio be kara namona momokani.” Unai tauna ena hemami bona ena kara edia badina oi lalo-pararalaia neganai, reana oiemu lalohadai bona hemami dikana ia dekenai be do idia ore idia lao. Bema iseda tahua gauna be maino ita ura ita havaraia lou bona unai lalohadai ita dogoatao noho, nega momo unai kerere o daradara do ita hamaoromaoroa, sori herevana do ita gwauraia, bona dika do ita gwauatao.
14. Ma haida edia dika ita gwauatao neganai, edena dala ai ita laloaboio?
14 Ma haida edia dika gwauatao karana ena anina be unai dika ita laloaboio vaitani, a? Mani Iehova ena haheitalai oi laloa, stadi herevana ginigunana lalonai ai herevalaia. Baibel ia gwau Iehova ese iseda kara dika ia laloaboio neganai, ita laloa lasi ena anina be unai kara dika ia laloa lou diba lasi. (Isaia 43:25) To, ia laloaboio dalana be dika ta ia gwauatao neganai, vaira negana ta ai unai kara dika dainai ita do ia kota henia lasi. (Esekiela 33:14-16) Unai hegeregerena, kerere tauna ena dika ita gwauatao neganai, ita laloa lasi ena anina be ena kara dika ita laloa lou diba lasi. To, ita laloaboio diba dalana be unai kerere dainai dohore ita badu henia lou eiava unai do ita gwauraia lou lasi. Unai hekwakwanai ita hamaoromaoroa murinai, ia dainai ita udu mauri be maoro lasi; danu, bema unai kerere tauna ita dadaraia vaitani, bona kongregesen murimuri ai idia atoa siri tauna bamona ita kara henia, unai be lalokau lasi karana. (Aonega Herevadia 17:9) Momokani, iseda hetura karana ia namo lou momokani totona, reana nega sisina do ia ore guna; sedira guna ita moalelaia hebamo do ita moalelaia lou lasi. To iseda Keristani tadikaka bamona ia ita lalokau henia noho bona do ita hekwarahi noho ia danu maino ita karaia noho totona.—Luka 17:3.
Toana be Dika Ita Gwauatao Diba Lasi Neganai
15, 16. (a) Keristani taudia ese ia kara dika to ia helalo-kerehai lasi tauna ena dika idia gwauatao lasi be kerere, a? (b) Baibel ena sisiba Salamo 37:8 ai be edena bamona do ita badinaia?
15 To edena bamona bema ma haida ese ita idia kara dika henia dalana be bero dobu hereana idia karaia bamona, bona unai kara dika tauna be ena kerere ia abia dae lasi, ia helalo-kerehai lasi, bona ita dekenai sori herevana ia gwauraia lasi? (Aonega Herevadia 28:13) Baibel ia hahedinaraia goevagoeva Iehova ese idia helalo-kerehai lasi bona edia dala dikana idia manadalaia vadaeni taudia edia kara dikana ia gwauatao lasi. (Heberu 6:4-6; 10:26, 27) To ita be edena bamona? Insight on the Scriptures ia gwau: “Keristani taudia ese mai edia dagedage bona mai edia ura ida kara dika idia karaia bona unai kara amo idia helalo-kerehai lasi taudia edia dika idia gwauatao lasi be kerere lasi. Unai bamona taudia be Dirava ena inai taudia ai idia lao.” (Volium 1, rau 862) Namona be kara gageva, kara bodaga, eiava kara dika rohoroho edia hisihisi idia mamia Keristani taudia ta lasi be do ia laloa ta ese ia doria ia helalo-kerehai lasi kerere tauna ena dika ia gwauatao totona.—Salamo 139:21, 22.
16 Ita lalo-parara vadaeni, kara dika rohoroho dainai dika idia davaria taudia ese hisihisi bona badu idia mamia. To, mani oi laloatao, badu bona lalohisihisi ese ita idia hadikaia diba. Bema ta ena sori herevana eiava ena kara dika gwauraia hedinarai herevana ita naria to ita abia lasi, reana iseda lalohisihisi do ia bada ia lao. Bema unai kara gageva ita laloa loulou noho, ita lalonai ia noho badu ia ubua noho, bona lauma, lalona, bona tauanina dalanai ita do ia hadikaia. Unai dala amo, iseda hisihisi ia havaraia tauna ita koua lasi, to ita ia hahisia noho bamona. Baibel ena aonega sisibana be inai: “Do oi badu lasi, do oi dagedage lasi.” (Salamo 37:8) Keristani taudia haida idia davaria gabeai idia abia hidi diba unai dika do idia gwauatao, ena anina be ia idia badu henia noho lasi—unai kara idia gwauraia maoro lasi, to badu dikadika karana idia dadaraia. Unai gauna ibounai be hahemaoro maoromaoro Diravana ena imana dekenai idia rakatania vadaeni, bona unai ese edia lalo-hekwarahi ia hanamoa bena mai lalo-hisihisi bada lasi ida idia noho diba.—Salamo 37:28.
17. Apokalupo 21:4 ai, Iehova ena gwauhamata namona ese dahaka hagoadaia hereva ia henia?
17 Unai bamona bero ia dobu herea neganai, reana hari inai nega lalonai iseda lalona amo do ita kokia vaitani diba lasi. To Iehova ese tanobada matamatana ia gwauhamatalaia bona ia lalonai taunimanima edia “matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:4) Unai neganai ita laloatao gaudia ese lalohisihisi bada, reana hari iseda kudouna ia hametaua hisihisina, do ia havaraia lasi.—Isaia 65:17, 18.
18 Unai ita naria noho neganai, ita goevadae lasi kara dika taudia be tadikaka bona taihu bamona do ita noho hebou bona do ita gaukara hebou. Ita ibounai be kerere ita karaia. Nega ta ta, ita ta ta be ma ta ena lalona ita hamoalea lasi bona ena lalona ita hahisia danu. Iesu ia diba iseda tadikaka edia dika do ita gwauatao nega momo, unai dainai ia gwau, “nega 7 sibona lasi, to nega 70 x 7”! (Mataio 18:22) Momokani, Iehova bamona dika ita gwauatao vaitani diba lasi. To, nega momo iseda tadikaka ese ita idia kara dika henia neganai, edia dika ita gwauatao dalana be iseda badu ita rakatania, bona do ita laloaboio dalana be dohore unai gaudia dainai nega daudau herea do ita badu henia noho lasi. Dika ta ita gwauatao bona ita laloaboio neganai, kongregesen ena maino ita naria sibona lasi to iseda lalona bona kudouna edia maino ita naria danu. Bona gau badana be, iseda lalokau Diravana, Iehova, ia henia maino do ita moalelaia.—Filipi 4:7.
[Footnotes]
a Babulonia Talmud bukana ena hereva hegeregerena, rabi edia sene taudia edia hereva ta be inai: “Bema tau ta be kara kerere ia karaia, nega ginigunana, nega iharuana, bona nega ihatoina ia karaia neganai ena dika oi gwauatao, to nega namba 4 ia karaia neganai ena dika oi gwauatao lasi.” (Yoma 86b) Unai taravatu ia vara ena badina ta be Amosa 1:3; 2:6; bona Iobu 33:29 edia hereva idia lalo-pararalaia lasi.
b Watchtower Bible and Tract Society of New York, Inc. ese ia halasia bukana.
Riviu Henanadai
◻ Dahaka dainai ma haida edia dika ita ura ita gwauatao be namo?
◻ Edena bamona negadia ai ita ‘haheauka heheni noho’ be namo?
◻ Ma haida ese ita idia kara dika henia dainai iseda lalona ia hisihisi dikadika neganai, maino ai ita hamaoromaoroa dalana be dahaka?
◻ Ma haida edia kara dika ita gwauatao neganai, edena dala ai unai ita laloaboio?
1. (a) Ma haida edia dika ita gwauatao totona Petero ese “nega 7” ia gwauraia toho neganai, dahaka dainai reana ia laloa unai be hebogahisi bada herevana? (b) Iesu ia gwau ta ena dika be “nega 70 x 7” ita gwauatao ena anina be dahaka?
5. Efeso 5:1 ese edena badina namona ta ia gwauraia, ma haida edia dika do ita gwauatao totona?
11. Ma haida ese ita idia kara dika henia neganai, dahaka ese ita do ia durua edia dika ita gwauatao totona?
12. (a) Dahaka kara ta ita karaia be namo, ita ia kara dika henia bada tauna ena kara ita gwauatao totona? (b) Edena dala ai Efeso 4:26 ena hereva ese ia hahedinaraia hekwakwanai ita hamaoromaoroa haraga be namo?
18. (a) Dahaka dainai iseda tadikaka bona taihu ita kara henia neganai edia dika ita gwauatao be namo? (b) Ma haida ese ita idia kara dika henia neganai, edena dala ai unai kerere ita gwauatao bona ita laloaboio diba? (c) Edena dala ai unai ese ita ia durua?
[Picture on page 16]
Kerere tauna ita badu henia noho neganai, reana ia be iseda lalo-hekwarahi ia diba lasi
[Picture on page 17]
Maino havaraia lou totona ma haida oi hereva henia neganai, hekwakwanai oi hamaoromaoroa haraga diba