Hereva Momokani ese Taunimanima Edia Mauri Ia Haidaua

MADI, hari inai negai taunimanima momo edia mauri be auka, nega haida ia dika momokani. Unai bamona taudia ese moale idia davaria diba, a? Haida be taravatu utua taudia bona edia dekena taudia idia kara dika henia. Idia be taunimanima namodia ai do idia lao diba, a? Unai henanadai ruaosi edia haere be oibe. Taunimanima ese edia kara bona edia mauri idia haidaua diba. Aposetolo Paulo ese dala ia hahedinaraia, ia gwau: “Dirava ese emui lalona do ia hagiroa, vadaeni do umui matamata, bona idau momokani. Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.”—Roma 12:​2.

Reana inai hereva “Dirava ena ura” dainai, lagani 20 bamona gunanai, Paulo ese ataiai herevana ia do torea lasi negana ai, Iesu be ena hahediba taudia dekenai ia gwauraia herevana ita laloa. Iesu ia gwau: “Hereva momokani be do umui diba, bona hereva momokani ese umui do ia ruhaia.” (Ioane 8:​32) Iesu ese ia gwauraia “hereva momokani” ena anina be Dirava ena lauma amo Baibel lalonai ia halasia gaudia​—mai anina bada gauna be Dirava ena ura. (Ioane 17:​17) Baibel ena hereva momokani ese taunimanima ia ruhaia momokani, a? Dirava ena ura ita badinaia noho karana ese iseda mauri ia haidaua diba, a? Oibe. Mani haheitalai haida oi laloa.

Mauri Ena Anina

Vanegai sibona, Gibraltar dekenai, Moisés, lalohisihisi bada tauna, ia noho. Ia gwau: “Lau be inuinu kekero tauna bona dala ai lau mahuta. Lau daradara bada. Hanuaboi ibounai Dirava lau noia lau do ia hebogahisi henia bena dina ma ta do lau mauri lasi. Mai taitai danu Dirava lau nanadaia badina be dahaka lau vara bema lau be dika momokani, egu gaukara be lasi, egu ruma bese be lasi, bona durua tauna ta be lasi. Dahaka dainai lau mauri noho?” Bena, gau ta ia vara.

Moisés be ma ia gwau: “Roberto, Iehova ena Witness tauna ta lau davaria neganai, lau diba Dirava ese egu guriguri ia kamonai. Roberto ese Baibel ta bona Baibel stadi durua buklet ta ladana Dirava Ia Ura Dahaka Ita Karaia?a lau dekenai ia henia. Dina ibounai, hanuaboi ai lau mahuta patana dekenai, Baibel ai stadilaia hebou. Hua ta murinai, Roberto be Iehova ena Witness taudia edia Kingdom Hall dekenai lau ia abia lao. Nega sisina murinai, Baibel ena hereva momokani ese egu lalohadai ia haidaua momokani. Hari murimuri ai lau mahuta lasi; ma danu lau inuinu kekero lasi bona kuku lau ania lasi. Egu mauri ia idau, bona lau moale. Egu ura be nega sisina murinai bapatiso do lau abia bona Iehova ia hesiai henia Witness tauna ta ai do lau lao.”

Iena mauri ia idau momokani! Taunimanima be helaro lasi neganai, nega momo ena badina be diba dekenai idia dabu. Idia ese Dirava eiava ena ura namona idia diba lasi. Moisés hegeregerena, unai diba ia abia neganai, goada ia abia bona mai gari lasi ida ena mauri ia haidaua. Salamo torea tauna ese Dirava ia guriguri henia bona unai guriguri ena haere be Moisés ena mauri lalonai ia vara, ia gwau: “Oiemu diari bona oiemu hereva momokani, be mani oi siaia mai, idia ese dala maorona lau dekenai do idia hedinaraia. Vadaeni inai diari ese maoromaoro oiemu ororo helagana, Siona dekenai lau do idia hakaua. Unai be oiemu Dubu Helaga, oi noho gabuna.”—Salamo 43:3.

Belize ai, Daniel dekenai unai bamona ia vara danu. Daniel be dala ai ia mahuta lasi​—ia be mai ena gaukara namona. To lagani 20 lalonai ia ese drag bona kekero muramura gaukaralaia hanaihanai karana ia rakatania toho bona matabodaga karadia ia karaia. Ena be Katolik ruma bese lalonai ia bada, to Daniel ese mauri ena anina ia diba lasi, bona Dirava ia noho eiava lasi ia daradaralaia. Dubu idauidau dekenai ia lao heduru tahua totona, to ia davaria ena turadia, dubu dekenai idia lao taudia bona dubu gunalaia taudia danu, be drag bona kekero muramura idia gaukaralaia kava. Unai nega lalonai, ena adavana ese edia headava ia hadokoa gwauraia.

Ia daradoko dainai Daniel be drag ania kava karana hadokoa kliniki dekenai ia vareai. To, ia diba unai gabu ia rakatania murinai, bema heduru do ia abia lasi, drag do ia ania kava lou. To edena bamona heduru? May 1996 ai, dina rua unai kliniki ia rakatania murinai, Daniel ese Iehova ena Witness tauna ta dekenai ia lao bona unai Witness tauna ia hoa bada badina Daniel ese ia noia, ia gwau, “Mani emu kara lau ida Baibel oi stadilaia.” Unai Witness tauna ese dala ia hegaegaelaia, pura ta ta ai nega rua Daniel ida do ia stadi totona, bona nega sisina murinai Daniel ese ena mauri be Dirava ena ura hegeregerena ai ia haidaua matamaia bona ena turana gunadia ia rakatania bona drag bona kekero muramura idia gaukaralaia kava lasi bona matabodaga karadia amo idia gini siri Keristani turadia ia abia. Unai dala amo Daniel ia davaria Baibel ena hereva be momokani, ia gwau: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.” (Aonega Herevadia 13:20) Nega sisina murinai, ia gwau: “Egu mauri lalonai nega ginigunana hari lalona goevana ena mamina lau diba.” Daniel ena mauri ia idau danu.

Puerto Rico ai, tau ma ta ena mauri ia idau momokani. Ia be dibura ruma lalonai bona taunimanima idia laloa ia be tau dikana momokani, badina taunimanima sisina momo ia alaia mase. Baibel ena hereva momokani ese ia haidaua diba, a? Oibe. Iehova ena Witness tauna ta ese Gima Kohorona bona Awake! magasin haida ia henia, bona magasin ma haida totona ia noia haraga. Ia ida Baibel stadi idia hamatamaia, bona Baibel ena hereva momokani ese ena kudouna ia veria dainai, ia haidaua gaudia be ibounai idia itaia diba. Ia idau ena toana ginigunana ta be ena huina latana ia utua kwadogi bona ena auki huina ia utua oho.

Baibel ia gwau Dirava ese idia helalo-kerehai momokani bona edia mauri idia haidaua taudia edia kara dika ia gwauatao. Paulo ia gwau: “Umui diba lasi, a, kara dika taudia be Dirava ena Basileia do idia davaria lasi? . . . Umui haida be guna unai bamona umui karaia. To Dirava ese umui emui kara dika ia huria goeva vadaeni.” (1 Korinto 6:9, 11) Daradara be lasi, unai hereva ese unai tauna ia hagoadaia, Kara 24:​15 ena hereva ese ia hagoadaia hegeregerena, ia gwau: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.” Ia gwau: “Lau ura mase taudia do idia toreisi lou neganai do lau noho, badina lau ura lau hamasea taudia do lau noia egu dika do idia gwauatao.”

Ruma Bese Matamatana

Dina ta ai, Luis, Iehova ena Witness taudia edia ful-taim haroro tauna Argentina ai, ese tauhau ta ia hedavari henia, ena mauri be mai hebogahisi danu. Ia vara neganai ena tama sina ese idia rakatania, bona tama sina lasi natudia naria gabudia idauidau dekenai ia bada. Ena mauri lagani be 20 bamona neganai, ena sinana ena gabu ia dibaia bona lalona ia hadaia ena sinana kahirakahira do ia noho. Ia gaukara goada, moni bada ia gogoa, bona ena sinana ia noho siti dekenai ia lao. Sinana ese ia abia dae ia ida ia noho ela bona ena moni ibounai ia ore, bena sinana ese ia lulua. Unai bamona dadaraia karana dainai ia ura sibona ia hamasea.

To, Luis ese Baibel ena hereva momokani be unai tauhau dekenai ia hahedinaraia diba. Unai hereva momokani lalonai be inai gwauhamata ia noho: “Egu tamana bona sinana, ese lau idia rakatania, to Lohiabada ese lau do ia abia dae.” (Salamo 27:10) Unai tauhau ia davaria ena Tamana ta be guba ai ia noho bona do ia rakatania diba lasi. Hari ia moale bada, badina ruma bese matamatana lalonai ia noho, Iehova ena ruma bese unai.

Unai tano tamona dekenai tau ma ta be Iehova ena Witness tauna ta ia hamaoroa Gima Kohorona magasin ia ura henia. Dahaka dainai? Badina ena headava ia hanamoa. Toana be dina ta unai tauna be gaukara gabuna ia rakatania neganai, momoru gauna lalonai Gima Kohorona magasin ia itaia, ena sinado be leta badadia amo idia torea, ia gwau “Headava Hadokoa Karana.” Iena headava ia dika bona ia bona ena adavana ese idia parara dalana idia hegaegaelaia vadaeni dainai, unai magasin ia abia bona ia duahia matamaia. Ruma dekenai ia abia lao bona ena adavana ida ia duahia. Idia ruaosi ese unai magasin lalonai ia noho Baibel ena sisiba idia badinaia toho. (Efeso 5:⁠21–​6:4) Nega sisina murinai, edia noho hebou be ia namo ia lao. Parara dalana hegaegaelaia karana idia koua bona hari mai lalo-tamona ida idia ese Baibel idia stadilaia hebou.

Uruguay dekenai, tau ma ta ladana Luis be ia moale lasi momokani. Drag ania kava karana, meamea karana, kaivakuku tomadiho henia karana, kekero muramura gaukaralaia kava karana​—unai be ena mauri idia hadikaia gaudia haida. Dokonai, Luis be ia daradara momokani dainai, Dirava ia noho lasi lalohadaina ia abia dae. Ena turana ta ese buka ladana Life​—How Did It Get Here? By Evolution or by Creation?b ia henia Luis dekenai. Unai dainai Iehova ena Witness taudia ia bamoa sisina, to nega daudau lasi murinai Luis be kekero muramura bona drag ia gaukaralaia lou. Lalohisihisi negana ta lalonai momoru ese ia hahonua koupa dekenai ia helai, ia guriguri bona ena guriguri be “Iesu Keriso ena tamana” dekenai ia gwauraia, badina Dirava ena ladana ia diba namonamo lasi.

Ia ese Dirava ia noia bema tanobada dekenai ia noho be mai ena badina ta, mani do ia hahedinaraia. Luis ia gwau: “Kerukeru, lau diba tauna ta ese ia gaukaralaia lou lasi bukana ta ia henia lau dekenai. Ena ladana? Apokalupo​—Ena Hagugurua Negana Ia Kahirakahira!”c Unai buka ese ia durua ena henanadai haerelaia totona. Luis be heduru totona ia guriguri lou, Dirava hesiai henia dalana idia hahedinaraia tomadihona ia davaria totona. Hoa gauna ta ia vara! Iduara ena gaba regena ia kamonai bona murimuri ai Iehova ena Witness taudia rua idia gini. Maoromaoro Luis ese idia ida Baibel ia stadilaia matamaia. Lauma dalanai ia tubu haraga bona ia laloa hahenamo badana ia abia badina hari ia be bapatiso Witness tauna ta. Ena mauri ia goeva bona ma haida ia durua edia mauri lalonai anina idia davaria totona. Salamo 65:2 ena hereva ia momokani ia dekenai, ia gwau: “Oi ese aiemai guriguri oi kamonai. Taunimanima ibounai be oi dekenai do idia mai.”

Philippines dekenai, Allan be edia lalohadai idia goadalaia stiuden tauna ta. Ia be orea ta ena memba ta, edia ura be “gavamani idia hamorua bona unai amo gabeai urudia be maka tamona ai do idia noho diba.” To, dina ta ai, Iehova ena Witness taudia ia davaria bona Baibel amo Dirava ena palani taunimanima totona ia dibaia. Unai palani ena kahana ta be Dirava ena lauma amo idia torea gwauhamata: “Nega daudau lasi lalonai kara dika taudia do idia ore. Edia gabu do umui tahua, to do umui davaria lasi. To manau taudia ese noho gabuna tano do idia abia, do idia helai namonamo, mai moale bona mai maino danu.” (Salamo 37:10, 11) Allan ia gwau: “Nega kwadogi lalonai lau diba emai orea ese ia tahua gaudia be idau negai Baibel lalonai idia gwauhamatalaia. Ai ura bada gaudia ibounai be Dirava ena Basileia henunai do idia vara.” Hari Allan ese Dirava ena Basileia ia abia isi bona ma haida ia durua, Baibel ena hereva momokani idia abidadama henia totona.

Oibe, taunimanima ese Dirava ena Hereva, Baibel, ena hereva momokani idia badinaia neganai, edia mauri ia haidaua. Momokani, nega ta do ia mai idia noho taudia ibounai be edia mauri do idia haidaua bona Dirava ena ura idia badinaia. Unai be do ia idau momokani! Unai neganai, peroveta herevana ta do ia momokani, ia gwau: “Dirava ena ororo helagana dekenai, dika ta, o hadikaia gauna ta do ia noho lasi. Badina be tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.”​—Isaia 11:⁠9.

[Footnotes]