Headava Dinana Idauna Ta

MOZAMBIQUE ena not kahana ai, mai ena tubutubu gaudia momo kourana ta ia noho, ororo mai edia hairai​—haida dekenai nadi momo idia noho bona ma haida ai tubutubu gaudia be momo​—ese unai koura idia hagegea. Fíngoè ena hanua be unai gabu dekenai ia noho. Keru negana ena hanuaboi lalodiai, guba dekenai hisiu momo idia diaridiari, bona hua ena diari badana ese hanua taudia edia rei kakoro amo idia karaia guhi rumadia ia hadiaria. Unai gabu namo hereana ai, headava idauna ta idia karaia.

Taunimanima handred momo be hora momo, dina momo danu, idia raka, unai headava idauna dekenai idia lao totona. Haida ese gabu aukadia bona dikadia idia hanaia, uda sisia, laiona, bona elefant idia noho gabudia unai. Vadivadi taudia momo be edia baege sibodia lasi, to kokoroku, nanigosi, bona uma aniani idia mailaia danu. Hanua dekenai idia ginidae murinai, hanaihanai Keristani hebouhebou totona idia gaukaralaia gabu palakana dekenai idia lao. Ena be laolao dainai idia hesiku, to idia moale, bona edia kiri toana ese ia hahedinaraia do ia vara  gauna be mai edia ura ida idia naria.

Do idia headava taudia be daidia? Idia be momo! Oibe, tatau mai edia hahine ida be momo herea. Idia be taunimanima momo do idia itaia totona unai headava idauna idia karaia lasi. To, idia be lalohadai maorona idia abia lalo-momokani taudia, rejista opesi amo daudau idia noho dainai, guna edia headava idia rejista diba lasi taudia unai. Idia ibounai be Iehova ena Witness taudia ida Baibel idia stadilaia neganai, Dirava ena lalohadai headava dekenai idia dibaia. Idia diba, Havaraia Tauna, headava ia Hamatamaia Tauna, idia hamoalea totona tano ena taravatu hegeregerena edia headava idia rejista be namo, Iesu ena vara negana lalonai, Iosepa bona Maria ese rejista taravatuna idia badinaia hegeregerena.​—Luka 2:​1-5.

Headava Totona Idia Hegaegae

Iehova ena Witness taudia edia brens opesi taudia Mozambique dekenai idia laloa heduru do idia henia. Idia ese tano ena siti badana, Maputo, ai ia noho Ministries of Justice and Interior idia hereva henia guna, taravatu ia gwauraia karadia idia diba totona. Bena, Tete provinsi ena siti badana ai idia gaukara misinari taudia ese unai headava totona idia hegaegae lalonai, unai gabu ena gavamani taudia idia hereva henia. Misinari taudia, Notary taudia, bona Civil Identification Department taudia be Fíngoè hanuana dekenai do idia lao dinana idia abia hidi. Unai idia karaia lalonai, brens opesi taudia ese edia headava idia ura idia rejista taudia idia noho kongregesen iboudiai dekenai revareva idia siaia, do ia vara gauna idia diba namonamo totona. Witness taudia bona gavamani taudia ese unai headava dinana idauna idia naria noho mai edia ura ida.

Sunday, May 18, 1997 ai, misinari taudia toi bona gavamani taudia be Fíngoè dekenai idia ginidae. Unai gabu ena siahu taudia ese gavamani rumana kahirakahira dekenai mahuta gabuna namona idia hegaegaelaia gavamani taudia totona. To, idia mai gavamani taudia ese Iehova ena Witness taudia edia heabidae karana idia laloa bada dainai, idia ura misinari taudia ida edia ruma maragidia ai idia noho. Idia hoa, badina idia davaria nadunadu tauna ta be unai gabu ena kongregesen elda tauna ta bona headava dinana totona taunimanima idia laloa maragi gaukara ia karaia tauna ta be loaloa naria tauna. Danu, idia itaia misinari taudia idia moale bona ena be ruma maragidia ai idia noho bona tini maragidia idia gaukaralaia idia digudigu totona, to idia maumau lasi. Unai bamona taunimanima mai edia mauri dala idauidau edia turana karana goadana be guna idia itaia lasi. To, idia laloa bada gauna be abidadama, taunimanima ese tano ena taravatu bona Dirava ena dala idia badinaia totona idia hekwarahi bada amo idia hahedinaraia abidadama unai.

Moale Negana

Tatau bona hahine idia ginidae neganai, maoromaoro headava totona idia karaia be namo gauna ginigunana idia hegaegaelaia: edia vara negana ena setifiket idia abia. Idia iboudiai be mai edia haheauka ida laini ai idia gini, Civil Registry taudia ese edia pepadia idia henia totona idia naria. Bena laini ma ta ai idia lao edia piksa idia abia totona, bona unai murinai Civil Identification Department taudia dekenai idia lao edia identity kadi idia abia totona. Bena, Civil Registry taudia dekenai idia giroa lou, idia ura bada gauna, headava setifiket, idia hegaegaelaia totona. Unai murinai, mai edia haheauka ida idia naria noho tau ta be megafon amo edia ladana idia boiboilaia totona. Headava setifiket henia karana ese ibounai edia kudouna ia hamarerea. Headava matamata taudia be mai davana bada troufi bamona edia headava setifiket idia abia isi neganai, iboudiai idia moale bada herea.

Unai ibounai be dina ena siahu bada henunai ia vara. To, siahu bona kahu ese unai headava dinana ena moale idia hadikaia diba lasi.

Tatau edia dabua be namo herea, idia momo be jeket bona neketai idia atoa. Hahine taudia ese vaia edia gabu ai idia karaia dabuadia idia atoa, ena kahana ta be dabua latana mai ena kala momo, idia gwauraia capulana, bona idia ese edia gabana dekenai idia kwatua. Haida be unai bamona dabua lalonai beibi idia huaia danu.

Gau iboudiai idia heau namonamo, to idia be momo dainai dina tamona lalonai unai gaukara ibounai idia karaia haorea diba lasi. Dibura ia diho neganai, gavamani taudia be mai edia hebogahisi ida idia gwau idia mai taudia iboudiai do idia durua. Idia gwau “iseda tadikaka” idia rakatania diba lasi, badina be idia hekwarahi bada unuseniai idia mai totona. Unai bamona idia gaukara hebou karana bona sibona edia ura idia tahua lasi karana be do ai laloaboio lasi.

Hanuaboi ai keru be bada. Haida be ruma maragidia dekenai idia mahuta diba, to momo be murimuri ai lahi kahirakahira idia noho hebou. Unai ese headava dinana ena moale ia hadikaia lasi. Lahi ena regerege ia noho, to kiri regena bona tiuni hani ai ane idia abia taudia edia rege ai kamonai diba. Edia pepapepa matamatadia idia dogoatao neganai, momo ese dala dekenai idia vara gaudia edia sivarai idia herevalaia.

Daba rere ai, haida be hanua ena ihuanai idia lao edia kokoroku, nanigosi, bona uma aniani idia hoihoilaia totona, unai amo edia headava idia rejista karana ena davana idia abia. Momo ese edia animal idia “bouboulaia” bamona, badina edia davana korikorina idia abia lasi. Ogogami taudia dekenai, nanigosi be dava bada gauna; to mai edia ura ida idia hoihoilaia idia headava bona Havaraia Tauna idia hamoalea totona.

Laolao Ena Hekwarahi

Unai taudia haida be daudau amo idia raka mai. Chamboko bona ena hahine, Nhakulira, be unai bamona taudia. Unai headava negana ena hanuaboi iharuana ai, edia aena be lahi kahirakahira idia hasiahua neganai, edia sivarai idia herevalaia. Ena be Chamboko ena mauri laganidia be 77, ena matana ta ia kepulu bona matana ma ta amo ia itaia sisina sibona, to ena kongregesen taudia oredia ese idia bamoa neganai, dina toi lalonai aena kavakava ia raka, badina ena lalona ia hadaia lagani 52 lalonai ena hahine ida ia noho kava negana be taravatu hegeregerena ia rejista totona.

Anselmo Kembo, ena mauri lagani be 72, be lagani 50 bamona Neri ida ia noho kava vadaeni. Dina haida bena edia laolao idia hamatamaia neganai, ena uma ai ia gaukara bona ginigini badana ese ena aena ia gwadaia. Karaharaga hospital dekenai idia abia lao heduru ia abia totona. To, ena lalona ia hadaia edia laolao be aena amo do ia karaia, bona ena be ena aena ia hisihisi bona ia raka be auka, to Fíngoè dekenai ia lao. Dina toi lalonai idia raka. Anselmo ese ena imana dekenai ena headava setifiket ia dogoatao neganai, ena moale be bada herea.

Headava matamata tauna, Evans Sinóia, guna adavana rua ia abia tauna, ena sivarai ai gwauraia be namo danu. Dirava ena Hereva amo hereva momokani ia dibaia neganai, ia ura ena hahine ginigunana ida taravatu hegeregerena edia headava ia rejista, to unai hahine ia ura lasi, Evans ia rakatania bona tau ma ta ida ia lao. Ena hahine iharuana, ia danu ese Baibel ia stadilaia, ia ura Evans ia adavaia. Idia ruaosi ese laiona bona uda animal ma haida idia noho gabuna idia raka hanaia. Dina toi idia raka murinai, idia danu be taravatu hegeregerena edia headava idia hamomokania.

Friday ai, misinari taudia bona gavamani taudia idia ginidae bona dina ima murinai, unai gaukara idia haorea. Identity kadi 468 bona vara negana ena setifiket 374 idia karaia. Idia karaia headava setifiket edia namba be 233! Mamina be moale bada herea momokani. Ena be idia hesiku, to idia iboudiai idia moale unai gaukara totona idia hekwarahi. Ita daradara lasi, unai headava idauna dekenai idia mai taudia ibounai ese edia lalona bona kudouna dekenai maka ta ia atoa bamona, unai nega do idia laloatao ela bona hanaihanai. Ia be headava dinana idauna ta!