Mai Manau ida Iehova Ena Dala Badinaia Noho — Gima Kohorona INTANET LAIBRI

Basileia Haroro Ripoti

Mai Manau ida Iehova Ena Dala Badinaia Noho

‘UMUI manau taudia ibounai e, Iehova umui tahua.’ Unai hereva, lagani 2,600 bamona gunanai Heberu peroveta tauna Sepanaia ese ia gwauraia herevana, be hari inai negai danu, tanobada hegegemadai idia gwauraia noho. (Sepanaia 2:3) Ta ese Iehova ia tahua ena anina be dahaka? Kara ginigunana be ia mauri noho Dirava momokani tamona, Iehova, ia dibaia.—Ieremia 10:10; Ioane 17:3.

To, namo lasi ita gwau ia ese diba ia abia dainai Dirava ese do ia lalo-namo henia. Lasi. Unai ia abia totona, gau badana be ia abia dibana ia badinaia danu. Edena dala ai? Dala be inai, Dirava ena taravatu hegeregerena mai manau ida ena lalona bona ena kara ia haidaua, Suriname amo ia mai ekspiriens ese ia hahedinaraia hegeregerena.—Efeso 4:22-24.

Eddy, ena mauri lagani be 35 bamona sikuli tisa ta, ese inai henanadai edia haere maorodia ia tahua: ‘Hari inai negai, tomadiho ena anina taunimanima edia mauri dekenai be dahaka?’ bona ‘Unai idaunegai bukana, Baibel, be hari inai nega ena saiens ida ia hegeregere, a?’ Iehova ena Witness taudia ese idia vadivadi henia bona unai henanadai edia haere be Baibel amo idia henia neganai, Eddy ia kamonai namonamo. Ia ese pepa dekenai Witness taudia edia haere ia torea danu, do ia hamomokanidia totona.

Guna, Eddy be dubu ta ia lao henia bona unuseniai idia gwau Dirava ese maniki badadia edia toana ia haidaua sisina sisina dalanai taunimanima idia vara. Unai dainai, Witness taudia ese ia dekenai Life—How Did It Get Here? By Evolution or by Creation? bukana idia hahedinaraia neganai, mai ena ura ida ia abia. Unai buka ese Baibel ena hereva, Iehova ese gau ibounai ia havaraia herevana, ia herevalaia namonamo, bona unai hereva ese ena lalona ia veria. Ena Baibel stadi amo ia dibaia goevagoeva hereva momokani ia davaria vadaeni!

To hari hahetoho ia davaria. Eddy ena noho gabuna ai taunimanima idia henaohenao bona idia koikoi momo. Unai dainai, ia dekenai dala rua idia noho: idia ida daiutu tamona ia noholaia taudia edia mauri dalana dikana ia badinaia eiava unai bamona kara ia dadaraia bona Dirava ia hanamoa mauri dalana ia abia hidi. Mai aonega ida Eddy ese Dirava ena mauri dalana ia abia hidi. Ia ese hebamo dikana ibounai bona unai ruma ia rakatania.—1 Korinto 15:33, 34.

Eddy be Kingdom Hall dekenai hebou ia lao matamaia murinai, lauma dalanai ia tubu haraga. Danu, ena dabua bona ena tauanina ena toana ia hanamoa bona ena turadia bona varavara dekenai ia dibaia gaudia ia herevalaia matamaia. Gabeai, ena moale ia bada badina gwaumaoro idia henia “Sivarai Namona” harorolaia tauna ai ia lao totona. (Mataio 24:14; Kara 20:20) Nega daudau lalonai ia naria dinana be December 1996 ai ia ginidae, bapatiso amo ia hahedinaraia ia ese Iehova dekenai ena mauri ia gwauhamatalaia.

Lagani ta ta ai, kudou-momokani taudia handred tausen haida ese ‘Iehova idia tahua’ boiboina idia kamonai henia. Unai idia karaia lalonai, idia davaria Aonega Herevadia 22:4 ena hereva be momokani, ia gwau: “Lohiabada do oi gari henia, bona do oi manau. Inai bamona oi karaia neganai, kohu, bona matauraia, bona mauri do oi davaria.” Oibe, mai manau ida Iehova ena dala idia badinaia noho neganai, hereva momokani idia ura henia taudia ese unai bamona hahenamo harihari idia davaria, bona mai edia abidadama ida inai tanobada dekenai do idia abia noho daudau hahenamodia idia naria noho.—Salamo 37:29.

[Maps on page 18]

(For fully formatted text, see publication.)

Caribbean Sea

SURINAME

GUYANA

FRENCH GUIANA

BRAZIL

[Credit Line]