Lahi Ororona Badibadinai Idia Noho Bona Idia Haroro

“IA BE hagaria gauna. Reana ia be Baibel ia herevalaia tanobada ena dokona bamona. Namona be nega ibounai ai naria namonamo bona Iehova Dirava vairanai ai noho kerere lasi.” Unai be Víctor ena hereva, ia be Iehova ena Witness tauna ta Mexico ai, bona ia ese Popocatépetl, momo idia gwauraia Popo, lahi ororona kahirakahira ia noho bona unai hereva amo sibona ena sivarai ia gwauraia.

Lagani 1994 amo ema bona hari tanobada hegegemadai idia halasia nius dekenai unai lahi ororona, regerege ia halasia ororona, idia herevalaia.a Gavamani taudia idia gwau unai lahi ororona ena uduna amo kilomita 30 lalonai idia noho gaudia ibounai be dika do idia davaria diba. Unai lahi ororona ena saut kahana be dika momokani badina ena uduna be unai kahana dekenai ia diho sisina bona uduna dekenai idia noho koupa amo lava bona kopukopu do idia aru diho diba.

Momo idia laloa dahaka do ia vara Mexico City dekenai, bema unai lahi ororona do ia pou momokani. Unai siti ese dika do ia davaria, a? Danu, lahi ororona ena saut kahanai, Morelos provinsi dekenai idia noho taudia be edena bamona? Unai kahana dekenai idia noho taudia ibounai be dika do idia davaria diba danu, a? Bona lahi ororona badibadinai idia noho taudia, dina ibounai idia diba lasi dahaka do ia vara taudia, be edena bamona?

Lahi Ororona ese Ia Havaraia Diba Dikana

Mexico City ena ihuana gabuna ena daudau Popocatépetl amo be kilomita 70 bamona ororo ena notwest kahanai, to unai siti ena kahana haida edia daudau be kilomita 40 sibona. Ita gwau diba, unai siti badana mai ena taunimanima milioni 20 be reana dika do idia davaria lasi. To, bema unai lahi ororona ese kahu ia halasia momo neganai, bona lai ia bada danu, reana unai gabu dekenai gau haida do ia hadikaia diba.

Nega momo lahi kahuna ese ororo ena ist kahana ai dika ia havaraia. Unai gabu dekenai Puebla ena siti bona ma siti bona taoni maragidia momo idia noho bona taunimanima 200,000 be unai dika bada do ia vara diba gabuna lalonai idia noho. Sunday, May 11, 1997 ai, unai lahi ororona ese lahi kahuna bada herea ia halasia bona gabu ena kahana kahana ia diho, ela bona Veracruz provinsi dekenai, ororo amo ena daudau be kilomita 300 ma haida ist kahanai. Lahi ororona ena saut kahanai, Morelos provinsi dekenai, siti bona taoni haida mai edia taunimanima 40,000 bamona ese dika bada idia davaria diba danu.

Unai ibounai bogaraginai, Iehova ena Witness taudia idia noho bona idia gaukara. Mexico City ai, kongregesen 1,700 bamona lalonai edia namba be 90,000 ia hanaia. Watch Tower Society ena brens opesi be Mexico City murimurinai ena notist kahanai ia noho, lahi ororona amo ena daudau be kilomita 100 bamona. Unai brens dekenai idia gaukara volantia taudia edia namba be 800 ia hanaia, bona volantia taudia 500 bamona be konstraksen gaukara badana idia karaia. Idia ibounai be dika bada ia vara diba gabuna murimurinai idia noho.

Morelos provinsi dekenai, Iehova ena Witness taudia edia kongregesen be 50 bamona bona Basileia harorolaia taudia edia namba be 2,000 ia hanaia. Unai kongregesen haida be Tetela del Volcán bona Hueyapan ai idia noho, bona ororo ena uduna amo edia daudau be kilomita 20 bamona sibona. Ma danu, ist kahanai Puebla provinsi dekenai, kongregesen haida mai edia pablisa taudia 600 bamona idia noho bona lahi ororona amo edia daudau be kilomita 20 ia lao 30 sibona. Momokani, idia be dika bada do idia davaria diba.

Iehova Ena Witness Taudia Idia Gaukara Noho

Ena be nega ibounai dika ia vara diba, to Iehova ena Witness taudia ese unai gabu ai edia haroro gaukara idia hadokoa lasi. Idia ese edia Keristani hebou edia sediual idia badinaia danu, bona unai ese idia ia durua, inai nega aukana lalonai edia lalo-tamona bona abidadama idia goada noho totona. (Heberu 10:24, 25) Unai kongregesen ta amo ia mai sivaraina ia gwau: “Taunimanima ese edia lalohadai Basileia ena sivarai namona dekenai idia haidaua momokani. Hegeregere, hanua maragina ta ai taunimanima 18 ese Baibel stadi idia abia dae.”

Kilomita 20 lahi ororona amo ia noho kongregesen ta ese sivarai idia torea ia gwau: “Pablisa taudia edia namba ia bada ia lao. Inai kongregesen be November 1996 ai idia haginia. Unai murinai hua 6 lalonai, taunimanima 10 idia hegeregere haroro gaukara idia hamatamaia totona. Pablisa taudia haida edia noho gabudia edia daudau ororo ena uduna amo be kilomita 20 bamona sibona. Unuseniai Keristani heboudia idia karaia, bona hebou dekenai idia lao taudia edia namba be 40 bamona.”

Magdalena, San Agustín Ixtahuixtla, Puebla ai, kilomita 25 lahi ororona amo ia noho hahinena, be ia gaukara goada noho bona Baibel stadi momo ia karaia. Ororo ia pou negana ta murinai ia vara gauna ia herevalaia.

“Ai idia hadibaia emai ruma ai rakatanidia be namo, bona unai ai karaia​—⁠lahi kahuna ia diho noho lalonai. Ena be haraga ai lao be gau badana, to idia ida Baibel stadi lau karaia Dorado ruma besena lau laloa. Tadikaka haida bona lau be Dorado taudia edia ruma dekenai ai lao bona idia ai durua dika do ia vara lasi gabuna dekenai idia lao totona. Kahirakahira ia noho Puebla ena siti ai, Iehova ena Witness taudia edia heduru komiti taudia ese edia gaukara idia hamatamaia vadaeni. Ai idia kara henia dalana be Dorado ruma bese taudia idia hoalaia bada. Emai Keristani tadikaka ese idia hegaegaelaia vadaeni gabu idauidau dekenai ai noho. Ena be emai noho gabudia amo daudau ai noho, to ai dabu lasi. Unai ruma bese taudia be guna Kingdom Hall ai hebou haida dekenai idia lao, to guna idia hedavari henia lasi tadikakadia ese idia hahedinaraia lalokauna idia hoalaia. Emai noho gabudia dekenai ai giroa bona pura haida murinai, unai ruma bese taudia be hanaihanai hebou dekenai idia lao matamaia. Nega daudau lasi murinai, idia hegeregere sivarai namona harorolaia pablisa taudia ai idia lao. Hari idia rua be bapatiso idia abia vadaeni. Idia be hua haida lalonai heduru painia gaukara idia karaia bona idia hegaegae noho regula painia gaukara idia hamatamaia totona.”

Martha, lagani 20 kekenina ta, ena noho gabuna ena daudau ororo ena uduna amo be kilomita 21 bamona, bona ena be ena tauanina ia dika to dala ia tahua noho haroro gaukara ia karaia totona. Lagani toi gunanai lahi ororona ia mareremarere negana ta lalonai, hereva momokani ia dibaia. Ororo dekenai ia noho dainai, uilisea ia gaukaralaia diba lasi, to haroro gaukara ia karaia neganai doniki ia guia. Hebou dekenai ia lao neganai danu doniki ia guia. Kongregesen taihudia ese Martha idia durua doniki latanai ia daekau bona ia amo ia diho totona, bona Martha ese Iehova ia tanikiu henia bada badina lalokau tadikaka edia orea lalonai ia noho diba. Hua ta ta ai, ena haroro gaukara ena hora be 15 idia hanaia.

Unai bamona daudau gabudia ai, nega momo Iehova ena Witness taudia edia dekena taudia ese idia doria goadagoada tomadiho aria badadia lalonai idia vareai totona. Kilomita 20 bamona ororo amo ia noho hanuana ta, Tulcingo dekenai, tau ta idia siaia Witness taudia amo aria ta ena heduru monina ia abia totona. Tadikaka ese mai edia manau ida idia hahedinaraia dahaka dainai unai tomadiho ariadia lalonai idia vareai diba lasi. Unai tau ia ura dikadika tadikaka amo moni ia abia dainai idia ia bamoa matamaia, bona edia hahediba herevadia haida ia dibaia matamaia. Ia moale bada badina ena Katolik Baibel amo ena henanadai edia haere ia davaria. Lagani tamona lalonai vadaeni, ia bona ena adavana bona natuna kekeni be hanaihanai hebou dekenai idia lao bona ia gwau ia ura sivarai namona harorolaia pablisa ai ia lao.

Edena Bamona Oi Hegaegae Diba?

Lahi ororo idia diba bada taudia ese edia stadi idia karaia noho bona Popocatépetl dikana ena sivarai idia halasia, to ta ia diba namonamo lasi dahaka do ia vara bona edena negai. Nius halasia taudia bona kahirakahira idia noho taudia idia gwau unai lahi ororona be karaharaga do ia pou diba. Dika do ia vara diba. Momokani, gavamani taudia ese unai idia laloa momo bona dika badana do ia vara diba dainai idia ura idia hegaegae namonamo. To ita lalo-parara idia ura lasi dika ena sivarai idia halasia haraga, badina idia ura lasi taunimanima hutuma be edia ruma idia rakatania kava. Unai dainai, taunimanima be dahaka idia karaia be namo?

Baibel ena aonega herevana ia gwau: “Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.” (Aonega Herevadia 22:3) Unai dainai, aonega dalana be nega ia do noho lalonai roho mauri dalana idia hegaegae, namo lasi idia “raka lao” gau ta do ia vara lasi bamona, bona namo lasi idia laloa gau ta ia vara matamaia neganai do idia kara. Unai gabu ena Iehova ena Witness taudia be unai lalohadai namona idia abia.

Vanegai, Watch Tower Society ena brens opesi taudia haida be Puebla provinsi ai sekit bona distrik naria taudia ida idia hebou, badina dika ia vara diba gabuna ai idia noho kongregesen idia diba namonamo. Palani idia karaia sekit bona distrik naria taudia bona heduru komiti ena memba taudia be kilomita 25 bamona ororo ena uduna amo idia noho ruma bese ta ta iboudiai idia vadivadi henia totona. Unai ruma bese idia durudia, ororo ia do pou lasi neganai unai dika ia vara diba gabuna do idia rakatania idia laloa totona. Motuka bona noho gabudia idia hegaegaelaia taunimanima 1,500 be sibona edia ruma idia rakatania bona Puebla ena siti dekenai ma haida ida idia noho totona idia lao. Ruma bese haida be siti ma haida dekenai idia noho varavara taudia dekenai idia lao.

Dala Badana ai Dika Do Ia Vara Herevana Idia Halasia

Popocatépetl ese kwalahu, lahi, bona regerege ia halasia dainai, ia hahedinaraia goevagoeva ia pou negana be kahirakahira. Gavamani taudia ese dika idia gwauraia neganai, gau badana be idia ura idia roho mauri taudia ibounai be edia hereva idia kamonai bona idia badinaia. Lahi ororona kahirakahira gabudia ai idia noho Iehova ena Witness taudia be nega ibounai idia naria namonamo dika do idia davaria garina bona ma haida idia durua idia ese unai dika do idia lalo-parara bona nega ia do noho lalonai gau ta idia karaia totona.

Dala badana ai danu, Iehova ena Witness taudia ese Baibel ena peroveta herevadia edia diari dainai, tanobada ai idia vara gaudia idia laloa. Tuari, tano mareremarere, hitolo, gorere, bona taravatu utua karadia edia anina be lahi ororona ena kara edia anina hegeregerena. Idia be Iesu Keriso ese ia perovetalaia “tanobada dokona” ena toana ena kahana idauidau. Ena be ta ia diba lasi unai dokona be edena negai do ia mai, to ita daradara lasi ia mai noho bona ia be kahirakahira momokani.​—Mataio 24:​3, 7-​14, 32-​39.

Gau badana be hari inai negai tanobada ena kahana iboudiai dekenai taunimanima ese Iesu ena sisiba idia laloa namonamo, ia gwau: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina, vadaeni Lohiabada ena Dina do ia mai haraga, umui hegaegae lasi garina.” (Luka 21:34) Ia hedinarai goevagoeva unai be aonega dalana. Lahi ororona ena kara ita laloa maragi lasi hegeregerena, namona be taunimanima ena Natuna, Iesu Keriso, ia mai negana ita laloa maragi lasi, ia gwau: “Unai dainai, do umui hegaegae, badina be Taunimanima ena Natuna do ia mai ena hora be umui diba lasi.”​—Mataio 24:44.

[Footnote]

[Pictures on page 23]

Martha (doniki ia guia) bona ma haida be Popocatépetl badibadinai idia haroro