Dirava Ena Orea Lalonai Oi Noho Namo
“Iehova ena ladana be kohoro aukana. Kara maoromaoro tauna be ia lalonai ia heau vareai bena ia ese ia gimaia.”—AONEGA HEREVADIA 18:10, NW.
IESU ena mase negana ia kahirakahira neganai, ena murinai idia raka taudia totona ena tamana ia guriguri henia. Idia ia laloa bada dainai, ia gwau: “Oiemu hereva lau henia vadaeni idia dekenai, bona tanobada ese ia badu henia vadaeni idia dekenai, badina idia be tanobada ena lasi, lau hegeregerena, lau be tanobada ena lasi. Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria.” (Ioane 17:14, 15) Iesu ia diba tanobada dekenai Keristani taudia be dika do idia davaria diba. Tanobada ese ia inai henidia ena toana ia hahedinaraia daladia be sivarai koikoi amo idia ia herevalaia bona ia dagedage henidia. (Mataio 5:11, 12; 10:16, 17) Inai tanobada amo kara gageva ia vara danu.—2 Timoteo 4:10; 1 Ioane 2:15, 16.
2. Keristani taudia be edeseniai lauma dalanai noho namo do idia davaria diba?
2 Keristani taudia do ia inai henia tanobadana ena anina be Dirava idia badinaia lasi bona Satani ese ia biagua noho taudia. (1 Ioane 5:19) Inai tanobada ena bada ese Keristani kongregesen ena bada ia hanaia, bona Satani ena goada ese taunimanima edia goada ia hanaia momokani. Unai dainai, tanobada ena badu ese dika ia havaraia diba. Iesu ena murinai idia raka taudia be edeseniai lauma dalanai noho namo idia davaria diba? The Watchtower December 1, 1922 gauna, ena hereva ta ese haere ia herevalaia, ia gwau: “Hari ita be dika dinana lalonai ita noho. Satani ena orea bona Dirava ena orea idia tuari heheni. Idia tuari dikadika.” Inai hepapahuahu lalonai, Dirava ena orea be lauma dalana ai noho namo gabuna. Lagani 1920 murinai, inai hereva “Dirava ena orea” idia gwauraia matamaia. Vadaeni, unai orea be dahaka? Bona edena dala ai ia lalonai ita do ia gimaia diba?
Iehova Ena Orea
3, 4. (a) Dikseneri ta bona The Watchtower idia gwau orea (organization) ena anina be dahaka? (b) Edena dala ai ita gwau diba Iehova ena Witness taudia tanobada hegegemadai be orea ta?
3 Concise Oxford Dictionary ia gwau, orea (organization) ena anina be “ia gaukara hebou oreana.” Unai hereva ita laloa neganai, ita lalo-parara aposetolo taudia ese dala idia hegaegaelaia Keristani taudia ginigunadia be edia kongregesen ta ta lalodiai idia haboua, hakaua oreana Ierusalema dekenai ena henari henunai dainai, unai “Keristani taudia ibounai” ita gwauraia orea ta be maoro. (1 Petero 2:17) Hari inai negai, Iehova ena Witness taudia edia orea ena gaukara dalana be unai bamona. “Harihari gaudia,” hegeregere mamoe naria taudia bona hadibaia taudia, ese unai Keristani ginigunadia edia lalo-tamona karana idia hagoadaia. Idia haida be kongregesen ta ta idia vadivadi henia, to idia haida be elda taudia kongregesen ta ta dekenai. (Efeso 4:8, 11, 12; Kara 20:28) Unai bamona “harihari gaudia” be hari inai negai Iehova ena Witness taudia edia lalo-tamona karana idia hagoadaia noho.
4 The Watchtower November 1, 1922 gauna, ese inai hereva “orea (organization)” ia herevalaia ia gwau: “Orea ta ena anina be taunimanima haida idia gaukara hebou, palani ta do idia karaia guguru totona.” Unai Gima Kohorona ia hahedinaraia Iehova ena Witness taudia idia gwauraia orea ta, to idia be “inai hereva sect ena anina hegeregerena lasi, to anina be Baibel Stiuden taudia [Iehova ena Witness taudia] idia gaukara goada Dirava ena ura idia karaia totona bona Lohiabada ese gau ibounai ia karaia hegeregerena, ia heau namonamo dalana ai idia karaia.” (1 Korinto 14:33) Aposetolo Paulo ese ia hahedinaraia iena negai idia noho Keristani taudia edia gaukara ia heau namonamo danu. Ia ese horoa Keristani taudia be tauanina ta ida ia hahegeregerea. Unai tauanina be mai ena kahana momo, bona idia ta ta be mai ena gaukara, unai dainai tauanina ibounai be ia gaukara namonamo diba. (1 Korinto 12:12-26) Unai haheitalai ese orea ta ena gaukara ia haheitalaia namo herea! Dahaka dainai Keristani taudia edia gaukara idia haheaua namonamo? “Dirava ena ura” idia hagugurudia totona, Iehova ena ura idia karaia unai.
5. Dirava ena tanobada oreana be dahaka?
5 Baibel be idaunegai ia gwau hari inai negai Keristani taudia do idia tamona, “bese” tamona ai “tano” tamona dekenai do idia haboua, bona ‘tanobada taudia edia huanai diari bamona do idia hedinarai.’ (Isaia 66:8, NW; Filipi 2:15) Hari inai negai, unai “bese” oreana taudia edia namba be milioni 5 mai kahana ta ia hanaia vadaeni. (Isaia 60:8-10, 22) To, Iehova ena orea ena bada be unai sibona lasi. Aneru danu be unai orea lalonai.
6. Dirava ena orea ena anina badana hegeregerena, ia lalonai daidia idia noho?
6 Aneru bona Dirava ena taunimanima idia gaukara hebou sivaraidia be momo. (Genese 28:12; Daniela 10:12-14; 12:1; Heberu 1:13, 14; Apokalupo 14:14-16) Unai hegeregerena, The Watchtower May 15, 1925 gauna, ia gwau: “Aneru helagadia ibounai be Dirava ena orea taudia.” Bona ma ia gwau: “Dirava ena orea ena kwarana dekenai be Lohiabada Iesu Keriso, siahu bona goada ibounai ia abia tauna.” (Mataio 28:18) Unai ena anina badana be Dirava ena orea lalonai idia noho taudia be guba ai bona tanobada ai Dirava ena ura karaia totona idia gaukara hebou taudia ibounai. (Maua itaia.) Unai orea lalonai ita noho be hahenamo namo hereana! Bona mauri gaudia iboudiai, guba dekenai bona tanobada dekenai, be mai lalo-tamona ida Iehova Dirava hanamoa totona do idia gaukara hebou negana ita naria noho be moale bada herea gauna! (Apokalupo 5:13, 14) Dirava ena orea ese hari inai negai edena bamona ena orea taudia ia gimaia?
Dirava Ena Orea ese Ita Ia Gimaia—Edena Dala Ai?
7. Dirava ena orea ese edena dala ai ita ia gimaia?
7 Dirava ena orea ese heduru ia henia diba, Satani bona ena koikoi karadia amo ita ia gimaia totona. (Efeso 6:11) Satani ese Iehova idia tomadiho henia taudia ia doria, ia dagedage henidia, bona ia tohodia neganai, ena tahua gauna be tamona sibona: ‘edia raka dalana namona’ amo ia hakaudia siri totona. (Isaia 48:17; Mataio 4:1-11 itaia.) Hari inai nega lalonai unai hahetoho idauidau amo ita raka siri vaitani diba lasi. To, iseda hetura karana namona Iehova bona ena orea ida ese ita do ia hagoadaia bona gimaia, bona unai ese ita do ia durua ‘dala namona’ dekenai ita raka noho totona. Unai amo, eda helaro ena anina do ita davaria.
8. Iehova ena guba oreana ese iena hesiai taudia tanobada dekenai be edena bamona ia durudia?
8 Dirava ena orea be edena dala ai unai bamona ita ia gimaia? Gau ginigunana be, ita ese Iehova ena hesiai anerudia edia heduru ita abia. Iesu ia lalo-hekwarahi bada herea neganai, aneru ta ese ia durua. (Luka 22:43) Petero be idia hamasea diba negana ai, aneru ta ese hoa dalana ai ia hamauria. (Kara 12:6-11) Ena be hari inai negai unai bamona hoa karadia idia vara lasi, to Iehova be ena orea taudia ia gwauhamata henidia, edia haroro gaukarana lalonai aneru edia heduru do idia abia. (Apokalupo 14:6, 7) Nega momo hekwakwanai aukadia idia davaria neganai, edia goada ia hanaia goadana idia abia. (2 Korinto 4:7) Danu, idia diba “Lohiabada ena aneru ese, Dirava dekenai idia gari taudia ia naridia noho, bona dika dekena amo ia hamauridia noho.”—Salamo 34:7.
9 Iehova ena tanobada oreana danu be ita ia gimaia diba. Edena dala ai? Aonega Herevadia 18:10 (NW) ai ita duahia herevana be inai: “Iehova ena ladana be kohoro aukana. Kara maoromaoro tauna be ia lalonai ia heau vareai bena ia ese ia gimaia.” Ia gwau lasi Dirava ena ladana gwauraia loulou sibona ese ita do ia gimaia. Lasi, to Dirava ena ladana lalonai ita heau vareai ena anina be Iehova ita abidadama henia. (Salamo 20:1; 122:4, NW) Ena anina be iena lohia siahuna, iena taravatu bona hakaua herevadia ita abia isi, bona iena gwauhamata ita abidadama henidia momokani. (Salamo 8:1-9; Isaia 50:10; Heberu 11:6) Unai ena anina be Iehova sibona ita tomadiho henia. Unai dala ai Iehova idia tomadiho henia taudia sibona be salamo torea tauna ida inai bamona idia hereva diba: “[Iehova] ena ladana dainai ita moale noho. Iena ladana helagana dekenai ita abidadama henia.”—Salamo 33:21; 124:8.
9, 10. Edena dala ai ita gwau diba “Iehova ena ladana be kohoro aukana,” bona Dirava ena orea ibounai lalonai unai hakaua herevana be edena bamona idia badinaia diba?
10 Dirava ena tanobada oreana lalonai idia noho taudia ibounai be Mika ida idia gwau: “Ita ese [Iehova], iseda Dirava do ita tomadiho henia, bona kamonai henia, ela bona hanaihanai.” (Mika 4:5) Hari inai negai ia noho oreana ena huanai be “Dirava ena Israela,” bona Baibel ia gwau iena ladana dainai ena bese taudia ai ia halaodia. (Galatia 6:16; Kara 15:14, NW; Isaia 43:6, 7; 1 Petero 2:17) Unai dainai, Iehova ena orea lalonai ita noho ena anina be ita be Dirava ena ladana lalonai noho namo idia tahua bona idia davaria taudia huanai ita noho.
11. Edena dala haida ai Iehova ena orea ese ia lalonai idia noho taudia ia gimaia?
11 Danu, Dirava ena tanobada oreana be abidadama oreana, abidadama tamona taudia idia hebou bona ta ta idia durua bona hagoadaia heheni oreana. (Aonega Herevadia 13:20; Roma 1:12) Unai orea lalonai Keristani mamoe naria taudia ese mamoe taudia idia naria, gorere bona lalo-metau taudia idia hagoadaia, bona idia moru taudia idia haginia lou totona idia hekwarahi. (Isaia 32:1, 2; 1 Petero 5:2-4) “Hesiai tauna mai ena kamonai, bona mai ena kara maoromaoro” ese unai orea amo nega korikori ai ‘aniani ia henia.’ (Mataio 24:45) Unai “hesiai tauna,” horoa Keristani taudia oreana unai, ese lauma gaudia namo hereadia ia henia—Baibel amo ia mai diba maoromaorona, mauri dekenai ita ia hakaua lao diba gauna. (Ioane 17:3) Unai “hesiai tauna” ena hakaua namona dainai, Keristani taudia ia durua kara maoromaoro taravatudia idia badinaia namonamo bona inai dika idia davaria diba gabuna ena huanai ‘do idia aonega, gaigai bamona, bona do idia dagedage lasi, pune manu bamona.’ (Mataio 10:16) Bona heduru idia abia, hanaihanai ‘Lohiabada ena gaukara do idia karaia goadagoada’ totona, badina unai ese idia ia gimaia danu.—1 Korinto 15:58.
Daidia be Dirava Ena Orea Taudia?
12. Daidia be Dirava ena guba oreana taudia?
12 Dirava ena orea ese ia lalonai idia noho taudia ia gimaia diba dainai, daidia be unai orea lalonai? Guba oreana ita laloa neganai, ita daradara lasi unai henanadai ena haere be dahaka. Satani bona ena aneru be hari guba dekenai idia noho lasi. To, kamonai anerudia be unuseniai “hebou gabuna dekenai” idia do noho. Aposetolo Ioane ia itaia dina gabedia ai, “Mamoe ena Natuna,” kerubi (“mauri gaudia 4”), bona “aneru momo herea” be Dirava ena terona kahirakahira ai idia gini. Elda taudia 24—edia guba hairaina idia abia vadaeni horoa taudia idia laulaulaia—be idia ida idia noho danu. (Heberu 12:22, 23; Apokalupo 5:6, 11; 12:7-12) Ia hedinarai goevagoeva, idia ibounai be Dirava ena orea taudia. To, taunimanima huanai, gau ibounai idia hedinarai goevagoeva lasi.
13. Iesu ia gwau daidia be Dirava ena orea taudia bona daidia be unai orea taudia lasi?
13 Iesu ese sibodia do idia gwauraia iena hesiai taudia haida ia herevalaia, ia gwau: “Taunimanima momo do idia hereva lau dekenai, do idia gwau, ‘Lohiabada e, Lohiabada e, oiemu ladana dekenai guna ai haroro, ani? Oiemu ladana dekenai lauma dika ai lulua, bona oiemu ladana dekenai hoa kara momo ai karaia, ani?’ Vadaeni lau ese do lau haere idia dekenai, do lau gwau, ‘Umui be lau diba lasi momokani. Idau gabuna dekenai umui lao, umui dika karaia taudia.’ ” (Mataio 7:22, 23) Herevana ta be dahaka ia gwauraia bona edeseniai ia tomadiho, to bema ia be dika karaia tauna, ia be Iehova ena orea tauna ta lasi. Iesu ese ia hahedinaraia danu, edena bamona do oi diba daika be Dirava ena orea tauda. Ia gwau: “Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana, guba dekenai ia noho ena ura idia karaia taudia, idia sibona do idia vareai.”—Mataio 7:21.
14. Dirava ena ura ena kahana badadia haida, Iena orea taudia ese do idia badinaia karadia, be dahaka?
14 Unai dainai, bema ta be Dirava ena orea lalonai ia noho—ena anina bada kahana be “Guba Basileia”—namona be Dirava ena ura ia karaia noho. Iena ura be dahaka? Paulo ese mai anina bada kahana ta ia herevalaia, ia gwau: “Dirava ia ura taunimanima ibounai ese mauri do idia davaria, bona hereva momokani do idia diba.” (1 Timoteo 2:4) Bema ta be mai ena momokani ida Baibel amo diba maoromaorona ia tahua, ena mauri lalonai ia badinaia, bona “taunimanima ibounai” dekenai ia halasia totona ia hekwarahi, ia be Dirava ena ura ia karaia noho. (Mataio 28:19, 20; Roma 10:13-15) Iehova ena ura danu be iena mamoe be aniani bona heduru idia abia. (Ioane 21:15-17) Unai kahana dekenai Keristani heboudia be mai anina bada. Bema ta be mai ena dala unai hebou dekenai ia lao, to ia lao lasi, ia ese ena gabu Iehova ena orea lalonai ia laloa bada lasi.—Heberu 10:23-25.
Tanobada Tura Henia Karana
15. Iamesi ese iena negai idia noho kongregesen dekenai dahaka sisiba ia henia?
15 Lagani 30 bamona Iesu ia mase murinai, iena tadina Iamesi ese ta ena noho Dirava ena orea lalonai ia hadikaia diba gaudia haida ia gwauraia. Ia gwau: “Umui be headava kara ena taravatu umui makohia noho taudia bamona. Umui diba lasi, a, bema umui ura tanobada danu umui turana karaia neganai, inai be umui ese Dirava umui tuari henia noho?” (Iamesi 4:4) Dirava ia tuari henia tauna be iena orea tauna lasi. Vadaeni, tanobada tura henia karana be dahaka? Haida ese idia gwauraia daladia be idauidau, hegeregere haida ida hebamo dikana karaia matamaia eiava habadaia. Danu, Iamesi be gau ta ia herevalaia badabada—lalohadai kereredia unai, idia amo kara kereredia idia vara.
16 Iamesi 4:1-3 ia gwau: “Heatu bona heai be edena bamona umui emui huanai idia vara noho? Edia badina korikori be inai: Emui ura dikadia, be emui lalona dekenai idia tuari noho, ani? Gau idauidau umui ura dikadika, to umui abia diba lasi. Unai dainai taunimanima umui alaia gwauraia. Mai mama danu gau haida umui ura abia, to umui abia diba lasi. Unai dainai umui heatu bona heai noho. Emui ura gaudia umui abia lasi, badina be Dirava umui noia lasi dainai. O bema Dirava umui noia neganai, emui ura gauna umui davaria lasi, badina be mai laloa kerere danu umui noia. Emui laloa be unai gauna do umui abia, bona do umui gaukaralaia emui tauanina edia ura dikadia totona.” Unai hereva ia toredia murinai, Iamesi ese tanobada tura henia lasi karana ena sisiba ia henia.
17. Edena dala ai Keristani ginigunadia edia kongregesen lalonai idia “tuari” bona “heatu”?
17 Lagani handred momo Iamesi ia mase murinai, Keristani taudia koikoidia be sibodia idia tuari bona idia ala-ala heheni. To, Iamesi be aposetolo edia nega lalonai “Dirava ena Israela taudia,” edia helaro be guba dekenai king bona hahelaga taudia ai do idia lao taudia ia tore henidia. (Apokalupo 20:6) Idia be idia ala-ala heheni lasi eiava tuari korikorina lalonai ta ta idia hamasea lasi. Vadaeni dahaka dainai Iamesi be unai bamona kara Keristani taudia huanai idia vara ia herevalaia? Aposetolo Ioane ia gwau ena tadikaka ta ia inai henia tauna be ala-ala tauna. Bona Paulo ese kongregesen lalonai ta ta idia hepapahuahu karana ia gwauraia “heai” bona “heatu.” (Tito 3:9, NW; 2 Timoteo 2:14; 1 Ioane 3:15-17) Unai hegeregerena, Iamesi ia laloa gauna be ta ta edia Keristani tadikaka idia lalokau henia lasi. Unai Keristani taudia sibona huanai, tanobada taudia idia kara heheni hegeregerena idia karaia.
18. Dahaka ese Keristani taudia huanai lalokau lasi karadia bona hemamidia idia havaraia diba?
18 Dahaka dainai Keristani kongregesen lalonai unai bamona gaudia idia vara? Badina be lalohadai kereredia, hegeregere ma ta ena kohu idia ura henia dikadika bona “tauanina edia ura dikadia” idia ura moalelaia dainai. Hekokoroku, mama, bona ladana bada tahua karadia ese kongregesen lalonai hebamo karana mai lalokauna ia hadikaia diba. (Iamesi 3:6, 14) Unai bamona lalohadai ese ta be tanobada ena turana ai ia halaoa bona unai neganai, ia be Dirava ia inai henia tauna. Unai bamona lalohadai ia dogoatao noho tauna be Dirava ena orea lalonai do ia noho daudau lasi.
19 Bema lalohadai kereredia be iseda kudouna dekenai idia vareai matamaia, do ita gwau unai be daika ena kerere? Satani ena kerere, a? Dala ta ai, unai be maoro. Ia be inai tanobada ena “hodahoda” ena lohia, bona unai tanobada lalonai unai bamona lalohadai ia bada herea momokani. (Efeso 2:1, 2, NW; Tito 2:12) To, nega momo lalohadai kereredia be ita sibona eda goevadae lasi tauanina ai idia vara. Iamesi be tanobada tura henia lasi totona sisiba ia henia murinai, ia gwau: “Ena toana umui dekenai be revareva helagana ia hereva kava, a? Ia gwau: ‘Ita lalonai ia noho laumana ia ura dikadika noho mai ena hegahusi ida.’ ” (Iamesi 4:5, NW) Ita ibounai lalonai kerere karaia urana ia noho. (Genese 8:21; Roma 7:18-20) To, unai ura ita tuari henia diba, bema iseda manoka gaudia ita abia dae, bona ita hanaidia totona Iehova ena heduru dekenai ita tabekau. Iamesi ia gwau: “To Dirava ese iena hariharibada ia henia badabada noho [unai ese iseda lalona ena ura ena goada ia hanaia].” (Iamesi 4:6) Dirava ena lauma helaga bona abidadama Keristani tadikaka edia heduru dainai, bona Iesu ena davana karaia boubouna amo, abidadama Keristani taudia be edia tauanina ena manoka gaudia ese idia hamorudia lasi. (Roma 7:24, 25) Dirava ena orea ese idia ia gimaia, bona idia be Dirava ena turana, tanobada ena turana lasi.
20 Baibel ena gwauhamata be inai: “[Iehova] ese iena bese taudia dekenai goada ia henia noho, bona ia ese iena orea taudia, be maino dekena amo ia hanamodia noho.” (Salamo 29:11) Bema ita be hari inai negai Iehova ena “bese,” iena tanobada oreana, tauna momokanina, ia henia goadana do ita abia danu bona ena orea taudia ia hanamoa mainona do ita moalelaia. Momokani, Satani ena tanobada be bada herea bona Iehova ena orea tanobada dekenai be maragi, bona Satani ena goada ese iseda goada ia hereaia. To Iehova be Siahu Ibounai Diravana. Gau ta ese iena gaukara siahuna ia koua diba lasi. Iena aneru goadadia danu be ita ida iena hesiai gaukara ita karaia. Unai dainai, herevana ita idia inai henia, ita gini goada diba. Iesu bamona, tanobada ita halusia diba.—Ioane 16:33; 1 Ioane 4:4, NW.
Anina Oi Gwauraia Diba, A?
◻ Dirava ena tanobada oreana be dahaka?
◻ Edena dala haida ai Dirava ena orea ese ia lalonai idia noho taudia ia gimaia?
◻ Daidia be Dirava ena orea taudia?
◻ Edena dala ai tanobada ena turana ai ita lao dalana ita koua diba?
1. Iesu ena guriguri hegeregerena, Keristani taudia edia noho be edena dala ai ia auka?
16. Iamesi ese tanobada tura henia karana be Dirava tuari henia karana ia sisibalaia neganai, unai karoa ena siri ma haida be dahaka idia hahedinaraia?
19. (a) Bema Keristani tauna ta ia mamia lalohadai kererena be iena kudouna dekenai ia vara noho, unai be daika ena kerere? (b) Keristani tauna ese ena lalohadai kererena be edena bamona ia koua diba?
20. Dirava ena orea taudia ese dahaka hahenamo idia moalelaia noho?
[Box on page 9]
Dirava Ena Orea be Dahaka?
Iehova ena Witness taudia edia buka bona magasin lalonai inai hereva “Dirava ena orea” be dala toi dekenai idia gaukaralaia.
1 Iehova ena guba oreana, bona ia lalonai abidadama laumadia idia noho. Baibel lalonai ia gwauraia ‘Ierusalema guba dekenai.’—Galatia 4:26.
2 Iehova ena tanobada oreana. Hari inai negai, ia lalonai be horoa orena taudia bona hutuma bada herea taudia.
3 Iehova ena guba bona tanobada oreana. Hari inai negai, ia lalonai be Iehova ena guba oreana ibounai, bona ia horodia, iena natudia ai ia halaodia bona lauma maurina ena helaro idia abia taudia tanobada dekenai danu. Gabeai, goevadae taudia tanobada dekenai be ia lalonai do idia noho danu.
[Picture on page 10]
Lauma aniani hereadaena be Iehova ena orea amo ia halasia noho