Mauri Ena Dala Dekenai Idia Noho Saini

BEMA oi diba namonamo lasi dalana ta dekenai oi raka, do oi laloa idia noho saini be emu raka dalana idia koua gaudia, a? Lasi vaitani! Momokani idia be heduru gaudia bamona do oi laloa, oi idia durua oi lao gabuna ena dala maorona oi badinaia noho totona.

Mauri ena dala dekenai oi raka be edena bamona? Saini idia noho lasi neganai, unai dala dekenai oi raka namonamo diba, a? Idaunegai ia noho peroveta tauna ta ia gwau taunimanima be unai idia karaia diba lasi. Ia gwau: “Egu LOHIABADA E, lau diba, taunimanima ese edia mauri dalana idia abia hidi diba lasi; bona taunimanima ese edia mauri dalana idia biagua diba lasi.”​—⁠Ieremia 10:​23, The New English Bible.

Vadaeni, ita abia be namo hakaua herevadia be edeseniai ita davaria diba? Taunimanima ia Havaraia Tauna amo unai hakaua herevadia ita abia diba, bona laulau dalanai ita kikilaia saini be Baibel lalonai ita davaria diba. Iena Hereva amo, Iehova ia gwau: “Bema idiba kahanai o lauri kahanai do umui raka siri neganai, emui Hadibaia Tauna ena gadona do umui kamonai, do ia gwau, ‘Dala be inai, ia dekenai do umui raka lao.’ ”​—⁠Isaia 30:⁠21.

Oibe, Dirava ena hereva ese iseda mauri ena kahana ibounai lalonai ita badinaia diba hakaua herevadia ia henia. (Isaia 48:17; 2 Timoteo 3:​16, 17) To, madi, taunimanima momo herea be mauri ena dala dekenai idia raka neganai, Dirava ena hakaua herevadia idia badinaia lasi. (Mataio 7:13) To, unai saini be edia gabu dekenai idia gini noho! Mauri ena dala dekenai oi raka neganai, idia do oi badinaia, a?