Pris Taudia Iboudiai be Sibodia Edia Haroro Herevadia Idia Abidadama Henia, A?

HAHINE ta ena adavana be hari sibona ia mase. Pris tauna ia gwau ena adavana be tau namona momokani lasi dainai maoromaoro guba dekenai ia lao diba lasi, bona ia be tau dikana momokani lasi dainai hel ena lahi dekenai ia lao lasi. Unai dainai pris tauna ia gwau, hahine ena adavana be panisi do ia hisihisilaia ela bona ia hegeregere guba dekenai ia vareai totona. Hahine ese pris tauna dekenai moni ia henia, ia ura pris tauna ese ena adavana totona guriguri ia gwauraia bona pegatori amo ena adavana ia ruhaia haraga. Vabu ia laloa unai kara be maoro, ia laloa pris tauna ese unai lalohadai ia abidadama henia, ia sibona ese ia abidadama henia momokani hegeregerena.

Bema unai vabu ia davaria unai pris tauna ese mase murinai panisi abia lalohadaina ia abia dae momokani lasi, oi laloa do ia lalohisihisi, a? Taunimanima momo idia lalohisihisi, badina idia davaria pris taudia momo be sibodia edia haroro herevadia momo idia abidadama henia lasi. Niuspepa ladana National Catholic Reporter ese ia gwauraia “pris taudia edia sihari kava karadia ia hanaia hekwakwanai” ia herevalaia neganai, ia gwau: “Pris taudia huanai momo ese Dirava ia noho, eiava hahenamo bona panisi hahediba herevadia, eiava toreisi lou idia abidadama henia lasi . . . unai dainai pris taudia edia huanai abidadama lasi karana be ori mirona hegeregerena.”

Dubu idauidau dekenai unai hekwakwanai ia vara. Australia ena niuspepa ladana Canberra Times ia gwau, Church of England ena haroro taudia idia henanadai henia neganai, idia davaria idia momo ese “Keristani lalohadai gunadia, hegeregere Iesu be rami-hebou kekenina amo ia vara lalohadaina, Iesu ena hoa karadia, bona mesia ia giroa negana iharuana idia abidadama henia lasi.”

Tomadiho gaudia ia torea tauna George R. Plagenz ia henanadai, bema haroro tauna ia ura ena lalona ia namo, edena bamona ia abia dae lasi hahediba herevana ia gwauraia diba? Haroro tauna ta ia gwau ia ese unai hahediba herevana ena hereva “lau” ia haidaua. Ia gwau: “Unai hahediba herevana lau gwauraia neganai, lau gwau, ‘IDIA ese Siahu Ibounai Tamana, Dirava, . . . IDIA abidadama henia.’ ” Plagenz ia gwau unai bamona koikoi karana be “koikoi karana badana inai tano dekenai.”

Madi, pris taudia edia abidadama lasi karana dainai bona unai bamona idia koikoi dainai, taunimanima momo ese tomadiho idia ura henia lasi. To hari inai negai, taunimanima ese tomadiho idia lalohisihisilaia ena badina be unai sibona lasi. Dubu momo dekenai taunimanima idia hadibaia Baibel be Dirava ena Hereva. Bema idia davaria nega daudau idia abia dae hahediba herevadia be Baibel ena hahediba herevadia lasi, do idia hoa, a? Hereva gabena ese haheitalai ta do ia herevalaia.